ທ່ານ ທອງສິງ ທຳມະວົງ ນາຍົກລັດຖະມົນຕີ ສຳເລັດ ການເຂົ້າຮ່ວມ ກອງປະຊຸມ ສຸດຍອດ ອາຊຽນ ຄັ້ງທີ 24, ທີ່ປະເທດ ມຽນມາ

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນສຸກ, 16 ພ.ພ 2014 00:00

​​
ທ່ານ ທອງສິງ ທຳມະວົງ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ສຳເລັດ ການເຂົ້າຮ່ວມ ກອງປະຊຸມ ສຸດຍອດອາຊຽນ ຄັ້ງທີ 24 ຊຶ່ງໄດ້ຈັດຂຶ້ນ ໃນວັນທີ 11 ພຶດສະພາ 2014 ທີ່ນະຄອນຫຼວງເນປີດໍ ປະເທດມຽນມາ. ກອງປະຊຸມ ສຸດຍອດອາຊຽນ ຄັ້ງທີ 24 ໄດ້ເນັ້ນໃສ່ປຶກສາຫາລື 4 ບັນຫາຄື: ການສ້າງ ປະຊາຄົມອາຊຽນ ໃຫ້ບັນລຸ ໃນປີ 2015, ການພົວພັນຮ່ວມມື ກັບພາຍນອກ ຂອງອາຊຽນ, ທິດທາງ ໃນອະນາຄົດ ຂອງອາຊຽນ, ບັນຫາພາກພື້ນ ແລະ ສາກົນ ທີພົ້ນເດັ່ນ ແລະ ມີຄວາມສົນໃຈຮ່ວມກັນ.
ໃນໂອກາດ ກອງປະຊຸມ ສຸດຍອດອາຊຽນ ຄັ້ງນີ້, ທ່ານ ທອງສິງ ທຳມະວົງ, ນາຍົກລັດຖະມົນຕີ ໄດ້ຮ່ວມກັບ ບັນດາຜູ້ນຳ ອາຊຽນ ທົບທວນຄືນ ຄວາມຄືບໜ້າ ໃນການສ້າງ ປະຊາຄົມອາຊຽນ ຊຶ່ງເຫັນວ່າ ການຈັດຕັ້ງປະຕິບັດ ແຜນແມ່ບົດ ຂອງສາມເສົາຄ້ຳ ປະຊາຄົມ ອາຊຽນ (ປະຊາຄົມ ການເມືອງ-ຄວາມໝັ້ນຄົງ ອາຊຽນ, ປະຊາຄົມ ເສດຖະກິດ ອາຊຽນ ແລະ ປະຊາຄົມ ວັດທະນະທຳ-ສັງຄົມ ອາຊຽນ), ແຜນວຽກ ຂໍ້ລິເລີ່ມ ວ່າດ້ວຍການເຊື່ອມໂຍງ ອາຊຽນ ໄລຍະ 2, ແຜນແມ່ບົດ ວ່າດ້ວຍການເຊື່ອມຈອດ ອາຊຽນ ມີຄວາມຄືບໜ້າ ດີ, ແຕ່ຍັງມີ ບາງກິດຈະກຳ ທີ່ບັນດາຂະແໜງການ ຂອງອາຊຽນ ຕ້ອງໄດ້ເອົາໃຈໃສ່ ສືບຕໍ່ ຈັດຕັ້ງປະຕິບັດ ໃຫ້ສຳເລັດ ຕາມກຳນົດ ເວລາ. ໃນໂອກາດນີ້, ບັນດາຜູ້ນຳອາຊຽນ ໄດ້ຮັບຮອງເອົາ ຖະແຫຼງການເນປີດໍ ວ່າດ້ວຍ ການສ້າງ ປະຊາຄົມ ອາຊຽນ ໃຫ້ສຳເລັດ ໃນປີ 2015 ຊຶ່ງເປັນເອກະສານ ທີກຳນົດກິດຈະກຳ ບູລິມະສິດ ສຳລັບປີ 2014 ແນໃສ່ບັນລຸ ສ້າງປະຊາຄົມ ອາຊຽນ ຕາມກຳນົດເວລາ. ບັນດາຜູ້ນຳອາຊຽນ ໄດ້ຮຽກຮ້ອງ ໃຫ້ບັນດາຂະແໜງການ ອາຊຽນ ຈັດຕັ້ງປະຕິບັດ ຖະແຫຼງການ ດັ່ງກ່າວ ຢ່າງທັນການ ແລະ ມີປະສິດທິພາບ.
ກ່ຽວກັບ ການພົວພັນ ພາຍນອກ ຂອງອາຊຽນ, ບັນດາຜູ້ນຳອາຊຽນ ໄດ້ສະແດງຄວາມຍິນດີ ທີ່ເຫັນວ່າ ການຮ່ວມມື ຂອງອາຊຽນ ກັບ ບັນດາຄູ່ເຈລະຈາ ຂອງຕົນ ໄດ້ຮັບການເສີມຂະຫຍາຍ ເທື່ອລະກ້າວ ຊຶ່ງໄດ້ປະກອບສ່ວນ ອັນສຳຄັນ ເຂົ້າໃນຂະບວນການ ສ້າງປະຊາຄົມ ອາຊຽນ ກໍຄືການປົກປັກຮັກສາ ແລະ ສົ່ງເສີມ ສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນໂລກ ໂດຍລວມ. ບັນດາຜູ້ນຳອາຊຽນ ໄດ້ເຫັນດີ ໃຫ້ເສີມຂະຫຍາຍ ໝາກຜົນ ທີ່ຍາດມາໄດ້ ໃນການຮ່ວມມື ກັບ ພາຍນອກ ຂອງອາຊຽນ ໂດຍສືບຕໍ່ ຮັດແໜ້ນບົດບາດ ຄວາມເປັນແກນກາງ ຂອງອາຊຽນ ໃນໂຄງສ້າງພາກພື້ນ ໂດຍຜ່ານບັນດາກົນໄກ ທີ່ອາຊຽນ ເປັນຜູ້ລິເລີ່ມ ຄື: ອາຊຽນ+1, ອາຊຽນ+3, ເວທີພາກພື້ນ ອາຊຽນ, ກອງປະຊຸມ ລັດຖະມົນຕີ ປ້ອງກັນປະເທດ ອາຊຽນບວກ ແລະ ກອງປະຊຸມ ສຸດຍອດ ອາຊີຕາເວັນອອກ.
ກ່ຽວກັບທິດທາງ ໃນອະນາຄົດ ຂອງອາຊຽນ, ບັນດາຜູ້ນຳ ອາຊຽນ ໄດ້ຊົມເຊີຍ ທຸກຂະແໜງການ ຂອງອາຊຽນ ທີໄດ້ ເລີ່ມຂະບວກການ ຮ່າງວິໄສທັດ ປະຊາຄົມ ອາຊຽນ ຫຼັງປີ 2015 ຊຶ່ງເປັນເອກະສານ ທີ່ຈະກຳນົດທິດທາງເດີນ ຂອງອາຊຽນ ໃນອະນາຄົດ. ຕໍ່ບັນຫານີ້, ບັນດາຜູ້ນຳ ອາຊຽນ ໄດ້ຮຽກຮ້ອງໃຫ້ ບັນດາຂະແໜງການ ຂອງອາຊຽນ ເອົາໃຈໃສ່ ຮ່າງວິໄສທັດ ດັ່ງກ່າວ ຢ່າງຮອບດ້ານ ແລະ ທັນການ ເພື່ອໃຫ້ບັນດາຜູ້ນຳ ອາຊຽນ ໄດ້ຮັບຮອງເອົາ ໃນທ້າຍປີ 2015 ໂດຍວິໄສທັດ ດັ່ງກ່າວ ຄວນເນັ້ນໃສ່ ສືບຕໍ່ຮັດແໜ້ນ ປະຊາຄົມ ອາຊຽນ ທີເປັນອົງການຈັດຕັ້ງ ພາກພື້ນ ລະຫວ່າງ ລັດຖະບານ ໃຫ້ມີຄວາມເປັນປຶກແຜ່ນ ດ້ານການເມືອງ, ເຊື່ອມໂຍງກັນ ດ້ານເສດຖະກິດ ແລະ ມີຄວາມຮັບຜິດຊອບ ທາງສັງຄົມ ຕາມ 3 ເສົາຄໍ້າ ຄື: ປະຊາຄົມ ການເມືອງ-ຄວາມໝັ້ນຄົງ ອາຊຽນ, ປະຊາຄົມ ວັດທະນະທຳ-ສັງຄົມ ອາຊຽນ ແລະ ປະຊາຄົມ ເສດຖະກິດ ອາຊຽນ ແລະ ສືບຕໍ່ຮັດແຄບ ຄວາມແຕກໂຕນ ດ້ານການພັດທະນາ ລະຫວ່າງ ບັນດາປະເທດ ອາຊຽນ.
ນອກຈາກນີ້, ບັນດາຜູ້ນຳ ອາຊຽນ ຍັງໄດ້ແລກປ່ຽນ ຄຳຄິດຄຳເຫັນ ກ່ຽວກັບ ບັນຫາພາກພື້ນ ແລະ ສາກົນ ທີ່ພົ້ນເດັ່ນ ທີ່ມີຄວາມສົນໃຈ ຮ່ວມກັນ ແລະ ເຫັນດີ ເສີມຂະຫຍາຍ ທ່າອ່ຽງລວມ ແຫ່ງການປົກປັກຮັກສາ ແລະ ສົ່ງເສີມ ສັນຕິພາບ ແລະ ສະຖຽນລະພາບ ຊຶ່ງເປັນພື້ນຖານ ສຳລັບການຮ່ວມມືກັນ ເພື່ອການພັດທະນາ ຂອງພາກພື້ນ ແລະ ສາກົນ.
ໃນໂອກາດນີ້, ບັນດາຜູ້ນຳ ອາຊຽນ ຍັງໄດ້ພົບປະ ບໍ່ເປັນທາງການ ກັບ ຜູ້ຕາງໜ້າ ສະມັດຊາ ລັດຖະສະພາ ອາຊຽນ ແລະ ຊາວໜຸ່ມ ອາຊຽນ ອີກດ້ວຍ ຊຶ່ງບັນດາຜູ້ນຳ ອາຊຽນ ໄດ້ຊົມເຊີຍ ການປະກອບສ່ວນ ອັນສຳຄັນ ຂອງທັງ 2 ອົງກອນ ດັ່ງກ່າວ ໃນຂະບວນການ ສ້າງປະຊາຄົມ ອາຊຽນ ແລະ ຫວັງວ່າ ກອງປະຊຸມ ຄັ້ງທີ 35 ຂອງສະມັດຊາ ລັດຖະສະພາ ອາຊຽນ ຊຶ່ງສະພາແຫ່ງຊາດ ແຫ່ງ ສປປ ລາວ ຈະເປັນເຈົ້າພາບ ຈັດຂຶ້ນໃນເດືອນ ກັນຍາ ປີ 2014 ທີ່ນະຄອນຫຼວງວຽງຈັນ ຈະໄດ້ຮັບຜົນສຳເລັດ ອັນຈົບງາມ ປະກອບສ່ວນເຂົ້າ ໃນຂະບວນການ ສ້າງປະຊາຄົມ ອາຊຽນ ກໍຄື ການຮ່າງວິໄສທັດ ປະຊາຄົມ ອາຊຽນ ຫຼັງປີ 2015.

ແຫຼ່ງ: ຫ້ອງວ່າການລັດຖະບານ