ນາຍົກລັດຖະມົນຕີ ໃຫ້ກຽດເຂົ້າຮ່ວມພິທີ ມອບການຍ້ອງຍໍ ແລະ ເລື່ອນຊັ້ນໃຫ້ນາຍຕຳຫຼວດຂັ້ນສູງ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນເສົາ, 03 ມ.ສ 2021 11:00

​ເນື່ອງໃນໂອກາດ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ, ໃນວັນທີ 2 ເມສາ 2021 ທີ່ສະໂມສອນ ກະຊວງ ປກສ (ສະໜາມມ້າ), ກະຊວງປ້ອງກັນຄວາມສະຫງົບ ໄດ້ຈັດພິທີປະດັບຫຼຽນໄຊ, ຫຼຽນກາ ແລະ ປະກາດແຕ່ງຕັ້ງ, ເລື່ອນຊັ້ນ ໃຫ້ນາຍຕຳຫຼວດຂັ້ນສູງກະຊວງປ້ອງກັນຄວາມສະຫງົບ, ເປັນປະທານໂດຍ ສະຫາຍ ພົທ ວິໄລ ຫຼ້າຄຳຟອງ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ; ໃຫ້ກຽດເຂົ້າຮ່ວມໂດຍ ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ມີບັນດາສະຫາຍ ຄະນະພັກ-ຄະນະນຳຫຼັກແຫຼ່ງກະຊວງ ປກສ, ຜູ້ຕາງໜ້າ ປກສ ແຂວງ ແລະ ແຂກຮັບເຊີນເຂົ້າຮ່ວມ.
 
​ສະຫາຍ ດວງຕາ ຈູມພາວັນ, ຫົວໜ້າຫ້ອງການຄະນະຈັດຕັ້ງສູນກາງພັກ ຂຶ້ນຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງຮອງລັດຖະມົນຕີ, ຫົວໜ້າກົມໃຫຍ່ການເມືອງປ້ອງກັນ ຄວາມສະຫງົບ ໃນນີ້ແຕ່ງຕັ້ງ ສະຫາຍ ພົຕ ວັນທອງ ກອງມະນີ ເປັນຮອງລັດຖະມົນຕີ ທັງເປັນຫົວໜ້າກົມໃຫ່ຍການເມືອງ ກະຊວງປ້ອງກັນຄວາມສະຫງົບ; ຜ່ານລັດຖະດຳລັດຂອງປະທານປະເທດວ່າດ້ວຍການເລື່ອນຊັ້ນນາຍຕຳຫຼວດ ຈາກຊັ້ນ ພົນຈັດຕະວາ ຂຶ້ນຊັ້ນ ພົນຕີ ຈຳນວນ 4 ສະຫາຍ ຄື: ພົຕ ຄຳກິ່ງ ຜຸຍຫຼ້າມະນີວົງ, ຫົວໜ້າກົມໃຫຍ່ຕຳຫຼວດ; ພົຕ ໜູດີ ມີໄຊຍະລາດ, ຫົວໜ້າກົມໃຫຍ່ພະລາ; ພົຕ ປອ ບົວວັນ ວົງສາວັນທອງ, ຫົວໜ້າກົມໃຫຍ່ສັນຕິບານ ແລະ ພົຕ ສົມວັນ ສາຍລ້ອງພາ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ;  ເລື່ອນຊັ້ນ ພັນເອກ ຂຶ້ນຊັ້ນ ພົນຈັດຕະວາ ຈຳນວນ 5 ສະຫາຍ ຄື: ພົຈວ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານ, ພົຈວ ສະແຫວງ ພົມມະລີ ຫົວໜ້າສູນຄວບຄຸມລະບົບກ້ອງວົງຈອນປິດ ກົມໃຫຍ່ຕຳຫຼວດ, ພົຈວ ໜູຈອນ ກ້ອນທອງດໍາ ຮອງຫົວໜ້າກົມໃຫຍ່ພະລາ, ພົຈວ ແອນ ອຸ່ນອານົງນຸດ ຫົວໜ້າກອງບັນຊາການ ປກສ ແຂວງຫົວພັນ ແລະ ພົຈວ ບົວພັນ ອິນທະປັນຍາ ຫົວໜ້າກອງບັນຊາການ ປກສ ແຂວງໄຊສົມບູນ; ຜ່ານດຳລັດຂອງນາຍົກລັດຖະມົນຕີ ວ່າດ້ວຍການເລື່ອນຊັ້ນ ພັນໂທ ຂຶ້ນຊັ້ນ ພັນເອກ ໃຫ້ນາຍຕຳຫຼວດ ຈຳນວນ 39 ສະຫາຍ.


ສະຫາຍ ວັນນະ ບຸບຜາ ຄະນະພັກກະຊວງ ຫົວໜ້າກົມແຂ່ງຂັນ ແລະ ຍ້ອງຍໍ ກະຊວງພາຍໃນ ໄດ້ຜ່ານລັດຖະດຳລັດຂອງປະທານປະເທດ ວ່າດ້ວຍການມອບຫຼຽນໄຊອິດສະຫຼະ ແລະ ຫຼຽນໄຊແຮງງານ, ດຳລັດຂອງນາຍົກລັດຖະມົນຕີ ວ່າດ້ວຍການປະດັບຫຼຽນກາແຮງງານ ແລະ ໃບຍ້ອງຍໍ ລັດຖະບານ ໃຫ້ກົມກອງລວມໝູ່ ແລະ ບຸກຄົນ, ໃນນີ້ ປະທານປະເທດ ມອບຫຼຽນໄຊ ອິດສະຫຼະຊັ້ນ I ຈຳນວນ 1 ໜ່ວຍ ຜົນງານລວມກະຊວງປ້ອງກັນຄວາມສະຫງົບ, ມອບຫຼຽນໄຊອິດ ສະຫຼະຊັ້ນ II ຈຳນວນ 32 ກົມກອງ ແລະ 102 ສະຫາຍ, ຫຼຽນໄຊອິດສະຫຼະຊັ້ນ III ຈຳນວນ 21 ກົມກອງ ແລະ 35 ສະຫາຍ, ຫຼຽນໄຊແຮງງານຊັ້ນ II ຈຳນວນ 105 ກົມກອງ ແລະ 1.759 ສະຫາຍ, ຫຼຽນໄຊແຮງງານຊັ້ນ III ຈຳ ນວນ 186 ກົມກອງ ແລະ 4.363 ສະຫາຍ; ນາຍົກລັດຖະມົນຕີອອກດຳລັດ ມອບຫຼຽນກາແຮງງານ ຈຳນວນ 131 ກົມກອງ ແລະ 5.681 ສະຫາຍ, ມອບໃຍຍ້ອງລັດຖະບານ ຈຳນວນ 21 ກົມ ແລະ 5.253 ສະຫາຍ ທີ່ມີຜົນງານຄຸນງາມຄວາມດີ, ຜົນງານດີເດັ່ນ ໃນການເຄື່ອນໄຫວວຽກງານປ້ອງກັນຊາດປ້ອງກັນຄວາມສະຫງົບ ຕະຫຼອດໄລຍະ 10 (2011-2021). ນອກນັ້ນ, ຍັງມອບຫຼຽນກາ, ໃບຍ້ອງຍໍຂັ້ນກະຊວງ, ກົມໃຫຍ່ການເມືອງ ປກສ ອີກຈຳນວນໜຶ່ງ. ໃຫ້ກຽດປະດັບຊັ້ນແລະ ປະດັບຫຼຽນໄຊ ໂດຍສະຫາຍ ພັນຄຳ ວິພາວັນ ແລະ ພົທ ວິໄລ ຫຼ້າຄຳຟອງ.
 
ໂອກາດດັ່ງກ່າວ, ສະຫາຍ ພັນຄຳ ວິພາວັນ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ໂອ້ລົມໃຫ້ທິດຊີ້ນຳ ຫຼາຍບັນຫາສຳຄັນຕໍ່ນາຍຕຳຫຼວດຂັ້ນສູງ ທີ່ໄດ້ຮັບການແຕ່ງຕັ້ງ ແລະ ເລື່ອນຊັ້ນໃໝ່ໃນຄັ້ງນີ້ ໂດຍໄດ້ເນັ້ນໜັກໃຫ້ນາຍຕຳຫຼວດຂັ້ນສູງທຸກສະຫາຍ ສືບຕໍ່ຝຶກຝົນຫຼໍ່ຫຼອມຕົນເອງຢ່າງຮອບດ້ານ ພ້ອມກັນຍົກສູງຄວາມຮັບຜິດຊອບ ຕໍ່ໜ້າທີ່ການເມືອງຂອງຕົນໃຫ້ສູງກວ່າເກົ່າ, ເປັນຫຼັກແຫຼ່ງໃນການເຕົ້າໂຮມຄວາມສາມັກຄີໃຫ້ແໜ້ນແຟ້ນ, ປັບປຸງແບບແຜນວິທີເຮັດວຽກໃຫ້ມີວິທະຍາສາດ ບົນພື້ນຖານປະຕິບັດຕາມຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ມອບໃຫ້ບຸກຄົນຮັບຜິດຊອບ, ພ້ອມກັນກໍ່ສ້າງກຳລັງປ້ອງກັນຄວາມສະຫງົບ ໃຫ້ເປັນກຳລັງປະຕິວັດ, ມີແບບແຜນທີ່ທັນສະໄໝ ແລະ ລະບຽບວິໃນເຂັ້ມງວດ.​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ