ຫສນຍ ຈັດພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 109 ປີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 06 ມິ.ນ 2019 16:00

​​ໃນຕອນເຊົ້າວັນທີ 6 ມີນາ 2019 ຫ້ອງວ່າການ ສຳນັກງານນາຍົກລັດຖະມົນຕີ (ຫສນຍ) ຈັດພິທີສະເຫຼີມສະຫຼອ ງວັນແມ່ຍິງສາກົນ ວັນທີ 8 ມີນາ ຄົບຮອບ 109 ປີ (8 ມີນາ 1910 ຫາ 8 ມີນາ 2019) ພາຍໃຕ້ການເປັນປະທານ ຂອງທ່ານ ສົມສະນິດ ສຸວັນນະລາດ ຮອງເລຂາຄະນະພັກ, ຮອງລັດຖະມົນຕີ, ຮອງຫົວໜ້າ ຫສນຍ; ມີບັນດາຜູ້ຕາງໜ້າ ຄະນະພັກຮາກຖານ, ບັນດາໜ່ວຍພັກ ທີ່ສັງກັດຫ້ອງວ່າການ ສຳນັກງານນາຍົກລັດຖະມົນຕີ ແລະ ສະມາຊິກແມ່ຍິງ ຫສນຍ ເຂົ້າຮ່ວມ.

​​ຈຸດປະສົງ ຂອງການຈັດພິທີໃນຄັ້ງນີ້ ເພື່ອຮັບຟັງການຫວນຄືນ ມູນເຊື້ອປະຫວັດຄວາມເປັນມາ ຂອງວັນແມ່ຍິງສາກົນ; ຄວາມຮູ້ພື້ນຖານ ກ່ຽວກັບ ການບໍລິຫານ ແລະ ພາວະຄວາມເປັນຜູ້ນຳ, ແນໃສ່ເຮັດໃຫ້ຜູ້ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈ ຕໍ່ປະຫວັດຄວາມເປັນມາ ຂອງວັນສຳຄັນ ທາງດ້ານປະຫວັດສາດດັ່ງກ່າວ, ພ້ອມທັງ ເປັນການເພີ່ມຄວາມຮັບຮູ້ ທາງດ້ານການບໍລິຫານ ແລະ ພາວະຄວາມເປັນຜູ້ນຳ ໃຫ້ແກ່ເອື້ອຍນ້ອງແມ່ຍິງ ຫສນຍ ໄດ້ນຳໄປໝູນໃຊ້ ເຂົ້າໃນການດຳລົງຊີວິດ ກໍ່ຄື ການຈັດຕັ້ງປະຕິບັດ ວຽກງານຂອງຕົນ ໃຫ້ເກີດດອກອອກຜົນ ແລະ ມີຄວາມກ້າວໜ້າໃນອາຊີບ. ຊຶ່ງການນຳສະເໜີເນື້ອໃນດັ່ງກ່າວນັ້ນ ແມ່ນໄດ້ຮັບກຽດເຜີຍແຜ່ໂດຍທ່ານ ນາງ ຈັນດີ ປັນແກ້ວ ອາດີດປະທານສະຫະພັນແມ່ຍິງ ຫສນຍ ໂດຍໄດ້ຍົກໃຫ້ເຫັນ ຄວາມໝາຍຄວາມສຳຄັນ ຂອງວັນແມ່ຍິງສາກົນ ພ້ອມທັງ ຍົກໃຫ້ເຫັນການເຕີບໃຫຍ່ ຂະຫຍາຍຕົວ ແລະ ການປະກອບສ່ວນສຳຄັນ ຂອງແມ່ຍິງລາວ ໂດຍສະເພາະ ການຍົກສູງຖານະບົດບາດ ແລະ ການມີສ່ວນຮ່ວມຂອງແມ່ຍິງ ເຂົ້າໃນການປະຕິບັດ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ທັງໃນອະດີດ​ ແລະ ປະຈຸບັນ ເຊິ່ງລ້ວນແຕ່ປະກອບສ່ວນອັນສຳຄັນ ແລະ ໃຫຍ່ຫຼວງ ເຮັດໃຫ້ປະເທດຊາດ ມີຄວາມສະຫງົບ ເສດຖະກິດ-ສັງຄົມ ໄດ້ຮັບການພັດ ທະນາ ນັບມື້ນັບພົ້ນເດັ່ນໃນເວທີພາກພື້ນ ແລະ ສາກົນ.
​​ໃນຕອນທ້າຍ, ຜູ້ເຂົ້າຮ່ວມໄດ້ຮັບຟັງການໂອ້ລົມ ແລະ ຊີ້ນຳຂອງທ່ານປະທານພິທີ, ເຊິ່ງທ່ານໄດ້ເນັ້ນໜັກໃຫ້ສະຫະພັນແມ່ຍິງ ຫສນຍ ເອົາໃຈໃສ່ຕື່ມບາງດ້ານ ເປັນຕົ້ນແມ່ນ ເພີ່ມທະວີຄວາມຮັບຜິດຊອບຂອງຕົນ ໃນການປະຕິບັດໜ້າທີ່ ເປັນເສນາທິການ ໃຫ້ແກ່ການນໍາແຕ່ລະຂັ້ນ ແລະ ສືບຕໍ່ເອົາໃຈໃສ່ປັບປຸງກົງຈັກ ການຈັດຕັ້ງຂອງຕົນ ໃຫ້ມີຄວາມເຂັ້ມແຂງຮອບດ້ານ, ສືບຕໍ່ສ້າງຄວາມເຂັ້ມແຂງ ທາງດ້ານບຸກຄະລາກອນ ທີ່ເຮັດວຽກງານ ສະຫະພັນແມ່ຍິງ ໃຫ້ສາມາດເຄື່ອນໄຫວໄດ້ ຢ່າງຄ່ອງຕົວ ແລະ ມີປະສິດທິຜົນກວ່າເກົ່າ; ພ້ອມທັງ ປັບປຸງແບບແຜນວິທີເຮັດວຽກ, ແບບແຜນວິທີນໍາພາ ແລະ ເຊີດຊູຄວາມຮັບຜິດຊອບຂອງຕົນ ໃຫ້ສູງຂຶ້ນເລື້ອຍໆ; ເອົາໃຈໃສ່ສ້າງ ແລະ ພັດທະນາຕົນເອງ ໃນທຸກດ້ານ ໃຫ້ມີຄວາມເຂັ້ມແຂງ ເພື່ອກຽມພ້ອມຮັບໃຊ້ປະເທດຊາດ ແລະ ສັງຄົມ ແລະ ເອົາໃຈໃສ່ປະຕິບັດກົດລະບຽບຂອງແມ່ຍິງ, ແຜນພັດທະນາແມ່ຍິງ ແລະ ຄໍາຂວັນ 3 ດີ ຂອງແມ່ຍິງ ຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີ ໂດຍຕິດພັນກັບຄໍາຂວັນ 3 ດີ ຂອງ ຫສນຍ ຄື: ເປັນເສນາທິການທີ່ດີ, ປະສານງານທີ່ດີ ແລະ ບໍລິການຮັບໃຊ້ທີ່ດີ; ພ້ອມກັນນັ້ນ ກໍ່ເອົາໃຈໃສ່ ໃນການກະກຽມດໍາເນີນ ກອງປະຊຸມໃຫ່ຍ 3 ຂັ້ນ ໃຫ້ສໍາເລັດຕາມແຜນການ ທີ່ກໍານົດໄວ້; ເຊີດຊູ ແລະ ເຕົ້າໂຮມຄວາມສາມັກຄີ ຢ່າງເປັນປຶກແຜ່ນ, ເອົາໃຈໃສ່ໃນການອະນຸລັກ ຮັກສາຮີດຄອງປະເພນີ ອັນດີງາມຂອງຊາດລາວ ທີ່ມີມາແຕ່ດົນນານ ໃຫ້ຄົງຢູ່ຄູ່ກັບແມ່ຍິງລາວຕະຫຼອດໄປ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ