ທ່ານນາຍົກລັດຖະມົນຕີຢ້ຽມຢາມ ສ.ສິງກະໂປຢ່າງເປັນທາງການ

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນສຸກ, 21 ກ.ພ 2014 10:00

ຕອບສະໜອງຕາມຄໍາເຊີນ ຂອງທ່ານ ລີຊຽນລຸງ, ນາຍົກລັດຖະມົນຕີ ແຫ່ງ ສາທາລະນະລັດ ສິງກະໂປ. ໃນຕອນເຊົ້າວັນທີ 20 ກຸມພາ 2014 ນີ້,   ທ່ານ ທອງສິງ ທໍາມະວົງ ນາຍົກລັດຖະ ມົນຕີ ແຫ່ງ ສປປ ລາວ ພ້ອມຄະນະໄດ້ເດີນທາງຈາກນະຄອນຫລວງວຽງຈັນ ດ້ວຍຖ້ຽວບິນພິເສດຂອງສາຍການບິນລາວ ໄປຢ້ຽມຢາມ ສ.ສິງກະໂປ ຢ່າງເປັນທາງການ   ໃນລະຫວ່າງ ວັນທີ 20-21 ກຸມພາ 2014 ນີ້.

      ໃນມື້ທໍາອິດຂອງການຢ້ຽມຢາມປະເທດສິງກະໂປຢ່າງເປັນທາງການ ຂອງທ່ານ ທອງສິງ ທຳມະວົງ, ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍຄະນະ, ເມື່ອເດີນທາງເຖິງສະໜາມບິນສາກົນ​ຈາງຈີ ຂອງສິງກະໂປ ຄະນະຜູ້ແທນຂັ້ນສູງຂອງລາວເຮົາ ໄດ້ຮັບການຕ້ອນຮັບໂດຍທ່ານ ລິມຊີເຊ, ລັດຖະມົນຕີປະຈຳສຳນັກງານນາຍົກລັດຖະມົນຕີ ໃນຖານະລັດຖະມົນຕີກຽດຕິຍົດ ພ້ອມດ້ວຍ ເຈົ້າໜ້າທີ່ລະດັບສູງຂອງສິງກະໂປ ແລະ ພະນັກງານສະຖານທູດລາວ ປະຈຳສິງກະໂປ.

          ທ່ານລັດຖະມົນຕີກຽດຕິຍົດ ໄດ້ນໍາພາທ່ານນາຍົກລັດຖະມົນຕີ ພ້ອມຄະນະ ອອກເດີນທາງຈາກສະໜາມບິນໄປຍັງທີ່ພັກຈາກນັ້ນ ກໍ່ໄດ້ເດີນທາງໄປຢ້ຽມຢາມສະຖາບັນສຶກສາດ້ານເຕັກນິກ

ວິຊາຊີບແຫ່ງສິງກະໂປເມື່ອເດີນທາງໄປເຖິງ  ທ່ານນາຍົກລັດຖະມົນຕີ ແລະ ຄະນະກໍໄດ້ຮັບການຕ້ອນຮັບຢ່າງອົບອຸ່ນ  ຈາກຄະນະອຳນວຍການອາຈານ  ແລະ  ນັກສຶກສາຂອງສະຖາບັນດັ່ງກ່າວ

ພ້ອມທັງ ໄດ້ຟັງລາຍງານສະພາບໂດຍລວມຂອງສະຖາບັນ.

      ຕອນບ່າຍຂອງວັນດຽວກັນ ທ່ານນາຍົກລັດຖະມົນຕີ ແລະ ຄະນະໄດ້ໄປຢ້ຽມຢາມອົງກອນວາງແຜນ ແລະ ຈັດສັນແຜນຜັງຕົວເມືອງ, ໃຫ້ກຽດເຂົ້າຮ່ວມກອງປະຊຸມໂຕະມົນນັກທຸລະກິດລາວ- ສິງກະໂປ, ເຂົ້າຮ່ວມພິທີເປີດງານວາງສະແດງສິນຄ້າຫັດຖະກຳການຕໍ່າຫູກ ຢູ່ຮ້ານວາງສະແດງຂອງ ສປປ ລາວ ແລະ ຮ່ວມງານອື່ນໆຈຳນວນໜຶ່ງ.



ແຫຼ່ງ: ເວັບໄຊຂ່າວສານປະເທດລາວ