ທ່ານ ອາຊາງ ລາວລີ ຮອງນາຍົກລັດຖະມົນຕີ ໄດ້ໃຫ້ກຽດ ຕ້ອນຮັບ ທ່ານນາງ ທັນ ທິ ຮົງອານ (Ms. Tran Thi Hong An) ຮອງປະທານ ກາແດງ ສສ ຫວຽດນາມ.

ຜູ້ຂຽນ: ຂ່າວ ແລະ ພາບໂດຍ: ວັນນະສິນ ຈັນດາວົງ

ວັນພຸດ, 06 ສ.ຫ 2014 00:00

 
ໃນຕອນບ່າຍ ວັນທີ 04 ສິງຫາ 2014 ທີ່ຫ້ອງວ່າການລັດຖະບານ, ທ່ານ ອາຊາງ ລາວລີ ຮອງນາຍົກລັດຖະມົນຕີ ຜູ້ຊີ້ນໍາວຽກງານ ວັດທະນະທໍາ-ສັງຄົມ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ຄະນະຜູ້ແທນ ກາແດງ ສສ ຫວຽດນາມ ຊຶ່ງນຳໂດຍ ທ່ານນາງ ທັນ ທິ ຮົງ ອານ (Ms. Tran Thi Hong An) ຮອງປະທານ ກາແດງ ສສ ຫວຽດນາມ ພ້ອມດ້ວຍຄະນະ.
ໃນໂອກາດ ເຂົ້າຢ້ຽມຂ່ຳນັບຄັ້ງນີ້ ທ່ານ ອາຊາງ ລາວລີ ໄດ້ຮັບຟັງການລາຍງານ ຂອງຄະນະຜູ້ແທນ ກາແດງ ສສ ຫວຽດນາມ ກ່ຽວກັບການເຄື່ອນໄຫວເຮັດວຽກ ໃນຄັ້ງນີ້. ໃນໄລຍະຜ່ານມາ ອົງການກາແດງ ສສ ຫວຽດນາມ ໄດ້ໃຫ້ການຊ່ວຍເຫຼືອທຶນຮອນ, ຍົກລະດັບ ຄວາມຮູ້ຄວາມສາມາດ ພະນັກງານ ອົງການກາແດງ ສປປ ລາວ, ຊ່ວຍເຫຼືອກໍລະນີເກີດໄພພິບັດ ທາງທຳມະຊາດ. ພ້ອມນັ້ນ, ໄດ້ເອົາໃຈໃສ່ເພີ່ມທະວີຊ່ວຍເຫຼືອວຽກງານສັງຄົມສົງເຄາະ ແລະ ສະໜັບສະໜູນໃນເວທີສາກົນ ໃຫ້ແກ່ອົງການກາແດງ ສປປ ລາວ.
ໃນໂອກາດນີ້, ທ່ານຮອງນາຍົກ ລັດຖະມົນຕີ ໄດ້ສະແດງຄວາມຊົມເຊີຍ ແລະ ຂອບໃຈ ຕໍ່ອົງການກາແດງ ສສ ຫວຽດນາມ ທີ່ໄດ້ໃຫ້ການຊ່ວຍເຫຼືອ ແກ່ອົງການກາແດງ ສປປ ລາວ ຊຶ່ງການຊ່ວຍເຫຼືອດັ່ງກ່າວ ເປັນສິ່ງທີ່ສຳຄັນ ສຳລັບການຍົກລະດັບ ຄວາມຮູ້ຄວາມສາມາດ ແລະ ເສີມສ້າງປະສົບການ ໃຫ້ແກ່ວິຊາການລາວ ໃນການປະຕິບັດວຽກງານ ແລະ ຫວັງຢ່າງຍິ່ງວ່າ ອົງການກາແດງສອງຊາດ ລາວ-ຫວຽດນາມ ຈະສຶບຕໍ່ໃຫ້ການຮ່ວມມື ແລະ ໃຫ້ຄວາມຊ່ວຍເຫຼືອເຊິ່ງກັນ ແລະ ກັນ.

 

ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ