ຜົນກອງປະຊຸມສຸດຍອດ ແມ່ນໍ້າຂອງ-ສ.ເກົາຫຼີ ຄັ້ງທີ 2 ແລະ ແມ່ນໍ້າຂອງ-ຍີ່ປຸ່ນ ຄັ້ງທີ 12

ວັນສຸກ, 13 ພ.ຈ 2020 14:00

​​ໃນຕອນເຊົ້າ ຂອງວັນທີ 13 ພະຈິກ 2020, ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ໄດ້ເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ສ.ເກົາຫຼີ ຄັ້ງທີ 2 ໂດຍການເປັນປະທານຮ່ວມຂອງ ທ່ານ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ທ່ານ ມູນ ແຈ ອິນ, ປະທານາທິບໍດີ ແຫ່ງ ສ.ເກົາຫຼີ; ມີບັນດາຄະນະຜູ້ແທນຈາກປະເທດສະມາຊິກ (ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ສ.ເກົາຫຼີ) ເຂົ້າຮ່ວມຢ່າງພ້ອມພຽງ. 


​ກອງປະຊຸມຄັ້ງນີ້ ໄດ້ທົບທວນຄືນໝາກຜົນການຮ່ວມມື ແມ່ນໍ້າຂອງ-ສ.ເກົາຫຼີ ໃນໄລຍະຜ່ານມາ ໂດຍສະເພາະ ການຈັດຕັ້ງປະຕິບັດ ຖະແຫຼງການແມ່ນໍ້າຂອງ-ແມ່ນໍ້າຮານ ທີ່ຖືກຮັບຮອງໃນກອງປະຊຸມສຸດຍອດ ແມ່ນໍ້າຂອງ-ສ.ເກົາຫຼີ ຄັ້ງປະຖົມມະເລີກ ທີ່ ປູຊານ, ສ.ເກົາຫຼີ ໃນທ້າຍປີ 2019 ຜ່ານມາ ແລະ ແຜນປະຕິບັດງານ 3 ປີ (2017-2020) ຂອງຂອບການຮ່ວມມືແມ່ນໍ້າຂອງ-ສ.ເກົາຫຼີ, ຊຶ່ງກອງປະຊຸມໄດ້ຕີລາຄາວ່າ ຂອບການຮ່ວມມືດັ່ງກ່າວ ໄດ້ມີທ່າກ້າວຂະຫຍາຍຕົວຢ່າງໄວວາ ພາຍໃຕ້ 3 ເສົາຄໍ້າ ຂອງການຮ່ວມມື ແລະ 7 ຂົງເຂດບູລິມະສິດ ຄື: (ວັດທະນະທໍາ ແລະ ການທ່ອງທ່ຽວ; ການພັດທະນາຊັບພະຍາກອນມະນຸດ; ກະສິກໍາ ແລະ ພັດທະນາຊົນນະບົດ; ພັດທະນາພື້ນຖານໂຄງລ່າງ; ຂໍ້ມູນຂ່າວສານ ແລະ ເຕັກໂນໂລຊີ; ສິ່ງແວດລ້ອມ; ແລະ ສິ່ງທ້າທາຍແບບໃໝ່) ລວມທັງ ການຈັດຕັ້ງປະຕິບັດໂຄງການຊ່ວຍເຫຼືອຈາກກອງທຶນຮ່ວມມື ແມ່ນໍ້າຂອງ-ສ.ເກົາຫຼີ, ຊຶ່ງຜ່ານມາ ສປປ ລາວ ໄດ້ຮັບຈຳນວນ 4 ໂຄງການ ມູນຄ່າ 1.5 ລ້ານໂດລາສະຫະລັດ ຄື: ໂຄງການເພີ່ມຄວາມອາດສາມາດຂອງ ປະຊາຊົນ ແລະ ບັນດາເມືອງທຸກຍາກຂອງ ສປປ ລາວ; ໂຄງການສ້າງແຜນແມ່ບົດ ແລະ ຄວາມອາດສາມາດ ເພື່ອພັດທະນາໂຄງລ່າງພື້ນຖານ ດ້ານອຸຕຸນິຍົມ-ອຸທົກກະສາດ  ໃນອ່າງແມ່ນໍ້າຂອງ;  ໂຄງການຮ່ວມມືດ້ານການແລກປ່ຽນ ການຄຸ້ມຄອງ-ບໍລິຫານໂຄງການຊ່ວຍເຫຼືອ ໃນພາກພື້ນແມ່ນໍ້າຂອງ; ໂຄງການບໍລິຫານຄຸນນະພາບດິນ, ນໍ້າ ແລະ ສານອາຫານ ເພື່ອເພີ່ມທະວີລາຍຮັບ ໃຫ້ຊາວກະສິກອນໃນເຂດແຫ້ງແລ້ງ ໃນ ສປປ ລາວ. ພ້ອມດຽວກັນນັ້ນ, ກອງປະຊຸມ ກໍໄດ້ເຫັນດີເປັນເອກະພາບ ໃນການຍົກລະດັບການຮ່ວມມືຂຶ້ນ ສູ່ຄູ່ຮ່ວມມືຍຸດທະສາດ ເພື່ອປະຊາຊົນ, ຄວາມຈະເລີນຮຸ່ງເຮືອງ ແລະ ສັນຕິພາບ. 

​ນອກຈາກນັ້ນ, ກອງປະຊຸມຍັງໄດ້ປຶກສາຫາລືທິດທາງຮ່ວມມືໃນຕໍ່ໜ້າ ໂດຍສະເພາະ ການຈັດຕັ້ງຜັນຂະຫຍາຍແຜນປະຕິບັດງານ ໄລຍະ 5 ປີ ສະບັບໃໝ່ (2021-2025) ເປັນຕົ້ນ ການຮ່ວມມືໃນການຟື້ນຟູເສດຖະກິດ-ສັງຄົມໃນພາກພື້ນແມ່ນໍ້າຂອງ-ສ.ເກົາຫຼີ ພາຍຫຼັງທີ່ໄດ້ຮັບຜົນກະທົບ ຈາກການແຜ່ລະບາດຂອງພະຍາດໂຄວິດ-19; ການພັດທະນາໂຄງລ່າງພື້ນຖານ ແລະ ຊັບພະຍາກອນມະນຸດ ໃນຂະແໜງການສາທາລະນະສຸກ; ເພີ່ມທະວີການຮ່ວມມືດ້ານການຄ້າ ແລະ ການລົງທຶນ ແລະ ສຸມໃສ່ການພັດທະນາແບບຍືນຍົງ ບົນພື້ນຖານເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ. ໃນຕອນທ້າຍ, ກອງປະຊຸມ ກໍໄດ້ຮັບຮອງເອົາຖະແຫຼງການຮ່ວມ ກອງປະຊຸມສຸດຍອດແມ່ນໍ້າຂອງ-ສ.ເກົາຫຼີ ຄັ້ງທີ 2 ເພື່ອເປັນເອກະສານພື້ນຖານ ໃນການຈັດຕັ້ງຜັນຂະຫຍາຍການຮ່ວມມື ຕາມລະດັບຄາດໝາຍ.

​ຫຼັງຈາກສຳເລັດ ກອງປະຊຸມສຸດຍອດແມ່ນໍ້າຂອງ-ສ.ເກົາຫຼີ, ໃນຕອນເຊົ້າຂອງມື້ດຽວກັນ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 12 ໂດຍການເປັນປະທານຮ່ວມ ຂອງທ່ານ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ທ່ານ ຊູງະ ໂຢຊິຮິເດະ, ນາຍົກລັດຖະມົນຕີ ແຫ່ງ ຍີ່ປຸ່ນ ແລະ ໄດ້ມີບັນດາຄະນະຜູ້ແທນ ຈາກປະເທດສະມາຊິກ (ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ຍີ່ປຸ່ນ) ເຂົ້າຮ່ວມຢ່າງພ້ອມພຽງ.


​ກອງປະຊຸມ ໄດ້ທົບທວນຄືນໝາກຜົນຂອງການຮ່ວມມື ລະຫວ່າງ ປະເທດແມ່ນ້ໍາຂອງ ແລະ ຍີ່ປຸ່ນ ໃນໄລຍະຜ່ານມາ ກໍຄືການຈັດຕັ້ງຜັນຂະຫຍາຍ ຖະແຫຼງການຮ່ວມຂອງກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 11, ຍຸດທະສາດ ໂຕກຽວ 2018, ເອກະສານຂໍ້ລິເລີ່ມ ແມ່ນໍ້າຂອງ-ຍີ່ປຸ່ນ ສຳລັບການພັດທະນາແບບຍືນຍົງ ເຖິງປີ 2030 ແລະ ບັນດາແຜນງານ ແລະ ໂຄງການຕ່າງໆ. ໃນໄລຍະຜ່ານມາ, ຂອບການຮ່ວມມືແມ່ນໍ້າຂອງ-ຍີ່ປຸ່ນ ແມ່ນມີຄວາມຄືບໜ້າຫຼາຍດ້ານ ໂດຍສະເພາະ ການພັດທະນາໂຄງລ່າງພື້ນຖານ, ພັດທະນາຊັບພະຍາກອນມະນຸດ, ພັດທະນາແບບຍືນຍົງ ແລະ ການຮ່ວມມືກັບບັນດາອົງການຈັດຕັ້ງຕ່າງໆໃນພາກພື້ນ, ຊຶ່ງເຫັນວ່າ ຂອບການຮ່ວມມືດັ່ງກ່າວ ເປັນເວທີໜຶ່ງທີ່ດີ ສໍາລັບບັນດາປະເທດແມ່ນໍ້າຂອງ ແລະ ຍີ່ປຸ່ນ ໃນການຮັດແໜ້ນການຮ່ວມມື ແລະ ສ້າງຄວາມເຂັ້ມແຂງ ໃຫ້ພາກພື້ນແມ່ນໍ້າຂອງ ກາຍເປັນພາກພື້ນທີ່ເຂັ້ມແຂງທາງດ້ານເສດຖະກິດ ແລະ ສາມາດເຊື່ອມຈອດກັບພາກພື້ນອື່ນໆ ກໍ່ຄື ອາຊຽນໄດ້ເປັນຢ່າງດີ. ສຳລັບ ສປປ ລາວ ກໍໄດ້ຮັບໂຄງການຊ່ວຍເຫຼືອຫຼາຍໂຄງການ ເປັນຕົ້ນ ໂຄງການສຳຫຼວດເກັບກຳຂໍ້ມູນ ເພື່ອພັດທະນາການເຊື່ອມຈອດ ວຽງຈັນ ແລະ ຮ່າໂນ່ຍ, ໂຄງການກໍ່ສ້າງຂົວຕາມເສັ້ນທາງເລກ 9, ໂຄງການສຶກສາແຜນແມ່ບົດ ລະບົບໄຟຟ້າຂອງລາວ, ໂຄງການນໍ້າງື່ມ 1, ແລະ ໂຄງການຂະຫຍາຍອາຄານຜູ້ໂດຍສານ ສະໜາມບິນສາກົນວັດໄຕວຽງຈັນ. 

​ໃນໂອກາດນີ້, ກອງປະຊຸມ ໄດ້ຮ່ວມກັນວາງທິດທາງການຮ່ວມມືໃນຕໍ່ໜ້າ ໂດຍສະເພາະ ສືບຕໍ່ຈັດຕັ້ງປະຕິບັດແຜນງານ ແລະ ໂຄງການຕ່າງໆ ທີ່ໄດ້ຮັບຮອງເອົາແລ້ວນັ້ນໃຫ້ສໍາເລັດ ພາຍໃຕ້ແຜນຍຸດທະສາດໂຕກຽວ 2018 ແລະ ຂໍ້ລິເລີ່ມແມ່ນໍ້າຂອງ-ຍີ່ປຸ່ນ ສໍາລັບເປົ້າໝາຍການພັດທະນາແບບຍືນຍົງເຖິງປີ 2030 ໃຫ້ເປັນຮູບປະທໍາເທື່ອລະກ້າວ. ນອກຈາກນີ້, ກໍໄດ້ປຶກສາຫາລື ກ່ຽວກັບການຂະຫຍາຍການຮ່ວມມື ເພື່ອຟື້ນຟູເສດຖະກິດ-ສັງຄົມ ພາຍຫຼັງການລະບາດຂອງພະຍາດໂຄວິດ-19 ໂດຍສະເພາະ ທາງດ້ານສາທາລະນະສຸກແບບສຸກເສີນ ເພື່ອແລກປ່ຽນຂໍ້ມູນຂ່າວສານໃຫ້ທັນກັບເວລາ, ປະສົບການ ແລະ ການທົດລອງທີ່ດີ ເຂົ້າໃນການຫຼີກເວັ້ນ, ຈໍາກັດ, ປິ່ນປົວພະຍາດຕິດຕໍ່ ທີ່ເປັນໄພຄຸກຄາມໃຫ້ແກ່ປະເທດຊາດກໍ່ຄືປະຊາຊົນ. ພ້ອມທັງ ໄດ້ປຶກສາຫາລືໃນການປັບປຸງຂະແໜງການວິສາຫະກິດຂະໜາດນ້ອຍ, ກາງ ແລະ ໃຫຍ່ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະ ສ້າງເງື່ອນໄຂ ທີ່ເອື້ອອຳນວຍໃຫ້ພວກເຂົາ ສາມາດເຂົ້າເຖິງແຫຼ່ງທຶນ ແລະ ເຕັກໂນໂລຊີທີ່ທັນສະໄໝໄດ້.

​​ກອງປະຊຸມ ໄດ້ຮັບຮອງເອົາຖະແຫຼງການຮ່ວມ ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 12 ເພື່ອເປັນເອກະສານອ້າງອີງພື້ນຖານ ໃນການຈັດຕັ້ງປະຕິບັດແຜນງານຕ່າງໆ ໃນຕໍ່ໜ້າ.