ສຳມະນາ ກ່ຽວກັບການສ້າງກົດໝາຍ ແລະ ນິຕິກຳໃຕ້ກົດໝາຍ ຂັ້ນສູນກາງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 16 ມິ.ນ 2021 15:00

​​ໃນວັນທີ 16-17 ມີນາ 2021ທີ່ ໂຮງແຮມແລນມາກ, ນະຄອນຫຼວງວຽງຈັນ ຫ້ອງວ່າການສຳນັກງານນາຍົກລັດຖະມົນຕີ (ກົມນິຕິກຳ) ໄດ້ຈັດກອງປະຊຸມສຳມະນາ ກ່ຽວກັບການສ້າງກົດໝາຍ ແລະ ນິຕິກຳໃຕ້ກົດໝາຍ ຂັ້ນສູນກາງ (Workshop for Government Officials on Drafting of Laws and Sub-Laws) ໂດຍການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (Citizen Engagement for Good Governance, Accountability and Rule of Law Programme = CEGGA) ຂຶ້ນ  ໂດຍການເປັນປະທານຂອງທ່ານ ປອ. ນາງ ສຸວັນເພັງ ບຸບຜານຸວົງ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ມີບັນດາທ່ານ ຮອງລັດຖະມົນຕີກະຊວງ-ອົງການລັດທຽບເທົ່າກະຊວງ, ບັນດາທ່ານ ຮອງກຳມາທິການ, ຮອງຫົວໜ້າເລຂາທິການ ສະພາແຫ່ງຊາດ, ທ່ານ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານ ຫົວໜ້າກົມ, ຫົວໜ້າຫ້ອງການ, ວິທະຍາກອນບັນຍາຍ, ຊ່ຽວຊານອາວຸໂສ ທີ່ກ່ຽວຂ້ອງ ແລະ ນັກສຳມະນາກອນ ເຂົ້າຮ່ວມ.

ທ່ານ ປອ. ນາງ ສຸວັນເພັງ ບຸບຜານຸວົງ ໄດ້ກ່າວວ່າ: ກອງປະຊຸມສຳມະນາຄັ້ງນີ້ ໄດ້ຈັດຂຶ້ນ ເພື່ອປືກສາຫາລື, ທົບທວນຄືນ, ສົນທະນາແລກປ່ຽນປະສົບການປະຕິບັດຕົວຈິງ ໃນຫຼາຍຫົວຂໍ້ສົນທະນາທີ່ສຳຄັນ ເປັນຕົ້ນ: ການເສນາທິການ ໃຫ້ແກ່ລັດຖະບານ ໃນວຽກງານສ້າງ ແລະ ປັບປຸງນິຕິກຳ, ການຫັນພັນທະສາກົນ ເຂົ້າສູ່ກົດໝາຍພາຍໃນ ສປປ ລາວ, ການສ້າງກົດໝາຍ ແລະ ນິຕິກຳໃຕ້ກົດໝາຍ ຂັ້ນສູນກາງ, ການສ້າງ ແລະ ປັບປຸງກົດໝາຍ ພາຍຫຼັງທີ່ລັດຖະບານ ສະເໜີຕໍ່ຄະນະປະຈຳສະພາແຫ່ງຊາດ, ການປະເມີນຜົນກະທົບຂອງຮ່າງນິຕິກຳ, ການສ້າງເອກະສານທາງການ, ການເຂົ້າເຖິງຂໍ້ມູນຂ່າວສານ ຜ່ານລະບົບເອເລັກໂຕຣນິກ ແລະ ບາງບົດຮຽນ ການປະເມີນຜົນກະທົບ ກ່ຽວກັບການສ້າງກົດໝາຍຂອງສາກົນ.
​ 
ກອງປະຊຸມຄັ້ງນີ້, ນອກຈາກການສົນທະນາແລກປ່ຽນບົດຮຽນ ແລະ ປະສົບການ ທາງດ້ານນິຕິກຳ ແລະ ພຶດຕິກຳຕົວຈິງແລ້ວ, ຊ່ຽວຊານທາງດ້ານກົດໝາຍ ຂອງ ສປປ ລາວ ຍັງໄດ້ສະເໜີບົດຮຽນດ້ານການສ້າງກົດໝາຍ ແລະ ນິຕິກຳໃຕ້ກົດໝາຍ ຂັ້ນສູນກາງ; ຊ່ຽວຊານອະວຸໂສ ດ້ານການສ້າງລັດປົກຄອງດ້ວຍກົດໝາຍ ທີ່ຮ່ວມປະຊຸມທາງໄກ ຈາກປະເທດຢູເຄນ ໃນແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (CEGGA) ກໍ່ໄດ້ແລກປ່ຽນປະສົບການ, ຂໍ້ຄິດເຫັນ ແລະ ບົດຮຽນການປະເມີນຜົນກະທົບ ກ່ຽວກັບ ການສ້າງກົດໝາຍຂອງສາກົນ. ນອກນັ້ນ, ທ່ານ ປະທານກອງປະຊຸມ ຍັງໄດ້ເນັ້ນໜັກ ແລະ ຮຽກຮ້ອງມາຍັງ ວິທະຍາກອນ ແລະ ສຳມະນາກອນ ຈົ່ງເອົາໃຈໃສ່ສຸມສະຕິປັນຍາ ແລະ ຍົກສູງຄວາມຮູ້ຄວາມສາມາດຂອງຕົນ ເຂົ້າໃນການແລກປ່ຽນຄຳຄິດຄຳເຫັນ, ປະສົບການ, ພຶດຕິກຳຕົວຈິງ ແລະ ຊ່ວຍເຫຼືອກັນ ເພື່ອໃຫ້ສາມາດບັນລຸຜົນ ຕາມຈຸດປະສົງ ແລະ ລະດັບຄາດໝາຍທີ່ໄດ້ຕັ້ງໄວ້.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ