ທ່ານນາຍົກລັດຖະມົນຕີ ຕ້ອນຮັບຄະນະຜູ້ແທນ ສສ ຫວຽດນາມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 06 ທ.ວ 2019 16:00

​​ໃນຕອນເຊົ້າ ຂອງວັນທີ 6 ທັນວາ 2019 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ຫງວຽນ ຫງອກ ຖຽນ ລັດຖະມົນຕີ ກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ ພ້ອມດ້ວຍຄະນະ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ ສປປ ລາວ ຢ່າງເປັນທາງການ ໃນຄັ້ງນີ້, ໂດຍສະເພາະແມ່ນ ການເຮັດວຽກຮ່ວມກັບການນຳ ຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມພູນຄູນສ້າງ ສາຍພົວພັນ ແລະ ການຮ່ວມມືອັນດີງາມ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ຈະເລີນງອກງາມ ຢ່າງບໍ່ຢຸດຢັ້ງ ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ໃນຂົງເຂດວຽກງານການທ່ອງທ່ຽວ, ວັດທະນະທຳ ແລະ ກິລາ ໃຫ້ນັບມື້ແໜ້ນແຟ້ນ ແລະ ຂະຫຍາຍຕົວ ທັງລວງເລິກ ແລະ ລວງກວ້າງ ຢ່າງຕໍ່ເນື່ອງ. ພ້ອມດຽວກັນນີ້, ທ່ານນາຍົກລັດຖະມົນຕີ ຍັງໄດ້ຕີລາຄາສູງ ຕໍ່ທ່າແຮງ, ບົດຮຽນ ແລະ ຜົນສຳເລັດ ໃນການຈັດຕັ້ງປະຕິບັດວຽກງານການທ່ອງທ່ຽວ, ການປົກປັກຮັກສາຮີດຄອງປະເພນີ ແລະ ມູນເຊື້ອອັນດີງາມ ຂອງ ສສ ຫວຽດນາມ ໃນຊຸມປີທີ່ຜ່ານມາ. ໃນຕອນທ້າຍ, ທ່ານນາຍົກລັດຖະມົນຕີ ຍັງໄດ້ກ່າວຂອບໃຈ ຜ່ານທ່ານ ຫງວຽນ ຫງອກ ຖຽນ ໄປຍັງທ່ານນາຍົກລັດຖະມົນຕີ ກໍ່ຄືລັດຖະບານ ແຫ່ງ ສສ ຫວຽດນາມ ທີ່ໄດ້ໃຫ້ການຊ່ວຍເຫຼືອ ສ້າງໂຮງຮຽນສິລະປະດົນຕີ, ລວມທັງ ໃຫ້ການປຶກສາຫາລື, ຖ່າຍທອດບົດຮຽນ ແລະ ປະສົບການຕ່າງໆ ໃນຂົງເຂດວຽກງານວັດທະນະທຳ, ກິລາ, ການທ່ອງທ່ຽວ ແລະ ອື່ນໆ ໃຫ້ແກ່ຝ່າຍ ສປປ ລາວ. ນອກຈາກນີ້, ທ່ານນາຍົກລັດຖະມົນຕີ ຍັງສະເໜີໃຫ້ຝ່າຍຫວຽດນາມ ສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວຕື່ມອີກ ໂດຍສະເພາະ ການສະໜັບສະໜູນ ເຮັດໃຫ້ປ່າສະຫງວນແຫ່ງຊາດ ຫີນໜາມໜໍ ໄດ້ເຂົ້າເປັນມໍລະດົກໂລກ ໄວຂຶ້ນ, ການສ້າງເງື່ອນໄຂໃຫ້ນັກທ່ອງທ່ຽວ ມາທ່ອງທ່ຽວ ສປປ ລາວ ຫຼາຍຂຶ້ນ, ການພັດທະນາວຽກງານກິລາ ແລະ ອື່ນໆ.

​ໃນໂອກາດດຽວກັນ, ທ່ານ ຫງວຽນ ຫງອກ ຖຽນ ກໍ່ໄດ້ສະແດງຄວາມຂອບໃຈ ຢ່າງຈິງໃຈ ຕໍ່ການເສຍສະຫຼະເວລາ ໃຫ້ການຕ້ອນຮັບ ຂອງທ່ານນາຍົກລັດຖະມົນຕີ ແຫ່ງ ສປປ ລາວ ໃນຄັ້ງນີ້, ພ້ອມທັງ ນຳສະເໜີໃຫ້ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ຮັບຊາບຕື່ມ ກ່ຽວກັບຜົນສຳເລັດອັນພົ້ນເດັ່ນ ໃນການຈັດຕັ້ງປະຕິບັດວຽກງານການທ່ອງທ່ຽວ, ວຽກງານດ້ານວັດທະນະທຳ ແລະ ວຽກງານກິລາ ຂອງ ສສ ຫວຽດນາມ ໃນຊຸມປີຜ່ານມາ. ນອກນີ້ ກໍ່ຍັງແຈ້ງໃຫ້ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ຮັບຊາບຕື່ມ ກ່ຽວກັບຈຸດປະສົງ ແລະ ຜົນສຳເລັດ ໃນການເຄື່ອນໄຫວເຮັດວຽກ ຮ່ວມກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໃນຄັ້ງນີ້, ລວມທັງ ແຜນການຈະເດີນທາງໄປເຄື່ອນໄຫວວຽກງານກິລາຊີເກມ ​ຂອງທ່ານເອງ ທີ່ປະເທດຟີລິບປິນເປັນເຈົ້າພາບ ໃນປີນີ້, ພ້ອມກັນນັ້ນ, ສສ ຫວຽດນາມ ກໍ່ຈະໄດ້ຮັບກຽດເປັນເຈົ້າພາບ ກິລາຊີເກມ ໃນປີ 2021.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ