ສານຂອງທ່ານ ນາຍົກລັດຖະມົນຕີ, ເນື່ອງໃນໂອກາດ ວັນສາກົນຕ້ານຢາເສບຕິດ ຄົບຮອບ 32 ປີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 26 ມິ.ຖ 2019 11:00

​​                              
ພີ່ນ້ອງຮ່ວມຊາດ ທີ່ຮັກແພງ ທັງຫຼາຍ,
ຢາເສບຕິດ ເປັນໄພອັນຕະລາຍທີ່ຮ້າຍແຮງ ຕໍ່ຊາດ ກໍ່ຄື ຕໍ່ມວນມະນຸດ, ເປັນສາເຫດ ຂອງປະກົດການຫຍໍ້ທໍ້ຕ່າງໆ ໃນສັງຄົມ ເປັນຕົ້ນ : ການກໍ່ອາຊະຍາກໍາ, ການປຸ້ນຈີ້ຊີງຊັບ, ການຂີ້ລັກງັດແງະ, ການຫຼິ້ນກິນຟຸມເຟືອຍ ແລະ ອື່ນໆ ຕະຫຼອດຮອດ ການປະລະການຮຽນ ແລະ ການເຄື່ອນໄຫວ ຜິດລະບຽບກົດໝາຍ ຂອງຊາວໜຸ່ມ-ເຍົາວະຊົນ ທີ່ເປັນຜູ້ສືບທອດ ອະນາຄົດຂອງຊາດ ໃຫ້ກາຍເປັນຄົນເສຍທາດຂາດຄຸນ. ຢາເສບຕິດ ຍັງເປັນເຄື່ອງມື ຫຼື ຊ່ອງທາງ ໃຫ້ກຸ່ມຄົນບໍ່ດີ ສວຍໃຊ້ຫາເງິນ, ຟອກເງິນ ແລະ ຂະຫຍາຍ ເຄື່ອຂ່າຍການເຄື່ອນໄຫວ ທີ່ຜິດກົດໝາຍ ເຊິ່ງໄດ້ສ້າງຄວາມບໍ່ສະຫງົບ ໃຫ້ແກ່ສັງຄົມ ທັງເປັນການກົດໜ່ວງຖ່ວງດຶງ ການພັດທະນາ ເສດຖະກິດ-ສັງຄົມ ແລະ ສ້າງຄວາມເສຍຫາຍ ຢ່າງໃຫຍ່ຫຼວງ ຕໍ່ຊາດ ກໍ່ຄື ຕໍ່ບຸກຄົນ ແລະ ຄອບຄົວ ຜູ້ທີ່ຕົກເປັນທາດ ຂອງຢາເສບຕິດ.  ພັກ, ລັດຖະບານ ແລະ ປະຊາຊົນລາວ ກໍ່ຄື ປະຊາຊາດ ໃນທົ່ວໂລກ ລ້ວນແຕ່ເປັນເອກະພາບກັນ ສະກັດກັ້ນ, ຕ້ານ, ແລະ ແກ້ໄຂບັນຫາຢາເສບຕິດ ຢ່າງກວ້າງຂວາງທົ່ວໂລກ.
ຍ້ອນເຫັນໄດ້ ອັນຕະລາຍ ແລະ ຮັບຮູ້ວ່າ ບັນຫາຢາເສບຕິດ ຍັງເປັນໄພຄຸກຄາມ ຕໍ່ສັງຄົມລາວ ພັກ ແລະ ລັດຖະບານ ຈຶ່ງໄດ້ຖືເອົາ ການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເປັນວຽກງານສຳຄັນ. ລັດຖະບານ ໄດ້ປະກາດສົງຄາມ ຕ້ານກັບເຄື່ອຄ່າຍຄ້າຂາຍ ຢາເສບຕິດ, ໄດ້ຈັບກຸມຄຸມຄັງ ຫົວໂປ່ຕົວການຄ້າຂາຍຢາເສບຕິດ ລາຍໃຫຍ່ຈຳນວນໜຶ່ງ ແລະ ດຳເນີນຄະດີຕາມ ກົດໝາຍ ແລະ ລະບຽບການ. ຄຽງຄູ່ກັນນັ້ນ, ລັດຖະບານ ກໍ່ໄດ້ໂຄສະນະ, ສຶກສາອົບຮົມ ແລະ ສ້າງຈິດສຳນຶກ ໃຫ້ປະຊາຊົນ ແລະ ຊັ້ນຄົນຕ່າງໆ ເປັນຕົ້ນແມ່ນ ຊາວໜຸ່ມ-ເຍົາວະຊົນ ໃຫ້ຮັບຮູ້ ແລະ ເຂົ້າໃຈ ກວ້າງຂວາງ ກ່ຽວກັບພິດໄພ ແລະ ຜົນກະທົບ ຂອງຢາເສບຕິດ ພ້ອມທັງ ໄດ້ພົວພັນຮ່ວມມື ຢ່າງໃກ້ຊິດ ກັບ ບັນດາປະເທດເພື່ອນມິດ ໂດຍສະເພາະກັບ ປະເທດບ້ານໃກ້ເຮືອນຄຽງ ແລະ ອົງການຈັດຕັ້ງສາກົນ ທີ່ກ່ຽວຂ້ອງ ເພື່ອສະກັດກັ້ນ, ຕ້ານ ແລະ ແກ້ໄຂບັນຫາ ຢາເສບຕິດ ຢ່າງຈິງຈັງ.
ເນື່ອງໃນໂອກາດວັນສາກົນ ຕ້ານຢາເສບຕິດ ຄົບຮອບ 32 ປີ ໃນປີນີ້ ຕາງໜ້າໃຫ້ການນຳພັກ ແລະ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍສະແດງຄວາມຂອບໃຈ ແລະ ຊົມເຊີຍ ທຸກພາກສ່ວນທີ່ກ່ຽວຂ້ອງ, ໂດຍສະເພາະ ກໍ່ແມ່ນເຈົ້າໜ້າທີ່ ປ້ອງກັນຊາດ, ປ້ອງກັນຄວາມສະຫງົບ ແລະ ພະນັກງານ ຢູ່ຂັ້ນສູນກາງ ແລະ ທ້ອງຖິ່ນ ຕະຫຼອດຮອດ ພໍ່ແມ່ພີ່ນ້ອງ ປະຊາຊົນ ບັນດາຊັ້ນຄົນໃນທົ່ວປະເທດ   ທີ່ໄດ້ປະຕິບັດໜ້າທີ່ ທີ່ຫຍຸ້ງຍາກ-ສ່ຽງໄພນີ້ ແລະ ປະກອບສ່ວນຢ່າງຕັ້ງໜ້າ ເຂົ້າໃນວຽກງານສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ. ຂໍຖືໂອກາດນີ້ ສະ ແດງຄວາມຂອບໃຈ ແລະ ຮູ້ບຸນຄຸນ ມາຍັງບັນດາປະເທດເພື່ອນມິດ, ອົງການຈັດຕັ້ງສາກົນ, ສະຖາບັນການເງິນ ລະຫວ່າງປະເທດ, ອົງການບໍ່ສັງກັດ ລັດຖະບານ ແລະ ພາກທຸລະກິດ ທັງພາຍໃນ ແລະ ຕ່າງປະເທດ ທີ່ໄດ້ໃຫ້ການຮ່ວມມື, ສະໜັບສະໜູນ ແລະ ຊ່ວຍເຫຼືອລັດຖະບານ ແລະ ປະຊາຊົນລາວ  ໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເຮັດໃຫ້ການປະຕິບັດ ວຽກງານໃນດ້ານນີ້ ມີຄວາມຄືບໜ້າ ແລະ ໄດ້ຮັບໝາກຜົນ ເປັນຂັ້ນໆມາ.
ເພື່ອນຮ່ວມຊາດ ທີ່ ຮັກແພງ,
ເຖິງແມ່ນວ່າ ພັກ, ລັດຖະບານ, ປະຊາຊົນລາວບັນດາເຜົ່າ ແລະ ເພື່ອນມິດສາກົນ ທັງໃກ້ ແລະ ໄກ ຈະເປັນເອກະພາບ ກ່ຽວກັບພິດໄພ ແລະ ຜົນກະທົບຂອງຢາເສບຕິດ, ເຫັນໄດ້ຄວາມຈຳເປັນຕ້ອງໄດ້ສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ແລະ ກໍ່ໄດ້ພ້ອມກັນດຳເນີນ ວຽກງານດ້ານນີ້ຢ່າງຈິງຈັງ ແລະ ມີໝາກຜົນກໍ່ຕາມ, ແຕ່ບັນຫາຢາເສບຕິດ ຢູ່ປະເທດເຮົາ ກໍ່ຄື ຢູ່ປະເທດຕ່າງໆໃນໂລກ ກໍ່ຍັງບໍ່ໝົດສິ້ນໄປ ແລະ ຍັງຈະສືບຕໍ່ເປັນໄພຄຸກຄາມ ຕໍ່ຄວາມສະຫງົບ, ຈອບທຳລາຍຊາວໜຸ່ມ-ເຍົາວະຊົນ ແລະ ສ້າງຄວາມເສຍຫາຍແກ່ສັງຄົມ. ດັ່ງນັ້ນ, ໃນນາມລັດຖະບານ, ຂ້າພະເຈົ້າ ຂໍຮຽກຮ້ອງມາຍັງ ພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ທຸກຊັ້ນຄົນ, ທຸກເພດໄວ ໃນທົ່ວສັງຄົມ ຕະຫຼອດຮອດ ບັນດາອົງການຈັດຕັ້ງພັກ-ລັດ, ອົງການປົກຄອງທ້ອງຖິ່ນ, ສະຖາບັນການສຶກສາ, ອົງການພູດທະສາດສະໜາ ແລະ ສະຖາບັນຄອບຄົວ  ຈົ່ງໄດ້ພ້ອມກັນເອົາໃຈໃສ່ ເປັນເຈົ້າການ ແລະ ປະກອບສ່ວນ ຢ່າງແຂງແຮງ ເຂົ້າໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງ ແລະ ໝົດສິ້ນໄປຈາກສັງຄົມລາວ.
ຂ້າພະເຈົ້າ ຫວັງຢ່າງຍິ່ງວ່າ ບັນດາປະເທດເພື່ອນມິດ, ອົງການຈັດຕັ້ງສາກົນ, ສະຖາບັນການເງິນ ລະຫວ່າງປະເທດ, ອົງການທີ່ບໍ່ສັງກັດລັດຖະບານ ແລະ ພາກທຸລະກິດ ທັງພາຍໃນ ແລະ ຕ່າງປະເທດ ຈະສືບຕໍ່ໃຫ້ການຮ່ວມມື, ສະໜັບສະໜູນ ແລະ ຊ່ວຍເຫຼືອດ້ານທຶນຮອນ, ບົດຮຽນ ແລະ ປະສົບການ ແກ່ລັດຖະບານ ແລະ ປະຊາຊົນລາວ ກໍ່ຄື ອົງການທີ່ເຮັດໜ້າທີ່ ສະກັດກັ້ນ, ຕ້ານ ແລະ ແກ້ ໄຂບັນຫາຢາເສບຕິດ ເພື່ອໃຫ້ສາມາດເຄື່ອນໄຫວ ແລະ ແກ້ໄຂບັນຫາຢາເສບຕິດໄດ້ ຢ່າງມີປະສິດທິຜົນ ທັງປະກອບສ່ວນເຂົ້າ ໃນຂະບວນການລວມ ຂອງພາກພື້ນ ແລະ ສາກົນໃນການຕໍ່ສູ້, ສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ໃຫ້ສູນຫາຍ ຈາກໂລກທີ່ສວຍງາມ ຂອງພວກເຮົາ.
ຂໍຂອ​ບໃຈ

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ