14. ປ່າຊາພັນປີ ບ້ານມົກແຄະ ເມືອງປາກແບງ. (ອຸດົມໄຊ)

ວັນສຸກ, 25 ກ.ລ 2014 10:00

​ 

ປ່າຊາພັນປີ ຕັ້ງຢູ່ບໍລິເວນ ບ້ານມົກແຄະ, ເມືອງປາກແບງ, ຕັ້ງຢູ່ຫ່າງຈາກເທດສະບານ ເມືອງປາກແບງ ໄປທາງທິດຕາເວັນຕົກ ປະມານ 35 ກິໂລແມັດ. ສະພາບເສັ້ນທາງເຂົ້າເຖິງ ເປັນທາງດິນແດງ ປະມານ 25 ກິໂລແມັດ. ທ່າແຮງຂອງປ່າຊາ ແມ່ນສາມາດ ຜະລິດເປັນສິນຄ້າ ດ້ວຍການແປຮູບຕ່າງໆ ມາວາງສະແດງ ຢູ່ຕາມໂຮງແຮມ, ເຮືອນພັກ ແລະ ຮ້ານອາຫານ. ຢູ່ຕົວເມືອງປາກແບງ ທີ່ເປັນຈຸດແວ່ພັກເຊົາ ຂອງນັກທ່ອງທ່ຽວ ທີ່ເດີນທາງ ມາຕາມລຳແມ່ນ້ຳຂອງ ຈາກເມືອງຫ້ວຍຊາຍ ແຂວງບໍ່ແກ້ວ, ແຂວງຫຼວງພະບາງ, ແຂວງໄຊຍະບູລີ ແລະ ຈັງຫວັດນ່ານ ປະເທດໄທ. ນອກນີ້ ຍັງສາມາດສ້າງ ເປັນກິດຈະກຳ ທ່ອງທ່ຽວຊິມຊາ ແລະ ຜະລິດຊາ ທີ່ຕິດພັນກັບ ບ້ານຊົນເຜົ່າ ໃນຂົງເຂດດັ່ງກ່າວ ແລະ ສາມາດສ້າງ ເປັນລາຍການ ທ່ອງທ່ຽວເຊື່ອມຕໍ່ ກັບແຂວງບໍ່ແກ້ວ ໄດ້ອີກດ້ວຍ. ປ່າຊາ ໃນຂົງເຂດນີ້ ມີເນື້ອທີ່ ປະມານ 500 ເຮັກຕາ ເຊິ່ງຕັ້ງຢູ່ຕາມ ສາຍພູ-ເຈີ້ຍພູ ເຂດບ້ານມົກແວນ, ບ້ານລວງ, ບ້ານພູສູງ ແລະ ບ້ານມົກແຄະ. ໃນໄລຍະການເດີນທາງ ຈະໄດ້ສຳຜັດກັບ ບັນຍາກາດ ທີ່ເຕັມໄປດ້ວຍ ທັດສະນີຍະພາບ ທີ່ສວຍງາມ ໜ້າປະທັບໃຈ ແລະ ສາມາດ ຊົມແສງພະອາທິດຂຶ້ນ ແລະ ຕົກ ໃນຍາມໃກ້ຕົກດິນ, ຊົມທະເລໝອກ ໃນຍາມເຊົ້າ ເມື່ອຍາມລະດູໜາວ ແລະ ໄດ້ສຳພັດກັບ ການດຳລົງຊີວິດ ຂອງຊາວບ້ານ ໃນຂົງເຂດດັ່ງກ່າວ.

ປ່າຊາພັນປີ ຫຼື ຊື່ເດີມວ່າ “ປ່າໝ້ຽງ” ທີ່ປະຊາຊົນເຄີຍຮ້ອງ. ປະຊາຊົນສ່ວຍຫລາຍ ແມ່ນພາກັນເອົາໃບ ຂອງມັນມາພັນໝ້ຽງອົມ, ມີລົດຊາດ ຫອມສົ້ມແບບທຳມະຊາດ ແລະ ຍັງເອົາມາແລກປ່ຽນ ເປັນສິນຄ້າ. ນອກຈາກນັ້ນເຂົາເຈົ້າ ຍັງສາມາດ ເອົາໃບມາພັນຢາສູບ ແລ້ວເອົາຂີ້ຢາປົວພະຍາດ ແຂ້ວແມງໄດ້ອີກ ເຊິ່ງເປັນຢາຊະນິດໜຶ່ງ ທີ່ສາມາດ ປົວແຂ້ວແມງໄດ້. ໃນປີ 1996 ນັກທ່ອງທ່ຽວ ຊາວຝຣັ່ງ ໄດ້ຄົ້ນພົບ ແລ້ວເອົາໃບມາທົດລອງ ໃສ່ນ້ຳດຶ່ມ ເຫັນວ່າ ເປັນຊາທີ່ມີ ລົດຊາດຫອມ ແບບທຳມະຊາດ ເຊິ່ງມີອາຍຸ ປະມານ ພັນປີ. ຫຼັງຈາກນັ້ນ, ປະຊາຊົນ ຈິ່ງພາກັນເອີ້ນຊື່ວ່າ “ປ່າຊາພັນປີ” ຈົນເຖິງປະຈຸ ບັນນີ້.


ແຫຼ່ງ: ອົງການພັດທະນາການທ່ອງທ່ຽວ