ຜົນກອງປະຊຸມສຸດຍອດ ອາຊຽນ-ຈີນ ຄັ້ງທີ 23

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 12 ພ.ຈ 2020 20:00

ໃນວາລະດຳເນີນກອງປະຊຸມສຸດຍອດອາຊຽນ ຄັ້ງທີ 37 ແບບທາງໄກ (ຜ່ານລະບົບວີດີໂອອອນລາຍ) ໄດ້ມີກອງປະຊຸມສຸດຍອດອາຊຽນຜູ້ນໍາອາຊຽນ ແລະ ສປ ຈີນ, ຊຶ່ງກອງປະຊຸມ ໄດ້ຕີລາຄາສູງຕໍ່ໝາກຜົນຂອງການຮ່ວມມື ອາຊຽນ-ຈີນ ໃນໄລຍະຜ່ານມາ ອັນໄດ້ປະກອບສ່ວນສໍາຄັນ ເຂົ້າໃນການສ້າງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ຢູ່ພາກພື້ນ ກໍ່ຄືໃນໂລກ.  ທັງສອງຝ່າຍ ຢືນຢັນຄືນຄວາມໝາຍໜັ້ນ ທີ່ຈະສືບຕໍ່ຮ່ວມມືກັນໃນໄລຍະຕໍ່ໜ້າ, ໂດຍໄດ້ຮັບຮອງເອົາແຜນປະຕິບັດງານອາຊຽນ-ຈີນ ສະບັບໃໝ່ ປີ 2021-2025, ຊຶ່ງໄດ້ກວມເອົາ ທັງ 3 ເສົ້າຄໍ້າ ຂອງການສ້າງປະຊາຄົມອາຊຽນ ຮອດປີ 2025 (ການເມືອງຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ).


ກອງປະຊຸມ ໄດ້ສະແດງຄວາມພໍໃຈ ຕໍ່ມາດຕະການໃນການຮັບມື ແລະ ແກ້ໄຂ ການແຜ່ລະບາດຂອງພະຍາດ  ໂຄວິດ-19 ທັງຢູ່ອາຊຽນ ແລະ ຢູ່ ສປ ຈີນ ແລະ ໄດ້ຂອບໃຈ ຕໍ່ການຊ່ວຍເຫຼືອຂອງ ສປ ຈີນ ໃນການຕ້ານການແຜ່ລະບາດຂອງພະຍາດໂຄວິດ-19 ໂດຍສະເພາະ ການປະກອບສ່ວນງົບປະມານ ໃຫ້ແກ່ກອງທຶນອາຊຽນຕ້ານໂຄວິດ-19 ຈຳນວນ 1 ລ້ານໂດລາ ແລະ 5 ລ້ານໂດລາ ເພື່ອສະໜັບສະໜູນ ໂຄງການຮ່ວມມືດ້ານສາທະນະສຸກ ອາຊຽນ-ຈີນ.

ນອກຈາກນີ້, ກອງປະຊຸມ ຍັງໄດ້ສະແດງຄວາມຍິນດີ ຕໍ່ຄວາມຄືບໜ້າຂອງຈັດຕັ້ງປະຕິບັດຖະແຫຼງການ ອາຊຽນ-ຈີນ ວ່າດ້ວຍການເຊື່ອມສານ ລະຫວ່າງ ແຜນແມ່ບົດການເຊື່ອມຈອດອາຊຽນ 2025 ແລະ ຂໍ້ລິເລີ່ມໜຶ່ງແລວ, ໜຶ່ງເສັ້ນທາງ (BRI) ທີ່ໄດ້ຮັບຮອງໃນປີ 2019 ຜ່ານມາ, ຊຶ່ງເປັນການປະກອບສ່ວນອັນສໍາຄັນ ເຂົ້າໃນການສົ່ງເສີມການຄ້າ, ການລົງທຶນ ແລະ ການທ່ອງທ່ຽວ ໃນພາກພື້ນ ແລະ ສາກົນ. ໃນນີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ແຈ້ງໃຫ້ທີ່ປະຊຸມຊາບ ຄວາມຄືບໜ້າຂອງໂຄງການລົດໄຟຄວາມໄວສູງ ລາວ-ຈີນ, ຊຶ່ງແມ່ນສ່ວນໜຶ່ງຂອງໂຄງການເຊື່ອມຈອດທາງລົດໄຟອາຊຽນ ສິງກະໂປ-ຄຸນມິງ ໄດ້ມີຄວາມຄືບໜ້າຫຼາຍ ແລະ ຄາດວ່າ ຈະສຳເລັດພາຍໃນປີ 2021 ຕາມແຜນການ.

​ສຳລັບທິດທາງຕໍ່ໜ້າ, ສປປ ລາວ ຍັງໄດ້ສະເໜີໃຫ້ ສປ ຈີນ ສືບຕໍ່ຊ່ວຍສ້າງຂີດຄວາມສາມາດ ດ້ານເສດຖະກິດດີຈີຕອນ ໂດຍການຖ່າຍທອດ ແລະ ແລກປ່ຽນດ້ານເຕັກໂນໂລຊີ ແລະ ນະວັດຕະກຳ ໃນຂົງເຂດການເງິນ, ການທະນາ ຄານ ແລະ ການສ້າງຄວາມເຂັ້ມແຂງໃຫ້ແກ່ ຈຸລະວິສາຫະກິດ ແລະ ວິສາຫະກິດ ຂະໜາດນ້ອຍ-ຂະໜາດກາງ (MSMEs) ເພື່ອຫັນໄປສູ່ເສດຖະກິດດີຈີຕອນ ແລະ ການຄ້າອີເລັກໂຕຼນິກເທື່ອລະກ້າວ.​


ແຫຼ່ງ: ກະຊວງການຕ່າງປະເທດ