ທ່ານ ເພັດ ພົມພິພັກ ຕ້ອນຮັບທີ່ປຶກສາພິເສດ ຂອງລັດຖະບານຍີ່ປຸ່ນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 04 ມິ.ນ 2019 17:00

​​ໃນຕອນບ່າຍ ຂອງວັນທີ 4 ມີນາ 2019 ທີ່ຫ້ອງວ່າການ ສຳນັກງານນາຍົກລັດຖະມົນຕີ, ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມ ຂອງທ່ານ ໂກຢາ ນິຊິກະວະ (Mr. Koya NISHIKAWA), ທີ່ປຶກສາພິເສດ ຄະນະລັດຖະບານ ຍີ່ປຸ່ນ ພ້ອມດ້ວຍຄະນະ, ໃນໂອກາດມາເຄື່ອນໄຫວ ​ຢ້ຽມຢາມ ສປປ ລາວ ໃນລະຫວ່າງວັນທີ 3-5 ມີນາ 2019.
                      
ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ກ່າວສະແດງຄວາມຍິນດີ ຕ້ອນຮັບ ແລະ ຊົມເຊີຍ ຕໍ່ການມາຢ້ຽມຢາມ ສປປ ລາວ ຂອງທ່ານ ໂກຢາ ນິຊິກະວະ ພ້ອມດ້ວຍຄະນະ ໃນຄັ້ງນີ້, ພ້ອມທັງ ຕີລາຄາສູງ ຕໍ່ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ນັບມື້ໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວ ເປັນກ້າວໆ, ຊຶ່ງເປັນການປະກອບສ່ວນ ອັນສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງສອງປະເທດ ລາວ ແລະ ຍີ່ປຸ່ນ ຢ່າງຕໍ່ເນື່ອງ, ບັນດາໂຄງການຮ່ວມມື ຂອງສອງປະເທດ ລ້ວນແລ້ວແຕ່ເກີດເປັນຮູບປະທຳຕົວຈິງ, ທັງມີະສິດທິຜົນສູງ ແລະ ກາຍເປັນສັນຍາລັກ ແຫ່ງການພົວພັນ ແລະ ການຮ່ວມມື ໃຫ້ແກ່ ສປປ ລາວ ແລະ ຍີ່ປຸ່ນ ໄດ້ເປັນຢ່າງດີ. ໃນໂອກາດດຽວກັນ, ທ່ານ ເພັດ ພົມພິພັກ ຍັງໄດ້ແຈ້ງໃຫ້ທ່ານ ໂກຢາ ນິຊິກະວະ ໄດ້ຮັບຊາບ ກ່ຽວກັບທ່າແຮງ ແລະ ຂໍຈຳກັດ ໃນການພັດທະນາ ຂອງ ສປປ ລາວ ລວມທັງ ນະໂຍບາຍຊຸກຍູ້ສົ່ງເສີມການລົງທຶນ ຢູ່ ສປປ ລາວ. ນອກຈາກນັ້ນ, ທ່ານຍັງໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ແລະ ສະໜັບສະໜູນ ຂອງລັດຖະບານ ແລະ ປະຊາຊົນຍີ່ປຸ່ນ ແກ່ ສປປ ລາວ ໃນໄລຍະຜ່ານມາ ເປັນຕົ້ນ ການພັດທະນາຊັບພະຍາກອນມະນຸດ, ການພັດທະນາພື້ນຖານໂຄງລ່າງ ຕິດພັນກັບ ການແກ້ໄຂຄວາມທຸກຍາກ ຂອງປະຊາຊົນ, ການແກ້ໄຂພິພິບັດ ແລະ ອື່ນໆ.

ໃນຕອນທ້າຍ, ທ່ານ ໂກຢາ ນິຊິກະວະ ກໍ່ໄດ້ກ່າວສະແດງ ຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໃນຄັ້ງນີ້, ພ້ອມທັງ ໄດ້ແຈ້ງໃຫ້ຊາບ ກ່ຽວກັບ ຜົນສຳເລັດເບື້ອງຕົ້ນ ໃນການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້. ນອກຈາກນັ້ນ ກໍ່ຍັງໄດ້ກ່າວສະແດງຄວາມຊົມເຊີຍ ຕໍ່ລັດຖະບານ ແລະ ປະຊາຊົນລາວ ທີ່ໄດ້ພ້ອມກັນເອົາໃຈໃສ່ ປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ ນັບມື້ມີຄວາມຈະລີນກ້າວໜ້າ ຢ່າງບໍ່ຢຸດຢັ້ງ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ