ທ່ານນາຍົກລັດຖະມົນຕີຕ້ອນຮັບຄະນະຜູ້ແທນ ແຫ່ງ ສາທາລະນະລັດ ອິນໂດເນເຊຍ

ຜູ້ຂຽນ: ຂ່າວ/ພາບ: ອານິຄົມ ວົງເດືອນ

ວັນພະຫັດ, 28 ມ.ກ 2016 16:00

ໃນຕອນເຊົ້າຂອງວັນທີ 28 ມັງກອນ 2015 ທີ່ຫ້ອງວ່າການລັດຖະບານ ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ເລັດໂນ ມາຊູດີ ລັດຖະມົນຕີວ່າການກະຊວງການຕ່າງປະເທດ ແຫ່ງສາທາລະນະລັດ ອິນໂດເນເຊຍ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການແຕ່ວັນທີ 27-28 ມັງກອນ 2015 ນີ້.
ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ ທ່ານລັດຖະມົນຕີວ່າການກະຊວງການຕ່າງປະເທດ ອິນໂດເນເຊຍ ພ້ອມດ້ວຍຄະນະ ທີ່ເດີນທາງມາເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້ ອັນເປັນການປະກອບສ່ວນສຳຄັນ ໃນການເພີ່ມພູນຄູນສ້າງ ສາຍພົວພັນມິດຕະພາບ ລະຫວ່າງ ສອງປະເທດ ລາວ-ອິນໂດເນເຊຍ ທີ່ມີມາແຕ່ດົນນານນັ້ນ ນັບມື້ໄດ້ຮັບການເສີມຂະຫຍາຍ ໃຫ້ແໜ້ນແຟ້ນຍິ່ງຂຶ້ນ. ພ້ອມດຽວກັນນີ້, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອງໃຈມາຍັງລັດຖະບານ ກໍ່ຄື ປະຊາຊົນອິນໂດເນເຊຍ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ຕະຫຼອດມາ ເປັນຕົ້ນ ດ້ານການສຶກສາ, ສາທາລະນະສຸກ, ການຄ້າ, ການລົງທຶນ ແລະ ອື່ນໆ.
ໂອກາດດຽວກັນນີ້, ທ່ານ ນາງ ເລັດໂນ ມາຊູດີ ໄດ້ສະແດງຄວາມຂອບອົກຂອບໃຈຕໍ່ທ່ານນາຍົກລັດຖະມົນຕີ ທີ່ໄດ້ເສຍສະຫຼະເວລາໃຫ້ການຕ້ອນຮັບຢ່າງອົບອຸ່ນໃນຄັ້ງນີ້. ພ້ອມທັງແຈ້ງຈຸດປະສົງ ຂອງການເດີນທາງມາເຄື່ອນໄຫວຢ້ຽມຢາມ ແລະ ຜົນຂອງການພົບປະສອງຝ່າຍ ກັບຄະນະຜູ້ແທນກະຊວງການຕ່າງປະເທດຂອງ ສປປ ລາວ ເຊິ່ງທັງສອງຝ່າຍໄດ້ປຶກສາຫາລື ກ່ຽວກັບການພົວພັນຮ່ວມມື ລະຫວ່າງ ສອງປະເທດໃຫ້ນັບມື້ນັບກວ້າງຂວາງ ແລະ ຮັດແໜ້ນສາຍພົວພັນມິດຕະພາບ ຖານປະ ເທດເພື່ອນມິດທີ່ດີຕໍ່ກັນ ທັງນີ້ກໍ່ເພື່ອເປັນການເພີ່ມທະວີຄວາມສາມັກຄີ ແລະ ຄວາມເຂົ້າອົກເຂົ້າ ໃຈໃນການພົວພັນຮ່ວມມື ເພື່ອການພັດທະນາໃນຄອບຄົວອາຊຽນຕື່ມອີກ, ໂດຍສະເພາະໃນປີ 2016 ນີ້, ສປປ ລາວ ໄດ້ຮັບກຽດເປັນປະທານອາຊຽນ, ທັງສອງຝ່າຍຍິ່ງມີຄວາມຈຳເປັນ ທີ່ຈະຕ້ອງໃຫ້ການສະໜັບສະໜູນຊ່ວຍເຫຼືອ ແລະ ໃຫ້ການຮ່ວມມືຊຶ່ງກັນ ແລະ ກັນ ເພື່ອໃຫ້ບັນລຸຕາມເປົ້າໝາຍຂອງສາມເສົາຄ້ຳຂອງປະຊາຄົມອາຊຽນ ເປັນຕົ້ນ ດ້ານການເມືອງ, ດ້ານເສດຖະກິດ ແລະ ດ້ານວັດທະນະທຳ-ສັງຄົມ.

ແຫລ່ງ: ຫ້ອງວ່າການລັດຖະບານ