ຄຂພສ ຫາລືປັບປຸງແຮງງານ ແລະ ສະຫວັດດີການສັງຄົມໃນ ຂພສ

ຜູ້ຂຽນ: ອານຸພາບ ອະນຸລັກ

ວັນພຸດ, 09 ມ.ສ 2014 15:00

​​

   ໃນຕອນເຊົ້າ ຂອງວັນທີ່ 9 ເມສາ 2014. ກອງເລຂາ ຄະນະກຳມະກຳມະການ ແຫ່ງຊາດ ເພື່ອຄຸ້ມຄອງເສດຖະກິດ ພິເສດ ແລະ ເຂດເສດຖະກິດ ສະເພາະ (ຄຂພສ)  ໄດ້ມີການຈັດກອງປະຊຸມ ກ່ຽວກັບ ວຽກແຮງງານ ແລະ ສະຫວັດດີການ ສັງຄົມໃນເຂດເສດຖະກິດ ພິເສດ ແລະ ເຂດເສດຖະກິດ ສະເພາະ ( ຂພສ ) ຢູ່ ສປປ ລາວ ຂຶ້ນ ຢູ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ພາຍໃຕ້ ການເປັນປະທານ ຂອງທ່​ານ ນາງ ບົວທາ ຂັດຕິຍະ, ຮອງປະທານ ຫົວໜ້າ ກອງເລຂາ ຄະນະກຳມະການ ແຫ່ງຊາດ ເພື່ອຄຸ້ມຄອງເສດຖະກິດ ພິເສດ ແລະ ເສດຖະກິດ ສະເພາະ ໃຫ້ກຽດເຂົ້າຮ່ວມກ່າວເປີດກອງປະຊຸມ ໂດຍທ່ານ ນາງ ບຸນເພັງ ມູນໂພທິໄຊ, ລັດຖະມົນຕີປະຈຳ ຫ້ອງວ່າການລັດຖະບານ, ຮອງປະທານ (ຄຂພສ), ທ່ານ ນາງຄຳໃບ ຂັດຕິຍະ, ລັດຖະມົນຕີຊ່ວຍ ວ່າການ ກະຊວງ ແຮງງານ ແລະ ສະຫວັດດີການ ສັງຄົມ   ໂດຍມີບັນດາທ່ານ ຫົວໜ້າກົມ, ຮອງກົມ, ຜູ້ຕາງໜ້າ ຈາກອົງການກຳມະບານ, ແມ່ຍິງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

   ກອງປະຊຸມຄັ້ງນີ້, ໄດ້ມີການປຶກສາຫາລື ຊອກຫາວິທີ ການປັບປຸງການສະໜອງແຮງງານ ໃຫ້ບັນດາເຂດເສດຖະກິດ ພິເສດ ໂດຍສະເພາະ ຜູ້ລົງທຶນ ໃນກິດຈະການຕ່າງໆ ໃຫ້ມີແຮງງານ ພຽງພໍກັບຄວາມ ຕ້ອງການ ລວມເຖິງການວາງແຜນ ຄວາມຕ້ອງການແຮງງານ ໃນແຕ່ລະໄລຍະທີ່ສອດຄ່ອງ ກັບແຜນກໍ່ສ້າງພື້ນຖານໂຄງລ່າງ ແລະ ແຜນດຳເນີນທຸລະກິດ ພ້ອມສະເໜີ ຄຸນລັກສະນະຂອງແຮງງານ ທີ່ຕ້ອງການ ເພື່ອປະສານກັບ ຂະແໜງການ ທີ່ກ່ຽວຂ້ອງ ແນໃສ່ຮັບປະກັນການຝຶກ ແລະ ສະໜອງແຮງງານ ທີ່ມີສີມື, ຮັບປະກັນຄຸນນະພາບແຮງງານ. ສະນັ້ນ, ຂະແໜງການ ຕ່າງໆ ທີ່ກ່ຽວຂ້ອງຈະຕ້ອງໄດ້ຮ່ວມກັນ ແກ້ໄຂເພື່ອສ້າງຄວາມເຊື່ອໝັ້ນ ໃຫ້ແກ່ຜູ້ພັດທະນາ ແລະ ຜູ້ລົງທຶນ ເຮັດໃຫ້ການພັດທະນາເຂດເສດຖະກິດ ພິເສດ ມີຄວາມຟົດຟື້ນ, ສ້າງອາຊີບທີ່ໝັ້ນຄົງ, ສ້າງລາຍຮັບ ທີ່ແນ່ນອນ ໃຫ້ແກ່ປະຊາຊົນບັນດາເຜົ່າ ແລະ ສ້າງລາຍຮັບເຂົ້າງົບປະມານ ແຫ່ງຊາດ.
   ​ສປປ ລາວ ມີ ຂພສ ທັງໝົດ 10 ແຫ່ງ ເປັນເຂດເສດຖະກິດ ພິເສດ 2 ແຫ່ງ ແລະ ເຂດເສດຖະກິດ ສະເພາະ 8 ແຫ່ງ, ສະນັ້ນ, ມາຮອດປະຈຸບັນ ຂພສ ສາມາດສ້າງວຽກເຮັດງານທຳ ໃຫ້ແກ່ປະຊາຊົນ ບັນດາເຜົ່າ ໄດ້ປະມານ 8.000 ຄົນ, ໃນນັ້ນແຮງງານລາວ 2.000 ຄົນ ຊຶ່ງເຫັນວ່າຍັງໜ້ອຍ ຖ້າທຽບກັບຂະໜາດ ແລະ ຄວາມຕ້ອງການທີ່ໂຮງຈັກ ໂຮງງານ ແລະ ບໍລິສັດຕ່າງໆ ຕ້ອງການ. ນອກຈາກການຈັດແຮງງານແລ້ວ, ບັນຫາໜຶ່ງທີ່ສຳຄັນແມ່ນ ຈະເຮັດແນວໃດໃຫ້ແຮງງານເຫຼົ່ານັ້ນ ມີຄວາມກະຕືລົ້ນ ໃນການປະກອບສ່ວນເຂົ້າໃນວຽກງານຂອງຕົນ, ໂດຍສະເພາະ ຄ່າແຮງງານ ແລະ ສະຫວັດດີການ ອື່ນໆ.
      ກອງປະຊຸມຄັ້ງນີ້, ມີຄວາມໝາຍສຳຄັນ ໃນການດຶງດູດການລົງທຶນຂອງຕ່າງປະເທດ ເຂົ້າໃນເຂດນິຄົມອຸດສາຫະກຳ ທີ່ສ້າງຕັ້ງຂຶ້ນແລ້ວ ເຊັ່ນ: ເຂດເສດຖະກິດ ພິເສດ ສະຫວັນເຊໂນ, ເຂດນິຄົມ ອຸສາຫະກຳ ວຽງຈັນໂນນທອງ ທີ່ມີຜູ້ມາລົງທຶນ ສ້າງຕັ້ງໂຮງງານອຸດສາຫະກຳ ຜະລິດ ເພື່ອສົ່ງອອກ ທີ່ນຳເອົາເຕັກໂນໂລຊີ ທີ່ທັນສະໄໝ ເຂົ້າໃນການຜະລິດ ເປັນສິນຄ້າ ຢູ່ ສປປ ລາວ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ