ຜົນຂອງກອງປະຊຸມລັດຖະບານ ສະໄໝສາມັນ ປະຈຳເດືອນ ມັງກອນ 2013

ຜູ້ຂຽນ: ທ່ານ ນ. ບຸນເພັງ ມູນໂພໄຊ

ວັນອັງຄານ, 25 ມິ.ຖ 2013 17:00

​   ແຕ່ວັນທີ 21 ຫາ 23 ມັງກອນ 2013 ກອງປະຊຸມລັດຖະບານສະໄໝສາມັນ ປະຈຳເດືອນ ມັງກອນ 2013 ໄດ້ດຳເນີນທີ່ຫ້ອງວ່າການລັດຖະບານ ພາຍໃຕ້ການ ເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ  ໂດຍການເຂົ້າຮ່ວມຂອງບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ. ພິເສດກອງ ປະຊຸມໃນຄັ້ງນີ້ ໄດ້ຮັບຟັງການໂອ້ລົມຂອງ ທ່ານ ຄຳໄຕ ສີພັນດອນ, ອະດີດປະທານພັກ, ປະທານປະເທດ ແລະ ນາຍົກລັດຖະມົນຕີ. ກອງປະຊຸມຄັ້ງນີ້ ໄດ້ປຶກ ສາຫາ ລື ແລະ ຕົກລົງຫຼາຍບັນຫາທີ່ສຳຄັນ ດັ່ງນີ້:
  1. ກອງປະຊຸມໄດ້ຮັບຟັງລາຍງານ ແລະ ຮັບຮອງເອົາບົດສະຫຼຸບຂາດຕົວ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນເງິນຕາ ແລະ ແຜນງົບປະ ມານແຫ່ງລັດ ປະຈຳສົກປີ  2011-2012 ແລະ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນເງິນຕາ, ງົບປະມານແຫ່ງລັດ ໄຕມາດ I ແລະ ຄາດຄະເນທ່າອ່ຽງ ແລະ ຄວາມອາດສາມາດໃນການ ປະຕິບັດແຜນ ໄຕມາດ II ສົກປີ 2012-2013, ເຖິງວ່າການພັດທະນາ ໄດ້ຮັບຜົນກະທົບຫຼາຍຢ່າງ ທັງຈາກພາຍ ໃນ ແລະ ພາຍນອກ ແຕ່ບັນດາຂະແໜງການ ແລະ ພາກສ່ວນທີ່ກ່ຽວຂ້ອງ ໄດ້ສຸມ ໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນເງິນຕາ ແລະ ແຜນງົບ ປະມານ ໂດຍສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IX ຢ່າງແຂງແຮງບົນຈິດໃຈ 4 ບຸກທະ ລຸ ແລະ ທິດນຳການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງ ຮອບດ້ານ ແລະ ສ້າງບ້ານເປັນຫົວໜ່ວຍພັດທະນາຂອງພັກ ຈຶ່ງເຮັດໃຫ້ເສດຖະກິດມະຫາພາກ ມີສະຖຽນລະພາບ ແລະ ຄວາມໝັ້ນ ທ່ຽງ, ການພັດທະນາສັງຄົມມີ ບາດກ້າວປ່ຽນແປງໃໝ່, ທົ່ວສັງຄົມມີຄວາມສະຫງົບ, ປອດໄພ ດີຂຶ້ນເປັນກ້າວໆ.
  2. ກອງປະຊຸມ ໄດ້ປຶກສາຫາລື ແລະ ໃຫ້ການຊີ້ນໍາຕໍ່ການຈັດສັນການຈາລະຈອນ ໃນນະຄອນຫຼວງ ວຽງຈັນ ໃຫ້ມີຄວາມເປັນລະບຽບຮຽບຮ້ອຍ ໂດຍກໍານົດມາດ ຕະການ, ວິທີການແກ້ໄຂໃນສະເພາະ ໜ້າ ແລະ ຍາວນານ ໂດຍຈະໄດ້ສຸມໃສ່ສຶກສາອົບຮົມ ສະຕິການຈາລະຈອນໃຫ້ທຸກພາກສ່ວນ ດ້ານ ລະບຽບການ ແລະ ພຶດຕິ ກຳໃນການຂັບຂີ່, ປະຊາສຳພັນຜ່ານສື່ຕ່າງໆດ້ວຍຫຼາຍຮູບຫຼາຍສີ, ດຶງ ເອົາການເຂົ້າມາມີສ່ວນຮ່ວມຂອງສັງຄົມ ແລະ ເພີ່ມທະວີກວດກາການປະຕິບັດລະບຽບສຳລັບ ການຈາລະຈອນ, ປະ ຕິບັດກົດໝາຍຜັງເມືອງ ຢ່າງເຂັ້ມງວດ, ສ້າງບັນດານິຕິກຳ ແລະ ລະບຽບ ການຮອງຮັບແກ່ການແກ້ໄຂ ບັນຫາການຈາລະຈອນແອອັດ, ປັບປຸງ ແລະ ພັດທະນາອຸປະກອນ ແລະ ເຄື່ອງມື ສໍາລັບການຈາລະ ຈອນ, ກຳນົດບ່ອນຈອດລົດ, ການປຸກສ້າງຫ້າງຮ້ານ, ສາງໃຫ້ ເໝາະສົມ, ກໍານົດ ແລະ ຈັດສັນເສັ້ນ ທາງເດີນລົດດ້ວຍການກຳນົດ ລະບົບ ແລະ ເວລາໃນການ ນຳໃຊ້ຖະໜົນ, ຈັດສັນເວລາ ສຳລັບການເດີນລົດປະເພດຕ່າງໆ ແລະ ພັດທະນາລະບົບຂົນສົ່ງ ມວນຊົນ. ກຳນົດເວລາເຂົ້າຮຽນ ຂອງນັກຮຽນ ແລະ ເວລາເຮັດວຽກຂອງພາກລັດຄືນໃໝ່. ສຳ ລັບໄລຍະຍາວແມ່ນວາງແຜນສ້າງທາງໂດຍແມ່ນລັດ ແລະ ເອກະຊົນ ມີສ່ວນຮ່ວມ ຢ່າງຕັ້ງໜ້າ ແນໃສ່ຮັບປະກັນໄດ້ການແກ້ໄຂບັນຫາການຈາລະຈອນແອອັດ ຢູ່ນະ ຄອນຫຼວງວຽງຈັນ.
  3. ກອງປະຊຸມເຫັນດີຮັບຮອງເອົາ ທິດທາງ, ໜ້າທີ່ຈຸດສຸມ ໃນການພັດທະນາ ເມືອງຮົ່ມ ແລະ ເມືອງໄຊສົມບູນ, ແຂວງວຽງຈັນ ແຕ່ນີ້ຮອດປີ 2015 ເພື່ອສ້າງສະ ພາບແວດລ້ອມທີ່ອຳນວຍ, ສ້າງໃຫ້ ເປັນເມືອງທີ່ເຂັ້ມແຂງຮອບດ້ານ, ພັດທະນາພື້ນຖານໂຄງລ່າງ ແລະ ຫັນປ່ຽນໂຄງປະ ກອບເສດຖະກິດ, ພັດທະນາດ້ານສັງຄົມ, ໃຫ້ສົມຄູ່ຢູ່ຂົງເຂດດັ່ງກ່າວ ໃຫ້ໄດ້ຮັບການພັດທະນາ ຢ່າງຮອບດ້ານ, ເຮັດໃຫ້ປະ ຊາຊົນບັນດາເຜົ່າ ມີຊີວິດທີ່ດີຂຶ້ນຢ່າງຈະແຈ້ງກວ່າທຸກໄລຍະທີ່ຜ່ານມາ ຊຶ່ງບັນດາຂະ ແໜງການ ທັງສູນ ກາງ ແລະ ທ້ອງຖິ່ນ ຈະຕ້ອງສຸມທຸກກຳລັງຂອງຕົນ ໃສ່ພາກປະ ຕິບັດຕົວຈິງຢ່າງເອົາຈິງເອົາຈັງ ໃນທຸກດ້ານ.
  4. ກອງປະຊຸມໄດ້ຮັບຮອງເອົາຮ່າງດຳລັດ ວ່າດ້ວຍການແຈ້ງຊັບສິນ ແລະ ໜີ້ສິນ ເພື່ອກຳນົດ ຫຼັກ ການ, ລະບຽບການ ແລະ ມາດຕະການກ່ຽວກັບການແຈ້ງຊັບສິນ ແລະ ໜີ້ສິນ ສຳລັບພະນັກງານ ນຳພາ-ຄຸ້ມຄອງແຕ່ລະຂັ້ນ ແນໃສ່ສະກັດກັ້ນ ຕ້ານການສໍ້ລາດບັງຫຼວງ ແລະ ສ້າງຄວາມໂປ່ງໃສ ໃນກົງ ຈັກການຈັດຕັ້ງຂອງພັກ-ລັດ ກໍ່ຄື ໃນຖັນແຖວພະນັກງານ, ລັດຖະກອນ ແລະ ປະກອບ ສ່ວນໃນການ ສ້າງສາ ແລະ ພັດທະນາລັດແຫ່ງກົດໝາຍເທື່ອລະກ້າວ.
  5. ກອງປະຊຸມໄດ້ຮັບຮອງເອົາບົດລາຍງານ ກ່ຽວກັບການປ່ຽນແປງຂອງສະພາບດິນຟ້າອາກາດ ສະບັບທີ 2 ເພື່ອຈັດຕັ້ງປະຕິບັດສົນທິສັນຍາວ່າດ້ວຍ ການປ່ຽນແປງ ດິນຟ້າອາກາດທີ່ປະເທດເຮົາ ເປັນ ພາຄີ ແລະ ສອດຄ່ອງກັບສະພາບການພັດທະນາເສດຖະກິດ-ສັງຄົມ ຕົວຈິງ ຊຶ່ງໄດ້ສຶກສາ ແລະ ສຳ ຫຼວດ ສະພາບການປ່ອຍອາຍ ພິດເຮືອນແກ້ວໃນປະເທດ, ຕີລາຄາ ແລະ ປະເມີນຂີດ ຄວາມສາມາດ ການເຄື່ອນໄຫວວຽກງານດັ່ງກ່າວ, ປັບປຸງນະໂຍບາຍ ແລະ ຍົກລະດັບວິຊາການ ແນໃສ່ວາງ ມາດຕະ ການລະອຽດ, ສ້າງແຜນຮັບມືຜົນກະທົບ ແລະ ການປັບຕົວໃຫ້ທັນກັບສະ ພາບການປ່ຽນແປງຂອງສະພາບດິນຟ້າອາກາດ. ທັງໝົດນີ້ ເພື່ອຮັບປະກັນໃຫ້ແກ່ ການພັດທະ ນາເສດຖະກິດ ແລະ ສັງຄົມ ມີຄວາມຍືນຍົງ.
  6. ກອງປະຊຸມເຫັນດີດ້ານຫຼັກການຮັບຮອງເອົາ ຮ່າງດຳລັດ ວ່າດ້ວຍສັງຄົມສົງເຄາະ ແລະ   ບົດ ລາຍງານຜົນການຈັດຕັ້ງປະຕິບັດດຳລັດ 70/ນຍ ວ່າດ້ວຍລະ ບອບປະກັນສັງຄົມພາກລັດ. ຊຶ່ງຈຸດປະສົງຂອງຮ່າງດໍາລັດດັ່ງກ່າວ ເພື່ອກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງປະຕິບັດ ນະໂຍບາຍ ສັງຄົມສົງເຄາະໃຫ້ແກ່ຜູ້ປະສົບໄພ ແລະ ຜູ້ດ້ອຍໂອກາດ ໃຫ້ໄດ້ ຮັບການ ຊ່ວຍເຫຼືອ ແລະ ການບໍລິການ ຢ່າງມີປະສິດທິພາບ, ເປັນທຳ ແລະ ທົ່ວເຖິງ ແນໃສ່ແກ້ ໄຂຊີວິດການເປັນຢູ່ທາງດ້ານວັດຖຸ ແລະ ຈິດໃຈ ໃນຂັ້ນພື້ນຖານ ປະກອບສ່ວນເຂົ້າໃນການລຶບ ລ້າງຄວາມທຸກຍາກ ຂອງລັດຖະບານ. ພ້ອມນັ້ນ, ບົດລາຍງານດັ່ງກ່າວ ໄດ້ຊີ້ໃຫ້ເຫັນຜົນສຳເລັດ ໃນຫຼາຍດ້ານ, ຂໍ້ຄົງຄ້າງ ແລະ ບັນຫາທີ່ຈະຕ້ອງໄດ້ຮັບການປັບປຸງ ແລະ ແກ້ໄຂ ໃນການຈັດຕັ້ງປະ ຕິບັດ ດຳລັດ 70/ນຍ ວ່າດ້ວຍລະບອບ ປະກັນສັງຄົມພາກລັດ ເພື່ອພັດທະນາວຽກງານປະກັນ ສັງຄົມ ໃຫ້ສອດຄ່ອງກັບການພັດທະນາເສດຖະກິດ-ສັງຄົມ, ປັບປຸງກົນໄກລະບົບການເຮັດວຽກ ລະບອບລະ ບຽບການ ແລະ ນິຕິກຳຕ່າງໆ ກ່ຽວກັບການຄຸ້ມຄອງວຽກງານປະກັນສັງຄົມໃຫ້ດີຂື້ນ ກວ່າເກົ່າແນໃສ່ຮັບປະກັນການຈັດຕັ້ງຜັນຂະຫຍາຍແຜນຍຸດທະສາດການພັດທະນາສະຫວັດດີການສັງຄົມ ໄລຍະປີ 2011-2020 ໃຫ້ປາກົດຜົນເປັນຈິງ.
  7. ກອງປະຊຸມເຫັນດີຮັບຮອງເອົາ ຮ່າງດຳລັດ ວ່າດ້ວຍກອງທຶນຢາສູບ ເພື່ອກຳນົດຫຼັກການ, ລະບຽບການ ແລະ ການຄຸ້ມຄອງ ການນຳໃຊ້ແຫຼ່ງທຶນ ແລະ ການ ກວດກາກອງທຶນຢາສູບ ເພື່ອລະດົມທຶນພາຍໃນ ແລະ ຕ່າງປະເທດ ຮັບໃຊ້ວຽກງານຄວບຄຸມຢາສູບ ແນໃສ່ສົ່ງເສີມປະຊາຊົນ ສາມາດເຂົ້າເຖິງການບໍລິການ ແລະ ມີ ສຸຂະພາບ ທີ່ແຂງແຮງ. 
  ພິເສດ ໃນກອງປະຊຸມຄັ້ງນີ້ ໄດ້ຮັບຟັງການໂອ້ລົມຂອງທ່ານ ຄຳໄຕ ສີພັນດອນ, ອະດີດປະ ທານພັກ, ປະທານປະເທດ ແລະ ນາຍົກລັດຖະມົນຕີ ຊຶ່ງທ່ານໄດ້ຊີ້ນຳ ໃຫ້ສະມາຊິກລັດຖະບານ ຖອດຖອນບົດຮຽນ ທັງດ້ານດີ ແລະ ດ້ານຄົງຄ້າງ ເພື່ອສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ບົນພື້ນຖານຈິດໃຈ 4 ບຸກທະລຸ ແລະ ທິດນຳການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາໃຫ້ປາກົດຜົນ ເປັນຈິງ.
  ຕອນທ້າຍທ່ານປະທານກອງປະຊຸມ ໄດ້ຮຽກຮ້ອງໃຫ້ສະມາຊິກລັດຖະບານ ເອົາໃຈໃສ່ຈັດຕັ້ງປະ ຕິບັດວຽກງານຈຸດສຸມຈຳນວນໜຶ່ງ ໃນເດືອນ ກຸມພາ 2013 ດັ່ງນີ້:
  1. ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານກໍ່ສ້າງຮາກຖານ ແລະ ອື່ນໆ. ພ້ອມນັ້ນ, ກໍ່ແກ້ໄຂປະກົດການຫຍໍ້ທໍ້ຕ່າງໆ ທີ່ເປັນບັນຫາ ເຄັ່ງຮ້ອນ.
  2. ຍູ້ແຮງຂະບວນການຈັດຕັ້ງປະຕິບັດວຽກງານ 3 ສ້າງ ຕິດພັນກັບການຊີ້ນຳບັນຊາ ແລະ ກວດກາ ຢ່າງແທດເຖິງ. 
  3. ເອົາໃຈໃສ່ ກະກຽມກອງປະຊຸມ ຄະນະຮັບຜິດຊອບຊີ້ນຳວຽກງານ 3 ສ້າງ ຮ່ວມກັບຄະນະຊີ້ນຳຂັ້ນກະຊວງ, ນະຄອນຫຼວງ ແລະ ບັນດາແຂວງໃນທົ່ວປະເທດ ໃນຕົ້ນເດືອນກຸມພາ ນີ້.
  4. ເອົາໃຈໃສ່ຍູ້ແຮງການຜະລິດລະດູແລ້ງ ຕິດພັນກັບການຊຸກຍູ້ການຜະລິດເປັນສິນຄ້າ ຂອງປະຊາຊົນ.
  5. ເອົາໃຈໃສ່ຜັນຂະຫຍາຍຈິດໃຈຊີ້ນຳຂອງສະຫາຍ ຄຳໄຕ ສີພັນດອນ, ອະດີດປະທານພັກ, ປະທານປະເທດ ຕໍ່ກອງປະຊຸມເທື່ອນີ້ ເພື່ອນຳໄປຈັດຕັ້ງປະຕິບັດໃຫ້ ເກີດໝາກເກີດຜົນຕົວຈິງ.