ຫສນຍ ຈັດກອງປະຊຸມສໍາມະນາແລກປ່ຽນບົດຮຽນ ຮ່ວມກັບບັນດາແຂວງ ພາກເໜືອ ແລະ ພາກກາງ

ຜູ້ຂຽນ: ນ. ຄໍາບິກ ສຸຂັນທາ

ວັນຈັນ, 22 ຕ.ລ 2018 16:00

     ໃນລະຫວ່າງວັນທີ 21-28 ຕຸລາ 2018 ຄະນະຄຸ້ມຄອງໂຄງການ "ຜະລິດສື່ ເພື່ອສະໜອງໃຫ້ແກ່ການນໍາກ່ຽວກັບການຄຸ້ມຄອງປ່າສະຫງວນ ແລະ ສັດນໍ້າ-ສັດປ່າ" ຂອງຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ທີ່ໄດ້ຮັບທຶນສະໜັບສະໜູນຈາກທະນາຄານໂລກ, ໂດຍຜ່ານກອງທຶນປົກປັກຮັກສາສິ່ງແວດລ້ອມ, ໄດ້ຈັດກອງປະຊຸມສຳມະນາຖອດຖອນບົດຮຽນ ກ່ຽວກັບວຽກງານໂຄສະນາຂໍ້ມູນຂ່າວສານ ໂດຍຕິດພັນກັບວຽກງານການຄຸ້ມຄອງປ່າສະຫງວນ ແລະ ສັດນໍ້າ-ສັດປ່າ ລະຫວ່າງພະນັກງານ ຂອງ ຫສນຍ ແລະ ບັນດາແຂວງພາກເໜືອ ຢູ່ທີ່ເມືອງແກ້ວອຸດົມ, ແຂວງວຽງຈັນ. ພາຍໃຕ້ການເປັນປະທານຂອງ ທ່ານ ນ. ວຽງສະຫວັນ ດວງສະຫວັນ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ຊີ້ນຳໂຄງການ, ມີຄະນະຄຸ້ມຄອງໂຄງການ, ຜູ້ຕາງໜ້າຈາກບັນດາກົມ ແລະ ຫໍປະຊຸມແຫ່ງຊາດ ທີ່ຂຶ້ນກັບ ແລະ ສັງກັດຢູ່ ຫສນຍ, ຜູ້ຕາງໜ້າຈາກຫ້ອງວ່າການຂອງບັນດາແຂວງພາກເໜືອ, ແຂວງໄຊສົມບູນ ແລະ ແຂວງວຽງຈັນ ແຂວງລະ 02 ທ່ານ, ວິທະຍາກອນຮັບເຊີນຈາກກະຊວງກະສິກຳ ແລະ ປ່າໄມ້, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຫ້ອງວ່າການສໍານັກງານນາຍົກລັດຖະມົນຕີ, ພະແນກກະສິກຳ ແລະ ປ່າໄມ້ ແຂວງວຽງຈັນ ພ້ອມດ້ວຍແຂກຮັບເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
     ໃນໂອກາດກ່າວເປີດກອງປະຊຸມ ທ່ານຮອງຫົວຫນ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ຊີ້ນຳໂຄງການ ໄດ້ກ່າວມີຄຳເຫັນຕໍ່ກອງປະຊຸມບາງຕອນວ່າ: ການປົກປັກຮັກສາປ່າສະຫງວນ ແລະ ສັດນ້ຳ-ສັດປ່າ ໄດ້ກຳນົດໄວ້ໃນ ກົດໝາຍວ່າດ້ວຍປ່າໄມ້ ຢ່າງຈະແຈ້ງວ່າ: ແມ່ນໜ້າທີ່ຂອງໝົດທຸກຄົນ, ທຸກສົງຄົມທີ່ມີສ່ວນຮ່ວມ ໃນການໂຄສະນາເຜີຍແຜ່ ເພື່ອປົກປັກຮັກສາ ແລະ ຄຸ້ມຄອງ; ສໍາລັບຢູ່ ຫສນຍ ມີກົມປະຊາສຳພັນ ທີ່ມີພາລະບົດ ບາດ, ເຮັດໜ້າທີ່ວຽກງານໂຄສະນາເຜີຍແຜ່ ບັນດາແຜນນະໂຍບາຍ, ກົດໝາຍ, ນິຕິກຳ, ດຳລັດ ແລະ ຄຳສັ່ງ ຂອງຂັ້ນເທິງ ໂດຍຜ່ານວາລະສານ ນັກບໍລິຫານ ແລະ ເວັບໄຊຂອງລັດຖະບານ ລວມທັງ ການເຜີຍແຜ່ຜົນງານການເຄື່ອນໄຫວຂອງນາຍົກ-ຮອງນາຍົກ ແລະ ສະມາຊິກລັດຖະບານ. ໃນທຸກໆເດືອນສະມາຊິກລັດຖະບານ ໄດ້ຈັດກອງປະຊຸມ ເຊິ່ງຜົນຂອງກອງປະຊຸມແຕ່ລະຄັ້ງ ຕ້ອງໄດ້ນຳມາເຜີຍແຜ່ໃຫ້ສັງຄົມໄດ້ຮັບຊາບ ໂດຍຜ່ານສື່ຕ່າງໆໃນທົ່ວສັງ ຄົມ ລວມທັງ ເວັບໄຊຂອງລັດຖະບານ ແລະ ວາລະສານ ນັກບໍລິຫານ ຫ້ອງວ່າການສໍານັກງານນາຍົກລັດຖະມົນຕີ.              
     ກອງປະຊຸມຖອດຖອນບົດຮຽນຄັ້ງນີ້ ເພື່ອເປັນການສືບຕໍ່ເພີ່ມທະວີການປະສານງານ ລະຫວ່າງສູນກາງ ແລະ ທ້ອງຖິ່ນ ລວມທັງ ການສະໜອງຂໍ້ມູນຕ່າງໆ ແລະ ສະພາບການເຄື່ອນໄຫວວຽກງານຕົວຈິງ ຢູ່ພາຍໃນທ້ອງ ຖິ່ນຂອງຕົນ ລົງໃນເວບໄຊ ທັງເປັນແລກປ່ຽນ ແລະ ເຊື່ອມໂຍງຂໍ້ມູນເຂົ້າກັບເວບໄຊລັດຖະບານ ແນໃສ່ ເພື່ອເຮັດໃຫ້ຂັ້ນເທິງຂອງຕົນ ກໍາບັນຫາຕ່າງໆໄດ້, ສິ່ງສໍາຄັນ ແມ່ນປະຕິບັດໜ້າທີ່ ເປັນເສນາທິການ, ປະສານງານ ແລະ ບໍລິການຮັບໃຊ້ຂັ້ນເທິງ ໃຫ້ນັບມື້ນັບມີປະສິດທິຜົນຫຼາຍຂຶ້ນ; ໄລຍະດໍາເນີນກອງປະຊຸມ ຜູ້ເຂົ້າຮ່ວມຈະໄດ້ຮັບຟັງຄວາມຮູ້ກ່ຽວກັບວຽກງານການຄຸ້ມຄອງປ່າສະຫງວນ ແລະ ສັດນ້ຳ-ສັດປ່າ ຢູ່ໃນລາວ; ຄວາມຮູ້ກ່ຽວກັບວຽກງານ ກວດກາການຄຸ້ມຄອງປ່າສະຫງວນ ແລະ ສັດນ້ຳ-ສັດປ່າ ຢູ່ແຂວງວຽງຈັນ, ຖອດຖອນບົດຮຽນກ່ຽວກັບເຕັກນິກການຂຽນຂ່າວ, ຂຽນບົດຄວາມ, ການຖ່າຍພາບ ແລະ ຕັດຕໍ່ວີດີໂອ; ການບັນນາທິການເອກະສານ ຜ່ານໂປແກຼມອ໋ອບຟິດ; ເຕັກນິກການຈັດໜ້າອອກແບບວາລະສານ; ບົດຮຽນກ່ຽວກັບເຕັກໂນໂລຊີຈູມລາຕົວໃໝ່ ແລະ ການປັບປຸງເວັບໄຊລຸ້ນເກົ່າໄປເປັນລຸ້ນໃໝ່, ບົດຮຽນກ່ຽວກັບເຕັກໂນໂລຊີການປະສານງານ ລວມທັງ ການແລກປ່ຽນຂໍ້ມູນລະຫວ່າງສູນກາງ ແລະ ທ້ອງຖິ່ນ. ພ້ອມນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ແບ່ງກຸ່ມຄົ້ນຄວ້າ ແລະ ລົງເກັບກຳຂໍ້ມູນຢູ່ພື້ນທີ່ຕົວຈິງ ໂດຍສະເພາະ ກ່ຽວກັບການດຳລົງຊີວິດຂອງປະຊາຊົນ ຕິດພັນກັບການຄຸ້ມຄອງປ່າສະຫງວນຢູ່ພື້ນທີ່ປ່າສະຫງວນພູເຂົາຄວາຍ ເຂດບ້ານວັງເຮືອ, ເມືອງທຸລະຄົມ; ລົງເກັບກໍາຂໍ້ມູນຢູ່ພື້ນທີ່ຕົວຈິງຢູ່ ຫ້ວຍສະໜອນ ເຊິ່ງເປັນແຫຼ່ງທ່ອງທ່ຽວທໍາມະຊາດ ທີ່ຕິດພັນກັບປ່າສະຫງວນແຫ່ງຊາດພູພະນັງ ຢູ່ເມືອງຫີນເຫີບ ຕື່ມອີກ.
     ໃນຕອນທ້າຍ ທ່ານປະທານກອງປະຊຸມ ຍັງໄດ້ຮຽກຮ້ອງມາຍັງຜູ້ເຂົ້າຮ່ວມກອງປະຊຸມ ໃຫ້ເອົາໃຈໃສ່ໃນການຕິດຕາມ ການຕິດຕາມການບັນຍາຍຂອງ ວິທະຍາກອນ, ຖ້າຫາກມີບັນຫາໃດ ຍັງບໍ່ທັນຈະແຈ້ງ ຫຼື ຊັດເຈນ ສາມາດແລກປ່ຽນບົດຮຽນຮ່ວມກັນ, ທັງນີ້ ກໍ່ເພື່ອນໍາເອົາຜົນກອງປະຊຸມແລກປ່ຽນ ແລະ ຖອດຖອນບົດຮຽນຄັ້ງນີ້ ໄປໝູນໃຊ້ເຂົ້າໃນຂົງເຂດວຽກງານຕົນເອງ ໃຫ້ມີປະສິດທິຜົນສູງ.
     ສໍາລັບໂຄງການຜະລິດສື່ເພື່ອສະໜອງໃຫ້ແກ່ການນຳ ກ່ຽວກັບການຄຸ້ມຄອງປ່າສະຫງວນ ແລະ ສັດນ້ຳ-ສັດປ່າ ໄດ້ເຊັນສັນຍາ ແລະ ຈັດຕັ້ງປະຕິບັດ ມາແຕ່ປີ 2015 ເຊິ່ງຈະສິ້ນສຸດໂຄງການໃນທ້າຍເດືອນ ມີນາ 2019 ໂດຍແມ່ນ ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ ເປັນຜູ້ຮັບຜິດຊອບຈັດຕັ້ງປະຕິບັດ. 


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ