ທ່ານນາຍົກລັດຖະມົນຕີ ໄດ້ໃຫ້ກຽດ ຕ້ອນຮັບ ການເຂົ້າຢ້ຽມຂໍ່ານັບ ຂອງລັດຖະມົນຕີວ່າການ ກະຊວງ ຍຸຕິທຳ ສສ. ຫວຽດນາມ

ຜູ້ຂຽນ: ທ່ານ ວັນທອງ ລັດຕະນະວິໄລ

ວັນພະຫັດ, 31 ກ.ລ 2014 10:00

​​​

​ທີ່ຫ້ອງວ່າການລັດຖະບານ, ໃນວັນທີ 30 ກໍລະກົດ 2014 ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຈົ້າຢ້ຽມຂໍ່ານັບຂອງ ທ່ານ ຮສຈ. ດຣ. ຮ່າ ຮຸ່ງ ເກື່ອງ ລັດຖະມົນຕີວ່າການ ກະຊວງຍຸຕິທຳ ແຫ່ງ ສສ. ຫວຽດນາມ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວວຽກງານ ຢູ່ ສປປ ລາວ ຢ່າງເປັນທາງການ ໃນລະຫວ່າງ ວັນທີ 27-31 ກໍລະກົດ 2014.
 
​ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ແຫ່ງ ສສ. ຫວຽດນາມ ຢ່າງອົບອຸ່ນ ແລະ ຕີລາຄາສູງ ຕໍ່ການເຄື່ອນໄຫວ ເຮັດວຽກຂອງສອງກະຊວງຍຸຕິທຳ ລາວ-ຫວຽດນາມ. ທ່ານໄດ້ກ່າວຍ້ອງຍໍຊົມເຊີຍ ທີ່ກະຊວງຍຸຕິທຳ ຂອງສອງປະເທດ ໄດ້ຜັດປ່ຽນກັນເປັນເຈົ້າພາບ ຈັດກອງປະຊຸມປຶກສາຫາລື-ແລກປ່ຽນ ຄວາມຄິດຄວາມເຫັນ ແລະ ຖອດຖອນບົດຮຽນ ກ່ຽວກັບ ວຽກງານຍຸຕິທຳເຊິ່ງກັນ ແລະ ກັນເພື່ອປັບປຸງ-ເສີມສ້າງ ວຽກງານຍຸຕິທຳຂອງສອງປະເທດ ໃຫ້ນັບມື້ມີປະສິດທິພາບສູງຂຶ້ນເປັນກ້າວໆ ເວົ້າສະເພາະ, ເວົ້າລວມ ກໍ່ແມ່ນການປະກອບສ່ວນ ເສີມສ້າງສາຍພົວພັນການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ກ້າວສູ່ລວງເລິກ ແລະ ກວ້າງຂວາງອອກໄປເລື້ອຍໆ. ພ້ອມນັ້ນ, ທ່ານຍັງໄດ້ກ່າວຂອບໃຈ ລັດຖະບານ ແລະ ປະຊາຊົນ ຫວຽດນາມ ທີ່ໃຫ້ການຊ່ວຍເຫຼືອ-ສະໜັບສະໜູນ ແກ່ ສປປ ລາວ ຢ່າງສະເໝີຕົ້ນສະເໝີປາຍ ບໍ່ວ່າໄລຍະຕໍ່ສູ້ປົດປ່ອຍຊາດ ກໍ່ຄື ໄລຍະສ້າງສາພັດທະນາປະເທດ ໃນປະຈຸບັນ.

 

​ທ່ານລັດຖະມົນຕີວ່າການ ກະຊວງຍຸຕິທຳ ແຫ່ງ ສສ. ຫວຽດນາມ ໄດ້ສະແດງຄວາມຂອບໃຈ ຕໍ່ການໃຫ້ກຽດ ແລະ ສະຫຼະເວລາຕ້ອນຮັບໃນຄັ້ງນີ້. ພ້ອມທັງ ໄດ້ນຳເອົາຄວາມ ເຢື້ອຢາມຖາມຂ່າວ ຂອງທ່ານນາຍົກລັດຖະ ມົນຕີ ແຫ່ງ ສສ. ຫວຽດນາມ ມາຍັງທ່ານນາຍົກລັດຖະມົນຕີ ແລະ ຄະນະລັດຖະບານ ແຫ່ງ ສປປ ລາວ. ນອກນັ້ນ, ຍັງໄດ້ແຈ້ງ ສະພາບການ ພັດທະນາເສດຖະກິດ-ສັງຄົມ ແລະ ລາຍງານຜົນຂອງ ກອງປະຊຸມພົບປະ ລະຫວ່າງ ສອງກະຊວງຍຸຕິທຳ ລາວ-ຫວຽດນາມ ໃນວັນທີ 29 ກໍລະກົດ 2014 ທີ່ຜ່ານມາ.
​ໃນຕອນທ້າຍ ທ່ານນາຍົກລັດຖະມົນຕີ ແຫ່ງ ສປປ ລາວ  ໄດ້ອວຍພອນໃຫ້ ທ່ານລັດຖະມົນຕີວ່າການ ກະຊວງຍຸຕິທຳ ແຫ່ງ ສ.ສ ຫວຽດນາມ ຈົ່ງມີພະລານາໄມເຂັ້ມແຂງ, ສືບຕໍ່ຊີ້ນຳ-ນຳພາວຽກງານຂະແໜງຍຸຕິທຳ ໃຫ້ມີຜົນສຳເລັດ.

ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ