5. ອ່າງນ້ຳຫີນບ້ານຫ້ວຍອຸ່ນ ເມືອງໄຊ. (ອຸດົມໃຊ)

ວັນສຸກ, 25 ກ.ລ 2014 12:00

ອ່າງນ້ຳຫີນ ຕັ້ງຢູ່ບ້ານຫ້ວຍອຸ່ນ ເມືອງໄຊ ແຂວງອຸດົມໄຊ ຫ່າງຈາກເທດສະບານເມືອງໄຊ ປະມານ 8 ກິໂລແມັດ, ອ່າງນີ້ປະກອບ ມີຫຼາຍຫ້ວຍ ທີ່ໄຫຼມາໂຮມເຂົ້າກັນ. ສະພາບເສັ້ນທາງເຂົ້າເຖິງ ເປັນທາງດິນແດງ ປະຈຸບັນ ທາງແຂວງພວມ ກຳລັງພັດທະນາ ແລະ ປັບປຸງເປັນເສັ້ນທາງປູຢາງ ຄາດວ່າຈະສຳເລັດ ໃນປີ 2013 ນີ້. ທ່າແຮງຂອງອ່າງນ້ຳຫີນ ແມ່ນສາມາດ ພັດທະນາການທ່ອງທ່ຽວ ຊົມທຳມະຊາດ, ຕຶກປາ, ອາບນ້ຳ, ຕັ້ງຣີສອດ ແລະ ຮ້ານອາຫານ, ສວນສາທາລະນະ ບໍລິເວນອ່າງ, ສວນສະໜຸກ, ສວນຈຳລອງຊົນເຜົ່າ ຂອງແຂວງ ແລະ ບ່ອນຕາກອາກາດ ສຳລັບນັກທ່ອງທ່ຽວ ທີ່ມັກຄວາມສະຫງົບ ແລະ ອາກາດສົດຊື່ນ. ອ່າງນໍ້າຫີນ ໄດ້ສ້າງຂຶ້ນໃນປີ ຄສ 2007. ແຂວງໄດ້ໃຊ້ງົບປະມານ ຈຳນວນມະຫາສານ ເພື່ອສ້າງເຂື່ອນ ຊົນລະປະທານ ຂະໜາດໃຫຍ່ ເພື່ອສົ່ງເສີມໃນການຜະລິດ ທາງດ້ານກະສິກຳ ໃນຂົງເຂດດັ່ງກ່າວ ເຊິ່ງເປັນເຂດ ທີ່ອຸດົມສົມບູນ ເໝາະສົມໃນການຜະລິດ. ປະຈຸບັນໄດ້ກາຍ ເປັນອ່າງເກັບນ້ຳທີ່ໃຫຍ່ທີ່ສຸດ ຂອງແຂວງ ເຊິ່ງແຂວງໄດ້ ມີແຜນຈະພັດທະນາອ່າງດັ່ງກ່າວ ໃຫ້ເປັນສະຖານທີ່ບໍລິການ, ສະຖານທີ່ທ່ອງທ່ຽວ ແລະ ສະຖານທີ່ຊ່ວງເຮືອບຸນ ປະເພນີປະຈຳປີ ຂອງແຂວງ ເພີ່ມຈາກທາງດ້ານກະສິກຳ ການປູກຝັງ ແລະ ການລ້ຽງສັດ. ເນື້ອທີ່ອ່າງ​ທັງໝົດມີ ປະມານ 121,7 ກິໂລຕາແມັດ, ໄດ້ກວມເອົາ 7 ບ້ານ ແລະ ເຂດດັ່ງກ່າວນີ້ເໝາະສົມໃນການ  ພັດທະນາການທ່ອງທ່ຽວຂີ່ເຮືອ, ຕຶກປາ ແລະ ສຳຜັດບັນຍາກາດ ທີ່ສວຍງາມ.

ແຫຼ່ງ: ອົງການພັດທະນາການທ່ອງທ່ຽວ