ບົດແຈ້ງຂ່າວຜົນກອງປະຊຸມລັດຖະບານ ສະໄໝສາມັນປະຈໍາເດືອນ ພະຈິກ 2018

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນອັງຄານ, 20 ພ.ຈ 2018 10:00

​​​​​​​​​​ກອງປະຊຸມລັດຖະບານສະໄໝສາມັນ ປະຈໍາເດືອນ ພະຈິກ 2018 ໃນມື້ທີສອງໄດ້ດໍາເນີນໃນວັນທີ 19 ພະຈິກ 2018, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ. 
   
​​​​​​​​​ກອງປະຊຸມ ຄັ້ງນີ້ ໄດ້ພ້ອມກັນສຸມໃສ່ພິຈາລະນາ, ປະກອບຄໍາເຫັນເຂົ້າໃສ່ 5 ເອກະສານສໍາຄັນ ດັ່ງນີ້: 
​​​​​1. ບົດລາຍງານ ກ່ຽວກັບສະພາບການພົ້ນເດັ່ນໃນການເຄື່ອນໄຫວວຽກງານພົ້ນເດັ່ນຂອງລັດຖະບານ ໃນໄລຍະຜ່ານມາ ແລະ ທິດທາງວຽກງານຈຸດສຸມ ໃນຕໍ່ໜ້າ.
​​​​​2. ບົດລາຍງານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດ ຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 02/ນຍ ວ່າດ້ວຍການຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດມະຫາພາກ.
​​​​​3. ຮ່າງດໍາລັດ ວ່າດ້ວຍກອງທຶນສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ.
​​​​​4. ຮ່າງດໍາລັດ ວ່າດ້ວຍການປະເມີນຜົນກະທົບຕໍ່ສິ່ງແວດລ້ອມ 
​​​​​​5. ຍຸດທະສາດວ່າດ້ວຍການເຕີບໂຕສີຂຽວ ແຫ່ງຊາດ ຮອດປີ 2030.
​​​​​- ຕໍ່ກັບບົດລາຍງານ ກ່ຽວກັບສະພາບການເຄື່ອນໄຫວວຽກງານພົ້ນເດັ່ນຂອງລັດຖະບານ ໃນໄລ ຍະຜ່ານມາ ແລະ ທິດທາງວຽກງານຈຸດສຸມ ໃນຕໍ່ໜ້າ ແລະ ບົດລາຍງານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດ ຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 02/ນຍ ວ່າດ້ວຍການຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດມະຫາພາກ, ກອງປະຊຸມ ເຫັນດີເປັນເອກະພາບຮັບຮອງເອົາ ແລະ ໄດ້ຊີ້ນໍາໃຫ້ພາກ ສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາຄິດຄໍາເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນຈະ ແຈ້ງ, ຮັດກຸມ ແລະ ມີເຫດມີຜົນ ເພື່ອເປັນຂໍ້ມູນທີ່ເປັນລະບົບຄົບຊຸດເພື່ອນໍາສະເໜີຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ເພື່ອພິຈາລະນາຮັບຮອງ.
​​​​​- ສໍາລັບຮ່າງດໍາລັດ ວ່າດ້ວຍກອງທຶນທຸລະກິດຂະໜາດນ້ອຍ ແລະ ຂະໜາດກາງ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຄືນຕາມການປະກອບຄໍາຄິດຄໍາເຫັນຂອງສະມາຊິກລັດຖະບານ ແລ້ວນໍາມາ ສະເໜີຜ່ານກອງປະຊຸມນາຍົກ-ຮອງນາຍົກ ພິຈາລະນາຕົກລົງ.
​​​​​​- ສຳລັບຮ່າງດໍາລັດວ່າດ້ວຍການປະເມີນຜົນກະທົບຕໍ່ສິ່ງແວດລ້ອມ ແລະ ຍຸດທະສາດເຕີບໂຕສີຂຽວ ແຫ່ງຊາດ ຂອງ ສປປ ລາວ, ກອງປະຊຸມໄດ້ຮັບຮອງເອົາໃນດ້ານຫຼັກການ ໂດຍມອບໃຫ້ພາກສ່ວນທີ່ກ່ຽວຂ້ອງນໍາໄປປັບປຸງໃຫ້ຮັດກຸມຕື່ມແລ້ວຈຶ່ງປະກາດໃຊ້ເປັນທາງການ.
​​​​​ນອກຈາກເນື້ອໃນດັ່ງກ່າວ, ກອງປະຊຸມ ໄດ້ເປັນເອກະພາບ ແລະ ຕັດສິນໃຈສູງ ເພື່ອພ້ອມກັນຈັດຕັ້ງປະຕິບັດວຽກງານຈຸດສຸມ ໃນເດືອນ ທັນວາ 2018 ດັ່ງນີ້:
​​​​​1. ໃຫ້ກະຊວງປ້ອງກັນຄວາມສະຫງົບ ສົມທົບກັບພາກສ່ວນທີ່ກ່ຽວຂ້ອງ ສືບຕໍ່ເພີ່ມທະວີຄວາມເອົາໃຈ ໃສ່ຕໍ່ວຽກງານຮັກສາຄວາມສະຫງົບ, ຄວາມເປັນລະບຽບ ຮຽບຮ້ອຍໃນສັງຄົມ, ໂດຍເອົາໃຈໃສ່ການແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນບັນດາໜໍ່ແໜງຂອງອາຊະຍາກຳ, ຄ້າມະນຸດ, ການຂີ້ລັກງັດແງະ, ການຄ້າຂາຍ ແລະ ເສບຢາເສບຕິດ, ການມົ້ວສຸມຂີ່ລົດກວນເມືອງ, ອັກຄີໄພ, ການໃຊ້ສື່ອອນລາຍເຄື່ອນໄຫວແບ່ງແຍກ ແລະ ຍຸແຍ່ໃຫ້ປະຊາຊົນເຂົ້າໃຈຜິດ ຕໍ່ການຈັດຕັ້ງຂອງພວກເຮົາ ແລະ ການເຄື່ອນໄຫວ ທີ່ບໍ່ສອດຄ່ອງກັບກົດໝາຍ ແລະ ລະບຽບການອື່ນໆ.   
​​​​​2. ໃຫ້ກະຊວງການຕ່າງປະເທດ ສືບຕໍ່ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນ ໂດຍມີການວິເຄາະວິໃຈເລີກເຊິ່ງກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມ ທີ່ອາດມີຕໍ່ປະເທດເຮົາ. ພ້ອມນີ້ກໍ່ກະກຽມຕ້ອບຮັບ ແລະ ເປັນເຈົ້າພາບຈັດກອງປະຊຸມຮ່ວມກັບລັດຖະບານກໍາປູເຈຍ ແລະ ລັດຖະບານຣາຊະອານາຈັກໄທ.
​​​​​3. ໃຫ້ກະຊວງແຜນການ ແລະ ການລົງທຶນ ຄົ້ນຄວ້າ ແລະ ປະກອບຄໍາເຫັນຕໍ່ຮ່າງມະຕິຂອງກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 6 ພ້ອມທັງສົມທົບກັບພາກສ່ວນກ່ຽວຂ້ອງຮີບຮ້ອນກະກຽມຮ່າງດໍາລັດ ວ່າດ້ວຍການຜັນຂະຫຍາຍການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປີ 2019 ໃຫ້ໄດ້ອອກໃນເດືອນ 12 ແລະ ເລີ່ມຈັດຕັ້ງປະຕິບັດໃນຕົ້ນເດືອນມັງກອນ ປີ 2019 ນີ້.
​​​​​4. ໃຫ້ກະຊວງການເງິນ ສືບຕໍ່ສຸມໃສ່ວຽກງານຄຸ້ມຄອງການເກັບລາຍຮັບໃຫ້ໄປຕາມແຜນງວດ ຊຶ່ງໃນປີ 2018 ພວກເຮົາມີເວລາພຽງແຕ່ເດືອນສຸດທ້າຍແລ້ວ. ພ້ອມນີ້ ໃນປີ 2019 ພວກເຮົາຕ້ອງໃຫ້ມີວິທີການຈັດເກັບລາຍຮັບ ໂດຍນໍາໃຊ້ເຄື່ອງມືທັນສະໄໝໃຫ້ຫລາຍຂຶ້ນກວ່າເກົ່າ ແລະ ເລີ່ມຕົ້ນແຕ່ຫົວທີໂລດ; ພ້ອມນີ້, ກໍ່ໃຫ້ຮີບຮ້ອນຈັດສັນງົບປະມານລົງທຶນຂອງລັດ ເພື່ອຊໍາລະໜີ້ໂຄງການລົງ ທຶນຂອງລັດ ໃນປີ 2019  ໃຫ້ມີຄວາມເໝາະສົມ ທັງຮັບປະກັນຄວາມໂປ່ງໃສ ຍຸຕິທໍາ ເພື່ອຫຼີ້ກລ້ຽງການຈົ່ມວ່າຂອງຜູ້ປະກອບການຕໍ່ການນໍາພວກເຮົາ.
​​​​​5. ໃຫ້ກະຊວງໂຍທາທິການ ແລະ ຂົນສົ່ງ ສືບຕໍ່ຕິດຕາມ ແລະ ກວດກາຄຸນນະພາບຂອງການສ້ອມແປງຖະໜົນຫົນທາງ ທີ່ໄດ້ຮັບຜົນກະທົບຈາກໄພ ທໍາມະຊາດ ຢູ່ທ້ອງຖິ່ນຕ່າງໆ ເພື່ອອໍານວຍຄວາມສະດວກໃນການຂົນສົ່ງ ແລະ ແຈກຢາຍສິນຄ້າຂອງປະຊົນ ກໍຄືຜູ້ປະກອບການໃຫ້ເປັນປົກກະຕິ. ພ້ອມກັນນີ້, ກໍ່ໃຫ້ຫ້ອງວ່າການສໍານັກງານນາຍົກລັດຖະມົນຕີ ປະສານສົມທົບກັບຂະແໜງການທີ່ກ່ຽວຂ້ອງຄົ້ນຄວ້າອອກແຈ້ງການທີ່ຈະແຈ້ງ ແລະ ປະ ຕິບັດໄດ້ໃນການປະຕິບັດນະໂຍບາຍພິເສດກ່ຽວກັບທີ່ດິນ, ໄຟຟ້າ ແລະ ສິ່ງອໍານວຍຄວາມສະດວກຕ່າງໆ ຕໍ່ປະຊາຊົນ ແລະ ຜູ້ປະກອບການຢູ່ເຂດທີ່ໄດ້ຮັບຜົນກະທົບຈາກໄພພິບັດໃນປີນີ້.
​​​​​6. ໃຫ້ຫ້ອງວ່າການສໍານັກງານນາຍົກລັດຖະມົນຕີ ປະສານສົມທົບກັບຄະນະຮັບຜິດຊອບ, ອົງການປົກ ຄອງແຂວງ ແລະ ພາກສ່ວນກ່ຽວຂ້ອງກະກຽມຄວາມພ້ອມໃນທຸກດ້ານ ແລະ ສ້າງເງື່ອນໄຂໃຫ້ຮອບດ້ານ ກະກຽມສະເຫຼີມສະຫຼອງເມືອງວຽງໄຊ ຄົບຮອບ 50 ປີ ທີ່ແຂວງຫົວພັນ ແລະ ການສະເຫຼີມສະຫຼອງວັນຊາດ ຄົບຮອບ 43 ປີ ໃຫ້ມີຄວາມຮັບປະກັນທາງດ້ານເນື້ອໃນ, ຄວາມສະຫງົບ, ປອດໄພ, ຂະບວນການ, ຄວາມປະຍັດມັດທະຢັດ.
​​​​​7. ໃຫ້ບັນດາຂະໜງການ ທີ່ຈະຕາງໜ້າລັດຖະບານ ລາຍງານຕໍ່ກອງປະຊຸມສະພາແຫ່ງຊາດ ສະໄໝສາ ມັນ ເທື່ອທີ 6 ກະກຽມບັນດາເອກະສານ ໃຫ້ຮອບຄອບຮັດກຸມ, ແລະ ເປັນເອກະພາບກັນສູງ ເພື່ອລາຍງານ ແລະ ຊີ້ແຈງຕໍ່ກອງປະຊຸມສະພາ ຄັ້ງທີ່ຈະມາເຖິງນີ້, ພ້ອມນີ້ ລັດຖະບານ ຈະໄດ້ຜ່ານຮ່າງກົດໝາຍ ທັງໝົດ 09 ສະບັບ. 
​​​​​8. ໃຫ້ກະຊວງກະສິກໍາ ແລະ ປ່າໄມ້ ແລະ ບັນດາຂະແໜງການ ແລະ ທ້ອງ ຖິ່ນໃນຂອບເຂດທົ່ວປະ ເທດ ເອົາໃຈໃສ່ກະກຽມຮອບດ້ານໃຫ້ແກ່ການຜະລິດລະດູແລ້ງ, ປູກພຶດ ເປັນສິນຄ້າໃຫ້ເປັນລະບົບ ແລະ ຕໍ່ເນື່ອງ ເປັນຂະບວນຟົດຟຶື້ນ ເພື່ອສ້າງໃຫ້ປະຊາຊົນມີລາຍຮັບຈາກການຂາຍຜົນຜະລິດ ນັບມື້ນັບຫລາຍຂຶ້ນ ຈາກຄອບຄົວທີ່ທຸກຍາກ ກາຍເປັນຄອບຄົວທີ່ຮັ່ງມີ. ພ້ອມນີ້, ກໍ່ໃຫ້ກະຊວງສາທາລະນະສຸກ ສືບຕໍ່ເຝົ້າລະວັງພະຍາດຕິດແປດຈາກສັດຕໍ່ຄົນ ພ້ອມທັງປະສານສົມທົບກັບກະຊວງກະສິກໍາ ແລະ ປ່າໄມ້ຄຸ້ມຄອງ ແລະ ກວດກາຜົນຜະລິດກະສິກໍາ ແລະ ສິນຄ້າບໍລິໂພກ ເພື່ອຮັບປະກັນຄວາມປອດໄພຕໍ່ສຸຂະພາບຂອງປະຊາຊົນ ກໍຄືຜູ້ບໍລິໂພກ.
​​​​​9. ໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ສະຫຼຸບການຈັດຕັ້ງປະຕິບັດປີທ່ອງທ່ຽວລາວ 2018, ຖອດຖອນບົດຮຽນ ແລະ ກະກຽມໃຫ້ດີກວ່າເກົ່າ ໃນການເປີດປີທ່ອງທ່ຽວ ລາວ-ຈີນ ໃນປີ 2019 ນີ້ ເພື່ອນໍາໃຊ້ທ່າແຮງຂອງປີທ່ອງທ່ຽວດັ່ງກ່າວໃນການຊຸກຍູ້ການເຕີບໂຕຂອງເສດຖະກິດ ແລະ ເສີມຂະຫຍາຍສາຍພົວ ພັນຮ່ວມມືຍຸດທະສາດ ຕາມທິດ 4 ດີ ລະຫວ່າງ ສອງຊາດລາວ-ຈີນ. ພ້ອມກັນນີ້, ໃຫ້ເອົາໃຈໃສ່ສົມທົບກັບຂະແໜງການກ່ຽວຂ້ອງ ເພື່ອຄຸ້ມຄອງສື່ຕ່າງໆ ລວມທັງສື່ອ່ອນລາຍ ຕາມກົດໝາຍ ແລະ ລະບຽບການຂອງ ສປປ ລາວ.
​​​​​10. ໃຫ້ບັນດາຂະແໜງການສູນກາງ ແລະ ອົງການປົກຄອງທ້ອງຖິ່ນທຸກຂັ້ນ ຍົກສູງຄວາມເປັນເຈົ້າການປະຕິບັດພາລະບົດບາດຂອງຕົນໃຫ້ຄົບຖ້ວນ ໂດຍສະເພາະ ເອົາໃຈໃສ່ ແລະ ເຂັ້ມງວດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ວຽກງານຈຸດສຸມຂອງຕົນ ໃຫ້ມີປະສິດທິຜົນສູງ.
​​​​​​ໃນຕອນທ້າຍ, ກອງປະຊຸມ ໄດ້ຮຽກຮ້ອງໃຫ້ພະນັກງານ, ສະມາຊິກພັກ, ລັດຖະກອນ, ທະຫານ, ຕໍາຫຼວດ, ກໍາມະກອນ, ນັກຮຽນຮູ້-ປັນຍາຊົນ, ນັກທຸລະກິດ, ຜູ້ປະກອບການ ທັງພາກລັດ ແລະ ເອກະຊົນ, ປະຊາຊົນເຜົ່າຕ່າງໆ ຈົ່ງເພີ່ມທະວີຄວາມສາມັກຄີເປັນປຶກແຜ່ນ ພ້ອມກັນຈັດຕັ້ງປະຕິບັດສອງໜ້າທີ່ຍຸດທະສາດ: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ໝັ້ນຄົງເຂັ້ມແຂງ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ