ທ່ານນາຍົກລັດຖະມົນຕີ ເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ແຂວງສະຫວັນນະເຂດ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພຸດ, 14 ສ.ຫ 2019 11:00

​​ໃນຕອນເຊົ້າວັນທີ 14 ສິງຫາ 2019 ທ່ານ ທອງລຸນ ສີສຸລິດ, ນາຍົກລັດຖະມົນຕີ, ພອ້ມດວ້ຍ ທ່ານ ລັດຖະມົນຕີ  ແລະ ຮອງລັດຖະມົນຕີ ກະຊວງກ່ຽວຂ້ອງ ໄດ້ໄປເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ແຂວງສະຫວັນນະເຂດ ໂດຍມີທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ.
                            
​ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມບ້ານຄຳປາແໜ, ເມືອງຈຳພອນ ຊຶ່ງເປັນບ້ານພັດທະນາຊົນນະບົດ ແລະ ລຶບລ້າງຄວາມທຸກຍາກ ຊຶ່ງເປັນໂຄງການແບບມີສ່ວນຮ່ວມ ຈັດຕັ້ງປະຕິບັດ ໂດຍທ່ານ ເກຍ ອຸ່ສິດທິເດດ ເຈົ້າຂອງໂຮງງານນ້ຳດື່ມ-ນ້ຳກ້ອນ ໂລມາຄຳ  ນັບແຕ່ປີ 2015 ຫາປີ 2018 ມີມູນຄ່າທັງໝົດ 22 ຕື້ກວ່າກີບ ໃນນັ້ນທຶນຂອງໂຮງງານນ້ຳດື່ມ-ນ້ຳກ້ອນ ໂລມາຄຳ 67%, ງົບປະມານຂອງລັດ 9%, ທຶນຊ່ວຍເຫຼືອຈາກສາກົນ 13% ແລະ ທຶນຈາກບັນດາບໍລິສັດ ແລະ ພາກສ່ວນຕ່າງໆ 11%. ຜ່ານການຈັດຕັ້ງປະຕິບັດ ໂຄງການລຶບລ້າງຄວາມທຸກຍາກບ້ານຄຳປ່າແໜ ແລະ ບ້ານປ່າກ້ວຍເຫັນວ່າ ປະຊາຊົນຈຳນວນ 77 ຄອບຄົວເປົ້າໝາຍ ສາມາດບັນລຸໄດ້ຈຳນວນໜຶ່ງ. ໂຄງການນີ້ ໄດ້ມອບໂອນໃຫ້ແກ່ອົງການປົກຄອງບ້ານ ສືບຕໍ່ ໃນເດືອນເມສາ 2019. ໃນໂອກາດນີ້ ທ່ານ ເຈົ້າເມືອງໄດ້ລາຍງານ ສະພາບການຊີ້ນຳ-ນຳພາ ແລະ ແຜນການສືບຕໍ່ສ້າງບ້ານຄຳປາແໜ ແລະ ບ້ານປ່າກ້ວຍ ໃຫ້ກາຍເປັນບ້ານພົ້ນທຸກ. ທ່ານ ນາຍົກລັດຖະມົນຕີ ໄດ້ສະແດງຄວາມດີໃຈ ທີ່ໄດ້ມາຢ້ຽມຢາມບ້ານ ຄຳປາແໜ, ຊົມເຊີນ ທ່ານ ເກຍ ອູ່ສິດທິເດດ ທີ່ເປັນນັກພັດທະນາດີເດັ່ນ ແລະ ຊົມເຊີຍ ປະຊາຊົນທີ່ຕັດສິນໃຈ ໃຫ້ການຮ່ວມມືເປັນຢ່າງດີ ແລະ ເຂົ້າຮ່ວມໂຄງການ ຊຶ່ງເປັນການປະຕິບັດຕາມນະໂຍບາຍ ຂອງລັດຖະບານ ໃນການ​ລຶບລ້າງຄວາມທຸກຍາກ, ເຫັນວ່າ ບ້ານຄຳປາແໜມີຊື່ສຽງໃນທາງບວກຫຼາຍຂຶ້ນ, ເປັນບ້ານທີ່ເປັນນຕົວແບບໃນການ ຫັນການດຳລົງຊີວິດ, ຫັນປ່ຽນວິທີການທຳມາຫາກິນ ແລະ ວິຖີຊີວິດແບບເກົ່າ ແບບເລື່ອນລອຍ ມາສູ່ແບບໃໝ່ ເຮັດການຜະລິດຄົງທີ່ ແລະ ໝັ້ນຄົງ, ການພັດທະນາບ້ານ ມີການຂະຫຍາຍຕົວຢ່າງແທ້ຈິງ. ທ່ານ ນາຍົກລັດຖະມົນຕີ ໄດ້ຊີ້ນຳໃຫ້ທຸກພາກສ່ວນ ສືບຕໍ່ພື້ນຖານທີ່ດີນີ້ ເພື່ອພັດທະນາບ້ານ ບ້ານຄຳປາແໜ ແລະ ບ້ານປ່າກ້ວຍ, ເດັດຂາດ ບໍ່ໃຫ້ຖອຍຫຼັງໄປສູ່ສະພາບເດີມ,  ຮຽກຮ້ອງ ໃຫ້ປະຊາຊົນ ປັບປ່ຽນວິທີທຳມາຫາກິນ ໃຫ້ກ້າວໜ້າ, ຫຼີກໄກຢາເສບຕິດ, ເຄົາລົບການຈັດຕັ້ງ, ໃຫ້ການຮ່ວມມື ແລະ ເຊື່ອໝັ້ນ ການຈັດຕັ້ງ ກໍ່ອົງການປົກຄອງທ້ອງຖິ່ນຂອງຕົນ ທີ່ຈະມາຊ່ວຍແນະນຳ ແລະ ນຳພາວິທີການທຳມາຫາກິນແບບໃໝ່ ທີ່ເໝາະສົມໃຫ້ແກ່ປະຊາຊົນ.​

​ຫຼັງຈາກນັ້ນ, ທ່ານ ນາຍົກລັດຖະມົນຕີ ແລະ ຄະນະໄດ້ເດີນທາງໄປຢ້ຽມຢາມ ເຂດເສດຖະກິດພິເສດສະຫວັນ-ເຊໂນ ເຂດ C (ສະຫວັນປັກ) ແລະ ທ່າບົກສະຫວັນນະເຂດ (Dry Port) ຊຶ່ງທ່ານ ນາຍົກລັດຖະມົນຕີ ໄດ້ຊີ້ນຳ ໃຫ້ຂະແໜງການກ່ຽວຂ້ອງ ຮີບຮ້ອນສ້າງລະບຽບການພາຍໃນ ເພື່ອຮັບປະກັນການຄຸ້ມຄອ ງເຂົ້າສູ່ລະບຽບການ ແລະ ດຶງດູດເອົາບໍລິສັດຂົນສົ່ງຕ່າງໆ ມາໃຫ້ຢູ່ຈຸດດຽວ, ມີເຈົ້າໜ້າທີ່ພາສີຢູ່ຈຸດດຽວ ເພື່ອສະດວກ ແລະ ຮັບປະກັນການ ເກັບພາສີຕ່າງໆ ໃຫ້ຄົບຖ້ວນ; ໃຫ້ເຂດເສດຖະກິດພິເສດ ເພີ່ມທະວີການດຶງດູດການລົງທຶນ ຂອງຕ່າງປະເທດເຂົ້າມາ ໃນເຂດໃຫ້ຫຼາຍຂຶ້ນ.
​ໃນເວລາຕໍ່ມາ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມໂຮງໝໍແຂວງສະຫວັນນະເຂດ ຊຶ່ງໄດ້ຮັບການສ້າງຕັ້ງຂຶ້ນໃນປີ 1920, ມີເນື້ອທີ່ທັງໝົດ 25.000 ມ2, ປະກອບມີ 200 ຕຽງ. ທ່ານ ຜູ້ອຳນວຍການໂຮງໝໍແຂວງ ໄດ້ລາຍງານກ່ຽວກັບການເຄື່ອນໄຫວຂອງໂຮງໝໍ ແລະ ສະພາບການແຜ່ລະບາດຂອງພະຍາດໄຂ້ຍຸງລາຍ ຊຶ່ງນັບຕັ້ງແຕ່ເດືອນ ມັງກອນ 2019 ມາຮອດປະຈຸບັນ, ທົ່ວແຂວງສະຫວັນນະເຂດ ມີຜູ້ຕິດເຊື້ອພະຍາດໄຂ້ຍຸງລາຍແລ້ວ 4.110 ຄົນ, ໃນນີ້ ໄດ້ມາປິ່ນປົວຢູ່ໂຮງໝໍແຂວງ 2.022 ຄົນ, (ເປັນເດັກນ້ອຍ 620 ຄົນ ແລະ ຜູ້ໃຫຍ່ 1.202 ຄົນ), ເສຍຊີວິດແລ້ວ 20 ຄົນ (ເດັກນ້ອຍ 11 ຄົນ ແລະ ຜູ້ໃຫຍ່ 9 ຄົນ). ພ້ອມນີ້, ທ່ານ ຫົວໜ້າພະແນກສາທາລະນະສຸກ ແຂວງສະຫວັນນະເຂດ ກໍ່ໄດ້ລາຍງານເພີ່ມຕື່ມກ່ຽວກັບ ວຽກງານສາທາລະນະສຸກຢູ່ແຂວງ ແລະ ການຈັດຕັ້ງປະຕິບັດ 10 ຕົວຊີິ້ວັດ ຊຶ່ງບາງຕົວຊີ້ວັດ ກໍ່ຍັງມີຄວາມທ້າທາຍທີ່ຈະ ບັນລຸຕາມແຜນ. ພາຍຫຼັງຮັບຟັງການລາຍງານ, ທ່ານ ລັດຖະມົນຕີ ກະຊວງສາທາລະນະສຸກ ກໍ່ໄດ້ອະທິບາຍຊີ້ແຈງ ບາງບັນຫາ ແລະ ຕອບຂໍ້ສະເໜີຂອງໂຮງໝໍແຂວງ ກໍ່ຄື ຂອງພະແນກສາທາລະນະສຸກ. ຫຼັງຈາກນັ້ນ ທ່ານ ນາຍົກລັດຖະມົນຕີ  ໄດ້ມີຄຳເຫັນ ຊົມເຊີຍ ໂຮງໝໍແຂວງ ແລະ ພະແນກສາທາລະນະສຸກ ກໍ່ຄື ພະນັກງານແພດໝໍ ພະຍາບານ ທີ່ເອົາໃຈໃສ່ແກ້ໄຂບັນຫາຫຍຸ້ງຍາກ ໂດຍສະເພາະການ ລະບາດຂອງພະຍາດໄຂ້ຍຸງລາຍ, ພ້ອມກັນນີ້ ກໍ່ໄດ້ຊີ້ນຳໃຫ້ເອົາໃຈໃສ່ປະຕິບັດ ຈັນຍາບັນຂອງແພດໝໍ ກໍ່ຄືຈັນຍາບັນ ຂອງພະນັກງານ-ລັດຖະກອນ, ປັບປຸງຄຸນນະພາບຂອງໂຮງໝໍ ແລະ ການບໍລິການໃຫ້ແກ່ປະຊາຊົນ; ສືບຕໍ່ເພີ່ມທະວີ ວຽກງານປ້ອງການລະບາດ ຂອງພະຍາດໄຂ້ຍຸງລາຍ ຖືເອົາການປ້ອງກັນແຕ່ຫົວທີ ເປັນສິ່ງສຳຄັນ ໂດຍສະເພາະການ ໂຄສະນາເຜີຍແຜ່, ການຮ່ວມມືກັບປະຊາຊົນ ໃນການທຳລາຍແຫຼ່ງໜອນນ້ຳຍຸງລາຍ, ໃຫ້ປຸກລະດົມນັກຮຽນແພດ ແລະ ຊາວໜຸ່ມອາສາສະໝັກ ໃຫ້ຊ່ວຍກັນ; ເຝົ້າລະວັງ ແລະ ປ້ອງກັນການລະບາດຂອງ ພະຍາດໄອໄກ່ ແລະ ປຸກລະດົມ ໃຫ້ປະຊາຊົນມາ ສັກຢາກັນພະຍາດ; ສູ້ຊົນຈັດຕັ້ງປະຕິບັດ 10 ຕົວຊີ້ວັດ ໃຫ້ໄດ້ຕາມຄາດໝາຍ ເພື່ອຮັບປະກັນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ (SDGs); ໃຫ້ຂະແໜງການກ່ຽວຂ້ອງ ເອົາໃຈໃສ່ ການຈ່າຍເງິນຍາມໃຫ້ແກ່ໂຮງໝໍ ແລະ ໃຫ້ຮີບຮ້ອນຄົ້ນຄວ້າ ກົນໄກການເບີກຈ່າຍ ໃຫ້ໄດ້ໄວຂຶ້ນ.

​ຫຼັງຈາກນັ້ນ ຢູ່ທີ່ຫ້ອງວ່າການປົກຄອງ ແຂວງສະຫວັນນະເຂດ, ທ່ານ ນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນຳ ຄະນະນຳ ແລະ ຄະນະປະຈຳພັກແຂວງ ໂດຍໄດ້ຊົມເຊີຍ ແຂວງສະຫວັນນະເຂດ ທີ່ເອົາໃຈໃສ່ພັດທະນາແຂວງ ມີຫຼາຍດ້ານມີຄວາມຄືບໜ້າດີ, ເອົາໃຈໃສ່ແກ້ໄຂປະກົດການຫຍໍ້ທໍ້ທາງສັງຄົມ, ຮັບປະກັນຄວາມສະຫງົບໄດ້ດີ, ພ້ອມນີ້ ໄດ້ຊີ້ນຳໃຫ້ແຂວງສືບຕໍ່ເອົາໃຈໃສ່ຍູ້ແຮງການລົງທຶນພາຍໃນ ແລະ ຕ່າງປະເທດ ໂດຍປະຕິບັດນະໂຍບາຍ 3 ເປີດ ຢ່າງແທ້ຈິງ, ວຽກງານພັດທະນາ ຊົນນະບົດ ແລະ ລຶບລ້າງຄວາມທຸກຍາກ ໂດຍເອົາຕົວແບບ ຂອງການພັດທະນາ ບ້ານຄຳປາແໜ ເປັນການຊຸກຍູ້ໃຫ້ເສດຖະກິດ ເຂົ້າໄປຊ່ວຍປະຊາຊົນຫຼາຍຂຶ້ນ, ຊຸກຍູ້ຂະບວນຮັກຊາດ-ພັດທະນາ, ປຸກລະດົມ ແລະ ດຶງດູດນັກທຸລະກິດລົງໄປ ຊ່ວຍປະຊາຊົນ; ເອົາໃຈໃສ່ການເກັບລາຍຮັບ ໂດຍການຈຳກັບການຮົ່ວໄຫຼ ແລະ ເກັບໃຫ້ຄົບຖ້ວນ; ຄຽງຄູ່ກັນນີ້ ກໍ່ເອົາໃຈໃສ່ດ້ານວັດທະນະທຳ ແລະ ສັງຄົມ ໂດຍສະເພາະການແກ້ໄຂສຸກເສີນ ບັນຫາການລະບາດ ຂອງພະຍາດໄຂ້ຍຸງລາຍ; ສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ ແລະ ຕິດຕາມຫາງສຽງສັງຄົມ ທີ່ຜ່ານສື່ສັງຄົມອອນລາຍ; ກະກຽມຮອບດ້ານໃຫ້ແກ່ ການເປີດກອງປະຊຸມໃຫຍ່ 3 ຂັ້ນຂອງແຂວງ ໂດຍສະເພາະ ຕ້ອງເອົາໃຈໃສ່ຍູ້ແຮງການສ້າງຂະບວນ, ວຽກງານບຸກຄະລາກອນ, ເພີ່ມທະວີຄວາມເປັນເອກະພາບ ພາຍໃນ ແລະ ກະກຽມຮັບມືກັບສິ່ງທ້າທາຍຕ່າງໆ. 

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ