15. ຖ້ຳມົກແຝກ ບ້ານນາຖົ່ວ ເມືອງນາໝໍ້. (ອຸດົມໄຊ)

ວັນສຸກ, 25 ກ.ລ 2014 10:00

ຖ້ຳມົກແຝກ ຕັ້ງຢູ່ ບ້ານນາຖົ່ວ, ເມືອງນາໝໍ້, ຫ່າງຈາກເທດສະບານ ເມືອງນາໝໍ້ ປະມານ 16 ກິໂລແມັດ. ເປັນເສັ້ນທາງດິນແດງ, ທ່າແຮງຂອງຖ້ຳນີ້ ເປັນຖ້ຳແຫ່ງໜຶ່ງ ທີ່ມີຄວາມກວ້າງໃຫຍ່, ຍາວ ແລະ ມີຄວາມສວຍງາມ ອີກແຫ່ງໜຶ່ງຂອງ ເມືອງນາໝໍ້ກໍຄື ແຂວງອຸດົມໄຊ. ຖໍ້ານີ້ ໄດ້ຜ່ານການສຳຫຼວດ ຂອງທີມງານ ນັກວິທະຍາສາດ ຈາກສະຫະພາບເອີຣົບ ໃນປີ 2010 ເໝາະສົມໃນການ ພັດທະນາ ທີ່ຈະເປັນສະຖານທີ່ ທ່ອງທ່ຽວແບບ ປະຈົນໄພ ໃນການຊົມຖ້ຳ ທີ່ຕິດພັນກັບ ບ້ານເຜົ່າກຶມມຸ ບ້ານນາຖົ່ວ ເຊິ່ງຕັ້ງບ້ານຢູ່ໃກ້ຖ້ຳ ປະມານ 1 ກິໂລແມັດ. ຈາກທາງເລກ 13 ເໜືອເຂົ້າໄປ ເຂົ້າເຖິງບ້ານ ປະມານ 8 ກິໂລແມັດ ເປັນເສັ້ນທາງຍົກລະດັບ. ນອກຈາກນີ້ ຍັງສາມາດ ສ້າງເປັນກິດຈະກຳ ການທ່ອງທ່ຽວ ເຊື່ອມຕໍ່ແຂວງຫຼວງນ້ຳທາ ນຳອີກດ້ວຍ. ຖ້ຳມົກແຝກ ເປັນຖ້ຳທຳມະຊາດ ມີປະຫວັດຄວາມເປັນມາ ຕິດພັນກັບການຕໍ່ສູ້ ປົດປ່ອຍຊາດ ໃນເມື່ອກ່ອນ. ຕັ້ງຢູ່ຂອບເຂດ ຄວາມຮັບຜິດຊອບ ຂອງບ້ານນາຖົ່ວ ຄົ້ນພົບຖ້ຳມົກແຝກນີ້ ໂດຍຊາວບ້ານໆນາຖົ່ວ 2 ຄົນ ຊື່ວ່າ ທ້າວລານ ແລະ ທ້າວແພງ ໄດ້ພາກັນໄປລ່າເນື້ອ ຕາມທຳມະດາ ຂອງຄົນຊົນນະບົດ ໃນສະໄໝກ່ອນ. ເຂດດັ່ງກ່າວ ເປັນປ່າດົງດິບດົກໜາ, ມີສັດສາວາສິ່ງອາໄສຢູ່ ຢ່າງຫຼວງຫຼາຍ. ບັງເອີນທັງສອງຄົນ ໄດ້ພົບຄ່າງໃຫຍ່ໂຕໜຶ່ງ ທ້າວລານກໍເລີຍຍິງ ຄ່າງໂຕນັ້ນ ແຕ່ຍັງບໍ່ຕາຍ ທັງສອງກໍໄດ້ ຕິດຕາມຮອຍເລືອດ ໂຕຄ່າງນັ້ນ ຈິ່ງໄດ້ໄປພົບຖ້ຳ ທີ່ສວຍງາມ ແລະ ເຢືອກເຢັນເປັນຕາຢ້ານ ແລະ ຍັງມີສັດຫຼາຍຊະນິດອາໄສຢູ່ ໃນຖ້ຳດັ່ງກ່າວ. ທັງສອງຄົນ ບໍ່ກ້າເຂົ້າໄປໃນຖ້ຳ ຈຶ່ງກັບຄືນບ້ານ ແລ້ວເລົ່າສູ່ຜູ້ເຖົ້າຜູ້ແກ່ຟັງ ຈາກນັ້ນເຖົ້າແກ່ໄດ້ ແຕ່ງຕັ້ງຊາວບ້ານ ໄປສຳຫຼວດເບິ່ງ ເຫັນວ່າຖ້ຳດັ່ງກ່າວ ມີຄວາມຈິງຕາມການບອກເລົ່າ ຈຶ່ງພາກັນເຂົ້າໄປເບິ່ງ ໃນຖ້ຳມີຖໍ້ານ້ອຍໃຫຍ່ ສະຫຼັບຊັບຊ້ອນກັນ. ແຕ່ລະຖ້ຳ ລ້ວນແຕ່ມີຄວາມສວຍງາມ ທີ່ແຕກຕ່າງກັນ, ອ້ອມຮອບດ້ວຍ ທຳມະຊາດ ແລະ ຜາຫີນປູນ, ລວມທັງໝົດ 7 ຖ້ຳ, ຖ້ຳທີ່ໃຫຍ່ກວ່າໝູ່ໜຶ່ງຖ້ຳ, ສ່ວນ 6 ຖ້ຳ ຂະໜາດກາງ ແລະ ນ້ອຍ. ຢູ່ບໍລິເວນຖ້ຳ ມີຕົ້ນແປກໃຫຍ່ໜຶ່ງຕົ້ນ ຊາວບ້ານຈຶ່ງໃສ່ຊື່ວ່າ “ຖ້ຳມົກແປກ” ຫຼື ມົກແຝກ ຕາມພາສາທ້ອງຖິ່ນ ພາກັນຮຽກເອີ້ນ. ຕໍ່ມາອົງການຈັດຕັ້ງບ້ານ ໄດ້ໄປສຳຫຼວດກວດກາ ຖ້ຳເຫຼົ່ານັ້ນ ເຫັນວ່າມີຄວາມສະຫງົບ ແລະ ສະດວກ ໃນການລີ້ຊ່ອນສັດຕູ ຈຶ່ງແຕ່ງຕັ້ງຊາວບ້ານ ໄປລາຍງານ ໃຫ້ຕາແສງ ແລະ ເມືອງຮັບຮູ້, ຕໍ່ມາພະນັກງານຂັ້ນເມືອງ ໄດ້ລົງກວດກາ ແລະ ກຳນົດເອົາສະຖານທີ່ດັ່ງກ່າວ ເປັນບ່ອນເກັບມ້ຽນ ສະບຽງອາຫານ, ອຸປະກອນຮັບໃຊ້ຕ່າງໆ. ສະໄໝສົງຄາມ ປີ ຄສ 1962 - 1964 ຜູ້ນຳຈຳນວນໜຶ່ງ ໄດ້ເຂົ້າອາໄສລີ້ຊ່ອນ, ເກັບມ້ຽນສະບຽງອາຫານ, ຂາຍ ເຄື່ອງ, ເຄື່ອງນຸ່ງຫົ່ມ ແລະ ອາວຸດ.


ແຫຼ່ງ: ອົງການພັດທະນາການທ່ອງທ່ຽວ