ບົດຖະແຫຼງຂ່າວ ຜົນຂອງກອງປະຊຸມລັດຖະບານສະໄໝສາມັນ ປະຈຳເດືອນ ທັນວາ 2013

ຜູ້ຂຽນ: ນັກຂ່າວ ໜັງສືພິມຂ່າວສານປະເທດລາວ

ວັນພຸດ, 15 ມ.ກ 2014 08:00


        ກອງປະຊຸມລັດຖະບານປະຈໍາເດືອນ ທັນວາ 2013 ໄດ້ຈັດຂຶ້ນໃນລະຫວ່າງວັນທີ 13-14 ມັງກອນ 2014 ໂດຍການເປັນປະທານຂອງທ່ານ ທອງສິງ ທໍາມະວົງ, ນາຍົກລັດຖະມົນຕີ ເຊິ່ງມີ ບັນດາຮອງນາຍົກລັດຖະມົນຕີ ແລະ ບັນດາສະມາຊິກລັດຖະບານ ເຂົ້າຮ່ວມ. ກອງປະຊຸມໄດ້ຄົ້ນຄວ້າ, ປຶກສາຫາລື ແລະ ເຫັນດີດ້ານຫຼັກການ ຮັບຮອງບາງບັນຫາສໍາຄັນຈຳນວນໜຶ່ງ ດັ່ງນີ້:
       1. ກອງປະຊຸມໄດ້ຜ່ານບົດລາຍງານ ກ່ຽວກັບການກະກຽມກອງປະຊຸມວຽກງານຍຸຕິທໍາລາວ-ຫວຽດນາມ 10 ແຂວງ ທີ່ມີຊາຍແດນຕິດຈອດກັນ. ບັນຫາທີ່ນໍາມາປຶກສາຫາລື ແລະ  ແກ້ໄຂຮ່ວມ ກັນ ໃນກອງປະຊຸມຄັ້ງນີ້ ແມ່ນເປັນຄັ້ງທີ 2 ເຊິ່ງເນື້ອໃນລວມມີ:   ການເຜີຍແຜ່ ແລະ ເຊື່ອມຊຶມ ຂໍ້ຕົກລົງ ລະຫວ່າງ ລັດຖະບານ ສປປ ລາວ ແລະ ສສ ຫວຽດນາມ ວ່າດ້ວຍການແກ້ໄຂບັນຫາຜູ້ຍົກຍ້າຍ ຕັ້ງພູມລໍາເນົາຕາມລໍາພັງ, ການສ້າງຄອບຄົວບໍ່ຖືກລະບຽບ ຢູ່ຕາມບໍລິເວນຊາຍແດນຂອງສອງປະເທດ; ການຕີລາຄາ  ແລະ  ທົບທວນການຈັດຕັ້ງປະຕິບັດສົນທິສັນຍາ ວ່າດ້ວຍການຮ່ວມມືທາງ ດ້ານຍຸຕິທໍາ ກ່ຽວກັບບັນຫາທາງແພ່ງ ແລະ ອາຍາ ລະຫວ່າງ ສອງປະເທດ ທີ່ໄດ້ລົງນາມຮ່ວມກັນ ໃນວັນທີ 6 ກໍລະກົດ 1998; ທັງໝົດນີ້, ກໍ່ເພື່ອພ້ອມກັນຄົ້ນຄວ້າທິດທາງ ແລະ ວິທີການ ໃນການ ຮ່ວມມືກັນໃນຂົງເຂດ ວຽກງານຍຸດຕິທໍາ ໃຫ້ມີປະສິດທິຜົນດີຂຶ້ນ ເຮັດໃຫ້ເຂດຊາຍແດນ ລາວ-ຫວຽດນາມ ມີການພົວພັນຮ່ວມມື ທີ່ເຂົ້າສູ່ລະບຽບ-ກົດໝາຍທັງສອງປະເທດ.
        2. ກອງປະຊຸມໄດ້ຜ່ານບົດລາຍງານ ກ່ຽວກັບການຈັດຕັ້ງປະຕິບັດການຮ່ວມມືດ້ານເສດຖະກິດ-ເຕັກນິກ ລາວ-ຈີນ ໄລຍະ 01 ປີຜ່ານມາ, ໂດຍລວມແລ້ວເຫັນວ່າ ການພົວພັນ ລະຫວ່າງ ລາວ-ຈີນ ໄດ້ສືບຕໍ່ຂະຫຍາຍຕົວໃນທຸກດ້ານ ບໍ່ວ່າຈະເປັນ ດ້ານການເມືອງ, ດ້ານເສດຖະກິດການຄ້າ-ການລົງທຶນ, ດ້ານວັດທະນະທໍາ-ສັງຄົມ ແລະ ອື່ນໆ. ແຕ່ໄປພ້ອມກັນນັ້ນ,  ທັງສອງຝ່າຍ ຍັງຈະໄດ້ສືບຕໍ່ຮ່ວມກັນ ເພື່ອປັບປຸງແກ້ໄຂບັນຫາທີ່ຍັງຄົງຄ້າງຈໍານວນໜຶ່ງ ກ່ຽວກັບການເຂົ້າ-ອອກ ຂອງພົນລະເມືອງ, ການຂົນສົ່ງສິນຄ້າກະສິກໍາ, ການຈັດລຽງບູລິມະສິດໂຄງການຕ່າງໆ ເພື່ອເຮັດໃຫ້ການພົວພັນຮ່ວມມື ລາວ-ຈີນ ເປັນໄປຕາມທິດນຳທີ່ວ່າ: “ເພື່ອນບ້ານທີ່ເປັນມິດ, ໝັ້ນຄົງຍາວນານ, ໄວ້ເນື້ອເຊື່ອໃຈ ແລະ ຮ່ວມມືຮອບດ້ານ” ແລະ ຈິດໃຈ “4 ດີ” ຄື:   ເພື່ອນບ້ານທີ່ດີ, ໝູ່ເພື່ອນທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ.
     3. ຜ່ານບົດລາຍງານ ກ່ຽວກັບການຄຸ້ມຄອງການນໍາໃຊ້ລະບົບເຄືອຂ່າຍສື່ສານເອເລັກໂຕຣນິກ (ສື່ສານສັງຄົມອອນລາຍ)  ໂດຍນຳໃຊ້ເຕັກໂນໂລຊີຂອງເວັບໄຊ ແລະ ເຕັກໂນໂລຊີມືຖື ໃນການສ້າງ- ເຜີຍແຜ່, ແລກປ່ຽນ ແລະ ເຂົ້າເຖິງຂໍ້ມູນຂ່າວສານຕ່າງໆ ໄດ້ຢ່າງວ່ອງໄວ.   ດ້ວຍຄຸນລັກສະນະ ແລະ ຄວາມສາມາດຂອງລະບົບດັ່ງກ່າວ ຈຶ່ງເຮັດໃຫ້ມີການນຳໃຊ້ຫຼາຍ, ຈຳນວນກໍ່ເພີ່ມຂຶ້ນຢ່າງໄວວາ, ຊຶ່ງຈຳ ນວນຜູ້ໃຊ້ນັ້ນ ມີທັງຜູ້ທີ່ມີເຈຕະນາດີ ແລະ ເຈຕະນາບໍ່ດີ ຈຶ່ງເກີດມີທັງດ້ານດີ ແລະ ດ້ານຫຍໍ້ທໍ້ ໃນສັງຄົມລາວປະຈຸບັນ. ສະນັ້ນ, ໃນສະເພາະໜ້ານີ້ ໃຫ້ກະຊວງກ່ຽວຂ້ອງ ກວດກາຄືນບັນດານິຕິກໍາຕ່າງໆ ທີ່ພົວພັນກັບບັນຫານີ້ ແລະ  ເຂັ້ມງວດໃນການກວດກາ  ແລະ ຕອບຕ້ານດ້ວຍວິທີການຕ່າງໆໃຫ້ທັນການ.  ພ້ອມດຽວກັນນັ້ນ, ກໍ່ໃຫ້ເອົາໃຈໃສ່ໂຄສະນາເຜີຍແຜ່, ສ້າງຈິດສຳນຶກ ແລະ ໃຫ້ ການສຶກສາແກ່ສັງຄົມ ໂດຍສະເພາະ ນັກຮຽນ ແລະ ຊາວໜຸ່ມ ກ່ຽວກັບຜົນດີ ແລະ ຜົນກະທົບດ້ານລົບ ຂອງການນຳໃຊ້ສື່ສານດັ່ງກ່າວ ໂດຍເລີ່ມຈາກຄອບຄົວ ແລະ ໂຮງຮຽນ ເປັນຕົ້ນ.
    4. ກອງປະຊຸມເຫັນດີດ້ານຫຼັກການ ຮັບຮອງຮ່າງຍຸດທະສາດການພັດທະນາກາເຟລາວ ຮອດປີ 2025, ຮ່າງຍຸດທະສາດດັ່ງກ່າວ ແມ່ນເລັ່ງໃສ່ 04 ເປົ້າໝາຍ  ແລະ 06 ມາດຕະການ ຄື:  ການພັດ ທະນາການຜະລິດ, ການປັບປຸງຄຸນນະພາບ ແລະ ຕະຫຼາດ, ການສົ່ງເສີມໂຄສະນາ, ການນໍາໃຊ້ທີ່ດິນ,   ການປັບປຸງສິ່ງແວດລ້ອມທຸລະກິດ,  ການສ້າງຄວາມເຂັ້ມແຂງດ້ານຄວາມສາມາດ  ໃນການຄຸ້ມ ຄອງຂອງສະຖາບັນ ແລະ ອົງການຈັດຕັ້ງຄຸ້ມຄອງການຜະລິດກາເຟ.  ທັງໝົດນີ້, ເພື່ອເຮັດແນວໃດ ໃຫ້ກາເຟລາວສາມາດຫັນໄປສູ່ຄຸນນະພາບ ແລະ ເປັນມິດຕໍ່ສິ່ງແວດລ້ອມ,   ສ້າງແຫຼ່ງລາຍຮັບທີ່ດີ ແລະ ໝັ້ນຄົງ ໃຫ້ແກ່ຜູ້ຜະລິດທຸກຂັ້ນ ລວມທັງ ສ້າງເງື່ອນໄຂເອື້ອອໍານວຍຄວາມສະດວກໃຫ້ພາກເອກະຊົນຜູ້ທີ່ມີສ່ວນຮ່ວມ ທັງເປັນການປະກອບສ່ວນທີ່ສໍາຄັນ ເຮັດໃຫ້ການພັດທະນາເສດຖະກິດ- ສັງຄົມແຫ່ງຊາດ ຂະຫຍາຍຕົວ ຢ່າງບໍ່ຢຸດຢັ້ງ.
        5. ກອງປະຊຸມໄດ້ຜ່ານຮ່າງດໍາລັດ ວ່າດ້ວຍໂຮງໝໍເອກະຊົນສະບັບປັບປຸງ.  ສະມາຊິກລັດຖະບານໄດ້ປະກອບຄໍາເຫັນດ້ວຍຄວາມຮັບຜິດຊອບສູງ ແລະ ເຫັນດີໃຫ້ຂະແໜງການທີ່ກ່ຽວຂ້ອງ ນໍາ ໄປປັບປຸງບາງເນື້ອໃນທີ່ສໍາຄັນ ເປັນຕົ້ນ ລັດສົ່ງເສີມໃຫ້ມີໂຮງໝໍເອກະຊົນ ແຕ່ຕ້ອງເປັນໂຮງໝໍທີ່ມີເຄື່ອງມືທັນສະໄໝ, ມີຄຸນນະພາບທີ່ດີ,   ມີການບໍລິການທີ່ດີ ບົນຈິດໃຈຮັບໃຊ້ສັງຄົມທາງດ້ານສຸຂະພາບ. ຊຶ່ງດຳລັດດັ່ງກ່າວ ຕ້ອງໄດ້ກໍານົດແຈ້ງ ກ່ຽວກັບນະໂຍບາຍດ້ານຕ່າງໆຢ່າງເໝາະສົມ ເພື່ອສາມາດດຶງດູດການລົງທຶນໃນດ້ານນີ້ ໃນປະຈຸບັນ ແລະ ອະນາຄົດ.
        6. ສໍາລັບຮ່າງນະໂຍບາຍ ວ່າດ້ວຍການເຝົ້າລະວັງ ແລະ  ຄວບຄຸມພະຍາດຕິດຕໍ່. ດ້ານຫຼັກການກອງປະຊຸມເຫັນດີຮັບຮອງ ເພາະວ່າ ຮ່າງນະໂຍບາຍດັ່ງກ່າວນີ້ ແມ່ນມີຄວາມສໍາຄັນເພື່ອສະກັດ ກັ້ນ ແລະ ຄວບຄຸມແຕ່ຫົວທີ  ບໍ່ໃຫ້ພະຍາດແຜ່ລະບາດ ແລະ ຂະຫຍາຍວົງກວ້າງ, ຈໍາກັດໄດ້ການເຈັບ ແລະ ຕາຍ ຂອງປະຊາຊົນບັນດາເຜົ່າ  ທັງເປັນການສົ່ງເສີມໃຫ້ປະຊາຊົນມີສ່ວນຮ່ວມ  ໃນການ ເຝົ້າລະວັງ ແລະ ຕ້ານການລະບາດຂອງພະຍາດ,  ສົ່ງເສີມຄວາມເປັນເຈົ້າການ ຂອງຂະແໜງສາທາລະນະສຸກ ໃນການຮ່ວມມື ແລະ ປະສານງານກັບບັນດາ
ປະເທດໃກ້ຄຽງ,  ບັນດາອົງການຈັດຕັ້ງໃນ ພາກພື້ນ ແລະ ສາກົນ.
          7. ກອງປະຊຸມເຫັນດີ ຕໍ່ການປັບປຸງບາງມາດຕາຂອງດໍາລັດ ວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວສາສະໜາຢູ່ ສປປ ລາວ; ຊຶ່ງດໍາລັດສະບັບເກົ່າ ປະກາດໃຊ້ໄດ້ 10 ກວ່າປີແລ້ວ,  ມີບາງມາດຕາບໍ່ສອດຄ່ອງກັບລະດັບການເຕີບໃຫຍ່ຂະຫຍາຍຕົວ ທາງດ້ານເສດຖະກິດ-ສັງຄົມ ໃນປະຈຸບັນ.   ສະນັ້ນ, ເພື່ອໃຫ້ດໍາລັດດັ່ງກ່າວ ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບ ຕົວຈິງ ແລະ  ກໍ່ເພື່ອເຮັດໃຫ້ການຄຸ້ມຄອງການເຄື່ອນໄຫວສາສະໜາ  ມີຄວາມເປັນເອກະພາບໃນຂອບເຂດທົ່ວປະເທດ, ຮັບປະກັນສິດໃນການເຊື່ອຖື  ຫຼື ບໍ່ເຊື່ອຖືສາສະໜາ ຂອງພົນລະ ເມືອງລາວ ທີ່ໄດ້ກໍານົດໄວ້ໃນລັດຖະທໍາມະນູນ ແຫ່ງ ສປປ ລາວ.

        ບັນດາບົດລາຍງານ, ດໍາລັດ ແລະ ຮ່າງຍຸດທະສາດ ທີ່ນຳມາພິຈາລະນາ ແລະ ຮັບຮອງໃນກອງປະຊຸມຄັ້ງນີ້, ທ່ານນາຍົກລັດຖະມົນຕີ ໄດ້ຊີ້ນໍາໃຫ້ບັນດາກະຊວງ ແລະ   ພາກສ່ວນທີ່ກ່ຽວຂ້ອງ ສືບຕໍ່ນໍາເອົາໄປປັບປຸງໃຫ້ລະອຽດ  ແລະ  ຈະແຈ້ງ  ຕາມຄວາມເຫັນສ່ວນໃຫຍ່ຂອງສະມາຊິກລັດຖະບານ.   ໃນຕອນທ້າຍຂອງກອງປະຊຸມ  ທ່ານນາຍົກລັດຖະມົນຕີ ຍັງໄດ້ຊີ້ນໍາໃຫ້ສະມາຊິກລັດຖະ ບານ ນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປຈັດຕັ້ງປະຕິບັດຢ່າງເອົາຈິງເອົາຈັງ, ມີຄວາມຮັບຜິດຊອບສູງ ເອົາໃຈໃສ່ຈັດຕັ້ງປະຕິບັດວຽກງານຈຸດສຸມ ໃນເດືອນມັງກອນ 2014 ເປັນຕົ້ນ:

    1). ໃຫ້ຮີບຮ້ອນຈັດຕັ້ງຜັນຂະຫຍາຍ ເນື້ອໃນຂອງກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VII ເຂົ້າໃນວຽກງານຕົວຈິງ ຢູ່ໃນຂະແໜງການຂອງຕົນ  ໃຫ້ໄດ້ຮັບໝາກຮັບ ຜົນກວ່າເກົ່າ.

     2). ໃຫ້ເອົາໃຈໃສ່ ຈັດຕັ້ງຜັນຂະຫຍາຍເນື້ອໃນກອງປະຊຸມ ສ້າງຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບວຽກງານ 3 ສ້າງ.

    3). ໃຫ້ສືບຕໍ່ຄົ້ນຄວ້າວຽກງານ ທີ່ກ່ຽວຂ້ອງກັບນະໂຍບາຍ ເປັນຕົ້ນ ແມ່ນການປັບປຸງຄຳສັ່ງ ວ່າດ້ວຍການປະຢັດ, ດຳລັດ 221/ນຍ ກ່ຽວກັບເງິນເດືອນ ແລະ ດຳລັດ 81/ນຍ ກ່ຽວກັບລາຍຮັບວິຊາການອື່ນໆ ໂດຍມອບໃຫ້ບັນດາສະຫາຍ ລັດຖະມົນຕີກະຊວງກ່ຽວຂ້ອງເປັນເຈົ້າການ. ພ້ອມກັນນີ້, ກໍ່ໃຫ້ສືບຕໍ່ການເບີກຈ່າຍເງິນເດືອນ ຂອງພະນັກງານ, ທະຫານ, ຕຳຫຼວດ ໃຫ້ເຂົ້າສູ່ສະພາບປົກກະຕິໂດຍໄວ.

     4). ໃຫ້ເອົາໃຈໃສ່ຈັດຕັ້ງປະຕິບັດ ສະເຫຼີມສະຫຼອງວັນຄົບຮອບ 65 ປີ ຂອງການສ້າງຕັ້ງກອງທັບປະຊາຊົນລາວ ໃຫ້ມີບັນຍາກາດດີ,   ມີຄວາມເບີກບານມ່ວນຊື່ນ  ແລະ ມີເນື້ອໃນຄວາມໝາຍ, ໃຫ້ຖືເອົາໂອກາດນີ້ ເປັນການໂຄສະນາປຸກລະດົມທົ່ວປວງຊົນລາວ ໃຫ້ຮູ້ກ່ຽວກັບປະຫວັດ ແລະ ຄວາມເປັນມາຂອງການກຳເນີດ, ການເຕີບໃຫຍ່ຂະຫຍາຍຕົວ, ໄຊຊະນະ ແລະ ຜົນງານຂອງກອງທັບປະຊາຊົນລາວ. ໂດຍໃຫ້ຖືເອົາຈິດໃຈວັນດັ່ງກ່າວ ເຂົ້າໃນຂະບວນການເຄື່ອນໄຫວ ປະຈຳເດືອນມັງກອນ ຢ່າງມີຊີວິດຊີວາ ສົມກັບກຽດສັກສີຂອງກອງທັບປະຊາຊົນລາວເຮົາ.



ແຫຼ່ງ: ຫ້ອງວ່າການລັດຖະບານ