ທ່ານຮອງນາຍົກລັດຖະມົນຕີ ເນັ້ນໜັກ 5 ດ້ານສຳຄັນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພຸດ, 06 ມິ.ນ 2019 14:00

​​ໃນຕອນບ່າຍ ຂອງວັນທີ 5 ມີນາ 2019 ທີ່ສະຖາບັນຄົ້ນຄວ້າກະສິກຳ ແລະ ປ່າໄມ້ (ດົງໂດກ), ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມໂອ້ລົມ ແລະ ຊີ້ນຳ ຕໍ່ກອງປະຊຸມສະຫຼຸບຕີລາຄາ ວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປະຈຳປີ 2018 ແລະ ທິດທາງແຜນການ ປະຈຳປີ 2019 ທີ່ດຳເນີນພາຍໃຕ້ການເປັນປະທານ ຂອງທ່ານ ລຽນ ທິແກ້ວ, ລັດຖະມົນຕີ ກະຊວງກະສິກຳ ແລະ ປ່າໄມ້, ໂດຍມີບັນດາທ່ານ ຮອງລັດຖະມົນຕີກະຊວງກະສິກຳ ແລະ ປ່າໄມ້, ຮອງເຈົ້າແຂວງ, ຫົວໜ້າພະແນກກະສິກຳ ແລະ ປ່າໄມ້ ປະຈຳແຂວງ, ຜູ້ຕາງໜ້າບັນດາກະຊວງ-ອົງການທຽບເທົ່າຂັ້ນສູນກາງ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

​​ກ່ອນອື່ນ, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ ກ່ຽວກັບຜົນສຳເລັດ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດ ແຜນພັດທະນາວຽກງານກະສິກຳ ແລະ ປ່າໄມ້ ແລະ ພັດທະນາຊົນນະບົດ ປະຈຳປີ 2018 ແລະ ທິດທາງປະຈຳປີ 2019 ຈາກທ່ານລັດຖະມົນຕີກະຊວງກະສິກຳ ແລະ ປ່າໄມ້. ຫຼັງຈາກນັ້ນ, ທ່ານຮອງນາຍົກລັດຖະມົນຕີ ໄດ້ມີຄຳເຫັນໂອ້ລົມ ແລະ ຊີ້ນຳ ເພື່ອເຮັດໃຫ້ວຽກງານຂະແໜງກະສິກຳ ແລະ ປ່າໄມ້ ແລະ ພັດທະນາຊົນນະບົດ ມີການຫັນປ່ຽນທີ່ຕັ້ງໜ້າ ແລະ ບັນລຸບັນດາຄາດໝາຍ ທີ່ໄດ້ກໍານົດໄວ້ ເປັນຕົ້ນ ດ້ານນະໂຍບາຍ: ສຸມໃສ່ພັດທະນາຂົງເຂດກະສິກໍາ ໃຫ້ທັນສະໄໝ, ໂດຍນໍາໃຊ້ວິທະຍາສາດ ແລະ ເຕັກໂນໂລຊີໃໝ່ ທີ່ເປັນມິດຕໍ່ສິ່ງແວດລ້ອມ ເຂົ້າໃນການຜະລິດກະສິກໍາ ແລະ ສອດຄ່ອງກັບເງື່ອນໄຂທ່າແຮງຕົວຈິງ ແນໃສ່ສ້າງແຫຼ່ງວັດຖຸດິບໃຫ້ພຽງພໍ ແລະ ມີຄຸນນະພາບສູງຮັບໃຊ້ໃຫ້ແກ່ການປຸງແຕ່ງ ໂດຍເນັ້ນໃສ່ຜະລິດຕະພັນສົດ, ສະອາດປອດສານພິດ ເພື່ອສົ່ງອອກຕ່າງປະເທດ, ສົ່ງອອກກັບທີ່ ແລະ ບໍລິໂພກພາຍໃນປະ ເທດ; ຫັນປ່ຽນໂຄງປະກອບກະສິກໍາ ຈາກການຜະລິດກະສິກໍາ ຊະນິດດຽວໄປສູ່ການຜະລິດກະສິກໍາແບບຫຼາຍຊະນິດ (ປະສົມປະສານ); ກໍ່ສ້າງ ແລະ ຂະຫຍາຍພື້ນຖານໂຄງລ່າງກະສິກໍາ ຢູ່ຊົນນະບົດໃຫ້ມີຄວາມເຂັ້ມແຂງ. ການຜະລິດຄໍ້າປະກັນຄວາມໝັ້ນຄົງດ້ານສະບຽງອາຫານ: ຕ້ອງຮັບປະກັນໃຫ້ປະຊາຊົນບັນດາເຜົ່າ ຢູ່ເຂດຫ່າງໄກສອກຫຼີກ ທີ່ເຮັດວຽກງານກະສິກໍາລ້ວນໆ ສາມາດຮັບປະກັນໃຫ້ຕົນເອງ, ມີເຂົ້າກິນ ຫຼື ມີສະບຽງອາຫານທີ່ພຽງພໍ, ໝາຍຄວາມວ່າ ໃຫ້ຜະລິດສະບຽງອາຫານກຸ້ມຕົນເອງ ເພື່ອຫຼີກລ້ຽງພາວະອຶດຢາກຂາດເຂີນ,   ບ້ານເມືອງບໍ່ມີຄວາມສະຫງົບ, ການວິພາກວິຈານຕ່າງໆນາໆ; ເປີດກວ້າງຂະໜາດການຜະລິດສະບຽງອາຫານ ຢູ່ເຂດທີ່ມີເງື່ອນໄຂ ເປັນຕົ້ນ ບັນດາເຂດທົ່ງພຽງ ທີ່ໄດ້ກໍານົດໃນແຜນແລ້ວ, ດ້ວຍການລົງທຶນທີ່ມີປະສິດທິຜົນ ທີ່ສາມາດເຮັດໃຫ້ມີການສະສົມສະບຽງອາຫານ, ຍົກສູງສະມັດຕະພາບຂອງການຜະລິດ ແລະ ມີແຫຼ່ງສະໜອງທີ່ພຽງພໍ. ການຜະລິດກະສິກໍາເປັນສິນຄ້າ: ໃຫ້ເປັນເຈົ້າການປະສານສົມທົບກັບ ຂະແໜງອຸດສາຫະກໍາ-ການຄ້າ, ຂະແໜງທະນາຄານ, ຂະແໜງໄຟຟ້າ ແລະ ຂະແໜງການອື່ນໆ ຄົ້ນຄວ້າຫາທາງອອກຊ່ວຍປະຊາຊົນ, ຊຸກຍູ້ສົ່ງເສີມການຜະ ລິດກະສິກໍາເປັນສິນຄ້າ ຢ່າງມີຈຸດສຸມ ໂດຍຕິດພັນກັບ ອຸດສາຫະກໍາປຸງແຕ່ງ, ຫຼຸດຂອດຂັ້ນການອອກອະນຸຍາດ, ມີການຈັດຕັ້ງສະຫະກອນ ກຸ່ມການຜະລິດ, ກົນໄກເສດຖະກິດຮ່ວມມືຂອງປະຊາຊົນ ແລະ ຫຼາຍຮູບແບບເສດຖະກິດ, ຊ່ວຍແຫຼ່ງທຶນ, ສິນເຊື່ອ ແລະ ນະໂຍບາຍດ້ານໄຟຟ້າ, ການກໍ່ສ້າງພື້ນຖານໂຄງລ່າງ ແລະ ຊອກຕະຫຼາດ ໃຫ້ກັບປະຊາຊົນ. ການຟຶ້ນຟູ ແລະ ຂະຫຍາຍປ່າໄມ້: ຕ້ອງປັບປຸງຍຸດທະສາດປ່າໄມ້ແບບຍືນຍົງ ທີ່ໄດ້ຮັບຮອງເອົາແລ້ວ ໃຫ້ສອດຄ່ອງກັບ ສະພາບຄວາມເປັນຈິງ;  ປັບປຸງກົດໝາຍປ່າໄມ້ ທີ່ໄດ້ປະກາດໃຊ້ມາແລ້ວນັ້ນ ໃຫ້ເປັນເຄື່ອງມືຄຸ້ມຄອງມະຫາພາກທີ່ຮັດກຸມ; ຍູ້ແຮງຂະບວນການສົ່ງເສີມການລົງທຶນປູກໄມ້ອຸດສະຫະກໍາ ແລະ ໄມ້ໃຫຍ່ໄວ ຕາມຄໍາສັ່ງເລກທີ 09/ນຍ; ກວດກາຄືນເນື້ອທີ່ປ່າຜະລິດ, ປ່າປ້ອງກັນ ແລະ ປ່າສະຫງວນ, ວາງມາດຕະການຄຸ້ມຄອງ ໃຫ້ເຂັ້ມງວດກວ່າເກົ່າ, ປົກປັກຮັກສາປ່າໄມ້ ໄປພ້ອມກັບການສົ່ງເສີມການທ່ອງທ່ຽວທຳມະຊາດ; ເພີ່ມທະວີຄວາມສັກສິດ ແລະ ເຂັ້ມງວດໃນການຈັດຕັ້ງປະຕິບັດຄໍາສັ່ງເລກທີ 15/ນຍ, ຄໍາສັ່ງເລກທີ 05/ນຍ ວ່າດ້ວຍການຄຸ້ມຄອງ ແລະ ກວດກາສັດປ່າ ແລະ ພືດພັນປະເພດຫວງຫ້າມ ທີ່ໄກ້ຈະສູນພັນ ແນໃສ່ເພີ່ມເນື້ອທີ່ປົກຫຸ້ມປ່າໄມ້ ໃຫ້ໄດ້ 70% ຕາມເປົ້າໝາຍວາງໄວ້. ການພັດທະນາຊົນນະບົດ ຕິດພັນກັບການລຶບລ້າງຄວາມທຸກຍາກ: ຕ້ອງຖືເອົາການຜະລິດກະສິກໍາ ເປັນໝາກຫົວໃຈຂອງການພັດທະນາ ເພື່ອຮັບປະກັນຄວາມຍືນຍົງ ທາງດ້ານເສດຖະກິດ-ສັງຄົມ ແລະ ສະພາບແວດລ້ອມ, ການປ່ຽນແປງດິນຟ້າອາກາດ; ຈັດຕັ້ງການຜະລິດ ແລະ ສ້າງສັງຄົມຊົນນະບົດ ໃຫ້ມີຄວາມເຂັ້ມແຂງ. ພ້ອມທັງ ປຸກລະດົມກຳລັງແຮງທັງຊາດ, ຂອງປະຊາຊົນ, ຜູ້ປະກອບການ, ນັກລົງທຶນ ແລະ ອົງການຈັດຕັ້ງ, ສະຖາບັນການເງິນພາຍໃນ, ການເງິນສາກົນ ແລະ ປະເທດເພື່ອນມິດ ເຂົ້າຮ່ວມໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ຢ່າງແຂງແຮງຕື່ມອີກ. ນອກນັ້ນ ຕ້ອງສົມທົບກັບ ອົງການປົກຄອງທ້ອງຖິ່ນ ສຶກສາອົບຮົມ, ປຶກສາຫາລື, ລະດົມແນວຄວາມຄິດ, ປຸກລຸກສະຕິຄວາມຕື່ນຕົວ ເປັນເຈົ້າການຂອງຊາວກະສິກອນ ໃຫ້ສູງຂຶ້ນ, ຕີຖອຍແນວຄິດເອື່ອຍອີງ, ແນວຄິດລໍຄອຍຖ້າແຕ່ລັດ, ອົງການຈັດຕັ້ງສາກົນ, ບໍລິສັດມາຊ່ວຍ...; ສືບຕໍ່ເປັນໃຈກາງປະສານສົມທົບກັບທ້ອງຖິ່ນ ຈັດຕັ້ງປະຕິບັດ ດໍາລັດ 348/ລບ ລົງວັນທີ 26/11/2017 ແລະ ບົດແນະນໍາ 0830/ກປ ຂອງກະຊວງກະສິກໍາ ແລະ ປ່າໄມ້ ກ່ຽວກັບມາດຕະຖານພົ້ນທຸກ ແລະ ມາດຕະ ຖານພັດທະນາ ຕາມບາດກ້າວຂັ້ນຕອນ ແລະ ຮູບແບວິທີໃໝ່ ທີ່ກໍາລັງດໍາເນີນໄປຢູ່ບັນດາແຂວງ ແລະ ເມືອງທົ່ວປະເທດ ໂດຍໃຫ້ຕິດພັນກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ ຢູ່ທ້ອງຖິ່ນ ມີຜົນສຳເລັດຕາມກໍານົດເວລາ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ