ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ ແຫ່ງ ສປປ ລາວ ສິ້ນສຸດການຢ້ຽມຢາມ ສສ.ຫວຽດນາມ

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນພຸດ, 15 ມ.ກ 2014 08:00

       ໃນລະຫວ່າງວັນທີ 7 ເຖິງວັນທີ 10 ມັງກອນ 2014 ທ່ານ ສົມສະຫວາດ ເລັ່ງສະຫວັດ,   ຮອງນາຍົກລັດຖະມົນຕີ ແຫ່ງ ສປປ ລາວ,  ຜູ້ຊີ້ນຳວຽກງານເສດຖະກິດ  ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ເຊິ່ງຄະນະດັ່ງກ່າວປະກອບດ້ວຍ ລັດຖະມົນຕີວ່າການ ກະຊວງການເງິນ, ຮອງຜູ້ວ່າການທະນາຄານແຫ່ງ ສປປ ລາວ ແລະ ພະນັກງານຂັ້ນສູງ ຈາກບັນດາຂະແໜງການໃນຂົງເຂດເສດຖະກິດຈຳນວນໜຶ່ງ.

ຕະຫຼອດໄລຍະເວລາໃນການຢ້ຽມຢາມຄັ້ງນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ຮັບການຮັບຕ້ອນ ແລະ ແລກປ່ຽນບົດຮຽນ  ກ່ຽວກັບວິທີການສະກັດກັ້ນໄພເງິນເຟີ້ ແລະ  ການຮັກສາສະຖຽນລະພາບຂອງເສດຖະກິດມະຫາພາກ ກັບ ທ່ານລັດຖະມົນຕີກະຊວງການເງິນ,   ຜູ້ວ່າການທະນາຄານແຫ່ງຊາດ,   ລັດຖະມົນຕີຊ່ວຍວ່າການກະຊວງແຜນການ  ແລະ  ການລົງທຶນ  ຂອງ ສສ.ຫວຽດນາມ. ນອກຈາກນັ້ນ, ຄະນະຍັງໄດ້ໄປຢ້ຽມຢາມແຂວງວິງຟຸກ ເພື່ອຖອດຖອນບົດຮຽນ ກ່ຽວກັບການແບ່ງຂັ້ນຄ້ມຄອງ ລະຫວ່າງ ສູນກາງກັບທ້ອງຖິ່ນ ໃນການຕິດຕາມ ແລະ ຊຸກຍູ້ການ ເກັບລາຍຮັບເຂົ້າງົບປະມານແຫ່ງລັດ.   ພ້ອມກັນນັ້ນ,   ຄະນະຜູ້ແທນຂອງລາວ ຍັງໄດ້ພົບປະເຮັດວຽກກັບທ່ານ ຫງວຽນ ຊວນ ຟຸກ,   ຮອງນາຍົກລັດຖະມົນຕີ,  ປະທານຄະນະກຳມາທິການ ຮ່ວມມື ຫວຽດນາມ-ລາວ ກ່ຽວກັບການຮ່ວມມືສອງຝ່າຍ; ພິເສດ ໃນໂອກາດຢ້ຽມຢາມຄັ້ງນີ້ ທ່ານ ເຈືອງ ເຕິນ ຊາງ, ປະທານປະເທດແຫ່ງ ສ.ສ ຫວຽດນາມ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ສົມສະຫວາດ ເລັ່ງສະຫວັດ,ຮອງນາຍົກລັດຖະມົນຕີ ພ້ອມດ້ວຍຄະນະຜູ້ແທນຂອງລາວຕື່ມອີກ.

     ໃນຕອນເຊົ້າຂອງວັນທີ 10 ມັງກອນ 2014  ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ   ພ້ອມດ້ວຍຄະນະຜູ້ແທນ ໄດ້ເດີນທາງກັບຄືນເຖິງນະຄອນຫຼວງວຽງຈັນ ດ້ວຍຜົນ ສຳເລັດຢ່າງຈົບງາມ, ເຊິ່ງການຢ້ຽມຢາມຄັ້ງນີ້ ໄດ້ເປັນການປະກອບສ່ວນທີ່ສຳຄັນເຂົ້າໃນການຮັດແໜ້ນມິດຕະພາບ ອັນເປັນມູນເຊື້ອ ແລະ ສືບຕໍ່ສົ່ງເສີມການຮ່ວມມື ລະຫວ່າງ ລາວ-ຫວຽດນາມ ໃຫ້ນັບມື້ເພີ່ມທະວີຍິ່ງໆຂຶ້ນ.

ແຫຼ່ງ: ຫ້ອງວ່າການລັດຖະບານ