ທ່ານຮອງນາຍົກລັດຖະມົນຕີ ຢ້ຽມຢາມໂຮງງານຜະລິດແຮ່ຫາຍາກ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 15 ສ.ຫ 2019 12:00

​ໂດຍປະຕິບັດຕາມກົດໝາ ຍວ່າດ້ວຍການສົ່ງເສີມການລົງທຶນ ໂດຍສະເພາະການຄຸ້ມຄອງການລົງທຶນ ໃຫ້ເຂົ້າສູ່ລະບຽບກົດໝາຍ, ໃນຕອນບ່າຍ ຂອງວັນທີ 15 ສິງຫາ 2019 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ໂຮງງານຜະລິດແຮ່ຫາຍາກ ຂອງບໍລິສັດ ລາວຊຽງຈຽງ ແຣເອີດ ຢູ່ເຂດນິຄົມອຸດສາຫະກຳ ຫຼັກ 21, ບ້ານໂຄກສະອາດ, ເມືອງໄຊທານີ, ນະຄອນຫຼວງວຽງຈັນ ເພື່ອຮັບຟັງການລາຍງານ ແລະ ກວດກາເບິ່ງສະພາບຄວາມເປັນຈິງ ຂອງໂຮງງານ ເປັນຕົ້ນ ສະພາບທີ່ຕັ້ງ, ໂຄງສ້າງຂອງໂຮງງານ, ວັດຖຸອຸປະກອນຂອງໂຮງງານ, ວັດຖຸດິບຈຳນວນໜຶ່ງ ທີ່ນຳມາຈາກຕ່າງປະເທດ ເພື່ອຈະນຳມາທົດລອງຜະລິດ, ທັງນີ້ ກໍ່ເພື່ອເປັນຂໍ້ມູນ ໃຫ້ແກ່ການຄົ້ນຄວ້າພິຈາລະນາ ຊອກຫາທາງອອກທີ່ເໝາະສົມ ໃນການປັບປຸງແກ້ໄຂ ຫຼື ຫັນການລົງທຶນ ເປັນກິດຈະການອື່ນ.
 
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ມີຄຳເຫັນໂອ້ລົມ ຕໍ່ຜູ້ເຂົ້າຮ່ວມ, ໂດຍໄດ້ຊີ້ນຳ ໃຫ້ກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ ເປັນໃຈກາງ ປະສານສົມທົບກັບຂະແໜງການທີ່ກ່ຽວຂ້ອງ ແລະ ບໍລິສັດ ປຶກສາຫາລືກັນ ຄົ້ນຄວ້າ ລົງເລິກລາຍລະອຽດ ເພື່ອຊອກຫາວິທີການແກ້ໄຂ ທີ່ເໝາະສົມ ໂດຍສອດຄ່ອງ ກັບ ກົດໝາຍ ແລະ ລະບຽບການ ແລ້ວສະເໜີລັດຖະບານ ເພື່ອພິຈາລະນາ ແລະ ມີທິດຊີ້ນຳໃນຂັ້ນຕໍ່ໄປ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ