ສປປ ລາວ ແລະ ສ.ເກົາຫຼີ ຈະສືບຕໍ່ເພີ່ມທະວີການຮ່ວມມື

ຜູ້ຂຽນ: ກົມປະຊາສຳພັນ, ຫສນຍ

ວັນພຸດ, 04 ທ.ວ 2019 17:00

​​​​​​ໃນວັນທີ 26 ພະຈິກ 2019, ໃນໂອກາດເຂົ້າຮ່ວມກອງປະຊຸມພິເສດ ອາຊຽນ-ສ.ເກົາຫຼີ ທີ່ ນະຄອນປູຊານ, ສ.ເກົາຫຼີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມພົບປະສອງຝ່າຍ ກັບ ທ່ານ ມູນ ແຈ ອິນ, ປະທານາທິບໍດີ ແຫ່ງ ສ.ເກົາຫຼີ.

ການພົບປະຄັ້ງນີ້ ສອງຝ່າຍໄດ້ຕີລາຄາສູງ ແລະ ທົບທວນຄືນການພົວພັນມິດຕະພາບ ແລະ ການພົວພັນຮ່ວມມືໃນໄລຍະຜ່ານມາ ໂດຍສະເພາະແມ່ນການຈັດຕັ້ງປະຕິບັດຜົນການຢ້ຽມຢາມ ສປປ ລາວ ຂອງ  ທ່ານ ມູນ ແຈ ອິນ ໃນເດືອນກັນຍາ ທີ່ຜ່ານມາ, ສອງຝ່າຍໄດ້ປຶກສາແລກປ່ຽນ ກ່ຽວກັບການເສີມຂະຫຍາຍການຮ່ວມມືສອງຝ່າຍຂອງຂະແໜງການຕ່າງໆ ໃຫ້ກ້າວສູ່ລວງເລິກຫຼາຍຂື້ນ ເປັນຕົ້ນ ແມ່ນການຮ່ວມມືທາງດ້ານການເຊື່ອມຈອດ ດ້ານການສ້າງພື້ນຖານໂຄງລ່າງ, ດ້ານການສຶກສາ, ສາທາລະນະສຸກ, ການລົງທຶນ, ການທ່ອງທ່ຽວ, ການສະໜັບສະໜູນຊ່ວຍເຫຼືອ ໃນການສົ່ງເສີມວິສາຫະກິດນ້ອຍ ແລະ ຂະໜາດກາງ (SMEs) ແລະ ການປະກອບການທຸລະກິດໃໝ່ (Start up Business). ນອກຈາກນີ້ ສອງຝ່າຍຍັງໄດ້ປຶກສາຫາລື ກ່ຽວກັບການຈັດຕັ້ງສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ.ເກົາຫຼີ ຄົບຮອບ 25 ປີ ເຊິ່ງຈະມີຂຶ້ນໃນປີ 2020 ນີ້. ພ້ອມກັນນີ້, ສອງຝ່າຍຍັງໄດ້ແລກປ່ຽນກ່ຽວກັບການຮ່ວມມືໃນພາກພື້ນ ແລະ ສາກົນ ຕື່ມອີກ. ໃນໂອກາດດຽວກັນນີ້, ທ່ານ ທອງລຸນ ສີສຸລິດ ແລະ ທ່ານ ມູນ ແຈ ອິນ ຍັງໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມບົດບັນທຶກຄວາມເຂົ້າໃຈ 03 ສະບັບ ຄື: ການຮ່ວມມືດ້ານລະບົບຂໍ້ມູນ ການຄຸ້ມຄອງບໍລິຫານທ່າເຮືອ, ການຮ່ວມມືດ້ານສິດ ທາງດ້ານຊັບສິນທາງປັນຍາ ແລະ ການຮ່ວມມືດ້ານວິຊາການ ແລະ ວິຊາຊີບ.
​​​​​​ໃນຕອນທ້າຍ, ທ່ານ ມູນ ແຈ ອິນ ກໍ່ໄດ້ສະແດງຄວາມຂອບໃຈ ຕໍ່ການເດີນທາງເຂົ້າຮ່ວມ ກອງປະຊຸມສຸດຍອດພິເສດອາຊຽນ-ສ.ເກົາຫຼີ ຂອງຄະນະຜູ້ແທນ ສປປ ລາວ ຄັ້ງນີ້, ພ້ອມທັງ ສະແດງຄວາມຍິນດີ ໃນການສືບຕໍ່ເສີມຂະຫຍາຍ ສາຍພົວພັນມິດຕະພາບ ລະຫວ່າງ 2 ປະເທດ ກໍ່ຄື 2 ພາກພື້ນ ຕາມນະໂຍບາຍໃໝ່ຫັນສູ່ທິດໃຕ້ (New Southern Policy) ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ ສ.ເກົາຫຼີ-ລາວ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ