ທ່ານນາຍົກລັດຖະມົນຕີ ໄດ້ໃຫ້ກຽດ ຕ້ອນຮັບ ການເຂົ້າຢ້ຽມອໍາລາ ຂອງເອກອັກຄະລັດຖະທູດ ແຫ່ງ ສສ. ເຢຍລະມັນ ປະຈຳ ສປປ ລາວ

ຜູ້ຂຽນ: ທ່ານ ອານຸພາບ ອານຸລັກ

ວັນຈັນ, 04 ສ.ຫ 2014 17:00

​​​​​

ໃນຕອນເຊົ້າວັນທີ 4 ສິງຫາ 2014 ທີ່ຫ້ອງວ່າການລັດຖະບານ, ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອຳລາ ຂອງທ່ານ Hans-Robert Peter von  Rimscha  ເອກອັກຄະລັດຖະທູດ ແຫ່ງ ສສ. ເຢຍລະມັນ ປະຈຳ ສປປ ລາວ ໃນໂອກາດ ສຳເລັດການປະຕິບັດໜ້າທີ່ການທູດ.
ທ່ານ ທອງສິງ ທຳມະວົງ ໄດ້ກ່າວສະແດງຄວາມຍິນດີ ແລະ ໃຫ້ການຕ້ອນຮັບ ທ່ານ Hans-Robert Peter von  Rimscha ຢ່າງອົບອຸ່ນ, ພ້ອມທັງໄດ້ຕີລາຄາສູງ ຕໍ່ການປະຕິບັດໜ້າທີ່ການທູດຢູ່ ສປປ ລາວ ຕະຫຼອດໄລຍະ 03 ປີຜ່ານມາ ຊຶ່ງໄດ້ເອົາໃຈໃສ່ເສີມຂະຫຍາຍສາຍພົວພັນການຮ່ວມມືອັນດີ ລະຫວ່າງ ສອງປະເທດ. ພ້ອມນັ້ນ, ທ່ານຍັງໄດ້ສະແດງຄວາມ ຂອບໃຈຕໍ່ການຊ່ວຍເຫຼືອ ແລະ ສະໜັບສະໜູນຂອງລັດຖະບານເຢຍລະມັນແລະບັນດາອົງການຈັດຕັ້ງສາກົນຂອງເຢຍລະມັນ ແກ່ສປປ ລາວ ໃນໄລຍະຜ່ານມາ ຊຶ່ງເຫັນວ່ານັບມື້ນັບເພີ່ມຂຶ້ນ ອັນໄດ້ປະກອບສ່ວນສຳຄັນ ເຂົ້າໃນການສ້າງສາພັດທະນາ ແລະ ປັບປຸງຊີວິດການເປັນຢູ່ຂອງປະຊາຊົນລາວ ໃຫ້ນັບມື້ນັບດີຂຶ້ນ.  
​ທ່ານ Hans-Robert Peter von  Rimscha ໄດ້ສະແດງຄວາມຂອບໃຈຕໍ່ ການເສຍສະຫຼະເວລາອັນມີຄ່າ ໃຫ້ກຽດຕ້ອນຮັບການເຂົ້າຢ້ຽມຄັ້ງນີ້ຢ່າງອົບອຸ່ນ, ສະແດງຄວາມຂອບໃຈ ຕໍ່ການຮ່ວມມື ແລະ ສະໜັບສະໜູນ ໃນການປະຕິບັດໜ້າທີ່ວຽກງານ ແລະ ຊົມເຊີຍການພົວພັນຮ່ວມມືອັນດີ ລະຫວ່າງ ສປປ ລາວ ແລະ ສສ ເຢຍລະມັນ ໃນໄລຍະຜ່ານມາ. ມາຮອດປະຈຸບັນເຫັນວ່າ ສປປ ລາວ ໄດ້ປະສົບຜົນສຳເລັດຫຼາຍດ້ານ ໃນການສ້າງສາພັດທະນາປະເທດຊາດ ໃຫ້ດີຂຶ້ນເທື່ອລະກ້າວ. ພ້ອມນັ້ນ, ທ່ານໄດ້ໃຫ້ຄຳໝັ້ນສັນຍາວ່າ ຈະສືບຕໍ່ຊຸກຍູ້ ເອກອັກຄະລັດຖະທູດ ແຫ່ງ ສສ ເຢຍລະມັນ ຄົນໃໝ່ ປະຈຳ ສປປ ລາວ ເພີ່ມທະວີການຮ່ວມມື ແລະ ໃຫ້ການສະໜັບສະໜູນຊ່ວຍເຫຼືອ ສປປ ລາວ.
ພ້ອມນັ້ນ, ຍັງໄດ້ປຶກສາຫາລື ການເສີມຂະຫຍາຍການພົວພັນຮ່ວມມືສອງຝ່າຍລະຫວ່າງລາວ-ເຢຍລະມັນ ເພື່ອສະໜັບສະໜູນ ຊ່ວຍເຫຼືອ ສປປ ລາວ ຈັດຕັ້ງປະຕິບັດແຜນການ ພັດທະນາເສດຖະກິດ-ສັງຄົມ 5 ປີ ຄັ້ງທີ 7 ແນໃສ່ແກ້ໄຂຄວາມທຸກຍາກ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ບັນລຸເປົ້າໝາຍສະຫັດສະວັດ ໃນປີ 2015 ແລະ ສຸມໃສ່ສ້າງສາພັດທະນາປະເທດ ໃຫ້ຫຼຸດພ້ນອອກຈາກສະພາບ ປະເທດດ້ອຍພັດທະນາໃນປີ 2020.
​ໃນຕອນທ້າຍ, ທ່ານນາຍົກລັດຖະມົນຕີ ​ໄດ້ອວຍພອນໄຊໃຫ້ທ່ານທູດຈົ່ງມີສຸຂະພາບເຂັ້ມແຂງ, ເດີນທາງກັບປະເທດ ໂດຍສະຫວັດດີພາບ ແລະ ປະສົບຜົນສຳເລັດ ໃນໜ້າທີ່ວຽກງານ.​

ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ