ເສີມຂະຫຍາຍການຮ່ວມມື ສອງຫ້ອງວ່າການລັດຖະບານ ລາວ-ຫວຽດນາມ

ຜູ້ຂຽນ: ທ່ານ ບີໂຟ ນັນທະວົງ

ວັນເສົາ, 19 ມ.ສ 2014 09:00


      ເພື່ອເປັນການເສີມຂະຫຍາຍ ການພົວພັນຮ່ວມມືພິເສດຮອບດ້ານ ຂອງສອງຫ້ອງວ່າການລັດຖະບານລາວ-ຫວຽດນາມ ໃຫ້ນັບມື້ນັບແໜ້ນແຟ້ນຂຶ້ນ. ດັ່ງນັ້ນ, ໃນລະຫວ່າງວັນທີ 17-18 ເມສາ 2014 ຢູ່ທີ່ຫ້ອງວ່າການລັດຖະບານທ່ານ ດຣ. ສິນລະວົງ ຄຸດໄພທູນ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການລັດຖະບານ ສປປ ລາວ ໄດ້ເປັນກຽດຕ້ອນຮັບການມາຢ້ຽມຢາມ ແລະ ເຮັດວຽກ ຂອງທ່ານ ຫງວຽນ ວັນ ເນນ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການລັດຖະບານ ສສ ຫວຽດນາມ ພ້ອມດ້ວຍຄະນະ.
    ໃນການພົບປະຄັ້ງນີ້ທັງສອງຝ່າຍກໍ່ໄດ້ຕີລາຄາສູງ ຕໍ່ສາຍພົວພັນມິດຕະພາບ, ການຮ່ວມມືແບບພິເສດ ຂອງສອງຫ້ອງວ່າການລັດຖະບານ ລາວ-ຫວຽດນາມ ໃນໄລຍະຜ່ານມາ ແລະ ຖືໂອກາດນີ້ ທັງສອງຝ່າຍກໍ່ໄດ້ລາຍງານສະພາບພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ - ສັງຄົມພາຍໃນປະເທດ ແລະ ສະພາບການຈັດຕັ້ງປະຕິບັດ ພາລະບົດບາດໜ້າທີ່ ຫ້ອງວ່າການ ລັດຖະບານຂອງຕົນ ໃຫ້ກັນຊາບ. ພ້ອມນັ້ນ, ທັງສອງຝ່າຍກໍ່ໄດ້ສະແດງຄວາມຊົມເຊີຍ, ຕີລາຄາສູງຕໍ່ຜົນສຳເລັດການຮ່ວມມືຂອງສອງຫ້ອງວ່າການລັດຖະບານລາວ ແລະ ຫວຽດນາມ ໃນໄລຍະ ຜ່ານມາ, ເຊິ່ງສະແດງອອກໃນການຈັດຕັ້ງປະຕິບັດ ໂຄງການຮ່ວມມືຂອງສອງຫ້ອງວ່າການລັດຖະບານ ໃນໄລຍະປີ 2011 – 2013, ຊຶ່ງເປັນໂຄງການໜຶ່ງທີ່ນອນຢູ່ໃນ 10 ໂຄງການຊ່ວຍເຫຼືອ ລັດຖະບານ ສປປ ລາວ ຂອງລັດຖະບານ ສສ ຫວຽດນາມ ໄດ້ຮັບການຈັດຕັ້ງປະຕິບັດສຳເລັດຕາມແຜນການທີ່ໄດ້ວາງໄວ້. ສຳລັບງົບປະມານທັງໝົດ ໃນການຈັດຕັ້ງປະຕິບັດໂຄງການຮ່ວມມື ສອງຫ້ອງວ່າການລັດຖະບານແມ່ນ 23,06 ຕື້ດົງ. ໃນນັ້ນ, ທຶນຊ່ວຍເຫຼືອລ້າຈາກ ສສ ຫວຽດນາມ 19,86 ຕື້ດົງ ແລະ ທຶນສົມທົບຈາກລັດຖະບານ ສປປ ລາວ 3,2 ຕື້ດົງ, ເຊິ່ງເນື້ອໃນ ການຈັດຕັ້ງປະຕິບັດໂຄງການມີ 3 ພາກຕົ້ນຕໍຄື: 1. ການຍົກລະດັບຄວາມສາມາດ ເປັນເສນາທິການ, ຄຸ້ມຄອງປະຕິບັດວຽກງານໃຫ້ແກ່ພະນັກງານ, ລັດຖະກອນຂອງ ຫລບ ລາວ; 2. ການນຳໃຊ້ ເຕັກໂນໂລຊີຂ່າວສານເຂົ້າໃນການຄຸ້ມຄອງ, ຊີ້ນຳ ແລະ ບໍລິຫານວຽກງານ ຂອງ ຫລບ ລາວ ( ສ້າງຫ້ອງປະຊຸມລັດຖະບານທັນສະໄໝ, ສ້າງຊອບແວ ໃນການຄຸ້ມຄອງການຈໍລະຈອນເອກະສານ ພາຍໃນຫ້ອງວ່າການລັດຖະບານ, ສ້າງຫ້ອງຝຶກອົບຮົມຄອມພິວເຕີ); ແລະ 3. ການສ້າງເວັບໄຊລັດຖະບານລາວ. ຈຸດປະສົງຂອງໂຄງການ ເພື່ອເປັນການຊ່ວຍຍົກສູງຄວາມສາມາດ ໃຫ້ພະນັກງານ ຫ້ອງວ່າການລັດຖະບານລາວ ໃນການເປັນເສນາທິການໃຫ້ແກ່ລັດຖະບານ ແລະ ນາຍົກລັດຖະມົນຕີ, ບັນດາ ຮອງນາຍົກ ລັດຖະມົນຕີ ໃນການອຳນວຍ, ຄວບຄຸມການເຄື່ອນໄຫວວຽກງານ ຂອງລັດຖະບານ ແລະ ອົງການປົກຄອງທ້ອງຖິ່ນ, ຊ່ວຍວຽກນາຍົກລັດຖະມົນຕີ, ບັນດາຮອງນາຍົກລັດຖະມົນຕີ ໃນການບໍລິຫານ ບັນຊາວຽກງານລວມ ແລະ ປະສານສົມທົບກັບ ບັນດາອົງການຈັດຕັ້ງຂອງພັກ, ລັດ, ອົງການຈັດຕັ້ງມະຫາຊົນ ແລະ ອົງການປົກຄອງທ້ອງຖິ່ນ.
      ຜ່ານການພົບປະທັງສອງຝ່າຍຍັງໄດ້ເປັນເອກະພາບກັນວ່າຈະສືບຕໍ່ຮັກສາ ແລະ ເສີມຂະຫຍາຍສາຍພົວພັນ, ຮ່ວມມືສາມັກຄີ ອັນເປັນມູນເຊື້ອທີ່ສອງພັກ, ສອງລັດ ໄດ້ຈັດຕັ້ງປະຕິບັດ ພ້ອມນັ້ນ, ສອງຝ່າຍຈະສືບຕໍ່ແລກປ່ຽນ ລະຫວ່າງຄະນະນໍາ, ວິຊາການ ຂອງສອງຫ້ອງວ່າການຢ່າງເປັນປົກກະຕິ. ນອກນັ້ນຫ້ອງວ່າການລັດຖະບານຫວຽດນາມ ຈະສືບຕໍ່ຊ່ວຍເຫຼືອຍົກລະດັບດ້ານວິຊາການ ໃຫ້ພະນັກງານ ຫ້ອງວ່າການລັດຖະບານລາວ ກ່ຽວກັບ ວຽກງານ ເສນາທິການ, ການຄຸ້ມຄອງຈໍລະຈອນເອກະສານ, ການຄຸ້ມຄອງຄວາມປອດໄພເວັບໄຊລັດຖະບານລາວ ແລະ ອື່ນໆ. ໃນໂອກາດ ດັ່ງກ່າວ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ແຫ່ງ ສປປ ລາວ ກໍ່ໄດ້ກ່າວສະແດງຄວາມຂອບໃຈມາຍັງ ລັດຖະບານຫວຽດນາມ ເວົ້າລວມ, ເວົ້າສະເພາະກໍ່ແມ່ນຫ້ອງວ່າການ ລັດຖະບານ ຫວຽດນາມ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອບໍ່ວ່າດ້ານທຶນຮອນ ກໍ່ຄືວິຊາການ ແລະ ຫວັງຢ່າງຍິ່ງວ່າ ໃນຕໍ່ໜ້າຈະໄດ້ຮັບການສະໜັບສະໜູນ ຕື່ມອີກ. ພາຍຫຼັງສຳເລັດ ການພົບປະສອງຝ່າຍ ຄະນະກໍ່ໄດ້ຢຽ້ມຢາມຜົນສຳເລັດຂອງໂຄງການ ເປັນຕົ້ນແມ່ນ: ຫ້ອງປະຊຸມລັດຖະບານທັນສະໄໝ, ຫ້ອງຝຶກອົບຮົມຄອບພິວເຕີ ແລະ ຫ້ອງເວັບໄຊລັດຖະບານ; ໃນໂອກາດນີ້ ທ່ານ ດຣ. ສິນລະວົງ ຄຸດໄພທູນ ຫົວໜ້າຫ້ອງວ່າການ ລັດ ຖະບານລາວ ກໍ່ໄດ້ໃຫ້ກຽດປະດັບຫຼຽນກາມິດຕະພາບ ໃຫ້ຫ້ອງວ່າການລັດຖະບານຫວຽດນາມ ພ້ອມທັງ ມອບຫຼຽນໄຊແຮງງານ ຊັ້ນ I, ຊັ້ນII ໃຫ້ຄະນະຄຸ້ມຄອງໂຄງການຫວຽດນາມ. ໃນໄລຍະມາພົບປະ ລະຫວ່າງ ສອງຫ້ອງວ່າການລັດຖະບານ, ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຢ່າງສູງຕ້ອນຮັບ ຄະນະຜູ້ແທນຫ້ອງວ່າການລັດຖະບານ ຫວຽດນາມ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ