ຫສນຍ ເປີດຊຸດຝຶກອົບຮົມ ທິດສະດີການເມືອງ-ການປົກຄອງ ຊຸດທີ VI

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 29 ຕ.ລ 2018 17:00

ໃນຕອນເຊົ້າ ຂອງວັນທີ 29 ຕຸລາ 2018 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ເປີດຊຸດຝຶກອົບ ຮົມ ບຳລຸງທິດສະດີ ການເມືອງ-ການປົກຄອງ ໄລຍະ 45 ວັນ ຊຸດທີ VI ໃຫ້ແກ່ສະມາຊິກພັກ, ພະນັກງານ ພາຍໃນ ຫສນຍ, ໂດຍການໃຫ້ກຽດເຂົ້າຮ່ວມກ່າວເປີດ ຂອງສະຫາຍ ສົມສະນິດ ສຸວັນນະລາດ, ຮອງເລຂາຄະນະພັກ, ປະທານກວດກາພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີຜູ້ຕາງໜ້າຈາກ ສະຖາບັນການເມືອງ-ການປົກຄອງແຫ່ງຊາດ, ບັນດາສະຫາຍ ເລຂາຄະນະພັກຮາກຖານ, ເລຂາໜ່ວຍພັກ, ອົງການຈັດຕັ້ງມະຫາຊົນ ແລະ ສຳມະນາກອນ ພາຍໃນ ຫສນຍ ເຂົ້າຮ່ວມ.

ຈຸດປະສົງ ແມ່ນເພື່ອຍົກລະດັບຄວາມຮູ້ ທາງດ້ານທິດສະດີ ການເມືອງ-ການປົກຄອງ ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ, ໂດຍສະເພາະ ພະນັກງານ ນຳພາ-ຄຸ້ມຄອງ ທີ່ຢູ່ໃນແຜນກຳນົດ ຂອງ ຫສນຍ ໃຫ້ເລິກເຊິ່ງ, ທົ່ວເຖິງກວ່າເກົ່າ ໃນການກຽມພ້ອມ ໃຫ້ແກ່ການຈັດຕັ້ງປະຕິບັດໜ້າທີ່ວຽກງານຂອງຕົນ; ເພື່ອສ້າງຖັນແຖວພະນັກງານ ຫຼັກແຫຼ່ງ ມີທັດສະນະຫຼັກໝັ້ນຊົນຊັ້ນໜັກແໜ້ນ, ມີຄຸນສົມບັດ ສິນທຳປະຕິວັດ, ເຊື່ອໝັ້ນ ຕໍ່ການນຳພາຂອງພັກ, ມີແບບແຜນດຳລົງຊີວິດປອດໃສ, ມີແບບແຜນວິທີເຮັດວຽກທີ່ຖືກຕ້ອງ; ທັງເປັນບ່ອນອີງ ໃຫ້ແກ່ສະຫາຍສະມາຊິກພັກ, ພະນັກງານ ທີ່ຈະສືບທອດ ມີມາດຖານເງື່ອນໄຂ ໃນການປະຕິບັດໜ້າທີ່ການເມືອງຂອງຕົນ ໃຫ້ມີດ້ານຕັ້ງໜ້າ ແລະ ພັດທະນາຕົນເອງເປັນກ້າວໆ.
ເນື້ອໃນ ແລະ ບົດຮຽນ ທີ່ຈະນຳເຂົ້າໃນການຝຶກອົບຮົມ ຄັ້ງນີ້ ປະກອບມີ 5 ວິຊາ ຄື: ວິຊາ ກໍ່ສ້າງພັກ, ວິຊາ ເສດຖະ ສາດການເມືອງ ແລະ ການຄຸ້ມຄອງເສດຖະກິດ, ວິຊາ ປັດຊະຍາ ມາກ-ເລນິນ, ວິຊາ ລັດທິສັງຄົມນິຍົມວິທະຍາສາດ ແລະ ວິຊາ ການປົກຄອງ ໂດຍໄດ້ຮັບກຽດສິດສອນ ແລະ ບັນຍາຍ ຈາກອາຈານ ທີ່ມາຈາກ ສະຖາບັນການເມືອງ-ການປົກຄອງແຫ່ງຊາດ, ຊຶ່ງການຝຶກອົບຮົມ ທິດສະດີການເມືອງ-ການປົກຄອງ ຊຸດນີ້ ຈະດຳເນີນໄປຮອດ ຕົ້ນເດືອນມັງກອນ 2019.
ໃນໂອກາດກ່າວເປີດຊຸດຝຶກອົບຮົມ, ສະຫາຍ ຮອງເລຂາຄະນະພັກ ຫສນຍ ໄດ້ກ່າວບາງຕອນວ່າ: “ບັ້ນຝຶກອົບຮົມຄັ້ງນີ້ ມີຄວາມໝາຍຄວາມສຳຄັນຫຼາຍ ກ່ຽວກັບວຽກງານການສົ່ງເສີມ ຍົກລະດັບ ແລະ ພັດທະນາບຸກຄະລາກອນຂອງລັດ ໃຫ້ມີຄຸນນະພາບ ໃນການບໍລິຫານວຽກງານ ຢູ່ແຕ່ລະຂັ້ນ ໃຫ້ທົ່ວເຖິງ ແລະ ປະຕິບັດແຜນການ ການຈັດຕັ້ງປະຕິບັດຝຶກອົບຮົມ ພາຍໃນ ຫສນຍ ໃຫ້ສຳເລັດຕາມແຜນການທີ່ວາງໄວ້. ໃນໂອກາດນີ້, ຂໍຮຽກຮ້ອງມາຍັງຄະນະຮັບຜິດຊອບຝຶກອົບຮົມ ແລະ ສຳມະນາກອນທຸກສະຫາຍ ຈົ່ງຍົກສູງຄວາມຮັບຜິດຊອບຂອງຕົນ ໃນການດຳເນີນບັ້ນຝຶກອົບຮົມ ບຳລຸງທິດສະດີການເມືອງ-ການປົກຄອງ ໄລຍະ 45 ວັນ ໃນຄັ້ງນີ້ ໃຫ້ໄດ້ຮັບຜົນສຳເລັດຢ່າງຈົບງາມ”.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ