ທ່ານ ສອນໄຊ ສີພັນດອນ ພົບປະໂອ້ລົມພະນັກງານຫຼັກແຫຼ່ງແຂວງຫົວພັນ

ຜູ້ຂຽນ: ຄຳວົງສັກ ບັນດິດ

ວັນອາທິດ, 20 ພ.ພ 2018 18:00

ໃນໂອກາດທີ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຫົວພັນ. ດັ່ງນັ້ນ, ໃນຕອນເຊົ້າວັນທີ 19 ພຶດສະພາ 2018 ທີ່ຫ້ອງວ່າການປົກຄອງແຂວງຫົວພັນ ທ່ານຮອງນາຍົກລັດຖະມົນຕີ ກໍ່ໄດ້ພົບປະໂອ້ລົມກັບພະນັກງານຫຼັກແຫຼ່ງຂອງແຂວງດັ່ງກ່າວ ເຊິ່ງມີ ທ່ານ ຄຳວອນ ບຸນທະວົງ ປະທານສະພາປະຊາຊົນແຂວງ, ມີບັນດາຄະນະພັກ-ຄະນະນຳແຂວງ, ພະແນກການ, ບັນດາເມືອງ, ຫ້ອງການອ້ອມຂ້າງ ແລະ ພະນັກງານຫຼັກແຫຼ່ງພາຍໃນແຂວງ ເຂົ້າຮ່ວມ.

 

ໂອກາດນີ້, ທ່ານ ຄຳວອນ ບຸນທະວົງ ກໍ່ໄດ້ລາຍງານໃຫ້ຊາບ ກ່ຽວກັບສະພາບການຊີ້ນຳນຳພາ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນປີ 2017 ແລະ ແຜນການປີ 2018 ເຊິ່ງໃນປີຜ່ານມາ ເສດຖະກິດມີການຂະຫຍາຍຕົວ ໃນລະດັບ 8,39%, ລວມຍອດຜະລິດຕະພັນພາຍໃນຂອງແຂວງ(GDP) ບັນລຸໄດ້ 2.380 ກວ່າຕື້ກີບ, ສະເລ່ຍລາຍຮັບໄດ້ 8.200.000 ກວ່າກີບຕໍ່ຄົນຕໍ່ປີ ຫຼື ເທົ່າກັບ 1.030 ກວ່າໂດລາສະຫະລັດຕໍ່ຄົນຕໍ່ປີ ທຽບໃສ່ແຜນການປີ ລື່ນຄາດໝາຍກວ່າ 24 ໂດລາສະຫະລັດ, ສາມາດເກັບລາຍຮັບໄດ້ 125 ກວ່າຕື້ກີບ ທຽບໃສ່ແຜນການປີລື່ນຄາດໝາຍ 15,75%, ການສົ່ງອອກບັນລຸໄດ້ 1,36 ລ້ານໂດລາສະຫະລັດ ທຽບໃສແຜນການປີ ປະຕິບັດໄດ້ 7,31% ສິນຄ້າສົ່ງອອກຕົ້ນຕໍແມ່ນ: ຜະລິດຕະພັນ ເຄື່ອງປ່າຂອງດົງ, ສາລີ, ແຮ່ທາດ ແລະ ຜະລິດຕະພັນໄມ້ສຳເລັດຮູບ. ດ້ານການແກ້ໄຂຄວາມທຸກຍາກ, ມາຮອດປະຈຸບັນ ຍັງມີຍັງມີຄອບຄົວທຸກຍາກກວ່າ 6,836 ຄົວເຮືອນ ເທົ່າກັບ 13,44% ຂອງຄົວເຮືອນທັງໝົດ.

 

ຫຼັງຈາກນັ້ນ, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ແລະ ຄວາມບາກບັ່ນພະຍາຍາມຂອງຄະນະພັກ-ຄະນະນຳແຂວງ ທີ່ພ້ອມພຽງຮຽງໜ້າ ກັບປະຊາຊົນຊາວແຂວງຫົວພັນ ຍາດມາໄດ້ໃນ 1 ປີຜ່ານມາ ໃນການປົກປັກຮັກສາ ແລະ ສ້າງພັດທະນາແຂວງຫົວພັນ ໃຫ້ມີບາດກ້າວດີຂຶ້ນ ເປັນຕົ້ນ ກໍ່ແມ່ນດ້ານເສັ້ນທາງຄົມມະນາຄົມ, ການແກ້ໄຂຄວາມທຸກຍາກ, ລາຍຮັບຂອງພົນລະເມືອງ ແລະ ອື່ນໆ. ແຕ່ກໍ່ຍັງມີບັນຫາສິ່ງທ້າທາຍ ທີ່ແຂວງຈະຕ້ອງໄດ້ເອົາໃຈໃສ່ ໂດຍສະເພາະ ການປະກອບສ່ວນເຂົ້າໃນການນຳພາປະເທດຊາດ ຫຼຸດພົ້ນອອກຈາກປະເທດດ້ອຍພັດທະນາ ຕາມທິດການພັດທະນາແບບຍືນຍົງ ແລະ ສີຂຽວ, ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ(SDGs), ລວມເຖິງວຽກງານການຄຸ້ມຄອງ ຊັບພະຍາກອນທຳມະຊາດ, ວຽກງານການຜະລິດເປັນສິນຄ້າ, ພື້ນຖານໂຄງລ່າງຈຳນວນໜຶ່ງ ກໍ່ຍັງບໍ່ທັນຮັບປະກັນ, ກົນໄກລະບຽບການບາງອັນ ທີ່ຕ້ອງໄດ້ມີການປັບປຸງ, ການແກ້ໄຂບັນຫາ ສໍ້ລາດບັງຫຼວງ. ດັ່ງນັ້ນ, ໃນຕໍ່ໜ້ານີ້ ທ່ານຮອງນາຍົກລັດຖະມົນຕີ ຈຶ່ງໄດ້ເນັ້ນໃຫ້ພ້ອມກັນ ກວດກາຕີລາຄາຄືນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ເປົ້າໝາຍການພັດທະນາແບບຍືນຍົງ(SDGs) ໃນເຄິ່ງສະໄໝທີ່ຜ່ານມາ ເພື່ອເຫັນໄດ້ຜົນສຳເລັດຂອງແຕ່ລະວຽກງານ ທີ່ຕ້ອງໄດ້ເສີມຂະຫຍາຍ ແລະ ຂໍ້ຄົງຄ້າງ ທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ໜ້າ, ເອົາໃຈໃສ່ວຽກງານການຜະລິດເປັນສິນຄ້າ ທີ່ເປັນມູນເຊື້ອ ແລະ ເປັນທ່າແຮງບົ່ມຊ້ອນຂອງແຂວງ ຕິດພັນກັບການຕະຫຼາດ ທັງຕະຫຼາດພາຍໃນ ແລະ ຕ່າງປະເທດ, ຊຸກຍູ້ດ້ານການທ່ອງທ່ຽວ ໃຫ້ມີຫຼາກຫຼາຍສີສັນ ຕິດພັນກັບການສົ່ງເສີມການລົງທຶນ ໂດຍການມີສ່ວນຮ່ວມຂອງປະຊາຊົນ; ເອົາໃຈໃສ່ສືບຕໍ່ປະຕິບັດວຽກງານ 3 ສ້າງ ຕາມ 4 ເນື້ອໃນ 4 ຄາດໝາຍ ທີ່ເປັນວຽກງານ ຍຸດທະສາດຍາວນານ ທີ່ຈະຕ້ອງໄດ້ເຮັດຢ່າງຕໍ່ເນື່ອງ ແລະ ເປັນປະຈຳ, ເອົາໃຈໃສ່ປັບປຸງກົງຈັກຢູ່ຮາກຖານ ຕາມ 5 ໜ່ວຍງານທີ່ໄດ້ກຳນົດໄວ້ ໄປພ້ອມໆກັບການຍົກລະດັບຄວາມຮູ້-ຄວາມສາມາດ ແລະ ການສ້າງພະນັກງານລຸ້ນໜຸ່ມ ເພື່ອປ່ຽນແທນໃນຕໍ່ໜ້າ.
ໃນຕອນທ້າຍ, ທ່ານ ສອນໄຊ ສີພັນດອນ ຍັງໄດ້ເນັ້ນຕື່ມບາງຂົງເຂດທີ່ຕ້ອງໄດ້ເອົາໃຈໃສ່ ແລະ ກວດກາຄືນ ໃນການຈັດຕັ້ງປະຕິບັດ ເປັນຕົ້ນ ການຄຸ້ມຄອງການລົງທຶນ, ບັນຫາການຕອບສະໜອງແຮງງານ ແລະ ການຄຸ້ມຄອງແຮງງານຕ່າງປະເທດ, ການຈັດຕັ້ງປະຕິບັດບັນດາແຜນງານ ຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່ເດັກຂັ້ນແຂວງ, ການຄຸ້ມຄອງອິນເຕີເນັດ ໃຫ້ໄດ້ຮັບປະໂຫຍດສູງສຸດ, ສຸມໃສ່ວຽກງານຕ້ານການຄ້າມະນຸດ, ເອົາໃຈໃສ່ພັດທະນາກິດຈະກຳການທ່ອງທ່ຽວ ສຳລັບປີ 2018 ຕິດພັນກັບການພັດທະນາຢູ່ທ້ອງຖິ່ນ ແລະ ສີລະປະວັດທະນາທຳບັນດາເຜົ່າ.


ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ