ຖະແຫຼງຂ່າວຂອງທ່ານນາຍົກລັດຖະມົນຕີ ເນື່ອງໃນໂອກາດຢ້ຽມຢາມສູນບໍລິຈາກການຊ່ວຍເຫຼືອ ທີ່ກະຊວງແຮງງານ ແລະ ສະຫວັດດີການສັງຄົມ, ຄັ້ງວັນທີ 29 ກໍລະກົດ 2018

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 30 ກ.ລ 2018 10:00


ມື້ນີ້ ຂ້າພະເຈົ້າໄດ້ມີໂອກາດມາຢ້ຽມຢາມ ສູນການຮັບບໍລິຈາກ ເຊິ່ງເປັນສູນໜຶ່ງທີ່ໃຫຍ່ກວ່າໝູ່ ແລະ ສໍາຄັນຢູ່ທີ່ກະຊວງແຮງງານ ແລະ ສະຫວັດດີການສັງຄົມ ໃນການເຮັດໜ້າທີ່ເປັນຜູ້ຮັບການບໍລິການ ເຊິ່ງຄວາມຈິງແລ້ວສູນບໍລິຈາກນີ້ແມ່ນໄດ້ເປີດໃນທົ່ວປະເທດ, ເຊັ່ນ: ຢູ່ໃນນະຄອນຫຼວງວຽງຈັນ ແລະ ຢູ່ບັນດາແຂວງ ກໍ່ໄດ້ເປີດຮັບບໍລິຈາກໃນຫຼາຍຈຸດ, ຂ້າພະເຈົ້າຂໍສະເໜີແນວນີ້ຕໍ່ສື່ມວນຊົນ, ຕໍ່ປະຊາຊົນລາວ ໃນທົ່ວປະເທດວ່າ: ໃນອາທິດທີ່ຜ່ານມາ ປະຊາຊົນລາວຂອງພວກເຮົາ ແມ່ນຕົກຢູ່ໃນຄວາມວິຕົກກັງວົນ, ຄວາມຫຍຸ້ງຍາກທາງດ້ານຈິດໃຈ ແຕ່ວ່າໃນໄລຍະ 4 ຫາ 5 ວັນມານີ້ ຄວາມສະທ້ານໃຈດັ່ງກ່າວນັ້ນ ກໍ່ໄດ້ເຈືອປົນໄປດ້ວຍຄວາມຊາບຊຶ້ງເຖິງຄວາມມີນໍ້າໃຈ, ຄວາມໂອບເອື້ອອາລີຂອງປະຊາຊົນລາວບັນດາເຜົ່າ ໃນທົ່ວປະເທດ, ຂ້າພະເຈົ້າ ໄດ້ຕິດຕາມຢ່າງໃກ້ຊິດ ກ່ຽວກັບການບໍລິຈາກຂອງປະຊາຊົນລາວ ທີ່ໄດ້ຊ່ວຍກັນຄົນລະໄມ້ຄົນລະມື, ວັດຖຸ, ເງິນ, ຄໍາ, ອາຫານການກິນ, ເຄື່ອງໃຊ້ອຸປະໂພກ, ບໍລິໂພກ ກໍ່ໄດ້ແບ່ງປັນໄປໃຫ້ ທີ່ສູນບໍລິຈາກຕ່າງໆ ຢູ່ໃນນະຄອນຫຼວງວຽງຈັນ ກໍ່ຄື ອັດຕະປື, ຈາກທຸກໆແຂວງໃນຂອບເຂດທົ່ວປະເທດ ເພື່ອສົ່ງຕໍ່ໄປໃຫ້ປະຊາຊົນ ຜູ້ທີ່ໄດ້ຮັບຜົນກະທົບຢ່າງຮ້າຍແຮງຈາກໄພພິບັດ ໃນຄັ້ງນີ້. 
ຄືບັນດາທ່ານຮູ້ແລ້ວວ່າ ໄພພິບັດທີ່ເກີດຂຶ້ນ ໃນຄັ້ງນີ້, ສາຍເຫດຕົ້ນຕໍແມ່ນເຂື່ອນນ້ອຍ ຫຼື ຄູກັນນໍ້າຂອງອ່າງເກັບນໍ້າເຂື່ອນໄຟຟ້າ ເຊປຽນ-ເຊນໍ້ານ້ອຍແຕກ, ຂ້າພະເຈົ້າຄິດວ່າມະຫັນຕະໄພຄັ້ງນີ້ ເປັນຜົນກະທົບທີ່ຮ້າຍແຮງ ຕໍ່ປະຊາຊົນເມືອງສະໜາມໄຊ, ເຮັດໃຫ້ບໍ່ມີທີ່ຢູ່ອາໄສ ແລະ ໄດ້ຫາຍສາບສູນໄປເປັນຈໍານວນຫຼາຍ ແລະ ໄດ້ກະທົບເຖິງໄຮ່ນາຕາກ້າ, ເຮືອນຊານຂອງປະຊາຊົນຢ່າງຮ້າຍແຮງ, ຂ້າພະເຈົ້າຄິດວ່າ ເຫດການດັ່ງກ່າວນີ້ ໄດ້ເກີດຂຶ້່ນ ແລະ ບໍ່ມີໃຜເພິ່ງປາດຖະໜາໃຫ້ເກີດຂຶ້ນ, ແຕ່ມັນກໍ່ໄດ້ເກີດຂຶ້ນແລ້ວ ພວກເຮົາຕ້ອງໄດ້ຮ່ວມແຮງຮ່ວມໃຈກັນ, ຊ່ວຍເຫຼືອກັນ. ນໍ້າໃຈທີ່ໄດ້ຈາກການສະໜັບສະໜູນ, ການແບ່ງປັນຂອງປະຊາຊົນລາວທົ່ວປະເທດນັ້ນ ແມ່ນມີຈໍານວນຫຼວງຫຼາຍທີ່ສຸດ, ໃນເວລາດຽວກັນນັ້ນ, ພວກເຮົາກໍ່ໄດ້ຮັບການຊ່ວຍເຫຼືອຈາກປະເທດເພື່ອມິດ ທີ່ໄດ້ສົ່ງທັງແຮງໃຈ ທັງວັດຖຸສິ່ງຂອງ, ເງິນຄໍາ ມາໃຫ້ປະຊາຊົນລາວຂອງພວກເຮົາ, ໂດຍສະເພາະແມ່ນ ປະຊາຊົນທີ່ກໍາລັງຖືກຜົນກະທົບຢູ່ທີ່ແຂວງອັດຕະປື ຢ່າງບໍ່ຂາດສາຍ ແລະ ເປັນຈໍານວນທີ່ໃຫຍ່ຫຼວງທີ່ສຸດ. ຂ້າພະເຈົ້າຄິດວ່າ ການຊ່ວຍເຫຼືອດັ່ງກ່າວ ລວມທັງ ການໃຫ້ກໍາລັງໃຈຕໍ່ປະຊາຊົນລາວຂອງພວກເຮົາ ທີ່ຖືກຜົນກະທົບນັ້ນ ແມ່ນບໍ່ສາມາດປະເມີນຄ່າໄດ້, ມັນເປັນຄຸນຄ່າອັນສູງສົ່ງທີ່ສຸດ, ການຊ່ວຍເຫຼືອດັ່ງກ່າວນີ້ ແມ່ນການຊ່ວຍເຫຼືອຢ່າງທັນການ, ຖືກກັບຄວາມຮຽກຮ້ອງຕ້ອງການຂອງປະຊາຊົນ ທີ່ກໍາລັງຖືກຜົນກະທົບຢ່າງແທ້ຈິງ. 
ໃນໂອກາດນີ້, ຂ້າພະເຈົ້າ ຂໍສະແດງຄວາມຮູ້ບຸນຄຸນອັນໃຫຍ່ຫຼວງ ຕໍ່ປະຊາຊົນລາວໃນທົ່ວປະເທດ ທີ່ໄດ້ໃຫ້ການຊ່ວຍເຫຼືອສະຫນັບສະໜູນຢ່າງຈິງໃຈ ດ້ວຍນໍ້າໃສໃຈຈິງຂອງຕົນທີ່ໄດ້ບິແບ່ງ ເພື່ອສະແດງເຖິງຄວາມເປັນຫ່ວງເປັນໃຍ ຕໍ່ປະຊາຊົນລາວ ທີ່ຢູ່ແຂວງອັດຕະປື, ອັນນີ້ເປັນສິ່ງທີ່ດີທີ່ສຸດ. ຂ້າພະເຈົ້າຄິດວ່າ ສິ່ງນີ້ແມ່ນມູນເຊື້ອອັນດີງາມຂອງປະຊາຊົນລາວບັນດາເຜົ່າ ຂອງພວກເຮົາ, ເປັນວັດທະນະທໍາອັນດີງາມຂອງຊາດລາວເຮົາ. ໃນເວລາດຽວກັນນັ້ນ, ຂ້າພະເຈົ້າກໍ່ຂໍສະແດງຄວາມຂອບອົກຂອບໃຈ, ຮູ້ບຸນຄຸນຢ່າງຈິງໃຈ ຕໍ່ບັນດາປະເທດເພື່ອນມິດ, ປະຊາຊົນ ກໍ່ຄື ອົງການຈັດຕັ້ງສາກົນຕ່າງໆ, ລັດຖະບານ ຂອງບັນດາປະເທດເພື່ອນມິດ ທັງຢູ່ໃກ້ ແລະ ໄກ ທີ່ໄດ້ໃຫ້ການຊ່ວຍເຫຼືອປະເທດຂອງພວກເຮົາ, ໃຫ້ການສະໜັບສະໜູນ, ຊ່ວຍເຫຼືອປະຊາຊົນທີ່ຖືກອຸທົກກະໄພຢ່າງຮ້າຍແຮງ ໃນເທື່ອນີ້, ເຊິ່ງການຊ່ວຍເຫຼືອດັ່ງກ່າວນັ້ນ ຈະນໍາໄປສູ່ສະຖານທີ່, ສູ່ປະຊາຊົນ ຜູ້ທີ່ໄດ້ຮັບເຄາະຮ້າຍນັ້ນຢ່າງທົ່ວເຖິງ ແລະ ທັນການ ເພາະວ່າຂ້າພະເຈົ້າໄດ້ມອບໃຫ້ຄະນະສະເພາະກິດ ຮ່ວມກັບທ້ອງຖິ່ນ, ຮ່ວມກັບອາສາສະໝັກກູ້ໄພ ຈາກບັນດາປະເທດເພື່ອນມິດ, ຮ່ວມກັບກໍາລັງປະກອບອາວຸດຂອງພວກເຮົາ ຈັດການຊ່ວຍເຫຼືອໃຫ້ໄປເຖິງ ປະຊາຊົນທຸກຄົນທີ່ໄດ້ຮັບຜົນກະທົບໃນຄັ້ງນີ້.
ສໍາລັບວຽກງານຕໍ່ໄປໃນການກູ້ໄພເທື່ອນີ້ ແມ່ນພວກເຮົາຈະສືບຕໍ່ຊອກຄົ້ນຫາ ຜູ້ຫາຍສາບສູນໄປນັ້ນ ໃຫ້ໄດ້ໄວເທົ່າໃດຍິ່ງດີເທົ່ານັ້ນ ລວມທັງ ຜູ້ທີ່ມີຊີວິດ ແລະ ເສຍຊີວິດ, ຈະເຮັດສຸດຄວາມສາມາດໃນການຊອກຫາ, ຖ້າຜູ້ໃດຍັງມີຊີວິດຢູ່ ກໍ່ນໍາເອົາເຂົ້າເຈົ້າມາໄວ້ຢູ່ທີ່ບ່ອນປອດໄພ ເພື່ອເຮັດແນວໃດໃຫ້ເຂົາເຈົ້າ ມີຊີວິດຢ່າງປົກກະຕິຕໍ່ໄປໄດ້, ລັດຖະບານ ກໍ່ຄື ພາກສ່ວນຕ່າງໆ ທັງພາຍໃນ ແລະ ຕ່າງປະເທດ ຈະອໍານວຍຄວາມສະດວກໃຫ້ເຂົາເຈົ້າເທົ່າທີ່ຈະເຮັດໄດ້ ເພື່ອໃຫ້ເຂົາເຈົ້າປອດໄພຈາກໄພພິບັດ ໃນຄັ້ງນີ້ ພາຍຫຼັງທີ່ນໍ້າຫລົດລົງແລ້ວ, ໜ່ວຍງານຂອງພວກເຮົາຈະໄດ້ຊ່ວຍໃຫ້ປະຊາຊົນ ກັບຄືນສູ່ບ້ານ, ສູ່ເຮືອນ, ສູ່ທ້ອງຖິ່ນຂອງເຂົາເຈົ້າ ເທົ່າທີ່ຈະກັບຄືນໄປໄດ້ ແລະ ຈະຊ່ວຍເຫຼືອຟື້ນຟູເຮືອນຊານ ທີ່ເປ້ເພເສຍຫາຍນັ້ນ ໃຫ້ເຂົາເຈົ້າດໍາລົງຊີ້ວິດໄດ້ຕໍ່ໄປ ເປັນແຕ່ລະກ້າວ, ລັດຖະບານ ຈະໄດ້ວາງແຜນຟື້ນຟູ ເມືອງສະໜາມໄຊ ທີ່ຖືກຜົນກະທົບໃນຄັ້ງນີ້ ຢ່າງມີລະບົບ, ມີຄວາມຮັບຜິດຊອບ, ຮຽກຮ້ອງການສະໜັບສະໜູນ ຈາກປະຊາຊົນທົ່ວປະເທດ ກໍ່ຄື ພີ່ນ້ອງ, ເພື່ອນມິດ ແລະ ອົງການຈັດຕັ້ງຕ່າງໆ ທີ່ມີຄວາມສົນໃຈຢາກມາຊ່ວຍເຫຼືອນັ້ນ ກໍ່ຈະຮັບເອົາໄປຊ່ວຍເຫຼືອໃຫ້ປະຊາຊົນ ທີ່ໄດ້ຮັບຜົນກະທົບ, ໃຫ້ມີທັງຄວາມປອດໄພ, ທັງດຳລົງຊີວິດໄປຕາມສະພາບປົກກະຕິ ແລະ ຈະພັດທະນາໃຫ້ເຂົາເຈົ້າມີຊີວິດການເປັນຢູ່ ທີ່ສາມາດພົ້ນຈາກໄພອັນຕະລາຍນີ້ໄດ້. ນອກຈາກນັ້ນ, ໃນຕໍ່ໜ້າລັດຖະບານ ຈະໄດ້ຈັດຕັ້ງໜ່ວຍງານສໍາລັບການສືບສວນສອບສວນຢ່າງເຂັ້ມງວດ ຕໍ່ເຫດການທີ່ເກີດຂຶ້ນໃນຄັ້ງນີ້ ເພື່ອຊອກໃຫ້ເຫັນເຫດຜົນ, ສາຍເຫດ ແລະ ຮ່ວມມືກັບລັດຖະບານບັນດາປະເທດ ທີ່ມີບໍລິສັດຈົດທະບຽນຢູ່ນັ້ນ ດໍາເນີນການກວດກາບໍລິສັດອອກແບບ, ບໍລິສັດຮັບເໝົາກໍ່ສ້າງ, ບໍລິສັດທີ່ປຶກສາ ແລະ ກວດກາເບິ່ງຄວາມຮັບຜິດຊອບຂອງເຈົ້າໜ້າທີ່ ຢ່າງມີຄວາມໂປ່ງໃສ ແລະ ຍຸຕິທໍາທີ່ສຸດ ເພື່ອຊອກໃຫ້ເຫັນສາຍເຫດທີ່ແທ້ຈິງ ຂອງການເກີດອຸທົກກະໄພຄັ້ງນີ້ ແລະ ເພື່ອແກ້ໄຂໃນຕໍ່ໜ້າຍາວນານ. 
ຂ້າພະເຈົ້າ ຂໍຮຽກຮ້ອງມາຍັງ ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າ ຈົ່ງພ້ອມກັນມີສະມາທິ, ມີຄວາມຕັ້ງໃຈ ເພື່ອຊ່ວຍເຫຼືອພີ່ນ້ອງພວກເຮົາ ທີ່ພົບຄວາມຫຍຸ້ງຍາກ, ກັນດານໃນປະຈຸບັນນີ້, ຂໍໃຫ້ປະຊາຊົນທີ່ຢູ່ໃນແຕ່ລະທ້ອງຖິ່ນຕ່າງໆ ຢ່າຫຼົງເຊື່ອຂ່າວລື, ຂ່າວອະກຸສົນຕ່າງໆ ທີ່ເກີດຂຶ້ນຜ່ານມາ ແລະ ກໍາລັງຈະເກີດຂຶ້ນນັ້ນ, ຕໍ່ໄປຖ້າມີ ແລະ ເກີດຂຶ້ນອີກ ກໍ່ຂໍໃຫ້ຕິດຕາມສະພາບການຈາກລັດຖະບານ ໃຫ້ເປັນປົກກະຕິ, ເພາະວ່າຂ້າພະເຈົ້າ ໄດ້ສັ່ງການໄປແລ້ວ ໃຫ້ທຸກໆເຂື່ອນໃນທົ່ວປະເທດ ຕ້ອງມີພະນັກງານ, ເຈົ້າໜ້າທີ່ວິຊາສະເພາະ, ເຈົ້າໜ້າທີ່ປ້ອງກັນຄວາມສະຫງົບ ປະຈໍາການຢູ່ຕະຫຼອດ 24 ຊົ່ວໂມງ ແລະ ມີການລາຍງານໃຫ້ລັດຖະບານ ແລະ ພາກສ່ວນທີ່ກ່ຽວຂ້ອງຢ່າງເປັນປະຈໍາ. ຖ້າມີຂ່າວຄາວອັນໃດ ທາງລັດຖະບານ ຈະແຈ້ງໃຫ້ປະຊາຊົນຮູ້ທັນທີ ເພື່ອກະກຽມ, ເພາະວ່າໄລຍະດັ່ງກ່າວນີ້, ແຕ່ເດືອນກໍລະກົດ ຫາ ເດືອນກັນຍາ ເປັນລະດູຝົນ ເປັນໄລຍະທີ່ຝົນກໍາລັງຕົກ. ສະນັ້ນ, ພວກເຮົາຈະຕ້ອງມີສະຕິລະວັງຕົວ ແລະ ກວດກາຢ່າງເຂັ່ງຄັດ.
ອີກເທື່ອໜຶ່ງ, ຂ້າພະເຈົ້າ ຂໍຮຽກຮ້ອງມາຍັງພໍ່ແມ່ພີ່ນ້ອງ, ປະຊາຊົນລາວ ໃນທົ່ວປະເທດ ແລະ ຂໍໃຫ້ປະຊາຊົນ ທີ່ກໍາລັງຖືກຜົນກະທົບຢ່າງຮ້າຍແຮງນັ້ນ ຂໍໃຫ້ມີກໍາລັງໃຈ ຕໍ່ສູ້ກັບສິ່ງທີ່ເກີດຂຶ້ນມາແລ້ວນັ້ນ ໃຫ້ຜ່ານພົ້ນໄປດ້ວຍດີ. ສ່ວນວ່າຄອບຄົວທີ່ສູນເສຍຄົນຮັກຂອງຕົນໄປ ທີ່ຍັງບໍ່ທັນຮູ້ຈໍານວນໄດ້ນັ້ນ, ພວກເຮົາທຸກຄົນ ຂໍສະແດງຄວາມເສຍໃຈຢ່າງສຸດຊຶ້ງ. ພັກ-ລັດຖະບານ ແລະ ປະຊາຊົນທົ່ວປະເທດ ຈະຢູ່ຄຽງຂ້າງປະຊາຊົນທີ່ກຳລັງພົບມະຫັນຕະໄພຄັ້ງນີ້ ແລະ ຈະຊ່ວຍເຫຼືອຢ່າງສຸດຄວາມສາມາດຂອງຕົນ ເພື່ອເຮັດໃຫ້ສະພາບການ ກ້າວເຂົ້າສູ່ຄວາມເປັນປົກກະຕິເທື່ອລະກ້າວ.
ຂໍຂອບໃຈ, ບັນດາທ່ານທັງຫຼາຍ ທີ່ມີຈິດໃຈເອື້ອເຟື້ອເພື່ອແຜ່, ອຸປະຖໍາ, ໃຫ້ການສະໜັບສະໜູນຊ່ວຍເຫຼຶືອ ໃນຄັ້ງນີ້ ລວມທັງ ການຊ່ວຍເຫຼືອຂອງບັນດາປະເທດເພື່ອນມິດສາກົນ ທີ່ຫຼັ່ງໄຫຼເຂົ້າມາ ແລະ ກໍາລັງຈະຫຼັ່ງໄຫຼເຂົ້າມາຕື່ມອີກນັ້ນ. ຂ້າພະເຈົ້າ ຂໍຮຽກຮ້ອງໃຫ້ຜູ້ທີ່ຮັບການຊ່ວຍເຫຼືອ, ຜູ້ທີ່ຈັດສັນການຊ່ວຍເຫຼືອໃນຄັ້ງນີ້ ຈົ່ງເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງ ເພື່ອເຮັດໃຫ້ການຊ່ວຍເຫຼືອ ໄປສູ່ປະຊາຊົນ ທີ່ໄດ້ຮັບຜົນກະທົບຢ່າງແທ້ຈິງ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ