ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ລັດຖະມົນຕີ ສປປ ເກົາຫຼີ

ຜູ້ຂຽນ: ຂ່າວ ແລະ ພາບໂດຍ: ວັນນະສິນ ຈັນດາວົງ

ວັນພຸດ, 06 ສ.ຫ 2014 00:00

ໃນວັນທີ 04 ສິງຫາ 2014 ທີ່ຫ້ອງວ່າການລັດຖະບານ, ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ຣິ ຊູ ຢອງ (Ri Su Yong) ລັດຖະມົນຕີວ່າການ ກະຊວງ ການຕ່າງປະເທດ ແຫ່ງ ສປປ ເກົາຫຼີ ພ້ອມຄະນະ ໃນໂອກາດເດີນທາງມາຢ້ຽມຢາມ ສປປ ລາວ ໃນລະຫວ່າງ ວັນທີ 04-05 ສິງຫາ 2014.
ທ່ານນາຍົກລັດຖະມົນຕີ ໄດ້ສະແດງຄວາມຍິນດີ ຕ້ອນຮັບ ຄະນະຜູ້ແທນ ແຫ່ງ ສປປ ເກົາຫຼີ ຢ່າງອົບອຸ່ນ ແລະ ຕີລາຄາສູງ ຕໍ່ການເຄື່ອນໄຫວເຮັດວຽກ ຂອງສອງກະຊວງ ການຕ່າງປະເທດ ລາວ-ເກົາຫຼີ. ທ່ານໄດ້ສະແດງຄວາມຊົມເຊີຍ ຕໍ່ກະຊວງ ການຕ່າງປະເທດ ຂອງສອງປະເທດ ຊຶ່ງໄດ້ມີການພົວພັນຮ່ວມມື ເຊິ່ງກັນ ແລະ ກັນ ທາງດ້ານການເມືອງ ແລະ ການພັດທະນາ ເສດຖະກິດ-ສັງຄົມ ຂອງສອງປະເທດ ນັບມື້ມີປະສິດທິພາບສູງຂຶ້ນ ເວົ້າລວມ, ເວົ້າສະເພາະ ແມ່ນການປະກອບສ່ວນ ດ້ານການລົງທຶນຢ່າງມີຈຸດສຸມ, ເສີມສ້າງສາຍພົວພັນ ຮ່ວມມືຮອບດ້ານ ລະຫວ່າງ ລາວ-ເກົາຫຼີ ໃຫ້ກ້າວສູ່ລວງເລິກ ແລະ ກວ້າງຂວາງອອກໄປເລື້ອຍໆ. ພ້ອມນັ້ນ, ທ່ານຍັງໄດ້ກ່າວຂອບໃຈ ລັດຖະບານ ແລະ ປະຊາຊົນ ເກົາຫຼີ ທີ່ໄດ້ໃຫ້ການຊ່ວຍເຫຼືອ-ສະໜັບສະໜູນ ແກ່ ສປປ ລາວ.
ໃນຕອນທ້າຍ ທ່ານນາຍົກລັດຖະມົນຕີ ໄດ້ອວຍພອນໃຫ້ ທ່ານລັດຖະມົນຕີວ່າການ ກະຊວງ ການຕ່າງປະເທດ ສປປ ເກົາຫຼີ ພ້ອມຄະນະ ຈົ່ງປະສົບຜົນສຳເລັດ ໃນການເຄື່ອນໄຫວເຮັດວຽກ ຢູ່ ສປປ ລາວ, ເດີນທາງກັບປະເທດ ດ້ວຍຄວາມສະຫວັດດີພາບ ທຸກປະການ ແລະ ຝາກຄວາມຢື້ຢາມຖາມຂ່າວ ໄປຍັງທ່ານ ນາຍົກລັດຖະມົນຕີ ແຫ່ງ ສປປ ເກົາຫຼີ.

ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ