ຮອງນາຍົກລັດຖະມົນຕີ ລົງເຄື່ອນໄຫວເຮັດວຽກ ຢູ່ເມືອງໜອງບົກ ແຂວງຄຳມ່ວນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 02 ຕ.ລ 2019 10:00

​ໃນວັນທີ 1 ຕຸລາ 2019 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກ ແລະ ຢ້ຽມຢາມ ປະຊາຊົນທີ່ໄດ້ຮັບຜົນກະທົບ ຈາກໄພນ້ຳຖ້ວມ ຢູ່ເມືອງໜອງບົກ ແຂວງຄຳມ່ວນ ໂດຍໄດ້ຮັບການຕ້ອນຮັບ ຈາກທ່ານ ສິນທະສອນ ມະໂຫໂຄດ ເຈົ້າເມືອງເມືອງໜອງບົກ ພ້ອມດ້ວຍຄະນະ.

ໃນການລົງເຄື່ອນໄຫ​ວ ຢ້ຽມຢາມໃນຄັ້ງນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ນຳເອົາເຄື່ອງອຸປະໂພກ, ບໍລິໂພກ ເປັນຕົ້ນ ເຂົ້າສານ, ນ້ຳດື່ມ, ປ່ອງປາ ແລະ ອື່ນໆ ລວມມູນຄ່າທັງໝົດ 50 ລ້ານກວ່າກີບ ມາມອບໃຫ້ຫ້ອງການປົກຄອງເມືອງໜອງບົກ ເພື່ອນຳໄປມອບຕໍ່ໃຫ້ແກ່ປະຊາຊົນ ທີ່ໄດ້ຮັບຜົນກະທົບ ຈາກໄພນ້ຳຖ້ວມ ຢ່າງທົ່ວເຖິງ, ພ້ອມດຽວກັນນັ້ນ, ທ່ານຮອງນາຍົກ ພ້ອມດ້ວຍຄະນະ ຍັງໄດ້ລົງຢ້ຽມຢາມ ພື້ນທີ່ກະສິກຳ, ຄອງຊົນລະປະທານ ເພື່ອຊອກຫາຊ່ອງທາງໃນການແກ້ໄຂ ໃນສະເພາະໜ້າ ແລະ ຍາວນານ, ພ້ອມນັ້ນ, ຍັງໄດ້ລົງຢ້ຽມຢາມປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ, ພ້ອມທັງ ເນັ້ນໃຫ້ປະຊາຊົນ ໃຫ້ເອົາໃຈໃສ່ເຝົ້າລະວັງ ເບິ່ງແຍງສຸຂະພາບຂອງຕົນເອງໃຫ້ດີ ແລະ ໃຫ້ມີສ່ວນຮ່ວມ ກັບ ອຳນາດການປົກຄອງບ້ານ, ເມືອງ ໃນການອານາໄມບ້ານເຮືອນ, ພື້ນຟູພື້ນທີ່ ທີີ່ໄດ້ຮັບຜົນກະທົບ ເປັນຕົ້ນ ເນື້ອທີ່ການຜະລິດກະສິກຳ ແລະ ອື່ນໆ ໃຫ້ກັບຄືນ ສູ່ສະພາບປົກກະຕິ ໂດຍໄວ.​
ອີງຕາມບົດລາຍງານຂອງເມືອງໜອງບົກ ໃຫ້ຮູ້ວ່າ: ເມືອງໜອງບົກ ມີ 55 ບ້ານ, ມີ 10 ພັນກວ່າຫຼັງຄາເຮືອນ, ມີ 9 ພັນກວ່າຄອບຄົວ, ມີ 52 ພັນກວ່າຄົນ,  ມີເນື້ອທີ່ນາ 15 ພັນກວ່າເຮັກຕາ, ສວນ 500 ກວ່າເຮັກຕາ ໃນນັ້ນ, ເນື້ອທີ່ນາຖືກນ້ຳຖ້ວມເສຍຫາຍ 5 ພັນກວ່າເຮັກຕາ, ມີ 51 ບ້ານ, 3 ພັນກວ່າຄອບຄົວ, ຜົນເສຍຫາຍ 20.800 ກວ່າໂຕນ ລວມມູນຄ່າຜົນເສຍຫາຍທັງໝົດ 78 ຕື້ກວ່າກີບ, ໂຮງຮຽນໄດ້ຮັບຜົນເສຍຫາຍ 4 ແຫ່ງ, ນ້ຳບາດານ 173 ແຫ່ງ, ວິດຖ່າຍ 148 ໜ່ວຍ, ເສັ້ນທາງ 11 ເສັ້ນ. ບະຈຸບັນ ອຳນາດການປົກຄອງແຂວງ ກໍຄື ເມືອງໜອງບົກ ພວມເລັ່ງປັບປຸງແກ້ໄຂ ຢ່າງຮີບດ່ວນ ເພື່ອໃຫ້ກັບຄືນສູ່ສະພາບປົກກະຕິໂດຍໄວ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ