ພິທີ ລະນຶກເຖິງ ວັນມີຜົນບັງຄັບໃຊ້ ສົນທິສັນຍາ ວ່າດ້ວຍການເກືອດຫ້າມ ລະເບີດລູກຫວ່ານ ຄົບຮອບ 4 ປີ

ຜູ້ຂຽນ: ພາບ ແລະ ຂ່າວ: ວັນນະສິນ ຈັນດາວົງ

ວັນສຸກ, 01 ສ.ຫ 2014 00:00

​​  

​​​​ໃນຕອນເຊົ້າ ວັນທີ 1 ສິງຫາ 2014 ຢູ່ທີ່​ສູນຮ່ວມມືສາກົນ ແລະ ຝຶກອົບຮົມ (ICTC ), ນະຄອນຫຼວງວຽງຈັນ, ຄະນະກຳມະການ ຄຸ້ມຄອງແຫ່ງຊາດ ເພື່ອການແກ້ໄຂບັນຫາ ລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໄດ້ຈັດ​ພິທີ ລະນຶກເຖິງວັນມີຜົນບັງຄັບໃຊ້ ສົນທິສັນຍາ ວ່າດ້ວຍການເກືອດຫ້າມ ລະເບີດລູກຫວ່ານ ຄົບຮອບ 4 ປີ ພິທີດັງກ່າວ ໄດ້ເປັນກຽດເຂົ້າຮ່ວມ ຂອງທ່ານ ອາຊາງ ລາວລີ ຮອງນາຍົກລັດຖະມົນຕີ ຜູ້ຊີ້ນໍາວຽກງານ ວັດທະນະທໍາ-​ສັງຄົມ, ໂດຍມີ ທ່ານ ລັດຖະມົນຕີປະຈໍາ ຫ້ອງວ່າການລັດຖະບານ, ລັດຖະມົນຕີຊ່ວຍວ່າການ, ບັນດາຜູ້ຕາງໜ້າ ຈາກອົງການຈັດຕັ້ງສາກົນ, ບັນດາສະຖານທູດຕ່າງໆ ປະຈໍາ ສປປ ລາວ, ປະເທດຜູ້ໃຫ້ທຶນ, ອົງການປະຕິບັດງານ ແກ້ໄຂບັນຫາ ລະເບີດບໍ່ທັນແຕກ ແລະ ບໍລິສັດ ເກັບກູ້ລະເບີດ ບໍ່ທັນແຕກ ລວມທັງໝົດ 100 ກວ່າທ່ານເຂົ້າຮ່ວມ. 

ໃນພີທີດັ່ງກ່າວ, ທ່ານ ບຸນເຮືອງ ດວງພະຈັນ ລັດຖະມົນຕີປະຈຳຫ້ອງວ່າການລັດຖະບານ, ປະທານຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ ໄດ້ຍົກໃຫ້ເຫັນຄວາມໝາຍ ຄວາມສຳຄັນ ແລະ ຜົນການຈັດຕັ້ງປະຕິບັດວຽກງານດັ່ງກ່າວ ຢູ່ ສປປ ລາວ. ພ້ອມນັ້ນ, ​​ຄະນະດັ່ງກ່າວ ຕ້ອງສຸມໃສ່ ສຳຫຼວດ ແລະ ເກັບກູ້ລະເບີດ ບໍ່ທັນແຕກ ຢູ່ບັນດາຈຸດສຸມ ພັດທະນາ  ຂອງສູນກາງ ແລະ ທ້ອງຖິ່ນ ແລະ ໂຄງການພັດທະນາ ພື້ນຖານໂຄງລ່າງ  ຂອງລັດຖະບານ ໃຫ້ໄດ້ 20,000 ເຮັກຕາ ຂື້ນໄປ ໂດຍນຳໃຊ້ວິທີການ ສຳຫຼວດ ທີ່ດີ ໜ້າເຊື່ຶອຖື ແລະ ມີປະສິດທິພາບ, ກວດກູ້ສະເພາະບ່ອນທີ່ມີລະເບີດ ຕົກຄ້າງ ເພື່ອປະຢັດທຶນ ເວລາ ແລະ ເພີ່ມເນື້ອທີ່ ກວດກູ້ໃຫ້ໄດ້ຫຼາຍ. ນອກນັ້ນ, ໃຫ້ເອົາໃຈໃສ່ຊ່ວຍເຫຼືອ ຜູ້ລອດຊີວິດ ຈຳນວນ 20,000 ກວ່າຄົນ ທີ່ໄດ້ຮັບເຄາະຮ້າຍ ຈາກສົງຄາມ ແຕ່ປີ 1964, ປັບປຸງລະບົບ ສຸກສາລາປິ່ນປົວ ໃຫ້​ມີມາດຕະຖານດີຂື້ນ ເພື່ອບໍລິການ ຜູ້ລອດຊີວິດ ຈາກລະເບີດບໍ່ທັນແຕກ ແລະ ຍາດຕິພີ່ນ້ອງ ຂອງເຂົາເຈົ້າ ໃຫ້ເປັນຮູບປະທຳ, ຂະຫຍາຍ ການໂຄສະນາເຜີຍແຜ່ ຄວາມສ່ຽງຈາກບັນຫາລະເບີດບໍ່ທັນແຕກ ເຂົ້າໃນໂຮງຮຽນປະຖົມ-ມັດທະຍົມ ແລະ ຊຸມຊົນທີ່ມີ ລະເບີດທີ່ບໍ່ທັນແຕກ ຕົກຄ້າງ ໃຫ້ກວມທົ່ວປະເທດ. ທັງໝົດນີ້, ກໍ່ເພື່ອຈັດຕັ້ງປະຕິບັດໃຫ້ບັນລຸຄາດໝາຍ ສະຫັດສະວັດ ແລະ ພັນທະສົນທິສັນຍາ ໂອສະໂລ.


ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ