ບົດຖະແຫຼງຂ່າວ ກອງປະຊຸມລັດຖະບານ ປະຈຳປີ 2012-2013

ຜູ້ຂຽນ: ທ່ານ ອານິຄົມ ວົງເດືອນ

ວັນພະຫັດ, 26 ກ.ຍ 2013 09:00

​​   ກອງປະຊຸມລັດຖະບານ ປະຈຳປີ 2012-2013 ໄດ້ໄຂຂຶ້ນ ໃນວັນທີ 16 ແລະ ປິດລົງໃນວັນທີ 20 ກັນຍາ 2013. ພາຍໃຕ້ການເປັນປະທານຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ ໂດຍມີບັນດາທ່ານ ຮອງ ນາຍົກລັດຖະມົນຕີ, ບັນດາສະມາຊິກລັດຖະບານ, ປະທານ, ຫົວໜ້າອົງການຈັດຕັ້ງ ພັກ, ລັດ, ສະພາແຫ່ງຊາດ, ອົງການຕຸລາການ, ອົງການແນວລາວສ້າງຊາດ, ອົງການມະຫາຊົນຂັ້ນສູນກາງ, ທ່ານເຈົ້າຄອງນະຄອນ ແລະ ບັນດາທ່ານເຈົ້າແຂວງທຸກໆແຂວງ ເຂົ້າຮ່ວມຢ່າງຄົບຖ້ວນ.

  ກອງປະຊຸມຄັ້ງນີ້ ຖືວ່າເປັນຄັ້ງສຳຄັນຍິ່ງ ເພາະວ່າ ກອງປະຊຸມໄດ້ນຳເອົາຫຼາຍບັນຫາສຳຄັນຂອງຊາດ ມາພິຈາລະນາຢ່າງເລິກເຊິ່ງກວ້າງຂວາງ ຊຶ່ງຂ້າພະເຈົ້າຂໍອະນຸຍາດ ແຈ້ງໂດຍສັງເຂບ ດັ່ງນີ້:

  1. ກອງປະຊຸມໄດ້ຮັບຟັງ ແລະ ປະກອບຄໍາເຫັນຕໍ່ບົດລາຍງານຂອງລັດຖະມົນຕີວ່າການກະ ຊວງແຜນການ ແລະ ການລົງທຶນ ກ່ຽວກັບການຕີລາຄາເບື້ອງຕົ້ນ ຜົນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ສົກປີ 2012-2013 ແລະ ຄາດໝາຍໃຫຍ່ ສົກປີ 2013-2014 ພ້ອມກັບ ການແນະນຳການຈັດຕັ້ງປະຕິບັດດຳລັດຂອງລັດຖະບານ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແລະ ແຜນງົບປະມານ ສົກປີ 2013-2014.

  2. ບົດລາຍງານຂອງລັດຖະມົນຕີວ່າການ ກະຊວງການເງິນ ກ່ຽວກັບສະພາບການຈັດຕັ້ງປະຕິບັດກົງຈັກການຈັດຕັ້ງພາສີ, ສ່ວນສາອາກອນ ແລະ ຄັງເງິນແຫ່ງຊາດ, ມາດຕະການເກັບລາຍຮັບງົບປະມານ ສົກປີ 2013-2014 ພ້ອມດ້ວຍ ເນື້ອໃນຄຳສັ່ງຂອງນາຍົກລັດຖະມົນຕີ ວ່າດ້ວຍມາດຕະການປະຢັດ ແລະ ຕ້ານການຟຸມເຟືອຍ.

  ຕໍ່ບັນດາບົດລາຍງານດັ່ງກ່າວນັ້ນ, ຜູ້ເຂົ້າຮ່ວມກອງປະຊຸມ ທັງສູນກາງ ແລະ ທ້ອງຖິ່ນ ໄດ້ພ້ອມກັນສົນທະນາ ແລະ ປະກອບຄຳເຫັນຢ່າງເລິກເຊິ່ງ ມີການປຽບທຽບຢ່າງກົງໄປກົງມາ ໂດຍໄດ້ຕີລາຄາວ່າ: ເກືອບໜຶ່ງປີຜ່ານ ມາ ປະເທດເຮົາຍັງຮັກສາຄວາມສະຫງົບ, ຄວາມເປັນລະບຽບຮຽບຮ້ອຍທາງດ້ານສັງຄົມໄດ້ດີ, ຄວາມເຕີບໂຕທາງດ້ານເສດຖະກິດ ຍັງຢູ່ໃນລະດັບ 8%, ສະພາບການຄ້າ-ການລົງທຶນ, ການຜະລິດ-ທຸລະກິດ ຍັງປົກກະຕິ ແລະ ຍັງມີທ່າອ່ຽງຂະຫຍາຍຕົວ, ການພັດທະນາເສດຖະກິດ-ສັງຄົມ, ການພັດທະນາຊົນນະບົດ-ແກ້ໄຂຄວາມທຸກຍາກ ຕິດພັນກັບການເຮັດທົດລອງ 3 ສ້າງ ສືບຕໍ່ເປັນຂະ ບວນຢ່າງກວ້າງຂວາງ. ເວົ້າລວມແລ້ວ ສົກປີ 2012-2013 ນີ້ ປະເທດເຮົາຍັງສາມາດສ້າງໄດ້ທ່ວງທ່າທີ່ດີໃນການກະກຽມກ້າວສູ່ປີ 2014 ທັງເປັນພື້ນຖານໃຫ້ແກ່ການບັນລຸເປົ້າໝາຍພັດທະນາໃນອະນາຄົດ.

   - ເຖິງຢ່າງໃດກໍ່ຕາມ ຄຽງຄູ່ກັບດ້ານຕັ້ງໜ້າ ດັ່ງກ່າວມານັ້ນ ກອງປະຊຸມຍັງໄດ້ຕີລາຄາວ່າ: ພວກເຮົາຍັງປະເຊີນກັບສິ່ງທ້າທາຍຫຼາຍຢ່າງ ເປັນຕົ້ນແມ່ນ: ອັດຕາເງິນເຟີ້ຍັງມີທ່າອ່ຽງເພີ່ມຂຶ້ນສູງ ແລະ ຄາດວ່າອາດຈະສູງ ກວ່າການຂະຫຍາຍຕົວຂອງເສດຖະກິດໃນຕໍ່ໜ້າ, ການເກັບລາຍຮັບບໍ່ໄດ້ຕາມແຜນທີ່ວາງໄວ້, ລາຍຈ່າຍພັດເພີ່ມສູງຂຶ້ນ, ການສຳລະໜີ້ສິນໂຄງການລົງທຶນຂອງລັດຍັງຄ້າງຄາຄຸມເຄືອ, ການຈ່າຍເງິນເດືອນຂອງພະນັກງານ, ທະຫານ, ຕຳຫຼວດ ມີຄວາມສັກຊ້າໃນບາງທ້ອງຖິ່ນ, ນອກນັ້ນຍັງຈະໄດ້ຮີບຮ້ອນສຸມໃສ່ແກ້ໄຂສິ່ງຫຍໍ້ທໍ້ໃນດ້ານຕ່າງໆອີກຫຼາຍສິ່ງຫຼາຍຢ່າງ.

   - ກອງປະຊຸມຍັງໄດ້ປະກອບຄໍາເຫັນຕໍ່ມາດຕະການ ແລະ ວິທີການຈັດເກັບລາຍຮັບງົບປະມານໃນສົກປີ 2013-2014 ເພື່ອສາມາດຕອບສະໜອງໃຫ້ແກ່ລາຍຈ່າຍທີ່ຈໍາເປັນ ແລະ ການພັດທະນາ ໂດຍໃຫ້ສຸມໃສ່ປັບປຸງ ຄວາມຮັບຜິດ-ຮັບຊອບ ຕໍ່ໜ້າທີ່ການເມືອງຂອງເຈົ້າໜ້າທີ່ກ່ຽວຂ້ອງ, ຂອງອົງການປົກຄອງທ້ອງຖິ່ນຢ່າງເປັນເຈົ້າການຮ່ວມກັນ, ເພີ່ມທະວີວຽກງານສຶກສາອົບຮົມການເມືອງແນວຄິດ ຕິດພັນກັບການກວດກາເປັນປະຈໍາ ແລະ ເຂັ້ມງວດ, ປັບປຸງນິຕິກໍາ ລະບຽບການ, ກົນໄກ ແລະ ນະໂຍບາຍຕ່າງໆໃຫ້ຖືກຕ້ອງ, ຮັດກຸມ, ປັບປຸງກົງຈັກການຈັດຕັ້ງ ແລະ ບຸກຄະລາກອນ ແລະ ມາດຕະການອື່ນໆ ເຊິ່ງມີທັງມາດຕະການລວມ ແລະ ມາດຕະການສະ ເພາະຢ່າງຈະແຈ້ງ (22+8).

   - ສິ່ງສໍາຄັນອີກອັນໜຶ່ງທີ່ກອງປະຊຸມໄດ້ສຸມໃສ່ພິຈາລະນາ ແລະ ເປັນເອກະພາບສູງຕໍ່ເນື້ອໃນຄຳສັ່ງ ຂອງນາຍົກລັດຖະມົນຕີ ກ່ຽວກັບມາດຕະການປະຢັດ ແລະ ຕ້ານການຟຸມເຟືອຍ ຊຶ່ງຄໍາສັ່ງສະບັບນີ້ ໄດ້ກໍານົດແຈ້ງ ມາດຕະການແຕ່ລະດ້ານ ຄື: ດ້ານການສຶກສາອົບຮົມ, ການຄຸ້ມຄອງພະນັກງານ, ມາດຕະການຄຸ້ມຄອງການປະມູນຈັດຊື້, ການປະເມີນມູນຄ່າລາຄາ, ການປະກອບ, ນໍາໃຊ້ຍານພາຫະນະຂອງລັດ, ການນໍາໃຊ້ອຸປະ ກອນໄ ຟຟ້າ, ສື່ສານ ແລະ ອຸປະກອນອື່ນໆ, ມາດຕະການດ້ານການເຄື່ອນໄຫວຂອງລັດຖະບານ, ການປະຊຸມສໍາມະນາ, ການຈັດງານລ້ຽງ, ຮັບແຂກ, ພິທີການທາງລັດຖະການ, ການອະນຸມັດການລົງທຶນ ແລະ ອື່ນໆ, ຈິດໃຈຄໍາ ສັ່ງດັ່ງກ່າວ ແມ່ນແນໃສ່ເຮັດໃຫ້ທຸກການຈັດຕັ້ງ ແລະ ທົ່ວສັງຄົມ ມີສະຕິຕໍ່ການປະຕິບັດນະໂຍບາຍປະຢັດແຫ່ງຊາດ ດ້ວຍຈິດໃຈບຸກທະລຸ.

   3. ໂດຍອີງຕາມທ່າອ່ຽງລວມຂອງໂລກ, ຂອງພາກພື້ນ ແລະ ຄວາມເປັນຈິງຂອງປະເທດເຮົາ ທາງດ້ານສະບຽງອາຫານ. ກອງປະຊຸມຄັ້ງນີ້ ໄດ້ພ້ອມກັນພິຈາລະນາ ແລະ ຮັບຮອງເອົາ ໂຄງການຄ້ຳປະ ກັນຄວາມໝັ້ນ ຄົງ ທາງດ້ານສະບຽງອາຫານ ແລະ ການຜະລິດເຂົ້າເປັນສິນຄ້າ ເຊິ່ງເປັນໂຄງການໃນລະດັບຍຸດທະສາດຂອງຊາດ ໃນສະເພາະໜ້າ ແລະ ຍາວນານ ຂອງປະເທດເຮົາ ທັງເປັນການຜັນຂະຫຍາຍຈິດໃຈມະຕິ IX ຂອງສູນກາງ ພັກ, ທັງເປັນວິໃສທັດ, ທັດສະນະຂອງພັກ ແລະ ລັດຖະບານເຮົາ ໃນ ເງື່ອນໄຂແຫ່ງການເຊື່ອມໂຍງເສດຖະກິດກັບພາກພື້ນ ແລະ ສາກົນ ຊຶ່ງມີທັງກາລະໂອກາດ ມີທັງອຸປະ ສັກ, ຄວາມສ່ຽງ ແລະ ສິ່ງທ້າທາຍຫຼາຍປະການ ເປັນຕົ້ນແມ່ນ ຄວາມໜາແໜ້ນຂອງປະຊາກອນນັບມື້ນັບເພີ່ມຂຶ້ນ, ຕ້ອງການອາຫານເພີ່ມຂຶ້ນ, ຊັບພະຍາກອນທຳມະຊາດ, ລວມທັງແຫຼ່ງພະລັງງານນັບມື້ລົດລົງ, ຄວາມຕ້ອງການທີ່ດິນເພື່ອຢູ່ອາໃສ ແລະ ທຳການຜະລິດ ນັບມື້ສູງຂຶ້ນ, ບັນຫາສິ່ງແວດລ້ອມບວກກັບການປ່ຽນແປງຂອງດິນຟ້າອາກາດ ກໍ່ເປັນໄພຂົ່ມຂູ່ອັນໜຶ່ງ, ລະດັບການແກ່ງແຍ້ງແຂ່ງຂັນຂອງຕະຫຼາດ, ຄວາມຕ້ອງການເຖິງຄຸນນະພາບ, ຄວາມປອດໄພ ແລະ ມາດຕະຖານ ຂອງສິນຄ້າຈາກການກະເສດນັບມື້ສູງຂຶ້ນ ແລະ ບັນຫາອື່ນໆ. ສະນັ້ນ, ໂຄງການດັ່ງກ່າວນີ້ ຈຶ່ງມີຄວາມສຳຄັນຫຼາຍສຳລັບປະເທດຊາດ ແລະ ປະຊາຊົນເຮົາ ເຊິ່ງທຸກການຈັດຕັ້ງພັກ-ລັດ, ບັນດານັກທຸລະກິດ, ຊາວກະສິກອນ ແລະ ທົ່ວສັງຄົມລາວເຮົາຈະໄດ້ເຊື່ອມຊຶມ ແລະ ເປັນເຈົ້າການເຂົ້າຮ່ວມປະຕິບັດໂຄງການນີ້ ຢ່າງມີຄວາມຮັບຜິດຮັບຊອບໃຫ້ເກີດໝາກເກີດຜົນ.

   4. ກອງປະຊຸມເຫັນດີເປັນເອກະພາບຮັບຮອງເອົາ ຍຸດທະສາດການພັດທະນາພື້ນຖານໂຄງລ່າງ ດ້ານການຄົມມະນາຄົມ-ຂົນສົ່ງ “ ທາງບົກ, ທາງລົດໄຟ, ທາງນ້ຳ ແລະ ທາງອາກາດຂອງ ສປປ ລາວ. ຕໍ່ບັນຫານີ້, ກອງ ປະຊຸມຍັງໄດ້ໃຫ້ທິດຊີ້ນຳ: ໃຫ້ຮີບຮ້ອນປັບປຸງ ແລະ ສ້າງເສັ້ນທາງຫຼວງແຫ່ງຊາດ ທີ່ເປັນເສັ້ນທາງເຊື່ອມຈອດກັບພາກພື້ນ ໃຫ້ໄດ້ຕາມມາດຕະຖານສາກົນ ແລະ ພາກພື້ນ ພ້ອມທັງ ຄົ້ນ ຄວ້າສ້າງເສັ້ນທາງດ່ວນ ໃນບາງ ຈຸດ ທີ່ມີເງື່ອນໄຂກ່ອນ; ສຳລັບທາງລົດໄຟ: ການພັດທະນາ ແລະ ຈັດລຽງ ບູລິມະສິດເສັ້ນທາງ ລົດໄຟ ໃນ ສປປ ລາວ ແມ່ນໃຫ້ອີງໃສ່ທິດຊີ້ນຳຂອງກົມການເມືອງສູນກາງພັກ ແລະ ອີງໃສ່ຍຸດທະສາດການ ເຊື່ອມໂຍງເຂົ້າກັບ ລະບົບຕາໜ່າງທາງລົດໄຟຂອງພາກພື້ນ ແລະ ອະນຸພາກພື້ນ, ໃນນັ້ນ ໃຫ້ສຸມໃສ່ໂຄງການກໍ່ສ້າງທາງລົດໄຟ ບໍ່ເຕັນ-ວຽງຈັນ. ສຳລັບຍຸດທະສາດພັດທະນາພື້ນຖານໂຄງລ່າງທາງນ້ຳໃຫ້ ສຶກສາ, ຄົ້ນຄ້ວາລະອຽດຕື່ມ ເພື່ອໃຫ້ ແທດເໝາະກັບສະພາບເງື່ອນໄຂພູມີປະເທດຂອງພວກເຮົາ ໂດຍການສົມທຽບກັບປະສິດທິຜົນຈາກການສ້າງທາງ, ທາງດ່ວນ, ທາງລົດໄຟ ຫຼື ສະໜາມບິນ; ສ່ວນການພັດທະນາການຄົມມະນາຄົມທາງອາກາດ ໃຫ້ຄົ້ນຄວ້າ ກຳນົດເຂດທີ່ດິນ ທີ່ຈະສ້າງເດີ່ນບິນສາກົນແຫ່ງໃໝ່ໃນໄລຍະຍາວ ແລ້ວປັກຫຼັກໝາຍສະຫງວນໄວ້ ເພື່ອບໍ່ໃຫ້ມີຄວາມຫຍຸ້ງຍາກໃນການເວນຄືນທີ່ດິນ. ນອກຈາກນັ້ນ ໃຫ້ຄົ້ນຄວ້າລະອຽດຕື່ມການກຳນົດຈຸດ, ຄວາມສາມາດ ແລະ ປະສິດທິຜົນ ທີ່ຈະສ້າງສະໜາມບິນສາກົນແຫ່ງໃໝ່ຢູ່ຕ່າງແຂວງ. ສ່ວນເດີ່ນບິນພາຍໃນ ໃຫ້ຄົ້ນຄວ້າປັບປຸງບາງແຂວງ ທີ່ເຫັນວ່າມີຄວາມຈຳເປັນ ບໍ່ຈຳເປັນທີ່ຈະຕ້ອງສ້າງຢູ່ທຸກແຂວງ. ແຕ່ການຈັດຕັ້ງກໍ່ສ້າງຕ້ອງໃຫ້ ສອດຄ່ອງກັບກົດໝາຍການລົງທຶນ ແລະ ກົດໝາຍອື່ນໆ, ສຳຄັນໃຫ້ ລີກລ້ຽງ ການລົງທຶນທີ່ບໍ່ມີແຫຼ່ງທຶນ, ຖ້າງົບປະມານຂອງລັດ ຕ້ອງມີແຜນຮັບຮອງຈາກລັດຖະບານ ແລະ ສະພາແຫ່ງຊາດກ່ອນ ບວກກັບ ມີແຜນການສຳ ຫຼວດຕົວຈິງ ລວມທັງ ຊອກຫາແຫຼ່ງທຶນຈາກຫຼາຍໆແຫຼ່ງ ທັງພາຍໃນ ແລະ ຕ່າງປະເທດ. ພ້ອມດຽວກັນນັ້ນ, ກໍ່ໃຫ້ເອົາໃຈໃສ່ຂອດການບໍລິການຕາມດ່ານ ເຂົ້າ-ອອກເມືອງ ແລະ ທ່າເຮືອຕ່າງໆ ທີຍັງອຶດອັດຊັກຊ້າ, ມີຫຼາຍ ຂັ້ນຫຼາຍຂອດ ໃຫ້ມີຄວາມວ່ອງໄວ ແລະ ຄ່ອງຕົວ ດ້ວຍການຈັດວາງລະບອບ ລະບຽບ ທີ່ກະທັດລັດ ທີ່ມີການບໍລິການທີ່ດີ.

   5. ຕໍ່ບົດລາຍງານຜົນຂອງການສຳມະນາ ການປັບປຸງກົດໝາຍ ວ່າດ້ວຍລັດຖະບານ, ກົດໝາຍ ວ່າດ້ວຍການປົກຄອງທ້ອງຖິ່ນ ແລະ ຮ່າງກົດໝາຍ ວ່າດ້ວຍນະຄອນ ແລະ  ເທດສະບານ ກອງປະຊຸມໄດ້ເຫັນດີສືບຕໍ່ຄົ້ນ ຄ້ວາພິຈາລະນາໄປຈົນເຖິງສະຫຼຸບຖອດຖອນບົດຮຽນ ການທົດລອງ 3 ສ້າງ ສຳເລັດ ແລ້ວຈຶ່ງນຳມາສະເໜີລັດຖະບານຄືນໃໝ່. ໃນເວລາຄົ້ນຄ້ວາບັນຫາໃດບໍ່ຈະແຈ້ງ ສະເໜີໃຫ້ຈັດສຳມະນາ ແລກປ່ຽນບົດຮຽນນຳວິ ຊາການ ຜູ້ທີ່ມີປະສົບການມາຮ່ວມນຳ.

   ໃນໂອກາດກອງປະຊຸມປະຈຳປີນີ້ ຄະນະລັດຖະບານ ຍັງໄດ້ດຳເນີນຊີວິດການເມືອງ ໂດຍລົງເລິກ ການບໍລິຫານງານລວມຂອງຄະນະລັດຖະບານ ສົກປີ 2012-2013 ລວມທັງ ປະເມີນຄຸນທາດການເມືອງ ຂອງສະມາ ຊິກລັດຖະບານ ໃນນາມເປັນນັກບໍລິຫານຂັ້ນສູງ, ຄວາມຮັບຜິດຊອບໜ້າທີ່ການເມືອງຂອງຕົນ ທີ່ໄດ້ຮັບມອບໝາຍ ເປັນຕົ້ນ ການນຳພາແກ້ໄຂບັນຫາຕ່າງໆ ປະຈຳສົກປີ 2012-2013 ໂດຍສະເພາະ ແມ່ນການຈັດຕັ້ງປະຕິບັດ ມະຕິຕົກລົງຂອງກອງປະຊຸມລັດຖະບານເປີດກ້ວາງ ປະຈຳປີ 2012, ເລກທີ 12/ລບ, ລົງວັນທີ 7 ພະຈິກ 2012. ຕໍ່ບັນຫານີ້ຄະນະລັດຖະບານ ພ້ອມດ້ວຍການນຳຂັ້ນແຂວງ ກໍ່ໄດ້ປະກອບຄຳເຫັນຢ່າງກົງໄປກົງມາ ພ້ອມທັງ ຕີລາຄາ ດ້ານດີ, ດ້ານອ່ອນ ດັ່ງນີ້:

   1. ຕໍ່ໜ້າທີ່ຄວາມຮັບຜິດຊອບການເມືອງ ທີ່ສະມາຊິກໄດ້ຮັບມອບໝາຍເຫັນວ່າ ຄວາມຮັບ ຜິດຊອບໃນການປັບປຸງແກ້ໄຂດ້ານຂົງເຂດເສດຖະກິດ-ສັງຄົມ ເຫັນວ່າຍັງປະຕິບັດບໍ່ໄດ້ດີເທົ່າທີ່ຄວນ ເກີດມີບັນຫາຕາມມາ.

   2. ກ່ຽວກັບການນຳພາໃນການແກ້ໄຂ 5 ບັນຫາພົ້ນເດັ່ນ ຍັງບໍ່ທັນໄດ້ຮັບການແກ້ໄຂດ້ານຕ່າງໆ ເປັນຕົ້ນບັນຫານການຈັດຕັ້ງປະຕິບັດຄຳຕັດສິນຂອງສານ, ບັນຫາທີ່ດິນ, ທຸລະກິດໄມ້, ໂຄງການຂຸດຄົ້ນແຮ່ທາດ, ການແກ້ ໄຂບັນຫາແຮງງານ ກໍ່ຍັງສືບຕໍ່ກາຍເປັນບັນຫາພົ້ນເດັ່ນຢູ່ ແລະ ບາງດ້ານກໍ່ຍັງຂະຫຍາຍຕົວ ເຊັ່ນ: ບັນຫາຢາເສບຕິດ, ການຄ້າມະນຸດ, ຂໍ້ຂັດແຍ່ງທີ່ດິນ ຍັງມີຫຼາຍ.

   3. ຂອດປະສານງານຂອງບາງຂະແໜງການເຫັນວ່າຍັງມີການເອື່ອຍອີງ ແລະ ຖິ້ມຄວາມຮັບຜິດ ຊອບໃສ່ກັນ.  
   ໃນຕອນທ້າຍຂອງກອງປະຊຸມ ທ່ານນາຍົກລັດຖະມົນຕີ ໄດ້ຊີ້ນຳໃຫ້ບັນດາສະມາຊິກລັດຖະບານ ເອົາໃຈໃສ່ ໃນແຜນວຽກຈຸດສຸມປະຈຳເດືອນ ຕຸລາ 2013 ດັ່ງນີ້:

   (1) ສຸມທຸກກຳລັງແຮງສັງລວມເຂົ້າໃນການປະຕິບັດແຜນພັດທະນາ ແລະ ແຜນງົບປະມານ ໃນທ້າຍສິ້ນປີນີ້ ໃຫ້ຍັບເຂົ້າໃກ້ຫຼື ໄດ້ຕາມຄາດໝາຍທີ່ວາງໄວ້. ມອບໃຫ້ຄະນະຕິດຕາມ ແລະ ຊຸກຍູ້ເສດຖະ ກິດມະຫາພາກ ສົມທົບກັບບັນດາກະຊວງ-ອົງການ ແລະ ທ້ອງຖິ່ນຕ່າງໆປະຕິບັດ.

   (2) ເພີ່ມຄວາມເອົາໃຈໃສ່ ໃນການປ້ອງກັນ ແລະ ແກ້ໄຂໄພພິບັດ  ແລະ ການຊຸກຍູ້ສົ່ງເສີມການຜະລິດເຂົ້າລະດູນາປີນີ້ ແລະ ການປູກພືດສິນຄ້າອື່ນໆໃນລະດູຝົນ ແລະ ຕໍ່ໃສ່ລະດູແລ້ງຈະມາເຖິງ ເພື່ອຮັບປະກັນຄວາມ ໝັ້ນຄົງ (ປອດໄພ) ດ້ານສະບຽງອາຫານຢູ່ປະເທດເຮົາ ຄືໄດ້ປຶກສາກັນ. ພ້ອມກັນນັ້ນ ກໍໃຫ້ເພີ່ມຄວາມລະມັດລະວັງ  ທີ່ອາດເກີດຂຶ້ນໃນທ້າຍລະດູຝົນນີ້, ເປັນຕົ້ນແມ່ນນ້ຳຖ້ວມ-ນ້ຳໄຫຼຊຸ; ອັນສຳຄັນໃນສະເພາະໜ້ານີ້ ແມ່ນໃຫ້ ເອົາໃຈໃສ່ຊ່ວຍເຫຼືອບັນດາແຂວງ ທີ່ປະສົບໄພນ້ຳຖ້ວມຫວ່າງແລ້ວ ແລະ ບັນດາແຂວງຢູ່ພາກໃຕ້ໃນປະຈຸບັນ ເພື່ອປົວແປງ ແລະ ຟື້ນຟູຊີວິດການເປັນຢູ່ຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ. ພ້ອມກັນນັ້ນ, ກໍຕັ້ງໜ້າກະກຽມເງື່ອນໄຂດ້ານຕ່າງໆ ເພື່ອຊ່ວຍປະຊາຊົນໃນເຂດດັ່ງກ່າວ ດຳເນີນການຜະລິດລະດູແລ້ງຈະມາເຖິງ.

   (3) ໃຫ້ສືບຕໍ່ເອົາໃຈໃສ່ວຽກງານກໍ່ສ້າງຮາກຖານການເມືອງ ຕິດພັນກັບວຽກງານ 3 ສ້າງ ຕາມຄຳສັ່ງແນະນຳເລກທີ 03 ຂອງກົມການເມືອງສູນກາງພັກ ແລະ ຄຳສັ່ງເລກທີ 16 ຂອງນາຍົກລັດຖະມົນ ຕີ ຢ່າງຕັ້ງໜ້າ.

   (4) ໃຫ້ເພີ່ມຄວາມເອົາໃຈໃສ່ຕໍ່ການຄຸ້ມຄອງຕະຫຼາດ, ຄຸ້ມຄອງລາຄາສິນຄ້າອັນຈຳເປັນຕົ້ນຕໍຈຳ ນວນໜຶ່ງ ສຳລັບການຜະລິດ ແລະ ຊີວິດການເປັນຢູ່ຂອງປະຊາຊົນ ກໍຄືພະນັກງານ, ທະຫານ, ຕຳຫຼວດ ຂອງພວກເຮົາ; ອັນນີ້ເປັນເລື່ອງສຳຄັນຫຼາຍ, ຖ້າພວກເຮົາຄຸ້ມຄອງລາຄາສິນຄ້າ ແລະ ຄ່າບໍລິການໄດ້ດີ ພວກເຮົາຈະຄວບຄຸມເງິນເຟີ້ໃຫ້ຢູ່ໃນລະດັບທີ່ເໝາະສົມໄດ້ ແລະ ຈະບໍ່ສົ່ງຜົນກະທົບຕໍ່ຈັງຫວະການເຕີບໂຕເສດຖະກິດ ກໍ່ຄືຕໍ່ການຜະລິດ-ທຸລະກິດ ແລະ ຊີວິດການເປັນຢູ່ຂອງປະຊາຊົນພົນລະເມືອງ. 

   (5) ໃຫ້ເພີ່ມຄວາມເອົາໃຈໃສ່ການແກ້ໄຂບັນຫາຕ່າງໆດ້ານສັງຄົມ, ເປັນຕົ້ນແມ່ນບັນ ຫາໃນຂົງເຂດການສຶກສາ, ສາທາລະນະສຸກ,ການແກ້ໄຂບັນຫາປະກົດການຫຍໍ້ທໍ້ໃນສັງຄົມ;    ໃນສະເພາະໜ້ານີ້ແມ່ນໃຫ້ເອົາໃຈໃສ່ຕໍ່ ການສະກັດກັ້ນ ແລະ ແກ້ໄຂພະຍາດໄຂ້ເລືອດອອກໃຫ້ຢຸດຕິຢ່າງສິ້ນເຊີງ.

   (6) ເພີ່ມທະວີຄວາມເປັນເຈົ້າການຕື່ມ ໃນການພົວພັນຮ່ວມມືກັບເພື່ອນມິດສາກົນ, ສົ່ງເສີມ ແລະ ດຶງດູດການລົງທຶນກັບຕ່າງປະເທດ ໃຫ້ແຂງແຮງກວ່າເກົ່າ ດ້ວຍການສືບຕໍ່ປັບປຸງລະບອບລະບຽບການຂອງຂະແໜງການ ແລະ ທ້ອງຖິ່ນຕ່າງໆເພື່ອເອື້ອອຳນວຍຄວາມສະດວກໃນການບໍລິການວ່ອງໄວ ແລະ ໂປ່ງໃສ.

   ຕໍ່ບັນຫາຕ່າງໆ ທີ່ນຳມາພິຈາລະນາ ແລະ ປຶກສາຫາລືກັນ ຢູ່ໃນກອງປະຊຸມເທື່ອນີ້ ທ່ານນາຍົກ ລັດຖະມົນຕີ ໄດ້ຊີ້ນຳໃຫ້ພາກສ່ວນກ່ຽວຂ້ອງ ນຳໄປປັບປຸງຕາມຄວາມເຫັນຂອງບັນດາສະມາຊິກລັດຖະ ບານ, ເຈົ້າຄອງນະ ຄອນຫຼວງ ແລະ ບັນດາເຈົ້າແຂວງ ເພື່ອເຮັດໃຫ້ເນື້ອໃນແຕ່ລະບັນຫາມີຄວາມສອດ ຄ່ອງ, ສົມບູນ ແລະ ຄົບຖ້ວນກ່ວາເກົ່າ ແລະ ທ່ານຍັງໄດ້ຮຽກຮ້ອງ ແລະ ຊີ້ນຳ ໃຫ້ບັນດາສະມາຊິກລັດ ຖະບານ, ເຈົ້າຄອງນະຄອນ ຫຼວງ ວຽງຈັນ, ບັນດາເຈົ້າແຂວງ ແລະ ຜູ້ເຂົ້າຮ່ວມປະຊຸມອື່ນໆ ຈົ່ງນຳເອົາເນື້ອໃນຈິດໃຈທີ່ ໄດ້ປຶກສາຫາລື ແລະ ຕົກລົງໃນກອງປະຊຸມເທື່ອນີ້ ໄປຈັດຕັ້ງຜັນຂະຫຍາຍເຂົ້າໃນວຽກງານຕາມຄວາມຮັບຜິດຊອບຂອງຂະແໜງການ ແລະ ທ້ອງຖິ່ນຕົນ ໃຫ້ປະກົດຜົນເປັນຈິງ.​

ແຫຼ່ງ: ຫ້ອງວ່າການລັດຖະບານ