ທ່ານນາຍົກ ສືບຕໍ່ເຄື່ອນໄຫວໃຫ້ກຳລັງໃຈຜູ້ປະສົບໄພນໍ້າຖ້ວມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອາທິດ, 08 ກ.ຍ 2019 12:00

ດ້ວຍຄວາມເປັນຫ່ວງເປັນໄຍ ຕໍ່ຊີວິດການເປັນຢູ່ ຂອງປະຊາຊົນ ທີ່ກຳລັງປະສົບໄພນໍ້າຖ້ວມ, ໃນຕອນເຊົ້າ ຂອງວັນທີ 8 ກັນຍາ 2019 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ໄປຢ້ຽມຢາມ ແລະ ພົບປະໂອ້ລົມ ເພື່ອໃຫ້ກຳລັງໃຈ ແກ່ປະຊາຊົນ ທີ່ປະສົບໄພນໍ້າຖ້ວມ ຢູ່ຈຸດພັກຊົ່ວຄາວ ບ້ານປາກຊອນ, ເມືອງຊະນະສົມບູນ, ແຂວງຈໍາປາສັກ.
 
ໃນໂອກາດນີ້,ທ່ານ ສອນສະຫວັນ ສີວິໄລ ເຈົ້າເມືອງຊະນະສົມບູນ ໄດ້ລາຍງານຫຍໍ້ ກ່ຽວກັບ ສະພາບຜົນກະທົບ, ການແກ້ໄຂ ແລະ ຊ່ວຍເຫຼືອ ປະຊາຊົນທີ່ຖືກຜົນກະທົບ ຈາກໄພພິບັດນໍ້າຖ້ວມ ຢູ່ເມືອງຊະນະສົມບູນຄັ້ງນີ້ ໃຫ້ ທ່ານ ນາຍົກລັດຖະມົນຕີ ແລະ ຄະນະ ໄດ້ຮັບຊາບ, ຊຶ່ງເຫັນວ່າ: ບ້ານທີ່ຖືກນໍ້າຖ້ວມ ມີ 34 ບ້ານ, ມີ 10.984 ຄອບຄົວ, 36.381 ຄົນ, ຍິງ 17,162 ຄົນ ໄດ້ຮັບຜົນກະທົບ, ໃນນີ້ ມີປະຊາຊົນທີ່ຖືກຍົກຍ້າຍ 16 ບ້ານ, 1.857 ຄອບຄົວ, 27.216 ຄົນ; ເນື້ອທີ່ນາ 11.416 ເຮັກຕາ, ຊົນລະປະທານ 15 ແຫ່ງ, ສຸກສາລາ 5 ແຫ່ງ, ວັດ 30 ວັດ, ໂຮງຮຽນ 6 ແຫ່ງ, ໜອງປາ 170 ໜອງ, ງົວ 9.205 ໂຕ, ຄວາຍ 5.210 ໂຕ, ແບ້ 1.200 ກວ່າໂຕ, ໝູ 341 ໂຕ ແລະ ສັດປະເພດອື່ນໆຕື່ມອີກ; ເສັ້ນທາງເລກທີ່ 13 ເສຍຫາຍ 2 ຈຸດ, ມີຄວາມຍາວລວມ ປະມານ 700 ແມັດ.​
 
ຫຼັງຈາກນັ້ນ, ທ່ານນາຍົກລັດຖະມົນຕີ ກໍ່ໄດ້ມີຄຳເຫັນ ໂອ້ລົມຕໍ່ອົງການປົກຄອງທ້ອງຖິ່ນ ແລະ ປະຊາຊົນ ຜູ້ປະສົບໄພນໍ້າຖ້ວມ ທີ່ກຳລັງພັກເຊົາຊົ່ວຄາວ ຢູ່ຈຸດບ້ານປາກຊອນ, ໂດຍໄດ້ກ່າວຊົມເຊີຍ ຕໍ່ທຸກພາກສ່ວນ ທີ່ມີສ່ວນຮ່ວມ ໃນການຊ່ວຍເຫຼືອປະຊາຊົນ ທີ່ປະສົບໄພນໍ້າຖ້ວມໃນຄັ້ງນີ້ ສາມາດໄປຢູ່ໃນເຂດທີ່ປອດໄພ ໂດຍສະເພາະ ການອອກເຫື່ອເທແຮງ, ການປະກອບສ່ວນ ທາງດ້ານວັດຖຸປັດໃຈ, ເຄື່ອງອຸປະໂພກ-ບໍລິໂພກ, ເຄື່ອງໃຊ້ຂອງສອຍທີ່ຈຳເປັນ ເພື່ອຊ່ວຍເຫຼືອ ສຸກເສີນປະຊາຊົນ, ຊຶ່ງເຫັນວ່າ ການຊ່ວຍເຫຼືອດັ່ງກ່າວ ແມ່ນເຮັດໄດ້ດີ, ວ່ອງໄວ ແລະ ທັນການພໍສົມຄວນ, ສະແດງເຖິງຄວາມເອົາໃຈໃສ່ ຂອງອົງການປົກຄອງທຸກຂັ້ນ, ຄວາມຕື່ນຕົວ, ຄວາມມີນໍ້າໃຈອັນດີງາມ ແລະ ເສຍສະຫຼະສູງ, ຄວາມປຸ້ມລຸມ ສາມັກຄີຮັກແພງ ຊ່ວຍເຫຼືອເຊິ່ງກັນ ແລະ ກັນ ຂອງປະຊາຊົນຄົນລາວ, ບໍ່ປະປ່ອຍກັນ ໃນເວລາທີ່ພົບ ກັບ ຄວາມຫຍຸ້ງຍາກ ສັບສົນເຊັ່ນນີ້. ພ້ອມກັນນັ້ນ, ທ່ານນາຍົກ ຍັງໄດ້ຖາມເຖິງສະພາບຊີວິດ ການເປັນຢູ່ ຂອງປະຊາຊົນ ເປັນຕົ້ນ ການຢູ່-ພັກເຊົາ, ອາຫານການກິນ, ສຸຂະພາບ, ຄວາມຕ້ອງການອັນຈຳເປັນ, ການຊ່ວຍເຫຼືອ, ການແກ້ໄຂບັນຫາດ້ານຕ່າງໆ ແລະ ຮັບຟັງຂໍ້ສະເໜີ ຂອງປະຊາຊົນ. ຫຼັງຈາກນັ້ນ, ທ່ານນາຍົກ ລັດຖະມົນຕີ ໄດ້ມີຄຳເຫັນເນັ້ນໜັກ ໃຫ້ພາກສ່ວນກ່ຽວຂ້ອງ ເອົາໃຈໃສ່ຕໍ່ບາງບັນຫາຕື່ມ ເປັນຕົ້ນ ສືບຕໍ່ສະໜອງ ອາຫານການກິນ, ນໍ້າດື່ມ ແລະ ເຄື່ອງໃຊ້ທີ່ຈຳເປັນ ແກ່ປະຊາຊົນ ໃຫ້ພຽງພໍ ແລະ ທົ່ວເຖິງ; ເອົາໃຈໃສ່ເບິ່ງແຍງດູແລ ສຸຂະພາບຂອງປະຊາຊົນ ຢ່າງໃກ້ຊິດ ໂດຍສະເພາະ ຜູ້ເຖົ້າຜູ້ແກ່ ແລະ ເດັກນ້ອຍ, ຕິດພັນກັບການໃຫ້ ປ້ອງພະຍາດຕ່າງໆ ທີ່ອາດເກີດຂຶ້ນ, ເອົາໃຈໃສ່ຮັກສາອະນາໄມ ກິນ, ຢູ່, ດື່ມ ສະອາດ; ເອົາໃຈໃສ່ຕິດຕາມ ການແຈ້ງເຕືອນ ສະພາບດິນຟ້າອາກາດ ຢ່າງເປັນປົກກະຕິ; ປົກປັກຮັກສາວັດຖຸສິ່ງຂອງ ຂອງປະຊາຊົນ ບໍ່ໃຫ້ຕົກເຮ່ຍເສຍຫາຍ ຍ້ອນການສວຍໂອກາດ ຂອງຄົນບໍ່ດີ; ສືບຕໍ່ຮັກສາມູນເຊື້ອ ອັນດີງາມ ຊ່ວຍເຫຼືອເຊິ່ງກັນ ແລະ ກັນ, ເພີ່ມຄວາມອົດທົນພະຍາ ຍາມ ໃນການແກ້ໄຂບັນຫາຕ່າງໆ ທີ່ເກີດຂຶ້ນ; ກະກຽມແຜນຊ່ວຍເຫຼືອ ປະຊາຊົນ ພາຍຫຼັງນໍ້າບົກແຫ້ງ ເຮັດໃຫ້ການແກ້ໄຂໄພພິບັດນໍ້າຖ້ວມຄັ້ງນີ້ ສາມາດຜ່ານພົ້ນໄປດ້ວຍດີ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ