ໃນໜຶ່ງປີຜ່ານມາ ຫ້ອງວ່າການລັດຖະບານ ໄດ້ມີຜົນສຳເລັດຫຼາຍດ້ານ

ຜູ້ຂຽນ: ຂ່່າວ ແລະ ພາບ: ນັກຂ່າວຫ້ອງວ່າການລັດຖະບານ

ວັນຈັນ, 07 ມ.ສ 2014 00:00

​​​​

ຫ້ອງວ່າການລັດຖະບານ ໄດ້ຈັດກອງປະຊຸມ ສະຫຼຸບຕີລາຄາການເຄື່ອນໄຫວວຽກງານ ແລະ ການຈັດຕັ້ງນຳພາຂອງຄະນະພັກ ຫ້ອງວ່າການລັດຖະບານ ປະຈຳປີ 2013 ພ້ອມທັງ ຜ່ານແຜນ ງານຈຸດສຸມ ປະຈຳປີ 2014  ຂຶ້ນໃນວັນທີ 7 ເມສາ 2014 ຢູ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ພາຍໃຕ້ການເປັນປະທານ ຂອງທ່ານ ດຣ. ສິນລະວົງ ຄຸດໄພທູນ, ກໍາມະການສູນກາງພັກ, ເລຂາຄະນະພັກ ຫ້ອງວ່າການລັດຖະບານ, ລັດຖະມົນຕີ, ຫົວໜ້າຫ້ອງວ່າການລັດຖະບານ  ໂດຍມີບັນດາທ່ານລັດຖະມົນຕີປະຈຳຫ້ອງວ່າການລັດຖະບານ, ລັດຖະມົນຕີຊ່ວຍວ່າການ, ບັນດາ ຫົວໜ້າກົມ, ຫົວໜ້າຫ້ອງການ, ພ້ອມດ້ວຍພະນັກງານຫຼັກແຫຼ່ງທົ່ວຫ້ອງວ່າການ ແລະ ແຂກທີ່ຖືກເຊີນຈຳນວນໜຶ່ງ ເຂົ້າຮ່ວມຢ່າງພ້ອມພຽງ ແລະ ກອງປະຊຸມສຳຄັນນີ້ໄດ້ຮັບກຽດ ຢ່າງສູງທີ່ຕ້ອນຮັບການເຂົ້າຮ່ວມຂອງ ທ່ານ ທອງສິງ ທຳມະວົງ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ.

ກອງປະຊຸມຄັ້ງນີ້, ທ່ານ ດຣ. ສິນລະວົງ ຄຸດໄພທູນ ໄດ້ຕີລາຄາຄືນຜົນການຈັດຕັ້ງປະຕິບັດ ການເຄື່ອນໄຫວວຽກງານຫ້ອງວ່າການລັດຖະບານ, ການນຳພາຂອງຄະນະພັກ-ຄະນະນຳ ຫ້ອງວ່າການລັດຖະບານປະຈຳປີ 2013 ຢ່າງເລິກເຊິ່ງຮອບດ້ານ ແລະ ຮັບຮູ້ເປັນເອກະພາບຢ່າງສົມບູນ ຕໍ່ຜົນງານທີ່ຄະນະພັກຍາດມາໄດ້ໃນໜຶ່ງປີຜ່ານມາ ອັນໄດ້ເຮັດໃຫ້ວຽກງານຫຼາຍດ້ານ ໄດ້ຮັບຜົນສຳເລັດໄປຕາມທິດທາງ ແລະ ຄາດໝາຍກຳນົດໄວ້, ເຊິ່ງສະແດງອອກໃນແຕ່ລະດ້ານ ຄື: ດ້ານເສນາທິການ: ໄດ້ເອົາໃຈໃສ່ຕໍ່ການປັບປຸງ, ຍົກລະດັບຄຸນນະພາບການເປັນເສນາ ທິການຮັບໃຊ້ການນຳ ເປັນຕົ້ນ ໄດ້ສ້າງແຜນເຄື່ອນໄຫວປະຈຳປີ, ປະຈຳງວດ ແລະ ປະຈໍາເດືອນ ຂອງລັດຖະບານ, ຂອງນາຍົກລັດຖະມົນຕີ, ບັນດາຮອງນາຍົກລັດຖະມົນຕີ ໄດ້ຢ່າງຕໍ່ເນື່ອງ, ໄດ້ເອົາໃຈໃສ່ກະກຽມເນື້ອໃນກອງປະຊຸມຕ່າງໆ ໄດ້ຖືກຕ້ອງ, ວ່ອງໄວ ແລະ ຊັດເຈນດີສົມຄວນ, ສັງລວມ ແລະ ຄົ້ນຄວ້າຄຳເຫັນຕໍ່ເອກະສານລາຍງານຂອງສູນກາງ ແລະ ທ້ອງຖິ່ນ, ພ້ອມທັງ ໄດ້ເອົາໃຈໃສ່ເກັບກຳ, ສະໜອງຂໍ້ມູນຕ່າງໆ ໃຫ້ແກ່ຂັ້ນເທິງ, ໄດ້ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍ, ມະຕິຕົກລົງຂອງລັດຖະບານ ແລະ ນິກຳຕ່າງໆ; ດ້ານການປະສານງານ: ໄດ້ປັບປຸງກົນໄກ ກໍ່ຄື ລະບອບລະບຽບການປະສານງານ, ສົມທົບກັບບັນດາອົງການສູນກາງ ແລະ ທ້ອງຖິ່ນ ໃຫ້ມີຄວາມກົມກຽວ ແລະ ສອດຄ່ອງກວ່າເກົ່າ ໂດຍສະເພາະ ແຜນການເຄື່ອນໄຫວຂອງລັດຖະບານ ຢູ່ພາຍໃນ ແລະ ຕ່າງປະເທດ ໃຫ້ມີຄວາມວ່ອງໄວ, ຊັດເຈນ ແລະ ຮັບປະກັນຄວາມປອດໄພ; ປະຕິບັດລະບອບສ່ອງແສງລາຍງານ ທັງເຜີຍແຜ່ຄວາມເຫັນຊີ້ນຳຂອງລັດຖະບານ ກໍ່ຄືຂັ້ນເທິງ ໃຫ້ພາກສ່ວນຕ່າງໆໄດ້ຮັບຊາບ ແລະ ຈັດຕັ້ງປະຕິບັດໄດ້ທັນການ; ດ້ານບໍລິການຮັບໃຊ້: ໄດ້ເອົາໃຈໃສ່ປັບປຸງວຽກງານຮັບໃຊ້, ອຳນວຍຄວາມສະດວກໃນດ້ານຕ່າງໆ ແລະ ດູແລຄວາມປອດໄພໃຫ້ການນຳ ເປັນລະບົບລະບຽບຮຽບຮ້ອຍ ແລະ ທັນສະໄໝຂຶ້ນ; ປັບປຸງລະບົບການຄຸ້ມຄອງ ແລະ ບໍລິການເອກະສານ ຜ່ານປະຕູດຽວ ໂດຍຜ່ານລະບົບເຄືອຂ່າຍພາຍໃນ ແລະ ລະບົບເຕັກໂນໂລຊີຂໍ້ມູນຂ່າວສານ. 
ຜົນງານທີ່ຍາດມາໄດ້ນັ້ນ ແມ່ນເກີດຈາກຄວາມບຸກໜ້າບືນຕົວຂອງບັນດາສະຫາຍສະມາຊິກພັກ-ພະນັກງານ ພາຍໃຕ້ການນຳພາຂອງຄະນະພັກ, ຄະນະນໍາ ຫ້ອງວ່າການລັດຖະບານ ເວົ້າສະ ເພາະ, ເວົ້າລວມ ພາຍໃຕ້ການຊີ້ນຳຢ່າງໃກ້ສິດຂອງທ່ານນາຍົກ-ບັນດາທ່ານຮອງນາຍົກລັດຖະມົນຕີ. ໃນນັ້ນແມ່ນໄດ້ເອົາໃຈໃສ່ຢ່າງຕັ້ງໜ້າໃນການປັບປຸງກົງຈັກການຈັດຕັ້ງ, ແບບແຜນວິທີເຮັດວຽກ ແລະ ສັບຊ້ອນພະນັກງານ ຕາມຕໍາແໜ່ງງານເຂົ້າໃນອົງການຈັດຕັ້ງຂອງພັກ, ຂອງລັດ ແລະ ອົງການຈັດຕັ້ງມະຫາຊົນຕາມພາລະບົດບາດການຈັດຕັ້ງ ແລະ ການເຄື່ອນໄຫວຂອງບັນດາກົມ, ຫ້ອງການ ຊຶ່ງຮັກສາໄດ້ຄວາມສາມັກຄີອັນເປັນປຶກແຜ່ນ, ຮັກສາໄດ້ຄວາມເປັນລະບຽບຮຽບຮ້ອຍ ພາຍໃນສຳນັກງານ-ອົງການພາຍໃນ ຂອງຫ້ອງວ່າການລັດຖະບານ.
ເພື່ອຈັດຕັ້ງປະຕິບັດຕາມຄຳຂວັນ 3 ດີ ຂອງຫ້ອງວ່າການລັດຖະບານ ແລະ ສ້າງຂະບວນການ ຂໍ່ານັບຮັບຕ້ອນ ກອງປະຊຸມໃຫຍ່ ຄັ້ງທີ IV ຂອງອົງຄະນະພັກຫ້ອງວ່າການລັດຖະບານ ຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ ນັ້ນ. ແຜນການໃນຕໍ່ໜ້າ ຍັງຈະຕ້ອງໄດ້ເອົາໃຈໃສ່ສືບຕໍ່ສູ້ຊົນ, ຍົກສູງຄວາມສາມາດ ໃນການປະຕິບັດພາລະບົດບາດ, ໜ້າທີ່ໃນການ ເປັນເສນາທິການ, ເປັນໃຈກາງປະສານງານ ແລະ ການບໍລິການຮັບໃຊ້ລັດຖະບານ, ນາຍົກ ແລະ ບັນດາຮອງນາຍົກລັດຖະມົນຕີ ໃຫ້ມີຄຸນນະພາບສູງກວ່າເກົ່າ ຕາມທິດໄປສູ່ຄຸນນະພາບ ແລະ ທັນສະໄໝ ຢ່າງແຂງແຮງ; ສູ້ຊົນບຸກທະລຸທັງ 4 ດ້ານ ເຊັ່ນວ່າ: ປັບປຸງລະບອບລະບຽບການ ແລະ ແບບແຜນວິທີເຮັດວຽກຂອງຫ້ອງວ່າ​ການລັດຖະບານ ແລະ ອົງການປະຈຳຫ້ອງວ່າການລັດຖະບານ ໃຫ້ເປັນລະບົບຄົບຊຸດ ເປັນຕົ້ນ ບຸກທະລຸດ້ານການບໍລິການເອກະສານ ເຮັດໃຫ້ບົດບາດຂອງຫ້ອງວ່າການລັດຖະບານພົ້ນເດັ່ນຂຶ້ນ; ຄຽງຄູ່ກັນນັ້ນ ຍັງຕ້ອງສູ້ຊົນອໍານວຍຊ່ວຍເຫຼືອ ການເຄື່ອນໄຫວວຽກງານຂອງພະນັກງານ, ລັດຖະກອນ, ຍົກລະດັບຊີວິດການເປັນຢູ່ໃຫ້ດີຂຶ້ນ. ພ້ອມທັງ, ສ້າງເງື່ອນໄຂທາງດ້ານວັດຖຸເຕັກນິກກໍ່ຄື ເຄື່ອງມືເຮັດວຽກຂອງຫ້ອງວ່າການລັດຖະບານ ໃຫ້ມີປະສິດທິຜົນດີກວ່າເກົ່າ.

ພິເສດ ໃນກອງປະຊຸມຄັ້ງນີ້ຍັງໄດ້ຮັບກຽດໂອ້ລົມໂດຍ ທ່ານ ທອງສິງ ທຳມະວົງ ກຳມະການກົມການເມືອງສູນກາງພັກ, ນາຍົກລັດຖະມົນຕີ. ເພື່ອເປັນທິດທາງຈັດຕັ້ງປະຕິບັດວຽກງານ ຂອງຫ້ອງວ່າການລັດຖະບານ ໃຫ້ນັບມື້ນັບມີຄຸນນະພາບ ແລະ ໄດ້ຮັບຜົນສຳເລັດຫຼາຍກວ່າເກົ່າ ທ່ານໄດ້ຊີ້ນຳ ແລະ ເນັ້ນໃຫ້ຫ້ອງວ່າການລັດຖະບານເອົາໃຈໃສ່ ຄື:
1. ອົງຄະນະພັກຫ້ອງວ່າການລັດຖະບານ ຕ້ອງເພີ່ມທະວີການນຳພາ ເຮັດໜ້າທີ່ເປັນເສນາທິການໃຫ້ລັດຖະບານ, ນາຍົກລັດຖະມົນຕີ ແລະ ບັນດາຮອງນາຍົກລັດຖະມົນຕີ ໃຫ້ໄດ້ດີຕື່ມອີກ;
2. ຕ້ອງເພີ່ມທະວີຕື່ມອີກໃນການເຮັດໜ້າທີ່ ເປັນຜູ້ປະສານງານທີ່ດີກັບບັນດາຂະແໜງການຕ່າງໆ ໃນຂອບເຂດທົ່ວປະເທດ ຕາມທິດເຮັດໃຫ້ມີການເຄື່ອນໄຫວຢ່າງກົມກຽວ ແລະ ຊ່ວຍ ໜູນເຊິ່ງກັນ ແລະກັນ, ຮັບປະກັນພາລະບົດບາດ, ໜ້າທີ່, ເສີມຂະຫຍາຍສິດເປັນເຈົ້າ ແລະ ຄວາມຮັບຜິດຊອບຂອງທຸກພາກສ່ວນໃຫ້ສູງຂຶ້ນຕື່ມອີກ;
3. ສືບຕໍ່ເຮັດໜ້າທີ່ບໍລິການຮັບໃຊ້ຕາມທິດຫັນເປັນທັນສະໄໝ, ເປີດເຜີຍ, ວ່ອງໄວ, ທັນການ ແລະ ຮັບປະກັນຄຸນນະພາບ ເປັນຕົ້ນ ການເປີດນໍາໃຊ້ເວັບໄຊຂອງລັດຖະບານ ແລະ ວາລະ ສານ “ນັກບໍລິຫານ”. ພ້ອມທັງສ້າງພະນັກງານ, ລັດຖະກອນໃຫ້ທັນສະໄໝ. ພ້ອມນັ້ນ, ສະມາຊິກພັກ-ພະນັກງານທຸກຄົນ ຕ້ອງເປັນຜູ້ບໍລິການຮັບໃຊ້ທີ່ຈົງຮັກພັກດີຕໍ່ອຸດົມການຂອງພັກ, ຕໍ່ຜູ້ນຳ, ຖືກຕ້ອງຕາມກົດໝາຍ ແລະ ລະບຽບການຕ່າງໆ ທີ່ໄດ້ປະກາດໃຊ້ແລ້ວ, ພ້ອມກັນນັ້ນ ກໍ່ຕ້ອງເຮັດການບໍລິການໃຫ້ສັງຄົມ, ປະຊາຊົນໄດ້ຮັບຄວາມສະດວກວ່ອງໄວ, ໂປ່ງໃສ ແລະ ຍຸຕິທຳ ເຮັດໃຫ້ການຈໍລະຈອນເອກະສານຜ່ານປະຕູດຽວ;
4. ເອົາໃຈໃສ່ໃນການສ້າງ ແລະ ຄຸ້ມຄອງພະນັກງານ-ລັດຖະກອນຕາມທິດຍົກສູງຄຸນນະພາບ, ຫັນເປັນຊ່ຽວຊານ, ຫັນເປັນທັນສະໄໝ, ແກ້ໄຂບັນຫາການຈັດຕັ້ງທີ່ມີຫຼາຍຂັ້ນ, ຫຼາຍຂອດ ແລະ ສິ່ງອັດຕັນຕ່າງໆ; ສ້າງໃຫ້ໄດ້ຖັນແຖວພະນັກງານສອດຄ່ອງກັບໂຄງປະກອບ, ພຽງພໍກັບຄວາມຕ້ອງການໂດຍພື້ນຖານ, ຄົບຊຸດ ແລະ ມີຖັນແຖວພະນັກງານສືບທອດທີ່ໜັກແໜ້ນ ແລະ ຕໍ່ເນື່ອງ ໂດຍມີການຄຸ້ມຄອງນຳໃຊ້ຢ່າງເໝາະສົມ ແລະ ມີປະສິດທິພາບ. ພ້ອມກັນນັ້ນ ກໍ່ສົ່ງເສີມໃຫ້ພະນັກງານຕັ້ງໜ້າຄົ້ນຄວ້າຮ່ຳຮຽນດ້ວຍຕົນເອງ ເພື່ອຍົກລະດັບຄວາມຮູ້, ຄວາມສາມາດໃຫ້ນັບມື້ ນັບສູງຂຶ້ນ;
5.ສືບຕໍ່ເອົາໃຈໃສ່ປັບປຸງ ແລະ ເພີ່ມທະວີບົດບາດການນໍາພາຂອງຄະນະພັກຫ້ອງວ່າການລັດຖະບານ, ສືບຕໍ່ກໍ່ສ້າງ ແລະ ຂະຫຍາຍພັກໃຫ້ມີຄວາມຫນັກແໜ້ນເຂັ້ມແຂງຕື່ມອີກ. ໃນໂອກາດ ທີ່ມີຄວາມໝາຍສຳຄັນນີ້, ທ່ານນາຍົກລັດຖະມົນຕີ ຍັງໄດ້ຮຽກຮ້ອງມາຍັງຄະນະພັກ, ຄະນະນຳຫ້ອງວ່າການລັດຖະບານ, ບັນດາສະມາຊິກພັກ, ພະນັກງານ-ລັດຖະກອນ ທົ່ວຫ້ອງວ່າການ ລັດຖະບານ ຈົ່ງເສີມຂະຫຍາຍມູນເຊື້ອຂອງຫ້ອງວ່າການລັດຖະບານ, ເພີ່ມທະວີຄວາມສາມັກຄີເປັນປຶກແຜ່ນ, ບຸກໜ້າບືນຕົວຜ່ານຜ່າຄວາມຫຍຸ້ງຍາກ, ເສີມຂະຫຍາຍຫົວຄິດປະດິດສ້າງ, ເປັນເຈົ້າການກ້າຄິດ, ກ້າເຮັດ ແລະ ກ້າຮັບຜິດຊອບ, ເດັດດ່ຽວປະຕິບັດແນວທາງປ່ຽນແປງໃໝ່ຂອງພັກ, ສ້າງບາດກ້າວບຸກທະລຸໃນ 4 ດ້ານໃຫ້ປະກົດຜົນເປັນຈິງ ເປັນຕົ້ນ ປະຕິບັດຄໍາຂວັນ 3 ດີ (ການເປັນເສນາທິການທີ່ດີ, ການປະສານງານທີ່ດີ ແລະ ການບໍລິການຮັບໃຊ້ທີ່ດີ) ຂອງຫ້ອງວ່າການລັດຖະບານ; ສູ້ຊົນເຮັດໃຫ້ມະຕິຂອງກອງປະຊຸມໃຫຍ່ຄັ້ງທີ III ຂອງອົງຄະນະພັກ ຫ້ອງວ່າການລັດຖະບານ ໄດ້ຮັບການຜັນຂະຫຍາຍ ແລະ ສືບຕໍ່ຈັດຕັ້ງປະຕິບັດໃຫ້ມີຜົນສຳເລັດຢ່າງຈົບງາມ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ