ກອງປະຊຸມ ສຸດຍອດ ເພື່ອສະຫຼອງ ການພົວພັນ ອາຊຽນ-ຍີ່ປຸ່ນ ຮັບຮອງ ຖະແຫຼງການ ວິໄສທັດ ອາຊຽນ-ຍີ່ປຸ່ນ

ຜູ້ຂຽນ: ຫ້ອງວ່າການລັດຖະບານ

ວັນເສົາ, 14 ທ.ວ 2013 04:00


      ໃນຕອນເຊົ້າຂອງວັນທີ 14 ທັນວາ 2013, ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ໄດ້ເຂົ້າຮ່ວມກອງປະຊຸມສຸດຍອດ ເພື່ອສະເຫຼີມສະຫຼອງການພົວພັນ ອາຊຽນ-ຍີ່ປຸ່ນ ຄົບຮອບ 40 ປີ (1973-2013) ຊຶ່ງຈັດຂຶ້ນຢູ່ນະຄອນຫຼວງໂຕກຽວ. ໃນກອງປະຊຸມ, ບັນດາຜູ້ນຳອາຊຽນ ແລະ ຍີ່ປຸ່ນ ໄດ້ຕີລາຄາຜົນສຳເລັດການຮ່ວມມືຫຼາຍດ້ານ ແລະ ຮັບຮອງຖະແຫຼງການວິໄສທັດ ອາຊຽນ-ຍີ່ປຸ່ນ ວ່າດ້ວຍມິດຕະພາບ ແລະ ການຮ່ວມມື.
      ໃນ 4 ທົດສະວັດທີ່ຜ່ານມາ ການຮ່ວມມື ອາຊຽນ-ຍີ່ປຸ່ນ ແມ່ນໄດ້ຮັບໝາກຜົນທີ່ສຳຄັນໃນຫຼາຍດ້ານ ເປັນຕົ້ນ ດ້ານການເມືອງ: ນັບແຕ່ຍີ່ປຸ່ນໄດ້ສ້າງຕັ້ງ ສາຍພົວພັນບໍ່ເປັນທາງການກັບອາຊຽນ ໃນປີ 1973 ແລະ ໄດ້ຍົກລະດັບຂຶ້ນເປັນຄູ່ເຈລະຈາທາງການ ໃນປີ 1977, ການຮ່ວມມືກໍ່ໄດ້ຂະຫຍາຍຕົວສູງຂຶ້ນ ໂດຍສະເພາະ ພາຍຫຼັງທີ່ຍີ່ປຸ່ນ ໄດ້ເປັນຄູ່ຮ່ວມຍຸດທະສາດຂອງອາຊຽນ ໃນປີ 2003, ບັນດາກົນໄກການຮ່ວມມືຕ່າງໆ ກໍ່ໄດ້ຖືກສ້າງຕັ້ງຂຶ້ນ ແລະ ໄດ້ປະຕິບັດຮ່ວມກັນຢ່າງມີໝາກຜົນ. ໃນປີ 2010 ຍີ່ປຸ່ນ ໄດ້ແຕ່ງຕັ້ງທູດຂອງຕົນເປັນທູດປະຈຳອາຊຽນ ແລະ ໃນປີ 2011 ກໍ່ໄດ້ສ້າງຕັ້ງສຳນັກງານຜູ້ຕາງໜ້າຖາວອນຂອງຕົນ ທີ່ຈາກາກຕາ. ດ້ານເສດຖະກິດ: ຍີ່ປຸ່ນ ເປັນຄູ່ການຄ້າໃຫຍ່ອັນດັບສອງຂອງອາຊຽນ ຊຶ່ງໃນປີ 2012 ມູນຄ່າການຄ້າສອງຝ່າຍ ບັນລຸໄດ້ກວ່າ 262 ຕື້ໂດລາສະຫະລັດ ແລະ ຄາດວ່າຈະສາມາດບັນລຸໄດ້ອີກເທົ່າຕົວ ໃນປີ 2022. ດ້ານວັດທະນະທຳ-ສັງຄົມ: ໄດ້ມີການ ແລກປ່ຽນດ້ານວັດທະນະທຳ ພ້ອມທັງການແລກປ່ຽນຊາວໜຸ່ມ ແລະ ນັກສຶກສາ ລະຫວ່າງ ອາຊຽນ ແລະ ຍີ່ປຸ່ນ ເປັນຈຳນວນຫຼວງຫຼາຍໃນແຕ່ລະປີ ພາຍໃຕ້ໂຄງການຕ່າງໆ ເຊັ່ນ: ໂຄງການເຄືອຂ່າຍອາຊີຕາເວັນອອກ ເພື່ອແລກປ່ຽນຊາວໜຸ່ມ ແລະ ນັກສຶກສາ ຫຼື ເອີ້ນວ່າ “JENESYS”, ໂຄງການແລກປ່ຽນຊາວໜຸ່ມ ຫຼື ເອີ້ນວ່າ “Kizuna”. ດ້ານການຮ່ວມມືເພື່ອການພັດທະນາ: ກໍ່ໄດ້ມີຄວາມຄືບໜ້າຢ່າງມີໝາກມີຜົນໃນຫຼາຍດ້ານ ຊຶ່ງຍີ່ປຸ່ນກໍ່ເປັນໜຶ່ງໃນບັນດາຄູ່ເຈລະຈາຫຼັກຂອງອາຊຽນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອການເຊື່ອມໂຍງ ອາຊຽນ ດ້ວຍການສະໜັບສະໜູນການຈັດຕັ້ງປະຕິບັດແຜນການສ້າງປະຊາຄົມອາຊຽນ (2009-2015), ແຜນແມ່ບົດເພື່ອການເຊື່ອມຈອດອາຊຽນ  ແລະ ຂໍ້ລິເລີ່ມອື່ນໆ ຂອງອາຊຽນ ລວມທັງການສະໜັບສະໜູນ ແລະ ຊ່ວຍເຫຼືອພາຍໃຕ້ຂອບການຮ່ວມມືອະນຸພາກພື້ນຕ່າງໆ ເປັນຕົ້ນ ແມ່ນຂອບການຮ່ວມມືແມ່ນ້ຳຂອງ-ຍີ່ປຸ່ນ.
      ພ້ອມດຽວກັນນີ້, ກອງປະຊຸມ ກໍ່ໄດ້ຮັບຮອງເອົາຖະແຫຼງການວິໄສທັດ ອາຊຽນ-ຍີ່ປຸ່ນ ວ່າດ້ວຍມິດຕະພາບ ແລະ ການຮ່ວມມື ຊຶ່ງຈະເປັນເອກະສານສຳຄັນ ເພື່ອເປັນບ່ອນອີງໃນການຮ່ວມມື ອາຊຽນ-ຍີ່ປຸ່ນ ໃນຕໍ່ໜ້າ.

ແຫຼ່ງ: ຫ້ອງວ່າການລັດຖະບານ