ຫວຽດນາມ ມອບເຂົ້າຊ່ວຍເຫຼືອ ສປປ ລາວ 1.000 ໂຕນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 13 ພ.ຈ 2020 21:00

​​​ໃນທ່າມກາງບັນຍາກາດ ຂອງການດຳເນີນກອງປະຊຸມສຸດຍອດອາຊຽນ ຄັ້ງທີ 37, ໃນຕອນບ່າຍ ຂອງວັນທີ 13 ພະຈິກ 2020 ສສ ຫວຽດນາມ ໄດ້ມອບເຂົ້າສານ ຈຳນວນ 1.000 ໂຕນ ໃຫ້ແກ່ ສປປ ລາວ ເພື່ອນຳໄປຊ່ວຍເຫຼືອປະຊາຊົນ ແຂວງສະຫວັນນະເຂດ ທີ່ໄດ້ຮັບຜົນກະທົບຈາກໄພພິບັດໄພນໍ້າຖ້ວມຢ່າງໜັກໜ່ວງ, ຊຶ່ງພິທີມອບ-ຮັບເຂົ້າຄັ້ງນີ້ ໄດ້ຈັດແບບທາງໄກ (ຜ່ານວີດີໂອອອນລາຍ), ຝ່າຍ ສປປ ລາວ ຈັດຂຶ້ນທີ່ ຫໍປະຊຸມແຫ່ງຊາດ ໂດຍການເຂົ້າຮ່ວມເປັນສັກຂີຍານ ຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ມີທ່ານ ລັດຖະມົນຕີກະຊວງການຕ່າງປະເທດ, ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ການນຳຫ້ອງວ່າການສຳນັກງານນາຍົກລັດຖະມົນຕີ, ເອກອັກຄະລັດຖະທູດຫວຽດນາມປະຈຳລາວ ພ້ອມດ້ວຍ ພະນັກງານທີ່ກ່ຽວຂ້ອງ ເຂົ້າຮ່ວມ. ສໍາລັບຝ່າຍ ສສ ຫວຽດນາມ ແມ່ນນໍາໂດຍທ່ານ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍ ລັດຖະມົນຕີ, ຮອງລັດຖະມົນຕີ ທີ່ກ່ຽວຂ້ອງ ເຂົ້າຮ່ວມ.


​ໃນພິທີ ໄດ້ຮັບກຽດກ່າວມອບໂດຍ ທ່ານ ຫງວຽນ ກັວກ ຢຸງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ແລະ ກ່າວຮັບໂດຍ ທ່ານ ຈັນທະພອນ ຄຳມະນີຈັນ, ອຸປະທູດຊົ່ວຄາວ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ທີ່ນະຄອນຫຼວງຮ່າໂນ້ຍ. ໃນໂອກາດດັ່ງກ່າວ, ສອງນາຍົກລັດຖະມົນຕີ ກໍ່ໄດ້ມີຄຳເຫັນ ຕີລາຄາສູງຕໍ່ການຊ່ວຍເຫຼືອອັນມີຄຸນຄ່າໃນຄັ້ງນີ້, ຊຶ່ງສະແດງໃຫ້ເຫັນເຖິງ ສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ເວລາໃດກໍ່ຊ່ວຍເຫຼືອຊຶ່ງກັນ ແລະກັນ ແລະ ຄຽງບ່າຄຽງໄຫຼ່ກັນ, ເຂົ້າເມັດຫັກ ຜັກເສັ້ນໜຶ່ງ ກໍ່ບິແບ່ງປັ່ນກັນ. 

​​ໃນຕອນທ້າຍ, ຝ່າຍ ສປປ ລາວ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ແລະ ຢືນຢັນທີ່ຈະນຳເອົາເຂົ້າສານດັ່ງກ່າວ ໄປມອບໃຫ້ປະຊາຊົນແຂວງສະຫວັນນະເຂດ ທີ່ໄດ້ຮັບຜົນກະທົບຈາກໄພທຳມະຊາດໃນປີນີ້ ໃຫ້ສອດຄ່ອງກັບຈຸດປະສົງ-ເປົ້າໝາຍ ແລະ ທັນການ.​



ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ