ທ່ານ ນາງ ບຸນເພັງ ມູນໂພໄຊ ເຂົ້າຮ່ວມ ປູກຕົ້ນໄມ້ ຢູ່ເຂດເສດຖະກິດສະເພາະ ບຶງທາດຫຼວງ.

ຜູ້ຂຽນ: ທ່ານ ອານຸພາບ ອະນຸລັກ

ວັນສຸກ, 06 ມິ.ຖ 2014 05:00

​  

ໃນວັນທີ 5 ມິຖຸນາ 2014, ທ່ານ ນາງ ບຸນເພັງ ມູນໂພໄຊ ລັດຖະມົນຕີ ປະຈໍາຫ້ອງວ່າການລັດຖະບານ, ຮອງປະທານ ຜູ້ປະຈໍາການ ຄະນະ ກໍາມະການ ແຫ່ງຊາດລາວ ເພື່ອຄຸ້ມຄອງ ເຂດເສດຖະກິດ ພິເສດ ແລະ ສະເພາະ ໄດ້ໃຫ້ກຽດ ເປັນປະທານ ໃນງານ ກິດຈະກຳ ປູກຕົ້ນໄມ້ ທຳມະຊາດ - ໄມ້ພື້ນເມືອງລາວ ຢູ່ແຄມໜອງໃຫຍ່ ເຂດເສດຖະກິດ ສະເພາະ ບຶງທາດຫຼວງ ເມືອງ ໄຊເຊດຖາ ນະຄອນຫຼວງວຽງຈັນ ໃນເນື້ອທີ່ 50 ເຮັກຕາ ໂດຍມີ ທ່ານ ດຣ ວິໄລວົງ ບຸດດາຄຳ ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ສາຍທອງ ແກ້ວດວງດີ ຮອງເຈົ້າຄອງ ນະຄອນຫຼວງວຽງຈັນ, ທ່ານ ນາງ ບົວທາ ຂັດຕິຍະ ຮອງປະທານ ຄະນະກຳມະການ ແຫ່ງຊາດລາວ ເພື່ອຄຸ້ມຄອງ ເຂດເສດຖະກິດ ພິເສດ ແລະ ສະເພາະ, ຊາວໜຸ່ມ ຈາກອົງການຈັດຕັ້ງຕ່າງໆ ແລະ ນ້ອງນ້ອຍເຍົາວະຊົນ ເຂົ້າຮ່ວມ.

 

ການຈັດກິດຈະກຳ ປູກຕົ້ນໄມ້ຄັ້ງນີ້ ເພື່ອປະຕິບັດ ຕາມບົດບັນທຶກ ການຮ່ວມມື 4 ຝ່າຍຄື:  ສູນກາງຊາວໜຸ່ມ ປະຊາຊົນ ປະຕິວັດລາວ, ຄະນະຊາວໜຸ່ມ ຫ້ອງວ່າການ ລັດຖະບານ, ຄະນະຊາວໜຸ່ມ ກະຊວງ ກະສິກຳ ແລະ ປ່າໄມ້ ແລະ ຊາວໜຸ່ມ ນະຄອນຫຼວງວຽງຈັນ. ພ້ອມທັງ ເປັນການຈັດຕັ້ງ ປະຕິບັດ ແນວຄວາມຄິດ ຂອງບໍລິສັດ ທາດຫຼວງພັດທະນາ (ຜູ້ຮັບເໝົາ ເຂດເສດຖະກິດ ສະເພາະ ບຶງທາດຫຼວງ) ໃນການສ້າງເຂດ ເສດຖະກິດ ສະເພາະ ບຶງທາດຫຼວງ ໃຫ້ເປັນສີຂຽວ, ເປັນສວນ ຕົ້ນໄມ້ທໍາມະຊາດ ແລະ ດອກໄມ້ພື້ນເມືອງລາວ ແນໃສ່ດຶງດູດ ການທ່ອງທ່ຽວ ທີ່ຕິດພັນກັບ ປະຫວັດສາດ ແລະ ວັດທະນະທຳ ຂອງລາວລ້ານຊ້າງ, ສ້າງໃຫ້ເປັນ ບ່ອນຕິດຕໍ່ ທາງດ້ານ ທຸລະກິດ ທີມີສິ່ງແວດລ້ອມ ເອື້ອອຳນວຍ ແລະ ສວຍງາມ, ພ້ອມທັງ ເປັນບ່ອນພັກຜ່ອນ ຂອງປະຊາຊົນລາວ.

ຕົ້ນໄມ້ ທີ່ນໍາມາປູກຄັ້ງນີ້ ລວມມີ: ໄມ້ດູ່, ໄມ້ຂະຍຸງ, ໄມ້ແຕ້ຄໍາ, ໄມ້ຄໍາພີ, ໄມ້ຫໍາງົວ, ນອກນັ້ນຍັງມີ ຕົ້ນໄມ້ປະດັບ ປະຈໍາຊາດ ຄື: ດອກຈໍາປາ, ດອກຄູນ, ຕົ້ນດອກຝາງແດງ ແລະ ອື່ນໆ ລວມທັງໝົດ 150 ຕົ້ນ. ກິດຈະກຳ ປູກຕົ້ນໄມ້ ຢູ່ເຂດເສດຖະກິດສະເພາະ ບຶງທາດຫຼວງ ຈະມີການສືບຕໍ່ ປູກຕົ້ນໄມ້ ເປັນໄລຍະ 5 ປີ.​


ແຫຼ່ງ: ຫ້ອງວ່າການລັດຖະບານ