ນໍາໃຊ້ທ່າແຮງບົ່ມຊ້ອນ ຂອງປະເທດ ເຊື່ອມໂຍງເຂົ້າກັບສາກົນ (ຂົວມິດຕະພາບ ລາວ-ໄທ ແຫ່ງທີ 4)

ຜູ້ຂຽນ: ນັກຂ່າວ ຫ້ອງວ່າການລັດຖະບານ

ວັນພະຫັດ, 06 ມິ.ນ 2014 23:00

    ສປປ ລາວ ເປັນປະເທດ ທີ່ບໍ່ມີຊາຍແດນຕິດຈອດ ກັບ ທະເລ ເຊິ່ງຍາມໃດລັດຖະບານ ກໍ່ໄດ້ຖືເອົາການຄົມມະນາຄົມ - ຂົນສົ່ງ ເປັນປາຍແຫຼມ ຂອງເສດຖະກິດແຫ່ງຊາດ ມີການ ເປີດກວ້າງ ພົວພັນຮ່ວມມືອັນດີ ແລະ ການເຊື່ອມຈອດ ກັບ 5 ປະເທດ ໃກ້ຄຽງ ໂດຍໄດ້ຮ່ວມມືກັບອາຊຽນ ຜັນຂະຫຍາຍແມ່ບົດ ວ່າດ້ວຍການເຊື່ອມຈອດ ອາຊຽນ ແລະ ໄດ້ສຸມໃສ່ການພັດທະນາ ພື້ນຖານໂຄງລ່າງຕ່າງໆ ຂອງປະເທດ ຢ່າງຕັ້ງໜ້າ, ໂດຍໄດ້ ຂຸດຄົ້ນນຳໃຊ້ທຶນຢ່າງຫຼວງຫຼາຍ ທັງພາຍໃນ ແລະ ຈາກການຊ່ວຍເຫຼືອ ສະໜັບສະໜູນ ຈາກບັນດາປະເທດ ເພື່ອນມິດ ແລະ ສາກົນ ເຂົ້າໃນການພັດທະນາ ພື້ນຖານໂຄງລ່າງ ເພື່ອສົ່ງເສີມ ການລຳລຽງຂົນສົ່ງ ສະດວກຂຶ້ນກ່ວາເກົ່າ, ການທ່ອງທຽ່ວ, ການຄ້າ ແລະ ການບໍລິການ ພ້ອມທັງເປັນການດຶງດູດ ການລົງທຶນຢູ່ພາຍໃນ ຄອບຄົວອາຊຽນ ກໍ່ຄື ການເຊື່ອມໂຍງ ເຂົ້າກັບພາກພື້ນ ແລະ ສາກົນ.

  ດັ່ງສະແດງອອກໃນວັນທີ່ 11 ທັນວາ 2013 ທີ່ແຂວງ ບໍ່ແກ້ວ ໄດ້ມີພິທີເປີດນຳໃຊ້ ຂົວຂ້າມແມ່ນ້ຳຂອງມິດຕະພາບ ລາວ-ໄທ ແຫ່ງທີ 4 ຢ່າງເປັນທາງການຂຶ້ນ, ໂດຍ ໃຫ້ກຽດເຂົ້າຮ່ວມ ເປັນສັກຂີພິຍານ ຂອງ ທ່ານ ບຸນຍັງ ວໍລະຈິດ ຮອງປະທານປະເທດແຫ່ງ ສປປ ລາວ, ສົມເດັດພະເທບພະຣັດຣາຊະສຸດາສະຫຍາມບໍຣົມຣາຊະກຸມາຣີ (ຣາຊະອານາຈັກໄທ). ໃນພິທີ ດັ່ງກ່າວ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ໄດ້ເນັ້ນໃນບົດ ລາຍງານພິທີເປີດຂົວ ວ່າ: ພາຍຫຼັງທີ່ຂົວມິດຕະພາບ ລາວ-ໄທ ແຫ່ງທີ 4 ເປີດນຳໃຊ້ຈະເຮັດໃຫ້ເສັ້ນທາງ R3 ເຊື່ອມຕໍ່ລະຫວ່າງຣາຊະອານາຈັກໄທ - ສປປ ລາວ - ສປ ຈີນ, ເຊິ່ງເສັ້ນທາງດັ່ງກ່າວ ຈະຊ່ວຍອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມຂອງຊາດ ໃນອະນາຄົດ. ພ້ອມດຽວກັນນັ້ນ, ກໍ່ຍັງເປັນການຮອງຮັບການພັດທະນາຕາມແລວເສດຖະກິດ ເໜືອ-ໃຕ້ ຂອງ ອານຸພາກພື້ນລຸ່ມແມ່ນໍ້າຂອງ. ທັງເປັນການສະແດງອອກເຖິງເຈດຈຳນົງທາງການເມືອງ ແລະ ການຮ່ວມມືຢ່າງຮອບດ້ານອັນແນ່ວແນ່ ຂອງລັດຖະບານສາມປະເທດ ໃນການສົ່ງເສີມການເປັນຄູ່ຮ່ວມ ພັດທະນາທີ່ດີລະຫວ່າງສາມປະເທດ ກໍ່ຄື ລະຫວ່າງ ສປ ຈີນ ກັບ ອາຊຽນ. ຂົວແຫ່ງນີ້ຍັງຈະສາມາດສ້າງເງື່ອນໄຂທີ່ເອື້ອອຳນວຍຄວາມສະດວກຫຼາຍໆຢ່າງໃຫ້ແຂວງບໍ່ແກ້ວ ເປັນຕົ້ນແມ່ນ ສ້າງສະພາບແວດລ້ອມທີ່ດີເພື່ອດຶງດູດແຫຼ່ງທຶນ ແລະ ນັກລົງທຶນມາລົງທຶນຢູ່ແຂວງບໍ່ແກ້ວ ໃຫ້ນັບມື້ເພີ່ມທະວີຫຼາຍຂຶ້ນເປັນກ້າວໆ ເພື່ອໃຫ້ແຂວງມີການພັດທະນາໄວຂຶ້ນ ແລະ ມີເງື່ອນໄຂ ສ້າງພື້ນຖານວັດຖຸເຕັກນິກ ໃຫ້ມີຄວາມເຂັ້ມແຂງສາມາດແຂ່ງຂັນໃນຕະຫຼາດພາກພື້ນ ແລະ ສາກົນໄດ້, ຊ່ວຍສ້າງວຽກເຮັດງານທຳໃຫ້ສັງຄົມ ແລະ ສ້າງຖານອາກອນລາຍຮັບໃຫ້ ຂະຫຍາຍກວ້າງອອກ. ພ້ອມດຽວກັນນີ້, ຍັງເປັນການສົ່ງເສີມການຜະລິດເປັນສິນຄ້າຂອງປະຊາຊົນ ໂດຍສະເພາະໃນການປູກຝັງ-ລ້ຽງສັດທີ່ປອດສານເຄມີ ແລະ ກະສິກຳສະອາດ ເພື່ອບໍລິໂພກພາຍໃນ ແລະ ສົ່ງອອກ ສົ່ງເສີມການຜະລິດສິນຄ້າ, ບໍລິການຕາມຊາຍແດນ, ຕາມແລວທາງເສດຖະກິດເໜືອ-ໃຕ້, ສົ່ງເສີມການຜະລິດທີ່ປະຊາຊົນມີມູນເຊື້ອ ແລະ ມີທ່າແຮງ ເປັນຕົ້ນ ເຄື່ອງທີ່ລະນຶກເພື່ອບໍລິການນັກທ່ອງທ່ຽວ. ພ້ອມດຽວກັນນັ້ນ, ທັງເປັນການສ້າງຄວາມສາມາດຂອງວິສາຫະກິດຂະໜາດກາງ ແລະ ຂະໜາດນ້ອຍ ໃຫ້ເຂົ້າເຖິງຕະຫຼາດຫຼາຍຂຶ້ນກວ່າເກົ່າ ເປັນການສົ່ງເສີມ ການທ່ອງທ່ຽວຕາມຊາຍແດນ, ການບໍລິການນັກທ່ອງທ່ຽວ ແລະ ພັດທະນາການທ່ອງທ່ຽວເຊື່ອມຕໍ່ກັບປະເທດໃກ້ຄຽງ, ພັດທະນາຈຸດພັກເຊົາທີ່ສາມາດດຶງດູດຜູ້ຄົນ ໃຫ້ທ່ຽວຊົມທຳມະຊາດ ແລະ ວັດທະນະທຳຕາມແລວທາງອີກດ້ວຍ. ນອກເໜືອຈາກການປັບປຸງພັດທະນາລະບົບພື້ນຖານໂຄງລ່າງໃນການເຊື່ອມຈອດ ດ້ວຍການສ້າງຂົວຂ້າມແມ່ນ້ຳຂອງມິດຕະພາບ ລາວ-ໄທ ທັງ 4 ແຫ່ງແລ້ວ. ປະຈຸບັນ ສປປ ລາວ ກຳລັງວາງແຜນກໍ່ສ້າງຂົວຂ້າມແມ່ນ້ຳຂອງມິດຕະພາບລາວ-ໄທ ອີກ 1 ແຫ່ງ (ລະຫວ່າງ ແຂວງ ບໍລິຄຳໄຊ-ຈັງຫວັດບຶງການ) ແລະ ອີກ 1 ແຫ່ງ ເພື່ອເຊື່ອມຈອດລະຫວ່າງ ສປປ ລາວ ກັບ ມຽນມາ.
     ຄຽງຄູ່ກັບການສ້າງຂົວເພື່ອເຊື່ອມຈອດກັບບັນດາປະເທດເພື່ອນບ້ານແລ້ວ. ໃນຂອບການຮ່ວມມືກັບອະນຸພາກພື້ນແມ່ນ້ຳຂອງ ກໍ່ມີຫຼາຍໂຄງການທີ່ຊ່ວຍຍູ້ໜູນການເຊື່ອມຈອດ ເປັນຕົ້ນ: ການສ້າງເສັ້ນທາງພາກກາງຂອງ ສປປ ລາວ ໄປຫາບັນດາແຂວງພາກກາງຂອງ ສສ ຫວຽດນາມ ຕາມແລວເສດຖະກິດຕາເວັນອອກ-ຕາເວັນຕົກ, ເສັ້ນທາງເຊື່ອມຕໍ່ແຫຼມສະບັງ-ບາງກອກ-ມຸກດາຫານ ຂອງໄທຜ່ານເສັ້ນທາງເລກ 9 ແຂວງສະຫວັນນະເຂດ, ເສັ້ນທາງ A3 ເຊື່ອມຕໍ່ຄຸນໜິງ. ສປ ຈີນ ກັບພາກເໜືອຂອງໄທ ໂດຍຜ່ານພາກເໜືອຂອງລາວ ຕາມແລວເສດຖະກິດເໜືອ-ໄຕ້. ນອກນັ້ນ, ກໍ່ໄດ້ເອົາໃຈໃສ່ປັບປຸງເສັ້ນທາງ ເພື່ອອຳນວຍຄວາມສະດວກ ໃຫ້ແກ່ການສັນຈອນ ແລະ ຂົນສົ່ງ ລະຫວ່າງ ນະຄອນຫຼວງວຽງຈັນ ກັບບາງກອກ, ຮ່າໂນ້ຍ, ພະນົມເປັນ ແລະ ຄຸນໝິງ. ພ້ອມດຽວກັນນັ້ນ, ສປປ ລາວ ຍັງໄດ້ຕົກລົງຈະສ້າງທາງລົດໄຟ ລາວ-ຈີນ ຈາກຄຸນໝີງ ຫານະຄອນຫຼວງວຽງຈັນ ແລະ ເຊື່ອມຕໍ່ເຂົ້າຫາໄທ ຊຶ່ງຈະກາຍເປັນສ່ວນໜຶ່ງ ຂອງການເຊື່ອມຕໍ່ເສັ້ນທາງ ລົດໄຟອາຊຽນ ແລະ ຄຸນໝິງ. ນອກນີ້, ມີແຜນຈະສ້າງເສັ້ນທາງລົດໄຟເຊື່ອຈອດລາວ-ໄທ ຫາຊາຍແດນຫວຽດນາມ ຜ່ານແຂວງ ສະຫວັນນະເຂດນຳອີກດ້ວຍ.
       ສປປ ລາວ ຈະສືບຕໍ່ເປີດກວ້າງ ແລະ ເສີມຂະຫຍາຍການພົວພັນຮ່ວມມື ກັບບັນດາປະເທດເພື່ອນບ້ານໃກ້ຄຽງໃນຂອບ 2 ຝ່າຍອະນຸພາກພື້ນ ຄື: ກຳປູເຈຍ-ລາວ-ຫວຽດນາມ (CLV), ກຳປູເຈຍ-ລາວ-ຫວຽດນາມ-ມຽນມາ (CLMV), ແອັກແມັກ ແລະ ຂອບການຮ່ວມມືລະຫວ່າງປະເທດແມ່ນ້ຳຂອງ ກັບຄູ່ຮ່ວມພັດທະນາຕ່າງໆ ກໍ່ຄື ໃນຂອບເຂດອາຊຽນ ເພື່ອສົ່ງເສີມການ ເຊື່ອມຈອດເສັ້ນທາງຄົມມະນາຄົມ ແລະ ເຊື່ອມໂຍງກັບເສດຖະກິດພາກພື້ນ. ເພື່ອເປັນການກະກຽມເປີດຂົວຢ່າງເປັນທາງການໃນວັນທີ່ 10 ເດືອນ ທັນວາ 2013 ຢູ່ດ່ານຂົວມິດຕະພາບທີ່ 4 ເມືອງຫ້ວຍຊາຍ, ແຂວງບໍ່ແກ້ວ ໄດ້ມີການຈັດພິທີມອບ-ຮັບອາຄານດ່ານຊາຍແດນ, ເສັ້ນທາງເຊື່ອມຕໍ່ ແລະ ເຄິ່ງໜຶ່ງຂອງຂົວມິດຕະພາບ 4 (ເບື້ອງລາວ) ຂອງຂວັນຈາກລັດຖະບານແຫ່ງ ສປ ຈີນ ທີ່ເປັນການຊ່ວຍເຫຼືອລ້າມອບໃຫ້ແກ່ລັດຖະບານແຫ່ງ ສປປ ລາວ. ໂດຍເປັນກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ປະທານຄະນະກຳມະ ທິການຮ່ວມມືລາວ-ຈີນ ແລະ ທ່ານ ກວນຮົວປິ່ງ. ຂົວແຫ່ງນີ້ ເປັນຂົວເຊື່ອມຕໍ່ລະຫວ່າງເມືອງຫ້ວຍຊາຍ, ແຂວງບໍ່ແກ້ວ, ສປປ ລາວ ກັບເມືອງຊຽງຂອງ, ແຂວງຊຽງຣາຍ, ຣາຊະອານາຈັກໄທ ໂດຍໄດ້ຮັບການຮ່ວມມື ຈາກລັດຖະບານແຫ່ງ ຣາຊະອານາຈັກໄທ ແລະ ຊ່ວຍເຫຼືອຈາກລັດຖະບານແຫ່ງ ສປ ຈີນ ຝ່າຍລະ 50% ໃນ ມູນຄ່າທັງໝົດ 48.106.982 ໂດລາສະຫະລັດອັນໄດ້ເປັນ ຂີດໝາຍສຳຄັນອັນເລິກ ເຊິ່ງສະແດງເຖິງຄວາມມຸ່ງໝາຍ ແລະ ຄວາມຈິງໃຈໃນການຮ່ວມມືຮອບດ້ານຂອງສອງລັດຖະບານ ເພື່ອເສີມສ້າງການຂະຫຍາຍຕົວທາງດ້ານເສດຖະກິດຂອງສອງປະເທດ ກໍ່ຄື ບັນດາປະເທດໃນອະນຸພາກພື້ນ ແມ່ນ້ຳຂອງ. ທັງໝົດນີ້, ກໍ່ເພື່ອຈັດຕັ້ງຜັນຂະຫຍາຍ ເນື້ອໃນບາງຕອນຂອງທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ກ່າວຢູ່ໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ່ 19 ບວກຄູ່ເຈລະຈາ 3 ປະເທດ ຄື: ສປ ຈີນ, ຍີ່ປຸ່ນ ແລະ ສ.ເກົາຫຼີ ທີ່ໄດ້ໄຂຂຶ້ນໃນວັນທີ່ 19 ທັນວາ 2013 ທີ່ ແຂວງຈຳປາສັກ, ສປປ ລາວ ທີ່ໄດ້ກ່າວວ່າ “ເພື່ອແນໃສ່ຫັນເອົາຈຸດພິເສດທາງດ້ານທີ່ຕັ້ງພູມສາດ ເປັນທ່າແຮງເຂົ້າໃນການພັດທະນາຂອງປະເທດ ໃຫ້ກາຍເປັນກາລະໂອກາດທີ່ເອື້ອອຳນວຍໃຫ້ແກ່ການພັດທະນາ ໂດຍລວມຂອງຕົນ ຕະຫຼອດໄລຍະທີ່ຜ່ານມາ ລັດຖະບານ ຈິ່ງໄດ້ກຳນົດທິດທາງຫັນ ສປປ ລາວ ເປັນປະເທດບໍລິການທາງຜ່ານຂອງອະນຸພາກພື້ນ ເຂົ້າໃນແຜນຍຸດທະສາດການພັດທະນາຂອງຕົນ ຮອດປີ 2020. ໃນນັ້ນ, ວຽກງານເຊື່ອມຈອດອາຊຽນ ເປັນວຽກບູລິມະສິດອັນດັບໜຶ່ງ ໃນຂະບວນວິວັດແຫ່ງການເຊື່ອມໂຍງ ຂອງ ສປປ ລາວ ກັບພາກພື້ນ ແລະ ສາກົນ” ແລະ ຍັງເປັນການຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ່ 6 (ສະໄໝທີ່ IX) ຂອງຄະນະບໍລິຫານງານສູນກາງພັກ ຄັ້ງວັນທີ່ 6-16 ພຶດສະພາ 2013 ທີ່ວ່າ “ສຸມໃສ່ປັບປຸງ ແລະ ກໍ່ສ້າງພື້ນຖານເສດຖະກິດໃຫ້ໜັກແໜ້ນ ໂດຍນຳໃຊ້ທ່າແຮງໄດ້ປຽບຂອງປະເທດ ເຮົາໃນການເຊື່ອມໂຍງກັບເສດຖະກິດອາຊຽນ. ພ້ອມທັງສືບຕໍ່ບຸກທະລຸວຽກງານການຕ່າງປະເທດ, ເປີດກວ້າງ ການຮ່ວມມືໂດຍຢຶດໝັ້ນແນວທາງການຕ່າງປະເທດທີ່ພັກວາງອອກ; ເຊີດຊູ ແລະ ເສີມຂະຫຍາຍບົດບາດອິທິພົນ ຂອງ ສປປ ລາວໃນ ພາກພື້ນ ແລະ ສາກົນ ເພື່ອເສີມຄວາມເຊື່ອໝັ້ນຕໍ່ຕ່າງປະເທດ ປະກອບສ່ວນສຳຄັນເຂົ້າໃນການຍາດແຍ່ງການຮ່ວມມື ແລະ ເປີດກວ້າງກັບເສດຖະກິດຕ່າງປະເທດ”.​


ແຫຼ່ງ: ວະລະສານ "ນັກບໍລິຫານ" ສະບັບທີ XIII ປະຈໍາເດືອນ ມັງກອນ 2014
ຂ່າວອື່ນໆ