ມອບ-ຮັບ ເຄື່ອງຊ່ວຍເຫຼືອ ໃນວຽກງານ ໂຄສະນາ ໃຫ້ແກ່ ຫ້ອງວ່າການ ລັດຖະບານ

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນພຸດ, 26 ມິ.ນ 2014 09:00

​​

      ​ເພື່ອເປັນການປະກອບສ່ວນເຂົ້າໃນວຽກງານໂຄສະນາເຜີຍແຜ່ ແນວທາງນະໂຍບາຍຂອງພັກ ແລະ ລັດຖະບານ. ດັ່ງນັ້ນ, ໃນຕອນບ່າຍຂອງວັນທີ 25 ມີນາ 2014 ທີ່ຫ້ອງວ່າການລັດຖະບານ (ຫລບ) ກໍ່ໄດ້ຈັດພິທີ ມອບ-ຮັບ ເຄື່ອງຊ່ວຍເຫຼືອ ປະກອບມີ: ກ້ອງຖ່າຍຮູບ 1 ໜ່ວຍ ແລະ ກ້ອງວີດີໂອ 1 ໜ່ວຍ ພ້ອມທັງອຸປະກອນຄົບຊຸດ ລວມມູນຄ່າ 116 ລ້ານກີບ ໃຫ້ແກ່ຫ້ອງວ່າການລັດຖະບານ ເຊິ່ງຕາງໜ້າຮັບໂດຍທ່ານ ຄຳພັນ ເຜີຍຍະວົງ ລັດຖະມົນຕີຊ່ວຍວ່າການ, ຮອງຫົວໜ້າຫ້ອງວ່າການລັດຖະບານ ແລະ ມອບໂດຍທ່ານ ພຸດທະລັກ ມັງພາກອນ ຮອງປະທານກຸ່ມບໍລິສັດ ຄູນຄຳ ຈຳກັດ. ພ້ອມນີ້, ກໍ່ມີບັນດາທ່ານຫົວໜ້າກົມ-ຮອງກົມ ຈາກກົມກອງອ້ອມຂ້າງ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

     ເຄື່ອງຊ່ວຍເຫຼືອທີ່ນຳມາມອບໃນຄັ້ງນີ້ແມ່ນເປັນການປະກອບສ່ວນຊ່ວຍເຫຼືອຂອງ ສອງກຸ່ມບໍລິສັດ ຄື: ກຸ່ມບໍລິສັດຄູນຄຳ ຈຳກັດ ແລະ ກຸ່ມບໍລິສັດ ລາວມີໄຊ ຈຳກັດ ເຊິ່ງຈະໄດ້ນຳໃຊ້ເຂົ້າໃນວຽກງານຂ່າວສານຂອງຫ້ອງວ່າການລັດຖະບານ ເວົ້າລວມ, ເວົ້າສະເພາະ ກໍ່ແມ່ນກົມປະຊາສຳພັນ ທີ່ມີໜ້າທີ່ໃນການກະກຽມເນື້ອໃນ, ບົດຄວາມ ແລະ ຂໍ້ມູນຂ່າວສານຕ່າງໆທີ່ພົວພັນກັບການເຄື່ອນໄຫວ ຂອງຄະນະລັດຖະບານ ເປັນຕົ້ນ ທ່ານ ນາຍົກ-ບັນດາຮອງນາຍົກລັດຖະມົນຕີ, ສະມາຊິກລັດຖະບານ ແລະ ການເຄື່ອນໄຫວຂອງ ຫລບ ພ້ອມທັງໝູນໃຊ້ເຂົ້າໃນວຽກງານຈັດພິມວາລະສານ ຂອງ ຫລບ ແລະ ການຜະລິດສື່ອື່ນໆ ເພື່ອເຜີຍແຜ່ແນວທາງນະໂຍບາຍທີ່ພັກ-ລັດ ວາງອອກ ໃຫ້ໄປສູ່ພໍ່ແມ່ປະຊາຊົນລາວບັນດາເຜົ່າ ໄດ້ຢ່າງທົ່ວເຖິງ.

      ໃນໂອກາດນີ້, ທ່ານ ຄຳພັນ ເຜີຍຍະວົງ ກໍ່ໄດ້ສະແດງຄວາມຂອບໃຈຕໍ່ການຊ່ວຍເຫຼືອຄັ້ງນີ້ຂອງທັງສອງກຸ່ມບໍລິສັດ ທີ່ໄດ້ປະກອບສ່ວນອັນສຳຄັນເຂົ້າໃນວຽກງານຂອງຫ້ອງວ່າການລັດຖະບານ ໂດຍສະເພາະການຫັນເປັນຊ່ຽວຊານ ແລະ ທັນສະໄໝ ຂອງຫ້ອງວ່າການລັດຖະບານ ໃນການ​​ສະໜອງຂໍ້ມູນ-ຂ່າວສານ ໃຫ້ທັນກັບສະພາບການ ແລະ ຫວັງຢ່າງຍິ່ງວ່າທັງສອງບໍລິສັດດັ່ງກ່າວຈະສືບຕໍ່ສະໜັບສະໜູນຊ່ວຍເຫຼືອໃນທຸກຂົງເຂດວຽກງານ ຂອງລັດຖະບານ ຕໍ່ໄປ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ