ທ່ານ ຮອງນາຍົກລັດຖະມົນຕີ ພົບປະກັບລັດຖະມົນຕີ ກະຊວງອຸດສາຫະກໍາ ແລະ ເຕັກໂນໂລຊີ ຂໍ້ມູນຂ່າວສານ ສປ ຈີນ

ຜູ້ຂຽນ: ບີ່​ໂຟ໊ ນັນ​ທະ​ວົງ

ວັນພຸດ, 20 ມິ.ຖ 2018 13:00

​​​

      ໃນຕອນເຊົ້າວັນທີ 19 ມິຖຸນາ 2018 ຢູ່ທີ່ ກະຊວງອຸດສາຫະກໍາ ແລະ ເຕັກໂນໂລຊີ ຂໍ້ມູນຂ່າວສານ ແຫ່ງ ສປ ຈີນ ທ່ານ Maio Wei ລັດຖະມົນຕີກະຊວງອຸດສາຫະກໍາ ແລະ ເຕັກໂນໂລຊີ ຂໍ້ມູນຂ່າວສານ ໄດ້ຕ້ອນຮັບຄະ ນະຜູ້ແທນຂັ້ນສູງຂອງ ສປປ ລາວ ທີ່ໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປ ຈີນ ລະຫວ່າງວັນທີ 13-21 ມິຖຸນາ 2018 ເຊິ່ງນໍາໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການຄຸ້ມຄອງອິນເຕີເນັດແຫ່ງຊາດ, ມີທ່ານ ທັນສະໄໝ ກົມມະສິດ  ພ້ອມດ້ວຍຄະນະ.

      ໃນໂອກາດນີ້ ທ່ານ ລັດຖະມົນຕີ ກະຊວງອຸດສາຫະກໍາ ແລະ ເຕັກໂນໂລຊີ ຂໍ້ມູນຂ່າວສານ ໄດ້ກ່າວສະ ແດງຄວາມຍິນດີຕ້ອນຮັບ ຄະນະຂອງທ່ານຮອງນາຍົກລັດຖະມົນຕີ ນັ້ນສະແດງໃຫ້ເຫັນເຖິງການເອົາໃຈໃສ່, ເປັນ ຫ່ວງເປັນໄຍ ແລະ ເປັນການຊຸກຍູ້ໃຫ້ສາຍພົວພັນ ການຮ່ວມມືຂອງສອງປະເທດ ທີ່ມີມາແຕ່ດົນນານ ໃຫ້ນັບມື້ນັບ ກ້າວເຂົ້າສູ່ລວງເລິກ ແລະ ກວ້າງຂວາງ ຕາມການນໍາຂັ້ນສູງຂອງສອງປະເທດ ໄດ້ຕົກລົງກັນ ໂດຍສະເພາະ ຜົນການ ໄປຢ້ຽມຢາມ ສປປ ລາວ ຢ່າງເປັນທາງການ ໃນເດືອນ ພະຈິກ 2017 ທີ່ຜ່ານມາ ຂອງປະທານ ສີຈິ້ນຜີງ ເລຂາທິ ການໃຫຍ່, ປະທານປະເທດ ແຫ່ງ ສປ ຈີນ ແລະ ການມາຢ້ຽມຢາມ ສປ ຈີນ ໃນຕົ້ນເດືອນ ມິຖຸນາ 2018 ຂອງປະທານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ເວົ້າລວມ, ເວົ້າສະເພາະ ໃນຂົງເຂດວຽກງານໂທລະຄົມມະນາຄົມ ຂອງສອງປະເທດ ໄດ້ເພີ່ມທະວີການພົວພັນຮ່ວມມືກັນ ຢ່າງສະໜິດແໜ້ນ ເປັນຕົ້ນ: ການແລກປ່ຽນຢ້ຽມຢາມການນໍາຂອງສອງກະຊວງ, ການແລກປ່ຽນບົດຮຽນ ປະສົບການ ແລະ ການຝຶກອົບຮົມວຽກງານດັ່ງກ່າວ ກໍ່ເຫັນໄດ້ວ່ານັບມື້ນັບເພີ່ມຂຶ້ນ.

ໃນໂອກາດດຽວກັນ, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈມາຍັງ ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງ ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນການຮ່ວມມື ຂອງສອງ ຂະແໜງການ ທີ່ເຫັນວ່າມີການຍົກລະດັບຂຶ້ນເປັນກ້າວໆ ເປັນການປະກອບສ່ວນເສີມຂະຫຍາຍມູນເຊື້ອສາຍພົວ ພັນ, ຄູ່ຮ່ວມມືແບບຍຸດທະສາດຮອບດ້ານ ຂອງສອງປະເທດໃຫ້ນັບມື້ນັບກ້າວສູ່ລວງເລິກ ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມນີ້ ທ່ານຮອງນາຍົກລັດຖະມົນຕີ ຍັງໄດ້ແຈ້ງໃຫ້ຊາບ ກ່ຽວກັບຈຸດປະສົງ ຂອງການມາຢ້ຽມຢາມຄັ້ງນີ້ ແມ່ນເພື່ອແລກປ່ຽນບົດຮຽນ ການຄຸ້ມຄອງອິນເຕີເນັດ ເຊິ່ງເຫັນໄດ້ວ່າ ສປ ຈີນ ເປັນປະເທດທີ່ມີບົດຮຽນທີ່ດີ ໃນການຄຸ້ມຄອງ ແລະ ການນໍາໃຊ້ອິນເຕີເນັດ. ໃນປະຈຸບັນມີຫຼາຍປະເທດ ທີ່ມີຈໍານວນກຸ່ມຄົນບໍ່ດີ ໄດ້ສວຍໃຊ້ສື່ສັງຄົມອອນລາຍ ໂຈມຕີການນໍາພັກ, ລັດ ເພື່ອໂຄສະນາ ປັ່ນປ່ວນຊວນເຊື່ອ, ສ້າງຄວາມແຕກແຍກຄວາມສາມັກຄີ ແລະ ສ້າງຄວາມບໍ່ສະຫງົບພາຍໃນປະເທດ ເຊິ່ງທັງໝົດນັ້ນ ລ້ວນແລ້ວແຕ່ມີຜົນກະທົບຕໍ່ຄວາມໝັ້ນຄົງຂອງຊາດ ແລະ ການພັດທະນາເສດຖະກິດ-ສັງຄົມ ພາຍໃນປະເທດ. ໃນຕໍ່ໜ້າ ແມ່ນເຫັນດີໃຫ້ສອງຂະແໜງການ ສືບຕໍ່ຈັດຕັ້ງປະຕິບັດ ຕາມແຜນການຮ່ວມມື ທີ່ການນໍາຂັ້ນສູງຂອງສອງປະເທດ ໄດ້ຕົກລົງກັນນັ້ນ ໃຫ້ມີປະສິດທິຜົນສູງຂຶ້ນ.

      ໃນຕອນທ້າຍທ່ານ ລັດຖະມົນຕີ ກະຊວງອຸດສາຫະກໍາ ແລະ ເຕັກໂນໂລຊີຂໍ້ມູນຂ່າວສານ  ແຫ່ງ ສປ ຈີນ ຍັງໄດ້ຢືນຢັນວ່າ ຈະສືບຕໍ່ຮ່ວມມືກັບບັນດາຂະແໜງການຂອງຝ່າຍລາວ ເພື່ອເພີ່ມທະວີຄົ້ນຄວ້າ, ພັດທະນາລະບົບ ອິນເຕີເນັດຢູ່ ສປປ ລາວ; ຍົກລະດັບຄວາມຮູ້, ຄວາມສາມາດ ກໍ່ສ້າງບຸກຄະລາກອນ ໃນການນໍາໃຊ້ລະບົບວຽກ ງານດັ່ງກ່າວ ໃຫ້ຮັບປະກັນດໍາເນີນຢ່າງເປັນປົກກະຕິ ແລະ ມີປະສິດທິຜົນສູງຂຶ້ນກວ່າເກົ່າ ພ້ອມທັງ ແກ້ໄຂບັນຫາທີ່ຢູ່ໃນລະບົບອິນເຕີເນັດ ທີ່ສອງຝ່າຍເຫັນວ່າມີຄວາມເໝາະສົມຕື່ມອີກ. ພ້ອມດຽວກັນນີ້ ທ່ານຮອງນາຍົກລັດຖະ ມົນຕີ ຍັງໄດ້ເຊື້ອເຊີນໃຫ້ຄະນະນໍາ ກະຊວງອຸດສາຫະກໍາ ແລະ ເຕັກໂນໂລຊີຂໍ້ມູນຂ່າວສານ  ແຫ່ງ ສປ ຈີນ ເດີນ ທາງໄປເຮັດວຽກ ແລະ ຢ້ຽມຢາມ ສປປ ລາວ  ໃນໂອກາດທີ່ ສປປ ລາວ ເປີດປີທ່ອງທ່ຽວລາວ ປີ 2018.



ແຫຼ່ງ: ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ
ຂ່າວອື່ນໆ