ຮອງນາຍົກລັດຖະມົນຕີ ລົງຊຸກຍູ້ວຽກງານດ້ານເສດຖະກິດ ຢູ່ແຂວງບໍລິຄຳໄຊ

ຜູ້ຂຽນ: ກົມປະຊາສຳພັນ, ຫສນຍ

ວັນຈັນ, 07 ຕ.ລ 2019 10:00

ໃນວັນທີ 4 ຕຸລາ 2019 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວ ຊຸກຍູ້ວຽກງານດ້ານເສດຖະກິດ-ສັງຄົມ ຢູ່ແຂວງບໍລິຄຳໄຊ, ໂດຍມີ ທ່ານ ກອງແກ້ວ ໄຊສົງຄາມ, ເຈົ້າແຂວງບໍລິຄຳໄຊ ພ້ອມດ້ວຍຄະນະນຳຂອງແຂວງ ໃຫ້ການຕ້ອນຮັບ.

ທ່ານ ກອງແກ້ວ ໄຊສົງຄາມ ໄດ້ຂຶ້ນລາຍງານສະພາບການໂດຍຫຍໍ້ ກ່ຽວກັບວຽກງານທີ່ພົ້ນເດັ່ນໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 9 ເດືອນຕົ້ນປີ ແລະ ທິດທາງແຜນການ 3 ເດືອນທ້າຍປີ, ໂດຍລວມແລ້ວ ໃນໄລຍະຜ່ານມາ ແຂວງບໍລິຄຳໄຊ ມີສະຖຽນລະພາບ ທາງດ້ານການເມືອງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ຊີວິດການເປັນຢູ່ຂອງພະນັກງານ-ລັດຖະກອນ, ທະຫານ, ຕຳຫລວດ ຕະຫຼອດຮອດປະຊາຊົນບັນດາເຜົ່າ ໄດ້ຮັບການປັບປຸງ ນັບມື້ນັບດີຂຶ້ນ, ຄວາມທຸກຍາກນັບມື້ຫຼຸດລົງເທື່ອລະກ້າວ, ອັນພົ້ນເດັ່ນ ເສດຖະກິດຂອງແຂວງ ມີການຂະຫຍາຍຕົວຢ່າງຕໍ່ເນື່ອງ, ໃນປີ 2019 ໄດ້ຮັບອະນຸມັດງົບປະມານການລົງທຶນທັງໝົດ 59,129 ຕື້ກີບ, ເພື່ອຈັດຊໍາລະໃຫ້ 321 ໂຄງການ, ໃນໄລຍະ 9 ເດືອນຜ່ານມາ ໄດ້ຈັດຊໍາລະໂຄງການໄດ້ 208 ໂຄງການ, ມູນຄ່າ 45 ຕື້ກີບ, ອອກອະນຸຍາດໃຫ້ນັກລົງທຶນພາຍໃນ ແລະ ຕ່າງປະເທດ ເຂົ້າມາລົງທຶນໃນກິດຈະການຕ່າງໆ ທັງໝົດ 61 ໂຄງການ, ມູນຄ່າ 1,345 ຕື້ກີບ ໃນນີ້ ກິດຈະການທົ່ວໄປ 48 ຫົວໜ່ວຍ ມູນຄ່າ 359.3 ຕື້ກີບ. ຄຽງຄູ່ກັນນັ້ນ, ວຽກງານກະສິກໍາ ກໍໄດ້ຮັບຜົນສຳເລັດໃນຫຼາຍດ້ານ ເປັນຕົ້ນ ເນື້ອທີ່ທໍາການຜະລິດເຂົ້ານາແຊງ ປະຕິບັດໄດ້ 1.357 ຮຕ, ເທົ່າກັບ 43,95%, ພ້ອມນັ້ນ ກໍ່ໄດ້ຄຸ້ມຄອງລາຄາສິນຄ້າຢ່າງເປັັນປົກກະຕິ, ຕົວເລກຈໍລະຈອນຂາຍຍົກ 444,83 ຕື້ກີບ, ຂາຍຍ່ອຍ 472,23 ຕື້ກີບ ເທົ່າກັບ 47,25%, ມູນຄ່າເກັບຊື້ຜະລິດຕະພັນພາຍໃນ 220,60 ຕື້ກີບ, ສິນຄ້ານໍາເຂົ້າ 156,37 ລ້ານໂດລາ ຫລຸດລົງ 31%, ສິນຄ້າຜ່ານແດນ 4,22 ລ້ານໂດລາ ຫລຸດລົງ 65%, ຂາດດຸນການຄ້າ 127,12 ລ້ານໂດລາ. ສຳລັບ ທິດທາງ-ແຜນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ 3 ເດືອນ ທ້າຍປີ 2019 ແຂວງບໍລິຄໍາໄຊ ໄດ້ກໍານົດວຽກຈຸດສຸມທີ່ສໍາຄັນຫຼາຍດ້ານ ເປັນຕົ້ນ ສືບຕໍ່ຈັດຕັ້ງປະຕິບັດບັນດາຄາດໝາຍຂອງແຜນພັດທະນາເສດຖະກິດ-ສັງຄົມທີ່ຍັງເຫລືອ ໃຫ້ສຳເລັດ, ຄວບຄຸມ ແລະ ປ້ອງກັນ ການລະບາດຂອງຜະຍາດອະຫິວາໝູອາຝຣິກກາ ຢ່າງແຂງແຮງ, ສຸມໃສ່ແກ້ໄຂການລະບາດໃນ 3 ເມືອງຄື: ເມືອງວຽງທອງ, ບໍລິຄັນ ແລະ ເມືອງຄໍາເກີດ, ຊຸກຍູ້ ແລະ ແກ້ໄຂຢ່າງເລັ່ງດ່ວນ ໄພແຫ້ງແລ້ງໃນການຜະລິດລະດູຝົນ ເພື່ອຮັບປະກັນແຜນງານຄໍ້າສະບຽງອາຫານ ທີ່ແຂວງໄດ້ຕັ້ງເປົ້າໄວ້ໃນປີ 2019 ຕາມມາດຕະການທີ່ຈໍາເປັນຕ່າງໆທີ່ພະແນກກະສິກໍາ ແລະ ປ່າໄມ້ ໄດ້ກໍານົດໄວ້ ແລະ ອື່ນໆ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດ ທີ່ແຂວງບໍລິຄຳໄຊ ສາມາດຍາດມາໄດ້ ເຮັດໃຫ້ມີຫຼາຍດ້ານມີຄວາມຄືບໜ້າເປັນຢ່າງດີ ເປັນຕົ້ນ ເສດຖະກິດຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ພ້ອມທັງ ເນັ້ນໃຫ້ຄະນະພັກ, ຄະນະນຳ ຂອງແຂວງ ສືບຕໍ່ເອົາໃຈໃສ່ບາງບັນຫາຕື່ມ ເປັນຕົ້ນ ໃຫ້ສືບຕໍ່ເອົາໃຈໃສ່ຍູ້ແຮງການລົງທຶນພາຍໃນ ແລະ ຕ່າງປະເທດ ໃຫ້ເຂົ້າມາລົງທຶນ ຢູ່ແຂວງ ໃຫ້ຫຼາຍຂຶ້ນ ແລະ ເພີ່ມທະວີ ອຳນວຍຄວາມສະດວກໃນທຸກດ້ານ, ສູ້ຊົນເກັບລາຍຮັບເຂົ້າງົບປະມານ ໃຫ້ບັນລຸຕາມແຜນການ ແລະ ຊຸກຍູ້ ການຜະລິດກະສິກຳ ຕາມທ່າແຮງຂອງທ້ອງຖິ່ນ, ໃຫ້ສຸມໃສ່ປະຕິບັດບັນດາຄຳສັ່ງ-ຄຳເນາະນຳ ຂອງລັດຖະບານ ເປັນຕົ້ນຄຳສັ່ງວ່າດ້ວຍການປະຕິບັດ 8 ມາດຕະການຊຸກຍູ້ເສດຖະກິດ, ຄຸ້ມຄອງການລົງທຶນຂອງພາກລັດ ແລະ ພາກເອກະຊົນ ທັງພາຍໃນ ແລະ ຕ່າງປະເທດ ໃຫ້ເຂັ້ມງວດ, ປັບປຸງລະບຽບການ ແລະ ກົນໄກການປະສານງານລະບົບປະຕູດຽວ ເພື່ອຮັບປະກັນຄວາມໂປ່ງໃສ ແລະ ວ່ອງໄວ. ຄູ່ກັນນັ້ນ, ກໍໃຫ້ສືບຕໍ່ເອົາໃຈໃສ່ເຮັດວຽກປ້ອງກັນຊາດ-ປ້ອງກັນຄວາມສະຫງົບ ຢ່າງແຂງແຮງ, ຮັບປະກັນໃຫ້ທົ່ວແຂວງ ສືບຕໍ່ມີຄວາມສະຫງົບ ແລະ ປອດໄພ; ເອົາໃຈໃສ່ ຍົກສູງຄຸນນະພາບການສຶກສາ, ການບໍລິການ ດ້ານສາທາລະນະສຸກ ໃຫ້ມີຄຸນນະພາບສູງ ແລະ ທັນສະໄໝຂຶ້ນກວ່າເກົ່າ, ສືບຕໍ່ພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນ ໂດຍຕິດພັນກັບ ຂະບວນການແຂ່ງຂັນ ຮັກຊາດ ແລະ ພັດທະນາ ໃຫ້ເປັນຂະບວນການກວ້າງຂວາງ ແລະ ອື່ນໆ. 
​ໂອກາດດຽວກັນ ທ່ານ ສອນໄຊ ສີພັນດອນ ຍັງໄດ້ນຳເອົາເງິນ ຈຳນວນ 100 ລ້ານກີບ ມອບໃຫ້ ແຂວງບໍລິຄຳໄຊ ເພື່ອນຳໄປໝູນໃຊ້ເຂົ້າໃນວຽກງານຕ່າງໆ ໂດຍສະເພາະວຽກງານຕ້ານ ແລະ ຄວບຄຸມໄພພິບັດ ພາຍໃນແຂວງ ໃຫ້ປະສົບຜົນສຳເລັດ ແລະ ເກີດດອກອອກຜົນຍິ່ງໆຂຶ້ນ. 

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ