ບົດຖະແຫຼງຂ່າວ ຜົນຂອງກອງປະຊຸມລັດຖະບານສະໄໝສາມັນ ປະຈຳເດືອນ ກໍລະກົດ 2013

ຜູ້ຂຽນ: ທ່ານ ອານິຄົມ ວົງເດືອນ

ວັນພຸດ, 25 ກ.ຍ 2013 12:00

​   ໃນລະຫວ່າງວັນທີ 1-2 ສິງຫາ 2013 ກອງປະຊຸມລັດຖະບານ ສະໄໝສາມັນປະຈຳເດືອນ ກໍລະກົດ 2013 ໄດ້ໄຂຂຶ້ນຢ່າງເປັນທາງການ ທີ່ຫ້ອງວ່າການລັດຖະບານ ພາຍໃຕ້ການເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ, ໂດຍການເຂົ້າຮ່ວມ ຂອງບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ. ກອງປະຊຸມຄັ້ງນີ້ ຄະນະລັດຖະບານ ໄດ້ສຸມໃສ່ຄົ້ນຄວ້າພິຈາລະນາບັນດາວຽກງານ ແລະ ບັນຫາສຳຄັນຈຳນວນໜຶ່ງທັງສະເພາະໜ້າ ແລະ ຍາວນານ ຄື:

1). ບັນຫາທໍາອິດທີ່ນໍາມາພິຈາລະນາ ໃນກອງປະຊຸມຄັ້ງນີ້ ແມ່ນບັນຫາການລະບາດຂອງພະຍາດໄຂ້ຍຸງລາຍ. ຕາມການລາຍງານຂອງກະຊວງສາທາລະນະສຸກ ໃຫ້ຮູ້ວ່າ: ການລະບາດຂອງໄຂ້ຍຸງລາຍໃນປີນີ້ ຮ້າຍແຮງກວ່າ ຫຼາຍປີຜ່ານມາ. ເຖິງປະຈຸບັນຍັງບໍ່ມີທ່ວງທ່າຈະລົດລົງເທື່ອ, ຜູ້ຕິດເຊື້ອຍັງສືບຕໍ່ເພີ່ມຂຶ້ນ, ຕາມຂໍ້ມູນຮອດວັນທີ 30/07/2013 ນີ້ມີຜູ້ຕິດເຊື້ອເຖີງ 33.830 ຄົນ ແລະ ເສຍຊີວິດ 76 ກໍລະນີແລ້ວ.

   ຕໍ່ສະພາບດັ່ງກ່າວນີ້, ລັດຖະບານ, ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງກໍ່ໄດ້ມີຄວາມພະຍາຍາມ ສຸມທຸກກໍາລັງແຮງ ແລະ ຄວາມສາມາດ ເພື່ອຄວບຄຸມ, ແກ້ໄຂ ແລະ ຕອບຕ້ານດ້ວຍມາດຕະການ ຕ່າງໆ ເຊັ່ນ: ດ້ານນິຕິກໍາດ້ານການປິ່ນປົວ, ການປ້ອງກັນ, ການປະສານງານ, ດ້ານງົບປະມານ ແລະ ການຈັດຕັ້ງກໍາລັງຕົວຈິງລົງສູ່ພື້ນທີ່ໂດຍມີສູນບັນຊາຊີ້ນໍາ ທັງຢູ່ສູນກາງ ແລະ ທ້ອງຖິ່ນ ອັນໄດ້ເຮັດໃຫ້ອັດຕາການເສຍ ຊີວິດຂອງຜູ້ຕິດເຊື້ອ ສາມາດຄວບຄຸມໄດ້ໂດຍພື້ນຖານ.

   ເຖິງຢ່າງໃດກໍ່ຕາມ ກອງປະຊຸມຍັງໄດ້ຕີລາຄາວ່າ: ການກະກຽມຄວາມພ້ອມດ້ານຕ່າງໆ ເພື່ອຕ້ານ ແລະ ສະກັດກັ້ນກ່ອນ ການລະບາດຂອງພະຍາດດັ່ງກ່າວ ບໍ່ທັນແຂງແຮງພໍ, ບໍ່ທັນໄດ້ສ້າງຂະບວນການອັນກວ້າງຂວາງ ເພື່ອສ້າງຄວາມເຂົ້າໃຈ, ຄວາມຮັບຮູ້ໃຫ້ແກ່ຊຸມຊົນ ແລະ ສັງຄົມ. ສິ່ງສໍາຄັນກໍ່ຍັງແມ່ນ ຄວາມເປັນເຈົ້າການຂອງທຸກພາກສ່ວນ, ທຸກຄອບຄົວ, ທຸກການຈັດຕັ້ງໃນການປະຕິບັດວຽກງານສະກັດກັ້ນ ແລະ ແກ້ໄຂບັນຫາດັ່ງກ່າວ ບໍ່ທັນສູງ ຊຶ່ງຈະໄດ້ສືບຕໍ່ປັບປຸງຢ່າງຈິງຈັງ ເພື່ອປ້ອງກັນ, ຕອບຕ້ານ ໃນສະເພາະໜ້າ ແລະ ຍາວນານ ຕໍ່ການລະບາດຂອງພະຍາດດັ່ງກ່າວນີ້.

2). ບັນຫາທີ່ສອງ ທີ່ກອງປະຊຸມໄດ້ປະກອບຄໍາເຫັນ ດ້ວຍຄວາມຮັບຜິດຊອບຢ່າງສູງ ຕໍ່ບົດລາຍງານ ກ່ຽວກັບແຜນພັດທະນາປັບປຸງການຄຸ້ມຄອງ ແລະ ການບໍລິການ ຢູ່ດ່ານສາກົນຂົວມິດຕະພາບ 1, ເຊິ່ງປະຈຸບັນໄດ້ເກີດ ບັນຫາສັບສົນໃນການບໍລິການ ແລະ ສ້າງຄວາມບໍ່ສະດວກຕໍ່ການເຂົ້າ-ອອກ ຂອງຜູ້ເດີນທາງເປັນຕົ້ນ ບັນຫານສັນຈອນແອອັດ, ມີຈຸດເກັບເງິນຫຼາຍບ່ອນ, ການບໍລິການມີຫຼາຍຂັ້ນຫຼາຍຂອດ ແລະ ອື່ນໆ ອັນເປັນຜົນສະ ທ້ອນ ທີ່ບໍ່ດີຕໍ່ພາບພົດປະເທດຊາດ, ສ້າງຄວາມລໍາບາກ, ລໍາຄານໃຫ້ຜູ້ໃຊ້ບໍລິການ ລວມທັງສ້າງຊ່ອງຫ່ວາງໃຫ້ເຈົ້າໜ້າທີ່ບໍ່ມີຄວາມໂປ່ງໃສ. ເພື່ອແກ້ໄຂບັນຫາທີ່ກ່າວມານັ້ນ ແລະ ເພື່ອຄວາມກຽມພ້ອມເຂົ້າເປັນ ສະມາຄົມເສດຖະ ກິດອາຊຽນ ປີ 2015 ຂອງປະເທດເຮົາ, ສະມາຊິກລັດຖບານໄດ້ເອກະພາບ ແລະ ຕັດສິນໃຈຕ້ອງແກ້ໄຂບັນຫາດັ່ງກ່າວຢ່າງເດັດຂາດ ໂດຍກອງປະຊຸມ ໄດ້ຕົກລົງ ຄື: ເຫັນດີ ແຕ່ງຕັ້ງຄະນະກໍາມະການສະເພາະກິດຂຶ້ນ ຊຶ່ງ ປະກອບມີຮອງນາຍົກລັດຖະມົນຕີ ຜູ້ຮັບຜິດຊອບວຽກງານດັ່ງກ່າວເປັນຜູ້ຊີ້ນໍາ ແລະ ປະກອບມີບັນດາລັດຖະມົນຕີຊ່ວຍວ່າການກະຊວງ ທີ່ກ່ຽວຂ້ອງ ແລະ ອົງການປົກຄອງນະຄອນຫຼວງວຽງຈັນ ເປັນຄະນະ ລົງກວດກາສະ ພາບການຕົວຈິງ ລວມທັງໄປຖອດຖອນບົດຮຽນນໍາປະເທດອື່ນໆ ອັນໃດດີ ອັນໃດອ່ອນ. ຫຼັງຈາກນັ້ນ, ມາປຶກສາຫາລືຫາວິທີແກ້ໄຂລະອຽດຮ່ວມກັນ ແລ້ວລາຍງານໃຫ້ລັດຖະບານ ເພື່ອຕົກລົງ ແລະ ປະຕິບັດແນໃສ່ສ້າງຄວາມ ຄ່ອງຕົວ ໃຫ້ແກ່ການສັນຈອນ ເຂົ້າ-ອອກ ທີ່ມີຄວາມສະດວກປອດໄພ.

3). ກອງປະຊຸມໄດ້ຮັບຮອງເອົາຮ່າງ ແຜນຍຸດທະສາດ ການພັດທະນາກິລາ-ກາຍຍະກໍາ ແຕ່ນີ້ເຖິງປີ 2020. ຈຸດປະສົງເພື່ອເຮັດໃຫ້ພົນລະເມືອງລາວ ມີສຸຂະພາບເຂັ້ມແຂງທາງດ້ານຮ່າງກາຍ, ຈິດໃຈ, ມີຄວາມເສຍສະຫຼະ ອົດທົນ ແລະ ມີນໍ້າໃຈກິລາ-ກາຍຍະກໍາທີ່ຜ່ອງໃສ, ສ້າງສະຕິຊາດ ເພື່ອຄວາມພ້ອມຮັບໃຊ້ພາລະກິດປົກປັກຮັກສາ ແລະ ສ້າງສາປະເທດຊາດ. ພ້ອມດຽວກັນນັ້ນ, ກອງປະຊຸມໄດ້ມີທິດຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບ ປຸງແກ້ໄຂຕາມການປະກອບຄໍາເຫັນ ຂອງສະມາຊິກລັດຖະບານ. ແຕ່ໃຈກາງຍັງແມ່ນສົ່ງເສີມກິລາມວນຊົນ, ປຸກລະດົມທົ່ວສັງຄົມເຂົ້າຮ່ວມ ໂດຍສ້າງຈິດສໍານຶກ, ສະຕິ ໃຫ້ຮັກກິລາ ເພື່ອສຸຂະພາບ ແລະ ມິດຕະພາບ. ສໍາລັບກິ ລາອາຊີບ ຕ້ອງເບິ່ງທ່າແຮງ ແລະ ຄວາມສາມາດຂອງປະເທດເຮົາວ່າຈະສຸມໃສ່ກິລາປະເພດໃດ ທີ່ເຮົາຈະສຸມໃສ່ສ້າງ ແລະ ພັດທະນາເພື່ອແຂ່ງຂັນ.

4). ກະຊວງໂຍທາທິການ ແລະ ຂົນສົ່ງ ໄດ້ລາຍງານຮ່າງ ແຜນຍຸດທະສາດການພັດທະນາທາງລົດໄຟຂອງປະເທດເຮົາ ແຕ່ນີ້ຮອດປີ 2015-2020 ແລະ 2050.

    - ເຫດຜົນກໍ່ຍ້ອນວ່າ ປະເທດເຮົາບໍ່ມີທາງອອກສູ່ທະເລ ຖ້າພວກເຮົາຈະນໍາໃຊ້ແຕ່ ທາງນໍ້າ, ທາງອາກາດ ແລະ ທາງບົກ ທຳມະດາຄືປະຈຸບັນ ແມ່ນຈະບໍ່ສາມາດຮອງຮັບຄວາມຕ້ອງການ ຂອງການພັດ ທະນາປະເທດ ເພື່ອເຊື່ອມໂຍງເສດຖະກິດກັບພາກພື້ນ ແລະ ສາກົນ ໃນອະນາຄົດໄດ້. ເຖິງຢ່າງໃດກໍ່ຕາມ ກອງປະຊຸມກໍ່ໄດ້ປະກອບຄຳເຫັນ ຕໍ່ແຜນຍຸດທະສາດດັ່ງກ່າວ ບົນພື້ນຖານທີ່ຄຳນຶງປະສິດທິຜົນຂອງການລົງທຶນ ແລະ ປະສິດທິຜົນທາງເສດຖະກິດ ວ່າຄວນຈະສຸມໃສ່ພັດທະນາດ້ານຄົມມະນາຄົມຂອງປະເທດເຮົາແນວໃດ ?. ຈະເຮັດຈຸດໃດກ່ອນ ?, ຍ່ານທາງໃດ ? ແຕ່ເໜືອຫາໃຕ້, ແຕ່ຕາເວັນຕົກຫາຕາເວັນອອກ (ທາງຕັ້ງ-ທາງຂວາງ) ໂດຍອີງຕາມຄວາມຈຳເປັນ ແລະ ຄວາມສາມາດຕົວຈິງ ທີ່ມີປະສິດທິຜົນ.

 

5). ສໍາລັບກົດໝາຍ ວ່າດ້ວຍພະນັກງານ-ລັດຖະກອນ, ກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປຄົ້ນຄ້ວາໃຫ້ລະອຽດ ໂດຍສົມທົບກັບພາກສ່ວນຕ່າງໆ ແລະ ຈັດສໍາມະນາ ໂດຍການເຂົ້າຮ່ວມຂອງຫຼາຍພາກສ່ວນ ເປັນຕົ້ນ ສະຖາບັນວິທະຍາສາດ ແລະ ສັງຄົມ, ພະນັກງານບໍານານ, ພະນັກງານວິທະຍາສາດ ແລະ ອື່ນໆ. ຫຼັງຈາກນັ້ນ, ໃຫ້ສັງລວມເອົາບັນຫາທີ່ເປັນບັນຫາຫຼັກການ, ທິດນໍາ ສະເໜີຕໍ່ກົມການເມືອງ.

6). ກອງປະຊຸມໄດ້ຄົ້ນຄວ້າພິຈາລະນາ ແລະ ເຫັນດີເປັນເອກະພາບ ຮັບຮອງເອົາບົດລາຍງານຂອງກະ ຊວງການຕ່າງປະເທດ ກ່ຽວກັບການນຳໃຊ້ ແລະ ຍົກເລີກການແຈ້ງວີຊາອອກ ສຳລັບບຸກຄົນທີ່ຖືໜັງສືຜ່ານແດນລັດຖະການ ແລະ ການທູດ.

     ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ຊີ້ນຳໃຫ້ບັນດາກະຊວງ ແລະ ພາກສ່ວນທີ່ກ່ຽວຂ້ອງສືບ ຕໍ່ນຳເອົາເອກະສານຕ່າງໆ ທີ່ກ່າວມາຂ້າງເທິງນັ້ນ ນຳໄປປັບປຸງ, ໃຫ້ລະອຽດ,ຈະແຈ້ງ ຕາມຄວາມເຫັນສ່ວນໃຫຍ່ຂອງບັນດາສະມາຊິກລັດຖະບານ ເພື່ອຮັບປະກັນໃຫ້ມີເນື້ອໃນຄົບຖ້ວນ, ຮັດກຸມ, ຊັດເຈນສາ ມາດຈັດຕັ້ງປະຕິບັດໄດ້.

    ສໍາລັບວຽກງານຈຸດສຸມ ທີ່ຕ້ອງຈັດຕັ້ງປະຕິບັດ ແລະ ແກ້ໄຂ ໃນເດືອນສິງຫານີ້, ທ່ານນາຍົກລັດ ຖະມົນຕີ ໄດ້ຮຽກຮ້ອງໃຫ້ສະມາຊິກລັດຖະບານ ເອົາໃຈໃສ່ ດັ່ງນີ້:

1. ໃຫ້ກະຊວງສາທາລະນະສຸກ ເປັນເຈົ້າການສົມທົບກັບບັນດາກະຊວງ-ອົງການ, ແຂວງ, ເມືອງ ແລະ ຮາກຖານ ເພີ່ມທະວີການເອົາໃຈໃສ່ໃນການແກ້ໄຂບັນຫາການລະບາດຂອງໄຂ້ຍຸງລາຍ ແລະ ພະຍາດຕິດຕໍ່ອື່ນໆ ໃນລະດູຝົນນີ້ ຢ່າງເອົາຈິງເອົາຈັງ, ຕ້ອງສູ້ຊົນຈໍາກັດການແຜ່ລະບາດ ແລະ ການເສຍຊີວິດຍ້ອນພະຍາດໄຂ້ຍຸງລາຍໃຫ້ສືບຕໍ່ຫຼຸດລົງເລື້ອຍໆ.

      2. ໃຫ້ກະຊວງກະສິກຳ ແລະ ປ່າໄມ້ ຮີບຮ້ອນສົ່ງທິມງານວິຊາການ ລົງສົມທົບກັບແຂວງ, ເມືອງ ແລະ ພື້ນຖານການຜະລິດຕ່າງໆ ເພື່ອແກ້ໄຂບັນຫາພະຍາດຂອງສັດ ເປັນຕົ້ນ ພະຍາດໝູຫູກໍ່າ ຢູ່ເມືອງໂພນໂຮງ, ແຂວງວຽງຈັນ ແລະ ພະຍາດປາກເປື່ອຍລົງເລັບງົວ-ຄວາຍ, ພະຍາດສັດປີກ ແລະ ອື່ນໆ. ພ້ອມກັນນັ້ນ, ກໍໃຫ້ສືບຕໍ່ຕິດຕາມ ແລະ ຊຸກຍູ້ການປູກພຶດລະດູຝົນ ໃຫ້ບັນລຸຕາມຄາດໝາຍທີ່ວາງໄວ້.

     3. ໃຫ້ກະຊວງການເງິນ, ທະນຄານ ແລະ ກະຊວງອຸດສາຫະກຳ ແລະ ການຄ້າ ເອົາໃຈໃສ່ໃນການຕິດຕາມກວດກາ, ຄຸ້ມຄອງ ແລະ ມີມາດຕະການອັນເໝາະສົມ ໃນການແກ້ໄຂ ແລະ ດັດສົມ ບັນຫາລາຄາສິນຄ້າ ແລະ ອັດຕາແລກປ່ຽນ ທີ່ມີທ່າອ່ຽງເໜັງຕີງໃນທ້ອງຕະຫຼາດປະຈຸບັນ ເພື່ອບໍ່ສົ່ງຜົນກະທົບຕໍ່ອັດຕາເງິນເຟີ້ ທີ່ອາດຈະເກີດຂື້ນ.

     4. ໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເອົາໃຈໃສ່ຕິດຕາມສະພາບດິນຟ້າອາກາດຢ່າງເປັນປະຈຳ ເພື່ອແຈ້ງເຕືອນລ່ວງໜ້າໃຫ້ທົ່ວປະເທດ ໄດ້ຮັບຊາບຢ່າງທັນການ ວ່າຢູ່ແຂວງໃດ, ເມືອງໃດ ມີຄວາມສ່ຽງຈະເກີດມີລົມພະຍຸ ຫຼື ໄພນ້ຳຖ້ວມ ເພື່ອລີກລ້ຽງບໍ່ໃຫ້ເກີດຄວາມເສຍຫານອັນໃຫຍ່ຫຼວງຕໍ່ຊີວິດ ແລະ ຊັບສິນຂອງປະຊາຊົນ. ພ້ອມກັນນັ້ນ, ກໍໃຫ້ຄະນະກຳການຕ້ານໄພພິບັດແຫ່ງຊາດ, ຂັ້ນແຂວງ, ຂັ້ນເມືອງ ກວດກາຄືນການກະກຽມພາຫະນະ, ເຄື່ອງມື, ເງິນ, ກຳລັງຄົນ ແລະ ປັດໃຈອັນຈຳເປັນອື່ນໆ ເພື່ອຮັບມືກັບໄພພິບັດທາງທຳມະຊາດ ທີ່ອາດຈະເກີດຂື້ນ.

     5. ໃຫ້ກະຊວງໂຍທາທິການ ແລະ ຂົນສົ່ງ ເປັນເຈົ້າການ ສົມທົບກັບແຂວງຕ່າງໆກວດກາ ສ້ອມແປງເສັ້ນທາງໃນຕົວເມືອງ, ທາງຫຼວງແຫ່ງຊາດ, ທາງທ້ອງຖິ່ນ ແລະ ຂົວທີ່ເປ່ເພເສຍຫາຍ ຍ້ອນຝົນຕົກໜັກ, ນ້ຳສຸທັ່ງ ຫຼື ດິນເຈື່ອນຖົມ ໃຫ້ວ່ອງໄວທັນການ, ສາມາດຂົນສົ່ງ ແລະ ໂດຍສານ ໄປມາໄດ້ເປັນປົກກະຕິ. ພ້ອມກັນນັ້ນ, ກໍໃຫ້ກະຊວງພະລັງງານ ແລະ ບໍ່ແຮ່ ມີແຜນບໍລິຫານຈັດການອ່າງເກັບນ້ຳເຂື່ອນໄຟຟ້າ ແຕ່ລະບ່ອນໃຫ້ດີ, ທັງມີມາດຕະການກວດກາ ປ້ອງກັນບໍ່ໃຫ້ສາຍສົ່ງໄຟຟ້າ ຢູ່ພາຍໃນ ແລະ ສົ່ງອອກໄປຕ່າງປະເທດ ຖືກຕັດຂາດ.

     6. ໃຫ້ບັນດາກະຊວງ, ອົງການ ແລະ ທ້ອງຖິ່ນ ຮີບຮ້ອນຜັນຂະຫຍາຍ ແລະ ຈັດຕັ້ງປະຕິບັດມະຕິຕົກລົງ ຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VII ເປັນຕົ້ນ ແຕ່ນີ້ຫາທ້າຍສະໄໝ ຂອງແຜນພັດທະນາ ສະບັບທີ VII ຢ່າງມີເປົ້າໝາຍ, ມີຕົວເລກຄາດໝາຍ, ມີແຜນ ການ, ແຜນງານ ແລະ ໂຄງການອັນໃດທີ່ຂະແໜງການຕົນ ຍັງມີບັນຫາ ກໍໃຫ້ສຸມທຸກກຳລັງເຂົ້າໃສ່ຈັດຕັ້ງປະຕິບັດໃຫ້ບັນລຸ. ພ້ອມກັນນັ້ນ, ກໍໃຫ້ເອົາໃຈໃສ່ແກ້ໄຂບັນຫາທີ່ກ່ຽວຂ້ອງກັບກະຊວງ, ຂະແໜງການຕົນ ທີ່ປະຊາຊົນສະເໜີຜ່ານໂທລະສັບສາຍດ່ວນ ໃນເວລາດຳເນີນກອງປະຊຸມສະພາແຫ່ງຊາດນັ້ນ ໃຫ້ດີມີເຫດມີຜົນ ແລະ ມີຄວາມຮັບຜິດຊອບຢ່າງແທ້ຈິງ.

     7. ໃຫ້ທຸກກະຊວງ, ອົງການ ແລະ ທ້ອງຖິ່ນຮາກຖານ ເອົາໃຈໃສ່ວຽກງານປ້ອງກັນພາຍໃນ, ປ້ອງກັນຄວາມສະຫງົບສຸກຂອງບ້ານເມືອງ, ແກ້ໄຂໃຫ້ໄວ ແລະ ຖືກເປົ້າໝາຍ ກ່ຽວກັບການເຄື່ອນໄຫວຂອງພວກຄົນບໍ່ດີ, ພວກຂີ້ລັກ ປຸ້ນຈີ້, ທີ່ເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ. ພ້ອມກັນນັ້ນ, ກໍໃຫ້ເອົາໃຈໃສ່ກະກຽມກອງປະຊຸມສາກົນ ທີ່ກະຊວງຕ່າງໆ ຈະໄດ້ເປັນເຈົ້າພາບ ຕາມຂອບຂອງອາຊຽນ ແລະ ການຮ່ວມມືສາກົນອື່ນໆ.

     8. ໃຫ້ບັນດາສະຫາຍ ຮອງນາຍົກລັດຖະມົນຕີ ຕິດຕາມ ກວດກາ ແລະ ຊີ້ນຳບັນດາກະຊວງ, ອົງການທີ່ກ່ຽວຂ້ອງ ໃນການກະກຽມເນື້ອໃນກອງປະຊຸມລັດຖະບານປະຈຳປີ 2013, ຊຶ່ງຈະໄດ້ຈັດຂື້ນໃນກາງເດືອນກັນຍານີ້ ຕາມການມອບໝາຍ.

     9. ເດືອນສິງຫາ ເປັນເດືອນປະກາດໃຊ້ລັດຖະທຳມະນູນ, ສະເໜີໃຫ້ສະຫາຍສະມາຊິກລັດຖະ ບານ ຖືເອົາເດືອນນີ້ ເປັນການເຜີຍແຜ່ແນະນຳກົດໝາຍ ເປັນຕົ້ນ ກົດໝາຍຂອງຂະແໜງການຕົນ, ຈັດຕັ້ງສຳມະນາກົດໝາຍ ວ່າດ້ວຍລັດຖະບານ ແລະ ກົດໝາຍ ວ່າດ້ວຍການປົກຄອງທ້ອງຖິ່ນ.