ທ່ານນາຍົກລັດຖະມົນຕີ ໂອ້ລົມພະນັກງານຫຼັກແຫຼ່ງ ເມືອງຈອມເພັດ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອາທິດ, 14 ກ.ລ 2019 11:00

ໃນຕອນເຊົ້າ ວັນທີ 14 ກໍລະກົດ 2019 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ເຮັດວຽກ ຢູ່ເມືອງຈອມເພັດ, ແຂວງ ຫຼວງພະບາງ; ມີທ່ານ ຄຳຂັນ ຈັນທະວີສຸກ ເຈົ້າແຂວງໆ ຫຼວງພະບາງ ພ້ອມດ້ວຍຄະນະພັກ-ຄະນະນຳແຂວງ ກໍ່ຄື ອົງການປົກຄອງເມືອງຈອມເພັດ ໃຫ້ການຕ້ອນຮັບຢ່າງອົບອຸ່ນ.

ໃນໂອກາດນີ້, ຢູ່ທີ່ຫ້ອງປະຊຸມໃຫຍ່ຂອງເມືອງ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ຮັບຟັງການລາຍງານ ສະພາບການພັດທະນາ ເສດຖະກິດ-ສັງຄົມ ຂອງເມືອງ ຈາກທ່ານ ຈັນ ວັນນະສີ ເຈົ້າເມືອງໆຈອມເພັດ ເຫັນວ່າ: ຈອມເພັດ ເປັນເມືອງພູດອຍ ຕິດກັບນະຄອນຫຼວງພະບາງ ເມືອງມໍລະດົກໂລກ, ໃນນັ້ນ ມີຂອບເຂດມໍລະດົກໂລກ ກວມເອົາ 5 ບ້ານ, ມີແຫຼ່ງທ່ອງທ່ຽວທຳມະຊາດ ແລະ ວັດທະນະທຳ, ມີທາງຫຼວງແຫ່ງຊາດ ເລກທີ  4B ຜ່ານ ເພື່ອເຂົ້າສູ່ຈັງຫວັດນ່ານ ປະເທດໄທ, ມີເສັ້ນທາງລົດໄຟລາວ-ຈີນ ຜ່ານ 19 ກິໂລແມັດ, ເມືອງໄດ້ສຸມໃສ່ຂຸດຄົ້ນທ່າແຮງບົ່ມຊ້ອນຂອງຕົນ ເຂົ້າໃນການພັດທະນາ ໃຫ້ໄປຕາມຍຸດທະສາດ ການສ້າງເປັນເມືອງທ່ອງທ່ຽວ ແລະ ທາງຜ່ານ ໂດຍຖືເອົາການບໍລິການທ່ອງທ່ຽວ, ການຜະລິດສະບຽງອາຫານ ປ້ອນຕະຫຼາດຫຼວງພະບາງ. ຈາກທ່າແຮງທາງດ້ານທີ່ຕັ້ງ ແລະ ຈຸດພິເສດດັ່ງກ່າວ, ຈຶ່ງສາມາດເຮັດໃຫ້ເສດຖະກິດ ມີການຂະຫຍາຍຕົວຢ່າງຕໍ່ເນື່ອງ, ໃນ 6 ເດືອນຕົ້ນປີຜ່ານມາ ສາມາດເກັບລາຍຮັບ ເຂົ້າງົບປະມານພາຍໃນເມືອງ ໄດ້ 1.800 ລ້ານກວ່າກີບ ເທົ່າກັບ 48 % ຂອງແຜນການປີ, ການປູກເຂົ້າ ແລະ ພືດຕ່າງໆ ໄດ້ຮັບການຊຸກຍູ້ສົ່ງເສີມ ແລະ ເລີ່ມມີຄອບຄົວຕົວແບບ ປູກໝາກສົ້ມຂຽວ. ພ້ອມນີ້ ເມືອງໄດ້ຫັນເອົາຄະນະພັກ, ພະນັກງານ ວິຊາການຈຳນວນໜຶ່ງ ລົງປະຈຳຢູ່ຮາກຖານ ກຸ່ມບ້ານຈຸດສຸມ ເພື່ອຊີ້ນໍາ-ນໍາພາປະຊາຊົນ ໃນການປູກ-ການລ້ຽງ ສາມາດແກ້ໄຂຄວາມທຸກຍາກໄດ້ຕື່ມອີກ 2 ບ້ານ. ນອກຈາກນີ້, ລັດຖະບານ ຍັງໄດ້ຕົກລົງໃຫ້ສ້າງເຂດເສດຖະກິດພິເສດ ໃນເນື້ອທີ່ 3.850 ເຮັກຕາ, ກວມເອົາ 10 ບ້ານ, ປະຈຸບັນ ໄດ້ສຳຫຼວດວັດແທກຕອນດິນແລ້ວ 6 ບ້ານ, ມີເນື້ອທີ່ 1.694 ເຮັກຕາ.

ຫຼັງຈາກນັ້ນ, ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ການເອົາໃຈໃສ່ນຳພາ ຂອງຄະນະພັກ-ຄະນະນຳ, ພະນັກງານຫຼັກແຫຼ່ງ ກໍ່ຄື ອົງການປົກຄອງຂອງເມືອງຈອມເພັດ ແລະ ແຂວງຫຼວງພະບາງ ໃນການພັດທະນາເສດຖະກິດ-ສັງຄົມ ມີທ່າກ້າວດີຂຶ້ນ ແລະ ມີອັນພົ້ນເດັ່ນຫຼາຍດ້ານ ເຮັດໃຫ້ປະຊາຊົນ ມີຄວາມສາມັກຄີເປັນປຶກແຜ່ນ, ເຊື່ອໝັ້ນຕໍ່ການນຳພາຂອງພັກ ມີຄວາມອຸ່ນອຽນທຸ່ນທ່ຽງ, ພາຍໃນເມືອງ ມີຄວາມສະຫງົບ ເປັນພື້ນຖານເອື້ອອຳນວຍ ໃນການທຳການຜະລິດ ແລະ ທຸລະກິດ ປະກອບສ່ວນເຂົ້າໃນການພັດທະນາ ຂອງແຂວງ ກໍ່ຄືຂອງປະເທດ.  ໃນໂອກາດນີ້, ທ່ານ ນາຍົກລັດຖະມົນ ກໍ່ທິດຊີ້ນຳ ໂດຍໄດ້ເນັ້ນໜັກບາງບັນຫາສຳຄັນ ໃຫ້ຄະນະພັກຄະນະນຳແຂວງ ແລະ ເມືອງ ເພີ່ມທະວີຄວາມເອົາໃຈໃສ່ ເປັນຕົ້ນ:  ຕ້ອງຍົກສູງຄວາມຮັບຜິດຊອບຂອງຕົນ ຂຶ້ນຕື່ມ, ລົງເລິກຊີ້ນຳ ວຽກງານຕົວຈິງໃນແຕ່ລະຂົງເຂດ ໃຫ້ເລິກເຊິ່ງກວ່າເກົ່າ ເພື່ອຮັບປະກັນ ການຈັດຕັ້ງປະຕິບັດວຽກງານ ຢ່າງມີປະສິດທິຜົນ; ຍົກສູງຄວາມເປັນແບບຢ່າງ ແລະ ບົດບາດການນຳພາຂອງອົງຄະນະພັກເມືອງ ໃນການສຶກສາອົບຮົມ ທາງດ້ານການເມືອງແນວຄິດ ໃຫ້ພະນັກງານ-ລັດຖະກອນ ມີແນວຄິດອຸ່ນອ່ຽງທຸ່ນທ່ຽງ, ເຄົາລົບລະບຽບກົດໝາຍ ຢ່າງເຂັ້ມງວດ, ແກ້ໄຂບັນຫາພະຍາດອາຍາສິດ, ການສໍ້ລາດບັງຫຼວງ ແລະ ອື່ນໆ; ເອົາໃຈໃສ່ກະກຽມຄວາມພ້ອມດ້ານຕ່າງໆ ໃຫ້ແກ່ກອງປະຊຸມ 3 ຂັ້ນ,ໃຫ້ມີຄວາມໂປ່ງໃສ, ຫຼີກລ້ຽງການຫຼີ້ນພັກ-ຫຼີ້ນພວກ; ເພີ່ມທະວີເອົາໃຈໃສ່ປະຕິບັດຄາດໝາຍ ຕ່າງໆ ໃນການພັດທະນາເສດຖະກິດ-ສັງຄົມ ຂອງເມືອງ ເພື່ອປັບປຸງຊີວິດການເປັນຢູ່ຂອງປະຊາຊົນ ໃຫ້ຫຼຸດພົ້ນຈາກຄວາມທຸກຍາກ ເທື່ອເປັນກ້າວໆ; ຈັດຕັ້ງປະຕິບັດຂະບວນການແຂ່ງຂັນ ຮັກຊາດ-ພັດທະນາ ແລະ ການຊຸກຍູ້ນັກທຸລະກິດ ມີສ່ວນຮ່ວມໃນການພັດທະນາຊົນນະບົດ ແລະ ລຶບລ້າງ ຄວາມທຸກຍາກຫຼາຍຂຶ້ນ ໂດຍສະເພາະ ໃນການສົ່ງເສີມຜະລິດເປັນສິນຄ້າ ເພື່ອໃຫ້ປະຊາຊົນຮູ້ຫັນປ່ຽນວິທີທຳມາຫາກິນ ກ້າວສູ່ການຫັນປ່ຽນວິຖີຊີວິດອັນໃໝ່ ມີຄວາມອຸດົມສົມບູນ ຢູ່ດີກີນດີກ້າວສູ່ຄວາມຮັ່ງມີ, ເຮັດໃຫ້ປະຊາຊົນເປັນເຈົ້າຕົນເອງຫຼາຍຂຶ້ນ; ສຸມໃສ່ການເຝົ້າລະວັງ, ຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດຕາມລະດູການ ໂດຍສະເພາະ ພະຍາດໄຂ້ເລືອດອອກ, ການລະບາດຂອງພະຍາດໃນສັດ ລວມທັງ ພະຍາດອະຫິວາໝູອາຟຣິກາ, ສັດຕູພືດ ແລະ ອື່ນໆ; ກະກຽມຄວາມພ້ອມເພື່ອຮັບມື ແລະ ແກ້ໄຂ ໄພແຫ້ງແລ້ງທີ່ອາດຈະເກີດຂຶ້ນ ໃນປີນີ້; ເອົາໃຈໃສ່ເປັນພິເສດຂຸດຄົ້ນທ່າແຮງການທ່ອງທຽ່ວທາງທຳມະຊາດ ແລະ ວັດທະນະທຳ, ປັບປຸງແກ້ໄຂຂັ້ນຂອດ ທີຕິດພັນກັບການບໍລິການຂອງພາກລັດ, ການຄຸ້ມຄອງ ແລະ ຊຸກຍູ້ສົ່ງເສີມບັນດາຫົວໜ່ວຍທຸລະກິດ ການທອ່ງທຽ່ວ ໃຫ້ມີຫຼາຍຮູບແບບ ແລະ ປັບປຸງການບໍລິການຂອງຕົນໃຫ້ ມີຄຸນນະພາບ ເພື່ອສ້າງຄວາມປະທັບໃຈ ໃຫ້ແກ່ນັກທ່ອງທ່ຽວ; ສືບຕໍ່ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ຕ່າງໆ ພາຍໃນເມືອງຂອງຕົນ ເພື່ອຮັບປະກັນຄວາມສະຫງົບປອດໄພ ແລະ ເປັນພື້ນຖານເອື້ອອຳນວຍ ໃຫ້ແກ່ການພັດທະນາເສດຖະກິດ-ສັງຄົມ ແລະ ການສົ່ງເສີມການທ່ອງທ່ຽວ.
ໃນໂອກາດລົງມາເຄື່ອນໄຫວ ແລະ ເຮັດວຽກ ໃນຄັ້ງນີ້, ທ່ານນາຍົກລັດຖະມົນຕີ ໄດ້ມອບເງີນ ຈໍານວນ 100 ລ້ານກີບ ໃຫ້ແກ່ອົງການປົກຄອງ ເມືອງຈອມເພັດ ເພື່ອນໍາໃຊ້ເຂົ້າໃນການກໍ່ສ້າງ ແລະ ປັບປຸງໂຄງລ່າງ ທີ່ຈຳເປັນຂອງເມືອງ ຕື່ມອີກ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ