ທ່ານຮອງນາຍົກລັດຖະມົນຕີ ເຂົ້າຮ່ວມພິທີ “Seeds for the Future” ໃນນະຄອນຫຼວງປັກກິ່ງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 06 ກ.ລ 2018 16:00

​​​​​ ​​​ໃນໂອກາດເດີນທາງໄປເຄື່ອນໄຫວເຮັດວຽກຢູ່ ສປ ຈີນ ລະຫວ່າງວັນທີ 16 ຫາ ວັນທີ 21 ມິຖຸນາ 2018 ທີ່ຜ່ານມາ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ປະທານຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ສູນການຄົ້ນຄວ້ານະວັດຕະກໍາຫົວເຫວີຍ ຢູ່ນະຄອນຫຼວງປັກກິ່ງ, ສປ ຈີນ.

ໃນໂອກາດມາຢ້ຽມຢາມສູນຄັ້ງນີ້ ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ຮັບຟັງການລາຍງານ ສະພາບການດໍາເນີນທຸລະກິດ ຂອງບໍລິສັດຫົວເຫວີຍ ໃນທົ່ວໂລກ ເວົ້າລວມ, ເວົ້າສະ ເພາະ ການດໍາເນີນທຸລະກິດຢູ່ໃນ ສປປ ລາວ. ບໍລິສັດຫົວເຫວີຍ ໄດ້ດໍາເນີນທຸລະກິດຢູ່ ສປປ ລາວ ນັບແຕ່ປີ 1998 ມາຮອດປະຈຸບັນນີ້ ໄດ້ກາຍເປັນຜູ້ສະໜອງອຸປະກອນ ແລະ ການບໍລິການດ້ານການສື່ສານອັນດັບ 1 ຂອງປະເທດລາວ ເຊິ່ງເປັນຄູ່ຮ່ວມ ຂອງບັນດາບໍລິສັດໂທລະຄົມ ເປັນຕົ້ນ ແມ່ນ LTC, ETL, Unitel. ໃນຕໍ່ໜ້າບໍລິສັດຫົວເຫວີຍ ຍັງຈະສືບຕໍ່ປະຕິບັດຕາມທິດຊີ້ນໍາ ແລະ ຕາມຕ້ອງການຂອງລັດຖະບານລາວ ເພື່ອປະກອບສ່ວນເຂົ້າ ໃນການພັດທະນາ ​​ຂະແໜງການ ICT ໃຫ້ມີປະສິດທິພາບ, ປະສິດທິຜົນ ຢ່າງສະເໝີຕົ້ນສະເໝີປາຍ ຄຽງຄູ່ກັບການແລກປ່ຽນປະສົບການ ແລະ ບົດຮຽນດ້ານຕ່າງໆ ລວມທັງ ການປະກອບສ່ວນຢ່າງຕັ້ງໜ້າ ເຂົ້າໃນການພັດທະນາເສດຖະກິດສັງຄົມ ແລະ ການກໍ່ສ້າງພັດທະນາ ບຸກຄະລາກອນ. ພາຍຫຼັງຮັບຟັງການລາຍງານ ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຜົນສໍາເລັດຂອງບໍລິສັດ ໃນໄລຍະຜ່ານມາ ພ້ອມທັງຫວັງວ່າໃນຕໍ່ໜ້າບໍລິສັດຫົວເຫວີຍ ຈະສືບເສີມຂະຫຍາຍບົດບາດ ແລະ ທ່າແຮງຂອງຕົນ ໂດຍສະເພາະ ດ້ານຂະແໜງການສື່ສານ ເພື່ອສະ ໜັບສະໜູນ ແລະ ຊ່ວຍເຫຼືອປະເທດລາວ ຄຽງຄູ່ກັບການພັດທະນາ ບຸກຄະລາກອນ ເພື່ອໃຫ້ມີພຽບພ້ອມໃນການບໍລິຫານ, ຄຸ້ມຄອງລະບົບໄອທີຊີ ທັງນີ້ ກໍ່ເພື່ອເປັນການປະກອບສ່ວນ ເຂົ້າໃນສາຍພົວພັນ ອັນດີງາມຂອງສອງຊາດລາວ-ຈີນ ທີ່ມີມາແຕ່ດົນນານ ໃຫ້ນັບມື້ນັບແໜ້ນແຟ້ນ ແລະ ກ້າວເຂົ້າສູ່ລວງເລິກກວ່າເກົ່າ.
ໃນໂອກາດດຽວກັນ ທ່ານຮອງນາຍົກລັດຖະມົນຕີ ຍັງໄດ້ໃຫ້ກຽດຕ້ອນຮັບນັກສຶກສາລາວ ຈໍານວນ 10 ຄົນ ເຊິ່ງເປັນຕົວແທນ ຈາກມະຫາວິທະຍາໄລ 3 ແຫ່ງ ທີ່ຕາງໜ້າໃຫ້ນັກສຶກສາ ສປປ ລາວ ມາທັດສະນະສຶກສາ ຢູ່ນະຄອນຫຼວງປັກກິ່ງ ແລະ ນະຄອນເຊີນເຈີ້ນ ເປັນເວລາ 2 ອາທິດ ຈຸດປະສົງເພື່ອຝຶກອົບຮົມ, ຮຽນຮູ້ກ່ຽວກັບວັດທະນະທໍາ ແລະ ເຕັກໂນໂລຊີໂທລະຄົມມະນາຄົມ ການສື່ສານ ພາຍໃຕ້ໂຄງການ “Seeds for the Future”. ເຊິ່ງໂຄງການດັ່ງກ່າວ ແມ່ນໄດ້ເລີ່ມຈັດຕັ້ງປະຕິບັດ ມາແຕ່ປີ 2016 ເປັນຕົ້ນມາ. ສິ່ງສໍາຄັນ ແມ່ນເພື່ອສ້າງນັກສຶກສາ ໃຫ້ກາຍເປັນບຸກຄະລາກອນ ທີ່ມີຄຸນນະພາບ ແລະ ພອນສະຫວັນ ປະກອບສ່ວນເຂົ້າໃນການພັດທະນາການສຶກສາ ຂອງປະເທດລາວ.
 
ທ່ານຮອງນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ພ້ອມທັງຫວັງວ່າ ບັນດານັກສຶກສາ ທີ່ໄດ້ເປັນຕົວແທນມາຮ່ວມກິດຈະກໍານີ້ ຈະຕັ້ງໜ້າຝຶກຝົນຫຼໍ່ຫຼອມຕົນເອງ ເພື່ອພັດທະນາໃຫ້ກາຍເປັນທີ່ມີຄວາມຮູ້, ຄວາມສາມາດ, ຄຸນ ສົມບັດ, ທຸ້ມເທເຫື່ອແຮງ ແລະ ສະຕິປັນຍາຂອງຕົນ ເພື່ອປະກອບສ່ວນເຂົ້າໃນການປະຕິບັດໜ້າທີ່ວຽກງານ ທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ ແລະ ມີຜົນສຳເລັດໃໝ່ໃຫຍ່ຫຼວງກວ່າເກົ່າ. ສິ່ງສໍາຄັນ ແມ່ນສຶກສາຄົ້ນຄວ້າແລ້ວນໍາເອົາຄວາມຮູ້ຈາກການທັດສະນະສຶກສາຄັ້ງນີ້ ໄປປະກອບສ່ວນເຂົ້າໃນໜ້າທີ່ວຽກງານ ກໍ່ຄື ຂົງເຂດຄວາມຮັບ ຜິດຊອບຂອງຕົນ ໃຫ້ປະກົດຜົນເປັນຈິງ ພ້ອມທັງ ຕີລາຄາສູງຕໍ່ກິດຈະກໍາ “Seeds for the Future” ຄັ້ງນີ້ ທີ່ບໍລິສັດຫົວເຫວີຍໄດ້ຈັດຂຶ້ນນັ້ນ ເປັນການປະກອບສ່ວນຢ່າງຕັ້ງນ້າເຂົ້າໃນການພັດທະນາຂະແໜງການ ICT ແລະ ຖ່າຍໂອນຄວາມຮູ້ດ້ານເຕັກໂນໂລຊີການສື່ສານ ເພື່ອສົ່ງເສີມປະເທດລາວກ້າວເຂົ້າສູ່ຍຸກດິຈິຕອນໃໝ່.​​

ແຫຼ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ