ຜົນກອງປະຊຸມສຸດຍອດອາຊຽນ ກັບຄູ່ຮ່ວມເຈລະຈາ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນເສົາ, 14 ພ.ຈ 2020 17:00

​ໃນຕອນເຊົ້າຂອງ ວັນທີ 14 ພະຈິກ 2020, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະເຂົ້າຮ່ວມ ກອງປະຊຸມສຸດຍອດອາຊຽນ-ສະຫະລັດ ຄັ້ງທີ 8, ກອງປະຊຸມສຸດຍອດອາຊຽນ-ນິວຊີແລນ ແລະ ກອງປະຊຸມສຸດຍອດອາຊຽນ-ອົດສະຕຣາລີ ໃນຮູບແບບທາງໄກ. 


ສະເພາະຜົນກອງປະຊຸມສຸດຍອດ ອາຊຽນ-ສະຫະລັດ ຄັ້ງທີ 8: ໃນຖານະທີ່ ສປປ ລາວ ເປັນປະເທດປະສານງານ ການພົວພັນຮ່ວມມື ອາຊຽນ-ສະຫະລັດ, ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບກຽດອ່ານບົດຄໍາເຫັນລວມ (ASEAN Common Statement) ຂອງ ອາຊຽນ ຕໍ່ກອງປະຊຸມສຸດຍອດດັ່ງກ່າວ, ຊຶ່ງໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດ ການຮ່ວມມືອາຊຽນ-ສະຫະລັດ ໃນໄລຍະ 1 ປີ ທີ່ຜ່ານມາ ໂດຍສະເພາະ ການຜັນຂະຫຍາຍ ຜົນຂອງກອງປະຊຸມສຸດຍອດອາຊຽນ-ສະຫະລັດ ໃນທ້າຍປີ 2019; ຜົນກອງປະຊຸມລັດຖະມົນຕີຕ່າງປະເທດ ອາຊຽນ-ສະຫະລັດ ວ່າດ້ວຍການແຜ່ລະບາດຂອງພະຍາດ ໂຄວິດ-19 ໃນເດືອນເມສາ 2020 ແລະ ຜົນການຈັດຕັ້ງປະຕິບັດ ແຜນປະຕິບັດງານການຮ່ວມມືອາຊຽນ-ສະຫະລັດ ໄລຍະ 2016-2020, ຊຶ່ງກວມເອົາ 3 ເສົາຄໍ້າ ການສ້າງປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ). ສຳລັບທິດທາງຕໍ່ໜ້າ,  ອາຊຽນ ແລະ ສະຫະລັດ ເຫັນດີ ຈະສືບຕໍ່ຮ່ວມມືກັນ ໃນບາງຂະແໜງການບູລິມະສິດ ເປັນຕົ້ນ: 1. ຂະແໜງສາທາລະນະສຸກ ໂດຍສະເພາະ ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ໃນການປ້ອງກັນ, ຮັບມື ແລະ ແກ້ໄຂ ການແຜ່ລະບາດພະຍາດໂຄວິດ-19 ລວມທັງ ການຮ່ວມມືກັນໃນການຄົ້ນຄວ້າ-ພັດທະນາ ແລະ ຜະລິດຢາປົວພະຍາດ ກໍ່ຄື ຢາວັກແຊັງຕ້ານໂຄວິດ-19 ແລະ ການຮັບປະກັນ ໃນການເຂົ້າເຖິງ ແລະ ສາມາດໄດ້ຮັບຢາປົວພະຍາດ ແລະ ຢາວັກແຊັງດັ່ງກ່າວ ພາຍຫຼັງທີ່ໄດ້ມີການຮັບຮອງຢາປົວພະຍາດ ແລະ ວັກແຊັງປ້ອງກັນແລ້ວ; 2. ການຟື້ນຟູເສດຖະກິດ ຫຼັງໂຄວິດ-19; 3. ການຫັນໄປສູ່ເສດຖະກິດດິຈີຕອນ; 4. ການເຊື່ອມຈອດອາຊຽນ; 5. ການຮັດແຄບຄວາມແຕກໂຕນ ດ້ານການພັດທະນາ ພາຍໃນອາຊຽນ ດ້ວຍການຈັດຕັ້ງປະຕິບັດ ແຜນປະຕິບັດງານໄອເອໄອ ສະບັບທີ 3 (2016-2020) ແລະ ສະບັບທີ 4 (2021-2025); ແລະ 6. ການພັດທະນາແບບຍືນຍົງ ລວມທັງ ແຜນງານໂຄງການ ພາຍໃຕ້ເຄືອຂ່າຍຕົວເມືອງອັດສະລິຍະອາຊຽນ. ກອງປະຊຸມສຸດຍອດ ອາຊຽນ-ສະຫະລັດ ຄັ້ງຕໍ່ໄປ (ຄັ້ງທີ 9) ຈະຈັດຂຶ້ນ ທີ່ປະເທດບຣູໄນ ໃນຖານະປະທານອາຊຽນ ຄັ້ງຕໍ່ໄປ ໃນທ້າຍປີ 2021.


ສຳລັບກອງປະຊຸມສຸດຍອດ ອາຊຽນ-ນິວຊີແລນ: ກອງປະຊຸມຄັ້ງນີ້ ເປັນການສະເຫຼີມສະຫຼອງ ຄົບຮອບ 45 ປີ ແຫ່ງການພົວພັນຮ່ວມມື ອາຊຽນ-ນິວຊີແລນ, ຊຶ່ງກອງປະຊຸມໄດ້ຕີລາຄາສູງ ຕໍ່ໝາກຜົນແຫ່ງການພົວພັນຮ່ວມມື ລະຫວ່າງ ອາຊຽນ ແລະ ນິວຊີແລນ ຕະຫຼອດໄລຍະກວ່າ 4 ທົດສະວັດ ທີ່ຜ່ານມາ ອັນໄດ້ນໍາຜົນປະໂຫຍດຕົວຈິງ ມາສູ່ປະຊາຊົນ ອາຊຽນ ແລະ ນີວຊີແລນ ແລະ ປະກອບສ່ວນອັນສໍາຄັນ ເຂົ້າໃນຂະບວນການສ້າງປະຊາຄົມອາຊຽນ ລວມທັງ ການຮັດແຄບຄວາມແຕກໂຕນດ້ານການພັດທະນາ ພາຍໃນອາຊຽນ, ການເຊື່ອມຈອດ, ການພັດທະນາຊັບພະຍາກອນມະນຸດ, ການເຊື່ອມໂຍງອາຊຽນ ແລະ ການຍົກສູງຊິວິດການເປັນຢູ່ຂອງປະຊາຊົນ. ພ້ອມນີ້, ບັນດາຜູ້ນຳ ໄດ້ຮັບຮອງເອົາຖະແຫຼງການວິໄສທັດຮ່ວມ ຜູ້ນຳອາຊຽນ-ນິວຊີແລນ ຄົບຮອບ 45 ປີ ເພື່ອເປັນທິດທາງໃຫ້ແກ່ການຮ່ວມມືໃນໄລຍະຕໍ່ໜ້າ, ໂດຍສຸມໃສ່ 4Ps: Peace (ສັນຕິພາບ), Prosperity (ຄວາມສົມບູນພູນສຸກ), People (ຄົນ) and Planet ແລະ ໂລກ  ແລະ ສະເໜີມອບໃຫ້ພາກສ່ວນກ່ຽວຂ້ອງ ນໍາໄປຜັນຂະຫຍາຍ ໃຫ້ປະກົດຜົນເປັນຈິງ. ຄຽງຄູ່ກັບການຜັນຂະຫຍາຍ ຖະແຫຼງການວິໄສທັດຮ່ວມ ຜູ້ນຳອາຊຽນ-ນິວຊີແລນແລ້ວ, ບັນດາຜູ້ນຳ ຍັງເຫັນພ້ອມສຸມໃສ່ບາງຂົງເຂດບູລິມະສິດ ເຊັ່ນ: ສາທາລະນະສຸກ ລວມທັງ ການປ້ອງກັນ, ຮັບມື ແລະ ແກ້ໄຂ ໂຄວິດ-19; ການຍົກລະດັບ ການເຊື່ອມໂຍງເສດຖະກິດພາກພື້ນ ໂດຍການຫັນເປັນດີຈິຕອນ ເພື່ອອຳນວຍຄວາມສະດວກດ້ານການຄ້າ ແລະ ການລົງທຶນ, ການທ່ອງທ່ຽວ, ການພັດທະນາຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSMEs), ການເຊື່ອມຈອດ, ການຮັດແຄບຄວາມແຕກໂຕນດ້ານການພັດທະນາ, ການສຶກສາ ໂດຍສະເພາະ ການສະໜອງທຶນສຶກສາ ໄລຍະສັ້ນ, ໄລຍະຍາວ ແລະ ການຝຶກອົບຮົມພາສາອັງກິດ ແລະ ການຝຶກອົບຮົມວິຊາຊີບ ເປັນຕົ້ນ.

ໃນໂອກາດກອງປະຊຸມຄັ້ງນີ້,  ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ຕີລາຄາສູງ ຕໍ່ການພົວພັນຮ່ວມມື ສອງຝ່າຍ ລາວ-ນິວຊີແລນ ຕະຫຼອດໄລຍະເກືອບ 6 ທົດສະວັດຜ່ານມາ ໄດ້ໃຫ້ການຊ່ວຍເຫຼືອແກ່ ສປປ ລາວ ໃນຂົງເຂດການພັດທະນາຊັບພະຍາກອນມະນຸດ, ກະສິກຳປ່າໄມ້, ການຮັບມືໄພພິບັດທາງທຳມະຊາດ, ການທ່ອງທ່ຽວຊຸມຊົນ ແລະ ການເກັບກູ້ລະເບີດບໍ່ແຕກ, ທັງໝົດນີ້ ໄດ້ປະກອບສ່ວນອັນສຳຄັນ ເຂົ້າໃນການພັດທະນາເສດຖະກິດ-ສັງຄົມ ສປປ ລາວ ຕະຫຼອດມາ.


​ສ່ວນຜົນກອງປະຊຸມສຸດຍອດ ອາຊຽນ-ອົດສະຕຣາລີ: ກອງປະຊຸມ ໄດ້ຕີລາຄາສູງ ຕໍ່ຜົນສໍາເລັດການຈັດຕັ້ງປະຕິບັດ ການຮ່ວມມື ອາຊຽນ-ອົດສະຕຣາລີ ໂດຍສະເພາະ ການຜັນຂະຫຍາຍແຜນປະຕິບັດງານ ອາຊຽນ-ອົດສະຕຣາລີ ໃນໄລຍະ 1 ປີ ຜ່ານມາ, ຊຶ່ງກວມເອົາ 3 ເສົ້າຄໍ້າ ຂອງການສ້າງປະຊາຄົມອາຊຽນຮອດປີ 2025: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ສຳລັບທິດທາງແຜນການຮ່ວມມືໃນຕໍ່ໜ້າ, ກອງປະຊຸມໄດ້ຮັບຮອງເອົາ ຖະແຫຼງການຮ່ວມຜູ້ນໍາ ອາຊຽນ-ອົດສະຕຣາລີ ວ່າດ້ວຍການເພີ່ມທະວີການເປັນຄູ່ຮ່ວມເພື່ອຟື້ນຟູເສດຖະກິດ, ໂດຍຈະສຸມໃສ່ບາງຂົງເຂດບູລິມະສິດ ເຊັ່ນ: ສາທາລະນະສຸກ ລວມທັງ ການປ້ອງກັນ, ຮັບມື ແລະ ແກ້ໄຂ ໂຄວິດ-19; ການຍົກລະດັບ ການເຊື່ອມໂຍງເສດຖະກິດພາກພື້ນ ໂດຍການຫັນເປັນດີຈິຕອນ ເພື່ອອຳນວຍຄວາມສະດວກທາງດ້ານການຄ້າ, ການລົງທຶນ ແລະ ການບໍລິການ ລວມທັງ ການເຂົ້າເຖິງແຫຼ່ງທຶນ ແລະ ເຕັກໂນໂລຊີ ທີ່ທັນສະໄໝ ສຳລັບຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ (MSMEs) ເພື່ອໃຫ້ສາມາດດໍາເນີນທຸລະກິດຜ່ານທາງອອນລາຍ; ການສຶກສາ ໂດຍສະເພາະ ການສະໜອງທຶນສຶກສາໄລຍະສັ້ນ, ໄລຍະຍາວ ແລະ ການຝຶກອົບຮົມພາສາອັງກິດ ລວມທັງ ໂຄງການໂຄລົມໂບໃໝ່ (New Colombo Plan); ການເຊື່ອມຈອດອາຊຽນ ໂດຍສະເພາະ ການຈັດຕັ້ງປະຕິບັດແຜນແມ່ບົດ ການເຊື່ອຈອດອາຊຽນ ຮອດປີ 2025 (MPAC 2025); ການຈັດຕັ້ງປະຕິບັດແຜນໄອເອໄອ ສະບັບທີ 3 (2016-2020) ແລະ ສະບັບທີ 4 (2021-2025); ການພັດທະນາແບບຍືນຍົງ ແລະ ການພັດທະນາ ເຄືອຂ່າຍຕົວເມືອງອັດສະລິຍະອາຊຽນ. ພິເສດ, ກອງປະຊຸມ ໄດ້ສະແດງຄວາມຍິນດີ ຕໍ່ການປະກາດໃຫ້ການຊ່ວຍເຫຼືອ ຂອງລັດຖະບານອົດສະຕຼາລີ ຈຳນວນ 21 ລ້ານໂດລາອົດສະຕຼາລີ ເຂົ້າໃນສູນຂະແໜງສາທາລະນະສຸກ ແລະ ພະຍາດລະບາດອາຊຽນ.​


ແຫຼ່ງ: ກະຊວງການຕ່າງປະເທດ