ກອງປະຊຸມ ສົ່ງເສີມ ແລະ ດຶງດູດ ການລົງທຶນ ໃນເຂດເສດຖະກິດ ສະເພາະ ບຶງທາດຫຼວງ

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນອັງຄານ, 25 ມິ.ນ 2014 09:00

      ໃນໂອກາດທີ່ຄະນະນັກລົງທຶນໃນສະມາຄົມນັກທຸລະກິດເຊື້ອສາຍຈີນ ແຫ່ງຣາຊະອານາຈັກໄທ ເດີນທາງມາເຄື່ອນໄຫວຢ້ຽມຢາມ ແລະ ສຳຫຼວດການລົງທຶນຢູ່ນະຄອນຫຼວງວຽງຈັນ. ດັ່ງນັ້ນ, ໃນຕອນເຊົ້າຂອງວັນທີ 24 ມີນາ 2014 ທີ່ສຳນັກງານເຂດເສດຖະກິດສະເພາະບຶງທາດຫຼວງ ກໍ່ໄດ້ຈັດກອງປະຊຸມສົ່ງເສີມ ແລະ ດຶງດູດການລົງທຶນຂອງໂຄງການພັດທະນາເຂດເສດຖະກິດ ສະເພາະບຶງທາດຫຼວງຂຶ້ນ ພາຍໃຕ້ການເປັນປະທານຂອງທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ພ້ອມນີ້, ກໍ່ມີ ທ່ານ ນາງ ບຸນເພັງ ມູນໂພໄຊ ລັດຖະມົນຕີປະຈຳຫ້ອງວ່າການ ລັດຖະບານ, ທ່ານ ນາງ ບົວທາ ຂັດຕິຍະ ຮອງປະທານ, ຫົວໜ້າກອງເລຂາຄະນະກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ພ້ອມດ້ວຍຜູ້ຕາງໜ້າສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານຮອງປະທານສະພາບໍລິຫານເຂດເສດຖະກິດສະເພາະບຶງທາດຫຼວງ ແລະ ຄະນະນັກລົງທຶນໃນສະມາຄົມ ນັກທຸລະກິດເຊື້ອສາຍຈີນ ແຫ່ງຣາຊະອານາຈັກໄທເຂົ້າຮ່ວມ.

       ໃນກອງປະຊຸມຄັ້ງນີ້ ທ່ານເຈົ້າຄອງນະຄອນຫຼວງວຽງຈັນ ໄດ້ກ່າວວ່າ: ການພັດທະນາເຂດເສດຖະກິດສະເພາະ (ຂພສ) ແມ່ນຮູບການໜຶ່ງຂອງການພັດທະນາເສດຖະກິດ ທີ່ພັກ ແລະ ລັດຖະບານ ແຫ່ງ ສປປ ລາວ ສ້າງຂຶ້ນເພື່ອແນໃສ່ບັນລຸຄາດໝາຍທາງດ້ານເສດຖະກິດ-ສັງຄົມ, ຫຼຸດຜ່ອນຂອດຂັ້ນທີ່ອຸດຕັນໃຫ້ມີທ່າກ້າວກະໂດດໂດຍນຳໃຊ້ທ່າແຮງ ແລະ ທີ່ຕັ້ງຕາມ ຈຸດຍຸດທະສາດທາງເສດຖະກິດຂອງປະເທດ ນຳໃຊ້ກົນໄກຫົວໜ່ວຍບໍລິຫານນ້ອຍ-ສັງຄົມກວ້າງ (ປະຕູດຽວ) ໃນການບໍລິຫານຄຸ້ມຄອງ. ປະຈຸບັນຢູ່ ສປປ ລາວ ມີ ຂພສ 10 ແຫ່ງ. ໃນນັ້ນ, ເປັນເຂດເສດຖະກິດພິເສດ 2 ແຫ່ງ ແລະ ເຂດເສດຖະກິດສະເພາະ 8 ແຫ່ງ, ເຊິ່ງເຂດເສດຖະກິດພິເສດບຶງທາດຫຼວງກໍ່ເປັນເຂດໜຶ່ງທີ່ມີທ່າແຮງທາງດ້ານທີ່ຕັ້ງ ເພື່ອສ້າງເປັນສະຖານທີ່ພັກຜ່ອນ ຂອງຊາວນະຄອນຫຼວງວຽງຈັນ ແລະ ນັກທ່ອງທ່ຽວ.

      ນອກຈາກບັນດາທ່າແຮງດ້ານທີ່ຕັ້ງແລ້ວ ຂພສ ສປປ ລາວ ຍັງມີບັນດານິຕິກຳທີ່ສົ່ງເສີມ ແລະ ຄຸ້ມຄອງການພັດທະນາ ຂພສ ສະເພາະອີກເພື່ອເອື້ອອຳນວຍຄວາມສະດວກ, ຄວາມວ່ອງໄວ ແລະ ໂປ່ງໃສດ້ວຍນະໂຍບາຍພິເສດແກ່ຜູ້ພັດທະນາ ແລະ ຜູ້ທີ່ເຂົ້າມາລົງທຶນໃນ ຂພສ ຢູ່ ສປປ ລາວ ທັງພາຍໃນ ແລະ ຕ່າງປະເທດ, ປະຈຸບັນ ສປປ ລາວໄດ້ເຂົ້າເປັນສະມາຊິກອົງການການຄ້າໂລກ (WTO) ແລະ ກຳລັງຈະເຂົ້າຮ່ວມປະຊາຄົມເສດຖະກິດອາຊຽນ (AEC) ໃນປີ 2015 ອີກດ້ວຍຊຶ່ງຈະເປັນອີກທ່າແຮງໜຶ່ງໃນການດຶງດູດການລົງທຶນ ແລະ ເຊື່ອມຕົວທາງເສດຖະກິດຂອງ ສປປ ລາວ ເຂົ້າສູ່ພາກພື້ນ ແລະ ສາກົນ.

      ປະຈຸບັນເຂດເສດຖະກິດສະເພາະບຶງທາດຫຼວງໄດ້ສຳເລັດການພັດທະນາພື້ນຖານໂຄງລ່າງ ແລະ ໜ້າວຽກຈຳນວນໜຶ່ງເປັນຕົ້ນການຊົດເຊີຍເວນຄືນທີ່ດິນໃຫ້ແກ່ປະຊາຊົນຜູ້ໄດ້ຮັບຜົນກະທົບ, ສ້າງຫ້ອງການບໍລິຫານເຂດ, ສ້າງຮູບແບບຈຳລອງແຜນແມ່ບົດການພັດທະນາເຂດ, ຂຸດໜອງນ້ຳໃຫຍ່ກວ້າງ 50 ເຮັກຕາ, ສ້າງທາງປູເບຕົງພາຍໃນເຂດ, ສ້າງຂົວຂ້າມນ້ຳ 4 ແຫ່ງ, ສ້າງປະຕູທາງເຂົ້າເຂດ ແລະ ກຳລັງສ້າງອາພາດເມັນ 11 ຕຶກ, ສູງ 18 ຊັ້ນ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ