ນາຍົກລັດຖະມົນຕີ ແຫ່ງ ສປປ ລາວ ຢ້ຽມຢາມ ສປ ຈີນ ຢ່າງເປັນທາງການ ແລະ ເຂົ້າຮ່ວມ ກອງປະຊຸມ ປະຈຳປີ ປົວ ອ້າວ 2014 ກ່ຽວກັບ ເວທີສົນທະນາ ພາກພື້ນ

ຜູ້ຂຽນ: ນັກຂ່າວ ໜັງສືພິມຂ່າວສານປະເທດລາວ

ວັນສຸກ, 11 ມ.ສ 2014 09:00

      ໂດຍຕອບສະໜອງຕາມຄຳເຊີນຂອງ ສະຫາຍ ລິ ເຄິ້ ສຽງ,  ນາຍົກລັດຖະມົນຕີ ແຫ່ງ ສປ ຈີນ, ສະຫາຍ ທອງສິງ ທຳມະວົງ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສປ ຈີນ ຢ່າງເປັນທາງການ ແຕ່ວັນທີ 8-12 ເມສາ 2014 ແລະ ເປັນການຢ້ຽມຢາມ ສປ ຈີນ ຄັ້ງທໍາອິດ ຂອງສະຫາຍນາຍົກລັດຖະມົນຕີ ແຫ່ງ ສປປ ລາວ.

ໃນຕອນບ່າຍຂອງວັນທີ 8 ເມສາ 2014 ສະຫາຍນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໂດຍເຮືອບິນພິເສດ ຈາກສະໜາມບິນສາກົນວັດໄຕ, ນະຄອນຫຼວງວຽງຈັນ ເຖິງສະໝາມບິນສາກົນ ຊານຢາ ແຂວງຫາຍໜານ ສປ ຈີນ, ຊິ່ງໃນ ເວລາ 16: 30 ຕາມເວລາທ້ອງຖິ່ນ ສະຫາຍ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ຖືກຕ້ອນຮັບຢ່າງເປັນທາງການ ແລະ ສົມກຽດ ຊຶ່ງເຕັມໄປດ້ວຍບັນຍາກາດແຫ່ງໄມຕີຈິດ ແລະ ມິດຕະພາບອັນອົບອຸ່ນ ຈາກ ສະຫາຍ ລິ ເຄິ້ ສຽງ ນາຍົກລັດຖະມົນຕີ ແຫ່ງ ສປ ຈີນ.

       ຫຼັງຈາກສຳເລັດພິທີຕ້ອນຮັບ ທັງສອງຝ່າຍໃດ້ມີການພົບປະສຸດຍອດຢ່າງເປັນທາງການ, ຊິ່ງສະຫາຍ ນາຍົກລັດຖະມົນຕີ ທັງສອງຕ່າງກໍ່ໄດ້ຜັດປ່ຽນກັນ ແຈ້ງສະພາບການພັດທະນາເສດຖະ ກິດ ຢູ່ພາຍໃນປະເທດຂອງຕົນໃຫ້ກັນຊາບ ພ້ອມທັງແລກປ່ຽນຄວາມຄິດເຫັນນຳກັນຢ່າງເລິກເຊິ່ງ ແລະ ມີຄວາມເປັນເອກກະພາບຢ່າງກວ້າງຂວາງ ກ່ຽວກັບການເສີມຂະຫຍາຍສາຍພົວພັນ ແບບຄູ່ຮ່ວມມືຍຸດທະສາດຮອບດ້ານ ລະຫວ່າງ ສປປ ລາວ ແລະ ສປ ຈີນ, ຊິ່ປະຈຸບັນນີ້ ສປ ຈີນ ແມ່ນອັນດັບ 1 ໃນການລົງທຶນຢູ່ ສປປ ລາວ, ລວມມູນຄ່າຫຼາຍກວ່າ 6 ຕື້ໂດລາສະຫະລັດ, ມີ 749 ໂຄງການ ໃນຫຼາຍຂະແໜງ ເຊັ່ນ: ບໍ່ແຮ່, ພະລັງງານໄຟຟ້າ, ກະສິກໍາ, ອຸດສຫະກໍາປຸງແຕ່ງ, ການບໍລິການ ແລະ ອື່ນໆ. ເຊິ່ງມີມູນຄ່າການແລກປ່ຽນສິນຄ້ານຳກັນບັນລຸເຖິ2,7 ຕື້ໂດລາສະຫະລັດ ໃນປີ 2013. ການພົບປະສອງຝ່າຍຢ່າງເປັນທາງການ ມີເນື້ອໃນ ດັ່ງນີ້: ຝ່າຍລາວສະເໜີໃຫ້ຝ່າຍຈີນ ສືບຕໍ່ໃນການລົງທຶນໃນຂະແໜງພະລັງງານໄຟຟ້າດ້ວຍແຮງນ້ຳ ແລະ ຖ່ານຫີນ; ສຳລັບບັນຫາທາງລົດໄຟ  ສອງສະຫາຍນາຍົກ ສປປ ລາວ ແລະ  ສປ ຈີນ ຍັງຍືນຢັນຢ່າງໜັກແຫ້ນວ່າຈະສືບຕໍ່ໃຫ້ການສະໜັບສະໜູນໂຄງການລົດໄຟ ລາວ-ຈີນ ແລະ ໃຫ້ທັງສອງຝ່າຍ ຮີບຮ້ອນເຈລະຈາ, ຊອກຫາຮູບແບບການຮ່ວມມືທີ່ມີປະສິດທີຜົນ ບົນພື້ນຖານຕ່າງຝ່າຍຕ່າງມີຜົນປະໂຫຍດ; ຂະແໜງກະສິກຳ ຝ່າຍລາວສະເໜີໃຫ້ລັດຖະບານຈີນ ສືບຕໍ່ສະໜັບສະໜູນເງິນກູ້ ເພື່ອນໍາໃຊ້ເຂົ້າໃນການພັດທະນາລະບົບຊົນລະປະທານຢູ່ 2 ແຂວງພາກກາງຂອງລາວ ເພື່ອຄ້ຳປະກັນຄວາມໝັ້ນຄົງດ້ານສະບຽງອາຫານ; ນອກນີ້ທັງ 2 ຝ່າຍຍັງຈະສືບຕໍ່ຮ່ວມມືໃນຂົງເຂດເຕັກໂນໂລຊີ ເຊິ່ງຝ່າຍລາວ ສະເໜີໃຫ້ຈີນ ຮ່ວມມືດ້ານການປ້ອງກັນໂຈລະກຳທາງອີນເຕີເນັດ ແລະ ໂຄງການບໍລິຫານລັດດ້ວຍລະບົບເອເລັກໂຕຣນິກ ( E-Government); ສຳລັບຂະແໜງປ້ອງກັນ ຄວາມສະຫງົບ ທັງສອງຝ່າຍຍັງຈະຍົກລະດັບໃນການຮັກສາຄວາມສະຫງົບຕາມລຳນ້ຳຂອງ ແລະ ອາສະຍາກຳຂ້າມຊາດທຸກຮູບແບບ; ຂົງເຂດການສຶກສາ ແລະ ວັດທະນະທຳ ຝ່າຍ ລາວ ສະເໜີໃຫ້ຝ່າຍຈີນ ໃຫ້ທຶນແກ່ນັກສຶກສາລາວໃຫ້ຫຼາຍຂຶ້ນອີກ.

  ໃນໂອກາດດຽວກັນນີ້, ຜູ້ນຳທັງສອງຝ່າຍຍັງດ້ເປັນສັກຂີພະຍານການລົງນາມໃນເອກກະສານຮ່ວມມື ລະຫວ່າງ ສອງປະເທດ ຄື: ສານແລກປ່ຽນວ່າດ້ວຍລັດຖະບານຈີນ ໃຫ້ການຊ່ວຍເຫຼືອລັດຖະບານລາວ ເພື່ອປະຕິບັດໂຄງການລະບົບສຳລະບັດອັດຕະໂນມັດຂອງທະນາຄານ ເປັນຕົ້ນ.

       ໃນໄລຍະການຢ້ຽມຢາມ ສປ ຈີນ ຄັ້ງນີ້ ສະຫາຍ ນາຍົກລັດຖະມົນຕີ ທອງສິງ ທຳມະວົງ ພ້ອມດ້ວຍຄະນະ ຍັງໃດ້ໄປຢ້ຽມຊົມ ພື້ນຖານການຜະລິດກະສິກຳ ແລະ ສະຖານທີ່ທ່ອງທ່ຽວ ທີ່ສຳຄັນຂອງ ແຂວງຫາຍໜານອີກດ້ວຍ.


ແຫຼ່ງ: ເວັບໄຊຂ່າວສານປະເທດລາວ